Levitico 23 - Jiñi Tsiji' bʌ Wen T'añ cha'añ Estudio

Jiñi ñuc bʌ q'uiñijel tac

¹ Lac Yum tsi' pejca Moisés, tsi' su'be:

² “Pejcan i yalobilob Israel, su'beñob: Che' mi la' cha'len ñuc bʌ q'uiñijel tac ti' tojlel lac Yum, yom ch'ujul mi la' q'uel jiñi q'uiñ tac che' mi la' tempan la' bʌ, jiñʌch iliyi:”

³ “Wʌcp'ejl q'uiñ yom mi la' cha'len e'tel, ti' wucp'ejlel q'uiñ yom mi la' c'aj la' wo, come ch'ujulʌch jiñi q'uiñ; mach yomic mi la' mel mi junchajpic la' we'tel, come i q'uiñilelʌch c'aj-o tic tojlel baqui jach chumuletla”.

⁴ “Jiñʌch jiñi ñuc tac bʌ q'uiñijel mu' bʌ caj la' mel tic tojlel, ch'ujulʌch jiñi q'uiñ, che' mi la' tempan bʌ che' bajche' añ i yorajlel tac:”

⁵ “Mi' tejchel ili q'uiñijel cha'añ Pascua che' ti ic'ajel che' ti' chʌnlujump'ejlel tsic ti jiñi ñaxan uw, jiñʌch Pascua cha'añ lac Yum.”

⁶ “Che' ti' jo'lujump'ejlel q'uiñ ti jiñi ñaxan bʌ uw jiñʌch i q'uiñilel waj mach bʌ añic i levadurajlel cha'añ mi' q'uejlel ti ñuc lac Yum; wucp'ejl q'uiñ yom mi la' c'ux jiñi waj mach bʌ añic i levadurajlel.

⁷ Yom ch'ujul mi' la' q'uel jiñi ñaxan bʌ q'uiñ; mach yomic mi' la' wʌc' ti e'tel jiñi x'e'telob la' cha'añ.

⁸ Wucp'ejl q'uiñ yom mi la' wʌq'ueñon pulbil bʌ c majtañ. Ch'ujul yom mi la' q'uel i wucp'ejlel q'uiñ yic'ot mach yomic mi' la' wʌc' ti e'tel la' wiñic.”

⁹ Lac Yum tsi' pejca Moisés, tsi' su'be:

¹⁰ “Pejcan i yalobilob Israel, su'beñob: Che' mi la' wochel ya' baqui mi caj cʌq'ueñetla la' lum, che' mi cajel la' tuc'ben i wut la' pʌc'ʌb, mi caj la' ch'ʌmben tilel motomaj jiñi ñaxan bʌ i wut la' pʌc'ʌb.

¹¹ Jiñi motomaj mi caj i jʌmts'un tic tojlel, cha'añ che' jiñi mic ch'ʌm tic wenta. Che' ti yorajlel c'aj-o mi caj i jʌmts'un.

¹² Ti jiñi jach bʌ q'uiñ che' mi la' wʌq'ueñon jiñi majtañʌl, mi caj la' tsʌnsan juncojt tat tʌñʌme' am bʌ jump'ejl i ja'bilel mach bʌ wis añic i c'am-ʌjel mi i lojwemal, jiñʌch pulbil bʌ c majtañ.

¹³ Yom mi la' wʌq'ueñon yic'ot i ñujp cha'p'is harina wen chʌmeñ bʌ juch'bil xajc'ubil bʌ yic'ot olivo aceite, jiñʌch jiñi majtañʌl mu' bʌ c pulbentel, wen xojocña bʌ i yujts'il; yic'ot yom jump'ejl litro vino cha'añ mi' mujlel jiñi majtañʌl.

¹⁴ Mach yomic mi la' wis c'ux waj, mi tiq'uesʌbil bʌ trigo, mi jiñic c'ʌñix bʌ i wut trigo, jinto mi yujtel la' wʌq'uen i majtañ Dios. Che'ʌch mi caj la' mel jatetla yic'ot la' walobilob ti' lajm ti' lajm, baqui jach mi la' majlel ti chumtʌl.”

¹⁵ “Mi caj la' tsic wucp'ejl semana ti ts'ʌcʌl, mi' tejchel la' tsic che' mi' ñumel i q'uiñilel c'aj-o, che' bʌ tsa' la' wʌc'ʌ jiñi jʌmts'ubil bʌ majtañʌl.

¹⁶ Che' mi' ts'ʌctiyel jiñi wucp'ejl i q'uiñilel c'aj-o, mi caj la' tsic lujump'ejl i yuxc'al q'uiñ (50); che' jiñi yom mi la' ch'ʌmbeñon tilel tsiji' bʌ i wut trigo.

¹⁷ Ch'ʌmbeñon tilel cha'q'uejl waj melbil bʌ ti la' wotot che' bajche' jʌmts'ubil bʌ majtañʌl tic tojlel, melbil bʌ ti chʌmp'ejl kilo harina tiq'uesʌbil bʌ yic'ot levadura loq'uem bʌ ti ñaxan bʌ i wut la' trigo.

¹⁸ Temel yic'ot jiñi waj mi caj la' wʌc' wuccojt tat tʌñʌme' am bʌ jump'ejl i ja'bilel, mach bʌ añic i c'am-ʌjel, yic'ot juncojt tat wacax, yic'ot cha'cojt tat tʌñʌme', cha'añ pulbil bʌ c majtañ; che' ja'el c majtañ melbil bʌ ti harina, yic'ot japbil bʌ c majtañ, mu' bʌ i pulel xojocña bʌ i yujts'il mi cu'bin.”

¹⁹ “Yom ma' tsʌnsʌbeñon juncojt i tat chivo cha'añ i tojol la' mul yic'ot cha'cojt tat tʌñʌme' am bʌ jujump'ejl i ja'bilel cha'añ i ñʌch'tʌlel la' pusic'al.

²⁰ Añ ti' wenta jiñi motomaj cha'añ mi yʌc' jiñi majtañʌl jʌmts'ubil bʌ tic tojlel, yic'ot jiñi waj melbil bʌ ti ñaxan bʌ i wut la' pʌc'ʌb yic'ot jiñi cha'cojt tʌñʌme'; jiñʌch ch'ujul bʌ c majtañ mu' bʌ i yʌq'uentel jiñi motomaj.”

²¹ “Ti jiñi jach bʌ ili q'uiñ mi caj la' pʌy tilel wiñicob x'ixicob cha'añ mi' tempañob i bʌ tic tojlel come ch'ujulʌch jiñi q'uiñ; mach yomic mi' cha'len mi junchajpic e'tel la' wiñicob ti ili q'uiñ. Yom chʌn c'ajal la' cha'añ ili mandar ti pejtelel ora, baqui jach mi la' majlel ti chumtʌl, yic'ot la' p'olbal ti' lajm ti' lajm.”

²² “Che' mi la' cha'len c'ajbal ti' la' chol, mach yomic mi la' laj c'aj c'ʌlʌl ti' ti' ti'il jiñi la' chol, mi yomic mi la' laj tuc' jiñi la' trigo; mi caj la' cʌybeñob jiñi p'ump'uño' bʌ yic'ot jiñi ñajt bʌ ch'oyolob. Joñon, la' Yumon, la' Dioson.”

²³ Lac Yum tsi' pejca Moisés, tsi' yʌlʌ:

²⁴ “Pejcan i yalobilob Israel, su'beñob: Che' ti ñaxan bʌ q'uiñ che' ti' wucp'ejlel uw mi caj la' c'aj la' woj, jiñʌch i yorajlel cha'añ mi la' ña'tañon che' mi' wustʌl trompeta yic'ot mi caj la' tempan la' bʌ cha'añ mi la' ch'ujutesañon.

²⁵ Mach yomic mi la' mel mi junchajpic e'tel yic'ot mi caj la' wʌq'ueñon pulbil bʌ c majtañ.”

²⁶ Lac Yum tsi' pejca Moisés, tsi' su'be:

²⁷ “Che' ti' lujump'ejlel q'uiñ ti' wucp'ejlel uw jiñʌch i q'uiñilel i ñusʌntel mulil, mi caj la' tempan la' bʌ tic tojlel, mi caj la' mel la pusic'al cha'añ la' mul yic'ot mi caj la' ch'ʌmbeñon tilel c majtañ cha'añ mi la' pulbeñon.

²⁸ Mi junchajpic e'tel yom mi' la' mel ti ili q'uiñ, come jiñʌch i q'uiñilel che' mic ñusʌbeñetla la' mul, cha'añ mi la' taj la' tijicñʌyel tic tojlel.

²⁹ Pejtelel jiñi mach bʌ añic mi' cha'len ch'ajb ti ili q'uiñ, la' chojquic loq'uel ti' tojlel i pi'ʌlob.

³⁰ Majqui jach mi' cha'len e'tel ti ili q'uiñ, mi caj cʌc' ti tsʌnsʌntel ti' tojlel i pi'ʌlob.”

³¹ “Che' jiñi mach yomic mi la' wis cha'len e'tel. Jiñʌch c mandar yom bʌ mi caj la' chʌn ña'tan yic'ot la' p'olbal ti' lajm ti' lajm baqui jach mi la' majlel ti chumtʌl.

³² Come i q'uiñilelʌch c'aj-o cha'añetla, cha'añ mi la' cha'len ch'ajb, mi caj la' tech che' ti' bolomp'ejlel q'uiñ ti jiñi jach bʌ uw che' ti ic'ajel c'ʌlʌl mi' cha' ic'an che' ti yijc'ʌlal, che'ʌch mi caj la' c'aj la' woj.”

³³ Lac Yum tsi' pejca Moisés, tsi' su'be:

³⁴ “Su'beñob i yalobilob Israel: Che' ti' jo'lujump'ejlel q'uiñ ti' wucp'ejlel uw, mi caj la' mel wucp'ejl q'uiñ i q'uiñilel lejchempat tac cha'añ c ñuq'uesʌntel.

³⁵ Che' ti ñaxan bʌ q'uiñ yom mi la' tempan la' bʌ come jiñʌch ch'ujul bʌ q'uiñijel cha'añetla; mach yomic mi la' mel mi junchajpic e'tel.

³⁶ Wucp'ejl q'uiñ mi caj la' wʌq'ueñon pulbil bʌ c majtañ. Ti' waxʌcp'ejlel q'uiñ mi caj la' mel ch'ujul bʌ q'uiñijel yic'ot mi caj la' wʌq'ueñon jiñi pulbil bʌ c majtañ; jiñʌch i yujtibal q'uiñijel, mach yomic mi la' mel mi junchajpic e'tel.”

³⁷ “Jiñʌch jiñi q'uiñijel mu' bʌ caj la' mel tic tojlel, ya' ba' mi caj la' mel jiñi ch'ujul bʌ tempan bʌ, cha'añ mi la' wʌq'ueñon pulbil bʌ c majtañ tac, yic'ot yan tac bʌ c majtañ tac ti' chajp ti' chajp ti jujump'ejl q'uiñ.

³⁸ Ti yam bʌ q'uiñ tac che' bʌ mach i yorajlelic c'aj-o mi caj la' wʌq'ueñon c majtañ tac che' bajche' ñʌmʌl la' mel, jiñʌch ofrenda mu' bʌ la wʌn su'b tac yic'ot tilem bʌ ti la' pusic'al.”

³⁹ “Pero che' ti' jo'lujump'ejlel q'uiñ ti' wucp'ejlel uw, che' bʌ tsa'ix ujti la' tuc'ben i wut la' pʌc'ʌb, wucp'ejl q'uiñ mi caj la' mel q'uiñijel tic tojlel; ti jiñi ñaxan bʌ q'uiñ i yorajlelʌch c'aj-o yic'ot i waxʌcp'ejlel q'uiñ.

⁴⁰ Che' ti ñaxan bʌ q'uiñ yom mi la' ch'ʌm tilel i c'ʌb tac am bʌ wen uts'at tac bʌ i wut la' pʌc'ʌb ti' chajp ti' chajp yic'ot i yopol ch'ib tac, yic'ot wen c'oc' tac bʌ i yopol i c'ʌb te', yic'ot mu' bʌ i colel tac ya' ti ti' tac pa'. Wucp'ejl q'uiñ mi caj la' wu'bin la' tijicñʌyel tic tojlel.

⁴¹ Wucp'ejl q'uiñ mi caj la' cha'len q'uiñijel tic tojlel ti jujump'ejl ja'b. Jiñʌch c mandar mu' bʌ caj la' chʌn ña'tan, yic'ot la' p'olbal ti' lajm ti' lajm; che' ti' wucp'ejlel uw mi caj la' mel.

⁴² Wucp'ejl q'uiñ mi caj la' chumtʌl ti lejchempat tac ti pejtelel israelob,

⁴³ cha'añ mi' ña'tañob la' p'olbal, cha'añ tsa' cʌc'ʌyob ti chumtʌl i yalobilob Israel ti lejchempat che' bʌ tsa' c loc'sayob ti lumal Egipto. Joñon, la' Yumon, la' Dioson.”

⁴⁴ Che'ʌch tsi' su'beyob Moisés i yalobilob Israel cha'añ jiñi q'uiñijel tac i cha'añ lac Yum. Q'uiñijel tac: Baqui bʌ q'uiñ tac: Baqui tac mi lac taj: Sábado Jiñʌch cojix bʌ q'uiñ ti semana Gn 2.2-3; Ex 20.8-11; 31.12-17; Lv 23.3; Mt 12.1-14 Tsiji' bʌ uw Jiñʌch ñaxan bʌ q'uiñ che' ti tsiji' bʌ uw tac. Nm 28.11-15; Ez 46.6-7 Trompeta tac (ti wi'il tsa' pejcʌnti ti Rosh-ha-Shaná o Tsiji' bʌ ja'bil) Jiñʌch che' ti uw Tishri che' ti q'uiñ 1 (septiembre - octubre) Lv 23.23-25; Nm 29.1-6 I ja'bilel c'aj-o Mi' melob ti wuwucp'ejl ja'b Ex 23.10-11; Lv 25.1-7, 18-22; Dt 15.1-18 I ja'bilel tijicñʌyel Mi' melob ti lujump'ejl i yuxc'al (50) tac ja'b Lv 25.8-17, 23-55; 27.17-24; Nm 36.4 Pascua Jiñʌch che' ti uw Nisán che' ti q'uiñ 14 (marzo - abril) Ex 12.1-14; Lv 23.5; Nm 28.16; Mc 14.12-21 Waj mach bʌ añic i levadurajlel Jiñʌch che' ti uw Nisán che' ti q'uiñ 15 - 21 (marzo - abril) Ex 12.15-20; 13.3-10; Lv 23.6-8; Nm 28.17-25; Mc 14.1 I q'uiñilel Primicia (ñaxan bʌ i wut pʌc'ʌbʌl tac) Jiñʌch che' ti uw Nisán che' ti q'uiñ 16 (marzo - abril) Lv 23.9-14 I q'uiñilel c'ajbal (Pentecostés) Jiñʌch che' ti uw Siván che' ti q'uiñ 6 (mayo - junio) Ex 23.16; Nm 28.26-31; Lv 23.15-21; Hch 2.1 I q'uiñilel i ñusʌntel mulil (Yom Kippur) Jiñʌch che' ti uw Tishri che' ti q'uiñ 10 (septiembre - octubre) Lv 16.1-34; Heb 9.7, 11-14 I q'uiñilel lejchempat (Tabernáculo) Jiñʌch che' ti uw Tishri che' ti q'uiñ tac 15-21 (septiembre - octubre) Lv 23.33-43; Nm 29.12-40; Jn 7.2 I yʌc'ol ti' wenta Dios (Hanuká) Jiñʌch che' ti uw Quisleu che' ti q'uiñ 25 (noviembre - diciembre) Jn 10.22 I q'uiñilel Purim Jiñʌch che' ti uw Adar che' ti q'uiñ tac 14 - 15 (febrero - marzo) Est 9.20-32