Levitico 24 - Jiñi Tsiji' bʌ Wen T'añ cha'añ Estudio

Jiñi c'ajc am bʌ ti Tabernáculo

¹ Lac Yum tsi' pejca Moisés, tsi' yʌlʌ:

² “Xic'beñob pejtelel jiñi israelob cha'añ mi' ch'ʌmbeñetob tilel jiñi olivo aceite loc'sʌbil bʌ ti olivo te', cha'añ ma' c'ʌn a ts'ʌ'b c'ajc ti pejtelel ora.

³ Jiñi pisil mu' bʌ i yʌc'on ti cʌjñel ya' ti Tabernáculo ba' mi la' tempan la' bʌ mi caj i ch'ʌm ti' wenta Aarón tic tojlel ti ic'ajel c'ʌlʌl ti sʌc'ajel. Jiñʌch c mandar cha'añetla yic'ot la' p'olbal ti' lajm ti' lajm.

⁴ Ya' ti yajñib melbil bʌ ti oro yom mi yajñel jiñi lámpara tac ts'ʌ'bil bʌ tic tojlel ti pejtelel ora.”

Waj mu' bʌ i yʌjq'uel ti jujump'ejl q'uiñ

⁵ “Mi caj a ch'ʌm harina cha'añ ma' mel lajchʌnq'uejl waj; ti jujunq'uejl jiñi waj yom chʌmp'ejl kilo yic'ot ojlil.

⁶ Yom cha'tsolom ma' wʌc', ti jujuntsolom mi caj a wʌc' wʌcq'uejl waj tic tojlel, ya' ti mesa melbil bʌ ti oro.

⁷ Ya' ti jujuntsolom mi caj a wʌc' pom, cha'añ xojocña jiñi waj che' bajche' pulbil bʌ c majtañ.

⁸ Ti jujump'ejl i q'uiñilel c'aj-o yom ma' tsol tic tojlel jiñi c majtañ mu' bʌ i yʌq'ueñoñob israelob che' bajche' xuc'ul bʌ c t'añ ti pejtelel ora.

⁹ Añobʌch ti' wenta Aarón yic'ot i yalobilob cha'añ mi' c'uxob jiñi waj ya' ti Ch'ujul bʌ Ajñibʌl, come jiñʌch c'ax ch'ujul bʌ c majtañ yom bʌ mi' chʌn aq'uentelob ti pejtelel ora.”

I tojol i mul xp'ajoñel

¹⁰ Ti jim bʌ ora juntiquil i yalobil x'ixic Israel bʌ, pero ch'oyol i tat ti Egipto, tsa' loq'ui ti' tojlel israelob. I yalobil jiñi x'ixic Israel bʌ, tsa' caji ti leto yic'ot yam bʌ juntiquil wiñic Israel bʌ,

¹¹ pero i yalobil jiñi x'ixic loq'uem bʌ ti Israel, tsi' p'ajbe i C'aba' lac Yum. I c'aba' i ña' jiñʌch Selomit, i yalobil Dibri loq'uem bʌ ti' p'olbal Dan; tsi' pʌyʌyob majlel ba'añ Moisés jiñi wiñic tsa' bʌ i cha'le p'ajoñel.

¹² Che' jiñi tsi' yotsayob ti mʌjquibʌl jinto tsi' yu'biyob chuqui mi' yʌl lac Yum.

¹³ Lac Yum tsi' pejca Moisés, tsi' su'be:

¹⁴ “Jiñi wiñic tsa' bʌ i cha'le p'ajoñel pʌyʌla majlel ti junwejl i ti' tejclum, pejtelel jiñi tsa' bʌ i yu'biyob che' bʌ tsi' cha'le p'ajoñel, la' i yʌc'ob i c'ʌb ti' jol jiñi wiñic, ti wi'il la i julob ti' xajlel pejtelel israelob.

¹⁵ Che' jiñi mi caj a su'beñob pejtelel israelob: Majqui jach mi' p'aj j c'aba', wersa mi' tsʌnsʌntel cha'añ i tojol i mul.

¹⁶ Jiñi mu' bʌ i p'aj j C'aba', la' chʌmic; pejtelel israelob mi caj i julob ti xajlel, mi Israel, o mi mach israelic, mi tsi' p'aja j C'aba', la' chʌmic.”

¹⁷ “Che' ja'el jiñi wiñic mu' bʌ i tsʌnsan majqui jach bʌ wiñic, mi caj i tsʌnsʌntel.”

¹⁸ “Jiñi mu' bʌ i tsʌnsan alʌc'ʌl, mi caj i q'uextan yic'ot yam bʌ alʌc'ʌl.”

¹⁹ “Jiñi mu' bʌ i low i pi'ʌl, che'ʌch mi caj i melbentel ja'el che' bajche' iliyi:

²⁰ xujlel i q'uexol xujlel, wutʌl i q'uexol wutʌl, i bʌquel ejʌl i q'uexol i bʌquel ejʌl, che' bajche' mi' low yam bʌ, che'ʌch mi caj i melbentel ja'el.”

²¹ “Majqui jach mi' tsʌnsʌben i yʌlac' i pi'ʌl, wersa mi caj i q'uextan; jiñi mu' bʌ i tsʌnsan juntiquil wiñic, mi caj i chʌmel ja'el.”

²² “Che'ʌch mi caj la' mel ti' tojlel jiñi ñajt bʌ ch'oyolob, yic'ot ti' tojlel la' pi'ʌlob wʌ' bʌ añob i lumal, come Joñoñʌch, la' Yumon, la' Dioson.”

²³ Che'ʌch tsi' pejca Moisés i yalobilob jiñi Israel, cha'añ mi' loc'sañob ya' ti' lumal jiñi tsa' bʌ i cha'le p'ajoñel, tsi' juluyob ti xajlel. Jiñi israelob tsi' meleyob che' bajche' tsi' yʌlʌ lac Yum ti' tojlel Moisés.