Levitico 4 - Jiñi Tsiji' bʌ Wen T'añ cha'añ Estudio

Jiñi majtañʌl tac cha'añ mulil

¹ Lac Yum tsi' pejca Moisés tsi' su'be:

² “Pejcan i yalobilob Israel, su'beñob: Che' añ majqui mi' cha'len mulil che' mach tsajilic i cha'añ ti' contra c mandar, che' mi' mel jiñi mach bʌ yomic melol tic'bil bʌ tic mandar.”

³ “Mi jiñi tsa' bʌ i cha'le mulil jiñʌch juntiquil motomaj mulbil bʌ ti olivo aceite, mi' tajob i mul ja'el pejtelel wiñicob ti' caj. Che' jiñi la' i yʌq'ueñon juncojt alʌ tat wacax mach bʌ wis añic i chʌmel mi i lojwel, cha'añ mic ñusʌben i mul.

⁴ Yom mi' pʌy tilel jiñi alʌ tat wacax ya' ti ti' jiñi Tabernáculo ba' mi la' tempan la' bʌ tic tojlel, mi caj i c'ʌcchocon i c'ʌb ya' ti' jol jiñi alʌ tat wacax, che' jiñi mi caj i tsʌnsan tic tojlel.

⁵ Ti wi'il jiñi motomaj mi caj i ch'ʌm tilel lamital i ch'ich'el jiñi alʌ tat wacax ya' ti' mal jiñi Tabernáculo ba' mi la' tempan la' bʌ.

⁶ Jiñi motomaj mi caj i ts'aj i yal i c'ʌb ya' ti ch'ich' cha'añ mi' tsijcan wucyajl tic tojlel ya' ti' tojel jiñi joc'ol bʌ pisil ya' ti Ch'ujul bʌ Ajñibʌl.

⁷ Jiñi motomaj mi caj i c'ʌn lamital jiñi ch'ich' cha'añ mi' bomben i xulub tac pulʌntib ba' mi' pulel pom ya' bʌ añ ya' ti Tabernáculo ba' mi la' tempan la' bʌ tic tojlel. I colojbal jiñi ch'ich' la' i bec' ya' ti' ye'bal jiñi pulʌntib ya' ti ti' jiñi Tabernáculo ba' mi la' tempan la' bʌ.

⁸ Che' jiñi mi caj i ch'ʌm pejtelel i lewil pʌc'ʌl bʌ ya' ti' soyta' jiñi alʌ tat wacax tsa' bʌ tsʌnsʌnti cha'añ i ñusʌntel mulil,

⁹ yic'ot ti' cha'p'ejlel i cuchi'tun yic'ot i lewil añ tac bʌ ti jol i ya'; yic'ot i lewil pʌc'ʌl bʌ ti yolmal yom mi' loc'sʌntel temel yic'ot i cuchi'tun,

¹⁰ che' bajche' tsa' loc'sʌbenti i lewil yic'ot i cuchi'tun jiñi wacax tsa' bʌ tsʌnsʌnti cha'añ i ñʌch'tʌlel la' pusic'al, jiñi motomaj mi caj i pul ya' ti' pam jiñi pulʌntib.

¹¹ Pero i pʌchʌlel jiñi alʌ tat wacax, yic'ot pejtelel i bʌc'tal, yic'ot i jol, yic'ot i ya' yic'ot i soyta', yic'ot i ta',

¹² yic'ot ti' cotol jiñi alʌ tat wacax, yom mi' ch'ʌm majlel ya' ti' pat jiñi tejclum ba' jochol jiñi lum, ba' mi' chojquel jiñi tañ, yic'ot ba' mi' mejlel i pul ti c'ajc yic'ot si'. Ya' mi caj i pulel ba' mi' chojquel jiñi tañ.”

¹³ “Mi ti' pejtelel jiñi israelob tsi' cha'leyob mulil che' mach tsajilobic i cha'añ, anquese mucul tsa' cʌle jiñi mulil ti' wut jiñi tejclum, pero añobʌch i mul mi' tsi' ñusayob jump'ejl c mandar che' mi' melob jiñi mach bʌ yomic mi' melol.

¹⁴ Che' bʌ tsa'ix i ña'tayob i mul tsa' bʌ i meleyob, yom mi' yʌc'ob jujuncojt alʌ tat wacax cha'añ i ñusʌntel i mul. La' i pʌyob tilel ya' ti ti' jiñi Tabernáculo ba' mi la' tempan la' bʌ.

¹⁵ Jiñi xñoxob ya' ti tejclum mi caj i c'ʌcchocoñob i c'ʌb ya' ti' jol jiñi alʌ tat wacax, che' jiñi mi' tsʌnsañob ya' tic tojlel.

¹⁶ Ti wi'il jiñi motomaj mulbil bʌ ti olivo aceite mi caj i ch'ʌm ochel lamital i ch'ich'el jiñi alʌ tat wacax ti' mal jiñi Tabernáculo ba' mi la' tempan la' bʌ,

¹⁷ jiñi motomaj mi caj i ts'aj i c'ʌb ti' ch'ich'el jiñi alʌ tat wacax, mi caj i tsijcan wʌcyajl ya' ti' tojel ba'añ jiñi joc'ol bʌ pisil.

¹⁸ Yom mi' ch'ʌm ja'el jiñi ch'ich' cha'añ mi' bon i xulub tac jiñi pulʌntib am bʌ tic tojel ya' ti Tabernáculo ba' mi la' tempan la' bʌ, pero i colojbal jiñi ch'ich' la' i bec' ya' ti' ye'bal jiñi pulʌntib ya' ti ti' jiñi Tabernáculo ba' mi la' tempa la' bʌ.

¹⁹ Yom mi' loc'sʌben pejtelel i lewil cha'añ mi' pul ya' ti pam jiñi pulʌntib,

²⁰ che'ʌch mi caj i mel ja'el yic'ot jiñi alʌ tat wacax che' bajche' tsi' mele yic'ot jiñi majtañʌl cha'añ i ñusʌntel mulil. Che'ʌch mi caj i mel jiñi motomaj cha'añ mi' ñusʌbentelob i mul ti' pejtelelob.

²¹ Jiñi motomaj mi caj i ch'ʌm majlel jiñi alʌ tat wacax ya' ti' pat jiñi tejclum cha'añ mi' pul che' bajche' tsi' pulu jiñi ñaxan bʌ alʌ tat wacax. Jiñʌch tsʌnsʌbil bʌ majtañʌl cha'añ i ñusʌntel i mul pejtelel israelob.”

²² “Mi tsi' taja i mul juntiquil yumʌl che' mach tsajilic i cha'añ, mi tsi' ñusa c mandar, che' mi' mel jiñi mach bʌ yomic melol, añʌch i mul.

²³ Mi tsa' su'benti cha'añ tsi' taja i mul, che' jiñi la' tilic ti ora cha'añ mi' yʌq'ueñon juncojt i tat chivo mach bʌ wis añic i c'am-ʌjel mi i lojwemal.

²⁴ Mi caj i c'ʌcchocon i c'ʌb ti' jol jiñi chivo, che' jiñi mi caj i tsʌnsan ya' baqui mi' tsʌnsʌntel jiñi pulbil tac bʌ majtañʌl ya' tic tojel. Jiñʌch majtañʌl cha'añ i ñusʌntel mulil.

²⁵ Jiñi motomaj mi caj i ts'aj i yal i c'ʌb ya' ti' ch'ich'el jiñi tat chivo cha'añ bʌ i ñusʌntel mulil, mi caj i bomben i xulub jiñi pulʌntib ba' mi' pulel jiñi majtañʌl yic'ot ya'i mi caj i bec' i colojbal jiñi ch'ich' ya' ti' ye'bal jiñi pulʌntib.

²⁶ Pejtelel i lewil tac mi' laj pulel ya' ti jiñi pulʌntib, che' bajche' mi' pulel i lewil tac majtañʌl cha'añ i ñʌch'tʌlel la' pusic'al. Che'ʌch mi caj i yʌc' majtañʌl jiñi motomaj cha'añ i tojol i mul jiñi yumʌl, che' jiñi mi caj i ñusʌbentel i mul.”

²⁷ “Mi añ juntiquil wiñic ti jiñi tejclum mu' bʌ i cha'len mulil che' mi' ñusʌbeñon c mandar che' mach tsajilic i cha'añ, añʌch i mul.

²⁸ Ti wi'il mi' tsa' su'benti cha'añ tsi' cha'le mulil, la' i pʌy tilel juncojt tat chivo che' bajche' ofrenda mach bʌ wis añic i c'am-ʌjel mi i lojwemal, cha'añ i tojol i mul tsa' bʌ i mele.

²⁹ Yom mi' c'ʌcchocon i c'ʌb ya' ti' jol jiñi alʌc'ʌl jiñʌch jiñi ofrenda cha'añ i ñusʌntel mulil. Che' jiñi mi caj i tsʌnsan ya' ti ajñibʌl ba' mi' tsʌnsʌntel jiñi alʌc'ʌl ba'añ jiñi pulʌntib.

³⁰ Ti wi'il jiñi motomaj mi caj i ts'aj i yal i c'ʌb ya' ti' ch'ich', mi caj i bon ya' ti' xulub tac jiñi pulʌntib ba' mi' pulel majtañʌl, yic'ot ya'i mi caj i bec' i colojbal jiñi ch'ich' ya' ti' ye'bal jiñi pulʌntib.

³¹ Che' ja'el yom mi' loc'sʌbentel i lewil, che' bajche' tsa' loc'sʌnti i lewil jiñi majtañʌl cha'añ i ñʌch'tʌlel la' pusic'al. Añ ti' wenta jiñi motomaj cha'añ mi' pul ya' ti pam jiñi pulʌntib che' bajche' xojocña bʌ i yujts'il majtañʌl cha'añon. Che'ʌch yom mi' mel jiñi motomaj cha'añ mic ñusʌben i mul jiñi wiñic.”

³² “Mi tsi' pʌyʌ tilel juncojt tʌñʌme' cha'añ i ñusʌntel i mul, yom juncojt i ña'al bʌ tʌñʌme' mach bʌ wis añic i c'am-ʌjel mi i lojwemal.

³³ Mi caj i c'ʌcchocon i c'ʌb ya' ti' jol jiñi tʌñʌme' cha'añ i ñusʌntel mulil, che' jiñi mi caj i tsʌnsan jiñi tʌñʌme' cha'añ i mul ya' ba'añ jiñi pulʌntib.

³⁴ Ti wi'il jiñi motomaj mi caj i ch'ʌm ti yal i c'ʌb ts'ita' i ch'ich'el jiñi majtañʌl cha'añ i ñusʌntel mulil, cha'añ mi' bomben i xulub tac jiñi pulʌntib ba' mi' pulel jiñi majtañʌl tac yic'ot ya'i mi caj i bec' i colojbal jiñi ch'ich' ya' ti ye'bal jiñi pulʌntib.

³⁵ Mi caj i loc'sʌben pejtelel i lewil jiñi majtañʌl che' bajche' tsa' loc'sʌbenti i lewil jiñi majtañʌl cha'añ i ñʌch'tʌlel la' pusic'al. Añ ti' wenta jiñi motomaj cha'añ mi' pul ya' ti pulʌntib che' bajche' yan tac bʌ pulbil bʌ c majtañ. Che'ʌch mi caj i mel jiñi motomaj, cha'añ i ñusʌntel mulil, che' jiñi mi caj i ñusʌbentel i mul jiñi wiñic.”