Levitico 22 - Jiñi Tsiji' bʌ Wen T'añ cha'añ Estudio

Sʌc bʌ majtañʌl tac

¹ Lac Yum tsi' pejca Moisés, tsi' su'be:

² “Su'ben Aarón yic'ot i yalobilob cha'añ ma'añic mi' tʌlob jiñi ch'ujul bʌ c majtañ tsa' bʌ i yʌq'ueyoñob jiñi israelob, cha'añ ma'añic mi' bi'b-esañob jiñi Ch'ujul bʌ j C'aba'. Joñon, la' Yumon.”

³ “Su'beñob pejtelel wiñicob ti la' p'olbal, ti' lajm ti' lajm; majqui jach mi' lʌc'tesan i bʌ ba'añ ch'ujul bʌ c majtañ mu' bʌ i ch'ʌmbeñoñob tilel israelob, che' añ i bi'bi'lel, mi caj i chojquel loq'uel tic tojlel. Joñon, la' Yumon.”

⁴ “Majqui jach wiñic bʌ i p'olbal jiñi motomaj Aarón, mi añ leco bʌ i tsoy ti' pʌchʌlel, o mi woli' loq'uel i ya'lel i tsoy, mach mejlic i c'ux chuqui tac ch'ujul jinto che' cha' sʌquix.” “Majqui jach mi' tʌl chuqui tac chʌmeñ, o wiñic tsa' bʌ i choco loq'uel i p'ʌtʌlel i wiñiclel,

⁵ o tsa' bʌ i tʌlʌ jiñi chʌmeñ bʌ lucum, o yan tac bʌ mach bʌ sʌquic, o wiñic mu' bʌ i yʌlo bi'b-esan i bʌ yic'ot chuqui tac mach sʌquic ti' tojlel;

⁶ jiñi mu' bʌ i tʌl jiñi tic'bil tac bʌ, bi'bi' mi' cʌytʌl c'ʌlʌl mi yic'an, che' ja'el mach mejlic i c'ux chuqui tac ch'ujul jinto che' bʌ tsa'ix i cha'le ts'ʌmel.

⁷ Che' mi' bʌjlel q'uiñ, cha' sʌquix mi' cʌytʌl jiñi motomaj, che' jiñi muq'uix i mejlel i c'ux chuqui tac ch'ujul, come i bʌlʌch i ñʌc'.

⁸ Mach mejlic i c'ux bʌte'el mu' bʌ i bajñel chʌmel o jiñi tsʌnsʌbil bʌ i cha'añ bajlum, come che' jiñi mi' bi'b-esan i bʌ. Joñon, la' Yumon.”

⁹ “Yom ts'ʌcʌl mi la' jac'beñon c mandar, cha'añ ma'añic mi' tajob i mul che' mi' bi'b-esañob i bʌ, ame chʌmicob ti' caj jiñi. Joñoñʌch la' Yumon, mu' bʌ c sʌc-esañetla.”

¹⁰ “Mach mejlic i c'ux chuqui tac ch'ujul mi juntiquilic mach bʌ motomajic, mi i jula'ic jiñi motomaj, mi x'e'telic i cha'añ.”

¹¹ “Mi añ i yaj e'tel mʌmbil bʌ i cha'añ jiñi motomaj, mi' mejlel i c'ux jiñi bʌl ñʌc'ʌl, yic'ot ja'el jiñi mu' bʌ i yilan pañimil ti yotot mi' mejlel i c'ux chuqui tac mi' c'ux jiñi motomaj.”

¹² “Che' mi' cha'len ñujpuñijel xch'oc bʌ yalobil jiñi motomaj yic'ot wiñic mach bʌ motomajic, mach mejlic i c'ux jiñi ch'ujul bʌ bʌl ñʌc'ʌl.

¹³ Pero mi tsa' cʌle ti me'ba' jiñi xch'oc bʌ i yalobil motomaj o mi tsa' ts'a'lenti loq'uel, che' ma'añic majqui añ ti' wenta, mi tsa' cha' c'oti ti yotot i tat, mi' mejlel i c'ux i bʌl i ñʌc' i tat che' bajche' che' bʌ xch'oc to; pero ma'añic majqui yam bʌ mi' mejlel i c'ux jiñi bʌl ñʌc'ʌl.”

¹⁴ “Mi añ majqui tsi' c'uxu jiñi ch'ujul bʌ bʌl ñʌc'ʌl che' mach yujilic mi ch'ujul, che' jiñi la' i yʌc' i q'uexol jiñi bʌl ñʌc'ʌl tsa' bʌ i c'uxu, ti' tojlel jiñi motomaj pero yom i ñumel che' bajche' cha'p'is loq'uem bʌ ti lujump'is.

¹⁵ Come mach yomic mi' bi'b-esʌntel chuqui tac sʌc mi' yʌc'ob jiñi israelob, come tsa'ix i yʌq'ueyoñob,

¹⁶ che' jiñi bʌ'bʌq'uen mi cʌq'uen ti' wenta i mul, cha'añ ti' caj tsi' c'uxu jiñi ch'ujul bʌ bʌl ñʌc'ʌl. Joñon, la' Yumon, mu' bʌ c sʌc-esañetla.”

¹⁷ Che' ja'el lac Yum tsi' pejca Moisés, tsi' su'be:

¹⁸ “Pejcan Aarón yic'ot i yalobilob yic'ot pejtelel israelob, su'beñob: Majqui jach bʌ wiñic ti Israel o mi mach israelic, mu' bʌ i yʌq'ueñon pulbil bʌ c majtañ tsa' bʌ i wʌn su'bu o majtañʌl tilem bʌ ti' bajñel pusic'al,

¹⁹ mi caj j q'uel ti uts'at mi tsi' yʌq'ueyon i tat alʌc'ʌl mach bʌ wis añic i c'am-ʌjel, mi' tat wacax, mi' tat tʌñʌme', o mi' tat chivo.

²⁰ Mach yomic mi la' wʌq'ueñon alʌc'ʌl che' añ i c'am-ʌjel, come ma'añic mi caj c ch'ʌm.”

²¹ “Che' ja'el mi añ majqui mi yʌq'ueñon c majtañ cha'añ i tijicñʌyel i pusic'al cha'añ mi' ts'ʌctesan jiñi tsa' bʌ i wʌn ña'ta o majtañʌl tilem bʌ ti' bajñel pusic'al, mi' ña'al wacax, mi' ña'al tʌñʌme', yom mach bʌ wis añic i c'am-ʌjel cha'añ uts'at mij q'uel.

²² Mach yomic mi la' wʌq'ueñon tic majtañ juncojt alʌc'ʌl xpots' bʌ, mi c'ʌscujem bʌ, mi lojwem bʌ, mi jiñic am bʌ i pʌc', mi jiñic woli bʌ ti sal o jayquexan bʌ i pʌchʌlel. Mach mejlic la' pulbeñon ti' pam jiñi pulʌntib jiñi c majtañ.

²³ Mi' mejlel la' wʌq'ueñon c majtañ tilem bʌ ti la' bajñel pusic'al juncojt tat wacax o juncojt tat tʌñʌme' mach bʌ wen uts'atic ti' bʌc'tal, pero mi woli la' wʌc' cha'añ i tojol jiñi wʌn su'bil bʌ la' cha'añ, ma'añic mi caj c ch'ʌm.

²⁴ Mach mi la' wʌq'ueñon juncojt alʌc'ʌl lojwem bʌ i bʌc' i yat o jats'bil bʌ, o loc'sʌbilix bʌ, mi jiñic che' bʌ ya'ix añetla ti la' lum mi caj la' wʌq'ueñon.

²⁵ Mach yomic ma' ch'ʌm jiñi alʌc'ʌl ti' c'ʌb wiñic ñajt bʌ tilem cha'añ ma' wʌq'ueñon tic majtañ, che' añ i c'am-ʌjel yic'ot i lojwemal, ma'añic mi caj c ch'ʌm tic wenta.”

²⁶ Lac Yum tsi' pejca Moisés, tsi' yʌlʌ:

²⁷ “Che' mi yilan pañimil i yal i ña'al wacax, o i yal i ña'al tʌñʌme', o mi i yal i ña'al chivo, wucp'ejl q'uiñ yom mi' cha'len chu', che' añix waxʌcp'ejl q'uiñ o che' ñumeñix uts'at mi' mejlel c pulbentel tic majtañ.”

²⁸ “Mach mi la' tsʌnsan ti jiñi jach bʌ q'uiñ i ña'al wacax yic'ot i yal, mi i ña'al tʌñʌme' yic'ot i yal.”

²⁹ “Che' ma' tsʌnsʌbeñon c majtañ cha'añ ma' su'beñon wocolix cʌlʌ, aq'ueñon wen sʌc bʌ cha'añ uts'at mij q'uel jiñi c majtañ.

³⁰ Ti jiñi jach bʌ q'uiñ yom mi' laj c'uxtʌl, mach yomic mi' cʌytʌl c'ʌlʌl ti' yijc'ʌlal. Joñon, la' Yumon.”

³¹ “Jac'ʌla pejtelel jiñi c mandar, yic'ot ts'ʌctesanla. Joñon, la' Yumon.”

³² “Mach mi la' q'uel ti lolom jiñi ch'ujul bʌ j c'aba', cha'añ che' jiñi mi caj c ch'ujutesʌntel ti' tojlel israelob. Joñoñʌch, la' Yumon mu' bʌ c sʌc-esañetla,

³³ jiñi cha'añ tsa' c loc'sayetla ti Egipto cha'añ mi cochel ti la' Dios. Joñon, la' Yumon.”