Levitico 5 - Jiñi Tsiji' bʌ Wen T'añ cha'añ Estudio

¹ “Mi añ tsa' bʌ pʌjyi i su'b chuqui tsi' q'uele o chuqui tsi' yu'bi, pero mi ma'añic tsi' tsictesa mi' taj i mul ja'el, che' jiñi mi' cʌytʌl ti' wenta jiñi mulil.”

² “Che' ja'el, che' añ wiñic tsa' bʌ i tʌlʌ chuqui tac bi'bi', che' bajche' jiñi chʌmeñ bʌ alʌc'ʌl mach bʌ sʌquic, mi chʌmeñ bʌ bʌte'el, o mi chʌmeñ bʌ i chʌñil lum, anquese mach yujilic jiñi wiñic, pero bi'bi' mi' cʌytʌl yic'ot añʌch i mul.”

³ “Mi añ majqui tsi' tʌlbe i bi'bi'lel wiñicob mu' bʌ mejlel i bi'b-esan che' mach yujilic, pero mi ti wi'il tsi' ña'ta, añʌch i mul.”

⁴ “Mi añ mu' bʌ i payxo ac' i t'añ ti ora cha'añ añ chuqui mi caj i mel, mi uts'at o mi mach uts'atic, come che'ʌch ñʌmʌl i yʌc' i t'añ ti ora che' maxto añic tsi' wen ch'ʌmbe isujm, pero mi ti wi'il tsi' cha' wen ch'ʌmbe isujm, añʌch i mul cha'añ ti' caj jiñi xuc'ul bʌ i t'añ.”

⁵ “Mi' tsi' taja i mul cha'añ ili payxo t'añ tac, yom mi' tsictesan baqui bʌ i mul,

⁶ yic'ot yom mi yʌc' tic tojlel jump'ejl ofrenda cha'añ i ñusʌntel i mul tsa' bʌ i mele, yom juncojt xch'oc tʌñʌme' o xch'oc chivo. Che'ʌch mi caj i mel jiñi motomaj cha'añ mi' ñusʌbentel i mul jiñi wiñic.”

⁷ “Mi ma'añic mi' tajben i tojol cha'añ mi' mʌn jiñi tʌñʌme', che' jiñi mi caj i yʌq'ueñon cha'cojt xpurwoc o cha'cojt x'ujcuts cha'añ mi' ñusʌbentel i mul tsa' bʌ i mele, juncojt jiñʌch majtañʌl cha'añ i ñusʌntel mulil, jiñi yam bʌ jiñʌch majtañʌl mu' bʌ i pulel.

⁸ Mi caj i ch'ʌm majlel ba'añ motomaj cha'cojt te'lemut. Jiñi ñaxan bʌ te'lemut, mi caj i pulel, jiñʌch ac'bil bʌ cha'añ i tojol mulil; mi caj i tsepben i bic' pero ma'añic mi caj i junyajlel ts'ocben loq'uel i jol.

⁹ Ti wi'il mi caj i tsijcan jiñi junwejl i pulʌntib majtañʌl ti' ch'ich'el jiñi majtañʌl cha'añ bʌ i ñusʌntel mulil, i colojbal jiñi ch'ich' mi caj i bec' ti ye'bal jiñi pulʌntib. Jiñʌch tsʌnsʌbil bʌ majtañʌl cha'añ i ñusʌntel mulil.

¹⁰ Jiñi yam bʌ juncojt mi caj i pule' che' bajche' i tilel ti pejtelel ora. Che'ʌch mi caj i mel jiñi motomaj cha'añ mi' ñusʌbentel i mul jiñi wiñic tsa' bʌ i mele, che' jiñi mux i ñusʌbentel.”

¹¹ “Pero mi ma'añic mi' tajben i tojol cha'añ mi' mʌn cha'cojt xpurwoc o cha'cojt x'ujcuts, jiñi tsa' bʌ i cha'le mulil yom mi' ch'ʌm tilel cha'p'is juch'bil bʌ harina cha'añ i ñusʌntel i mul, pero mach yomic xajc'ubil yic'ot olivo aceite. Mach yomic mi' yʌq'ueñ pom, come jiñʌch majtañʌl cha'añ i ñusʌntel mulil.

¹² Ili majtañʌl mi caj i ch'ʌm majlel ba'añ jiñi motomaj. Jiñi motomaj mi caj i ch'ʌm junmujch' jiñi harina cha'añ c ña'tʌntel, mi caj i pul ya' ti' pam jiñi pulʌntib ba' mi' pulel c majtañ. Jiñʌch majtañʌl cha'añ i ñusʌntel mulil.

¹³ Jiñi motomaj mi caj i yʌc' majtañʌl cha'añ i tojol ti' chajp ti' chajp mulil, che' jiñi, jiñi xmulil mi' ñusʌbentel i mul. I colojbal jiñi majtañʌl i cha'añix jiñi motomaj che' bajche' mi' mejlel ti jiñi majtañʌl loq'uem bʌ ti trigo.”

Majtañʌl cha'añ i ñusʌntel mulil

¹⁴ Lac Yum tsi' pejca Moisés, tsi' yʌlʌ:

¹⁵ “Mi añ wiñic mu' bʌ i taj i sajtemal che' mach yʌxʌlic i yoj, mi' taj i mul cha'añ tsi' yʌsi chuqui tac ch'ujul cha'añon. Cha'añ tsi' taja i mul tic tojlel, mi caj i pʌy tilel juncojt i tat tʌñʌme' mach bʌ wis añic i c'am-ʌjel mi i lojwemal, lajal bʌ i tojol che' bajche' jiñi sʌsʌc taq'uiñ am bʌ ya' ti Ch'ujul bʌ Ajñibʌl. Jiñʌch ofrenda cha'añ mulil.

¹⁶ Jiñi wiñic mi caj i yʌq'ueñ i q'uexol jiñi ch'ujul tac bʌ tsa' bʌ i yʌsi, yic'ot mi caj i yʌc' i cha'yajlel i diezmojlel cha'añ mi' yʌq'ueñ jiñi motomaj. Ti wi'il jiñi motomaj mi caj i yʌc' ti ñusʌntel jiñi mulil che' bʌ mi yʌq'ueñon jiñi tʌñʌme'. Jiñʌch tsʌnsʌbil bʌ c majtañ cha'añ mulil, che' jiñi mi' taj i ñusʌntel i mul.”

¹⁷ “Che' bʌ añ juntiquil wiñic mu' bʌ i taj i mul o mu' bʌ i ñusan c mandar tic'bil bʌ c cha'añ, anquese mach tsajilic i cha'añ, añʌch i mul mi' cʌlel.

¹⁸ Jiñi cha'añ, mi caj i ch'ʌm majlel ba'añ motomaj juncojt i tat tʌñʌme' mach bʌ wis añic i c'am-ʌjel mi i lojwemal cha'añ i tojol i mul. Jiñi motomaj mi caj i yʌc' cha'añ i tojol i mul jiñi wiñic tsa' bʌ i mele che' mach tsajilic i cha'añ. Che' jiñi ñusʌbilix i mul.

¹⁹ Jiñʌch i tojol mulil, come ti isujm tsi' cha'le mulil tij contra.”