Levitico 27 - Jiñi Tsiji' bʌ Wen T'añ cha'añ Estudio

6. ISUJMLEL CHA'AÑ JIÑI SɅC-ESɅBIL BɅ CHA'AÑ DIOS ( 27.1-34 ) Jiñi sʌc-esʌbil tac bʌ cha'añ Dios

¹ Lac Yum tsi' pejca Moisés, tsi' su'be:

² “Yom ma' su'beñob jiñi israelob: Che' añ majqui mi' ña'tan i yʌq'ueñon xuc'ul bʌ i t'añ cha'añ mi yʌq'ueñon i bʌ, yom mi' toj che' bajche' iliyi:

³ Jiñi wiñic am bʌ junc'al i ja'bilel c'ʌlʌl ti uxc'al, yom mi' yʌc' lujump'ejl i yuxc'al sʌsʌc taq'uiñ, che' bajche' añ i tojol ti jiñi ch'ujul bʌ ajñibʌl.

⁴ Mi jiñʌch x'ixic yom mi' yʌc' lujump'ejl i cha'c'al sʌsʌc taq'uiñ.

⁵ Mi jiñʌch ch'itoñ am bʌ jo'p'ejl i ja'bilel c'ʌlʌl ti junc'al, yom mi' yʌc' junc'al sʌsʌc taq'uiñ; mi xch'oc, la' i yʌc' lujump'ejl sʌsʌc taq'uiñ.

⁶ Jiñi ch'itoñ am bʌ jump'ejl uw c'ʌlʌl ti jo'p'ejl ja'b, yom mi yʌc' jo'p'ejl sʌsʌc taq'uiñ; mi xch'oc, la' i yʌc' uxp'ejl sʌsʌc taq'uiñ.

⁷ Pero jiñi wiñic añix bʌ uxc'al i ja'bilel o mi ñumeñix, la' i yʌc' jo'lujump'ejl sʌsʌc taq'uiñ; mi x'ixic, la' i yʌc' lujump'ejl sʌsʌc taq'uiñ.

⁸ Pero mi c'ax p'ump'un cha'añ mi' toj, che' jiñi yom mi' pʌjyel majlel ba'añ jiñi motomaj cha'añ mi' ña'tan bajche' c'amel mi' mejlel i yʌc'; che'ʌch bajche' mi' mejlel i taj jiñi tsa' bʌ i yʌc'ʌ xuc'ul bʌ i t'añ mi caj i yʌq'ueñ i toj jiñi motomaj.”

⁹ “Che' ja'el mi añ majqui tsi' yʌc'ʌ i t'añ cha'añ mi' yʌq'ueñon alʌc'ʌl mu' bʌ mejlel c ch'ʌm; pejtelel alʌc'ʌl mu' bʌ cʌq'uentel ch'ujulʌch.

¹⁰ Mach mejlic ti q'uextʌl jiñi alʌc'ʌl. Mach mejlic ti q'uextʌl jiñi uts'at bʌ yic'ot jiñi mach bʌ uts'atic, mi jiñic mach bʌ uts'atic yic'ot jiñi uts'at bʌ; mi tsa' q'uexle juncojt alʌc'ʌl yic'ot yam bʌ alʌc'ʌl, che' jiñi ch'ujulʌch ti' cha'cojtlel.”

¹¹ “Mi mach sʌquic jiñi alʌc'ʌl mach bʌ mejlic cʌq'uentel cha'añ c majtañ, jiñi alʌc'ʌl yom mi' pʌjyel majlel ba'añ jiñi motomaj cha'añ mi' q'uel bajche' yilal,

¹² añ ti' wenta jiñi motomaj cha'añ mi' ña'tan bajche' yom i tojol, mi wen o mi mach weñic; che'ʌch mi yujtel che' bajche' mi yʌl jiñi motomaj.

¹³ Mi yom i cha' ch'ʌm i yʌlac' jiñi wiñic, la' i toj che' bajche' añ i tojol jiñi alʌc'ʌl yic'ot i cha'yajlel i diezmojlel.”

¹⁴ “Che' añ majqui mi' yʌq'ueñon i yotot tic wenta, cha'añ mi' sʌc-esan tic tojlel, jiñi motomaj mi' majlel i q'uel bajche' yilal jiñi otot mi wen o mi mach weñic; che' bajche' i tojol mi' ña'tan jiñi motomaj che'ʌch mi' cʌytʌl.

¹⁵ Pero jiñi tsa' bʌ i yʌc'ʌ i yotot yom i cha' ch'ʌm, che' jiñi yom mi' toj jiñi otot che' bajche' tsi' ña'ta jiñi motomaj yic'ot i cha'yajlel i diezmojlel, che' jiñi i cha'añʌch mi' cʌytʌl jiñi otot.”

¹⁶ “Che' añ majqui mi yʌq'ueñon lamital i lum, mi' mejlel i yʌq'ueñon i tojol, che' bajche' c'amel mi' cha'len pac': Mi yom loq'uel jumbajc' kilo ti pʌc'ol jiñi cebada, yom mi' toj lujump'ejl i yuxc'al sʌsʌc taq'uiñ.

¹⁷ Mi tsi' yʌq'ueyon i lum che' ti' ja'bilel la' tijicñʌyel, che' bajche' tsi' ñaxan ña'tʌbe i tojol jiñi motomaj, che'ʌch mi' cʌytʌl.

¹⁸ Pero mi ñumeñix i ja'bilel la' tijicñʌyel tsi' yʌq'ueyon i lum, che' jiñi, jiñi motomaj mi caj i tsic jayp'ejl i tojol mi' loq'uel che' bajche' jayp'ejl to ja'b yom i ja'bilel la' tijicñʌyel, mi caj i ju'sʌben majlel i tojol ti jujump'ejl ja'b.”

¹⁹ “Mi yom i cha' ch'ʌm i lum jiñi wiñic, yom mi' yʌc' i tojol jiñi lum che' bajche' tsi' ña'ta jiñi motomaj yic'ot i cha'yajlel i diezmojlel, che' jiñi cha' i cha'añix mi' majlel.

²⁰ Pero mi ma'añic tsi' chʌn ch'ʌmʌ i lum, mi tsa' chojñi jiñi lum ti' tojlel yam bʌ wiñic, che' jiñi mach mejlix i cha' mʌn,

²¹ c'ʌlʌl jinto che' ti' ja'bilel la' tijicñʌyel libre mi' cʌytʌl, jiñi lum ch'ujul cha'añon, che' bajche' jump'ejl lum sʌc-esʌbilix bʌ, i cha'añix jiñi motomaj mi' majlel.”

²² “Mi añ mu' bʌ i ña'tan i yʌq'ueñon i lum mʌmbil bʌ i cha'añ, mach bʌ ochemic cha'añ mi' ch'ʌm ti wi'il i cʌñʌyo' bʌ,

²³ che' jiñi, jiñi motomaj mi caj i ña'tan jayp'ejl i tojol c'ʌlʌl jinto ti' ja'bilel la' tijicñʌyel, ti jim bʌ q'uiñ mi caj i yʌq'ueñ i tojol che' bajche' mi' yʌl jiñi motomaj, jiñʌch ch'ujul bʌ majtañʌl cha'añon.

²⁴ Che' ti' ja'bilel la' tijicñʌyel, mi caj i cha' aq'uentel i lum jiñi ñaxan bʌ i yum.”

²⁵ “Ti pejtelel chuqui tac ma' ña'tʌben i tojol, uts'at mi' tojtʌl ti taq'uiñ lajal bʌ che' bajche' jiñi am bʌ ti ch'ujul bʌ ajñibʌl. Jiñi taq'uiñ am bʌ ti ch'ujul bʌ ajñibʌl lajalʌch bajche' i tojol yoma chʌmp'ejl q'uiñ e'tel.”

²⁶ “Pero jiñi ñaxan tac bʌ i yal la' wʌlac', c cha'añʌch, mach mejlic la' wʌq'ueñon come c cha'añʌch; mi' tat wacax o mi tʌñʌme' c cha'añʌch.

²⁷ Pero jiñi mach bʌ sʌquic bʌ alʌc'ʌl, mi' mejlel la' wʌq'ueñon taq'uiñ cha'añ i wentajlel jiñi la' wʌlac' che' bajche' mi' ña'tan jiñi motomaj, yom mi la' wʌc' yic'ot i cha'yajlel i diezmojlel; mi mach la' womic la' cha' ch'ʌm, mux i chojñel.”

²⁸ “Pero mach mejlic ti chojñel mi muq'uic i mejlel ti mʌjñel pejtelel jiñi tsa' bʌ la' wʌq'ueyon; pejtelel añix bʌ tic wenta, mi wiñicob, mi alʌc'ʌl tac, mi lum tac, c'ax ch'ujulʌch cha'añon.

²⁹ Pejtelel wiñicob x'ixicob chocbilix bʌ tic tojlel mach mejlix ti chʌn mʌjñel; wersa mi caj i chʌmel.”

³⁰ “Jiñi i diezmojlel la' lum yic'ot loq'uem tac bʌ ti la' lum, yic'ot i wut la' pʌc'ʌb c cha'añʌch, yomʌch mi cʌq'uentel.

³¹ Mi añ yom bʌ i cha' mʌn jiñi diezmo, ts'ʌcʌl yom mi' yʌc' i tojol yic'ot i cha'yajlel i diezmojlel.”

³² “Pejtelel i diezmojlel wacax, o tʌñʌme', yic'ot pejtelel jiñi mu' bʌ i tsijquel tac, c cha'añʌch.

³³ Mach yomic mi la' ñaxan q'uel mi uts'at o mi mach uts'atic, mi muq'uic i mejlel ti q'uextʌl; mi tsa' la' q'uexe, che' jiñi yom mi la' wʌq'ueñon ti' cha'cojtlel come ch'ujulʌch: Mach mejlic ti mʌjñel.”

³⁴ Iliyi jiñʌch mandar tac tsa' bʌ i yʌc'ʌ lac Yum ti' tojlel Moisés ya' ti wits i c'aba' Sinaí cha'añ israelob.