Levitico 21 - Jiñi Tsiji' bʌ Wen T'añ cha'añ Estudio

I sʌclel jiñi motomajob

¹ Lac Yum tsi' su'be Moisés: “Pejcañob jiñi motomajob i yalobilob Aarón, yic'ot su'beñob cha'añ mach yomic mi' bi'b-esañob i bʌ che' mi' tʌlob xchʌmel ti' tojlel i pi'ʌlob,

² cojach mi' cʌñʌ, mach tic'bilic mi' tʌl, mi' tat, mi' ña', mi yalobil, mi yeran,

³ mi xch'oc bʌ i yijts'in maxto bʌ pi'lebilic, come maxto añic i ñoxi'al.

⁴ Mach yomic mi' bi'b-esañob i bʌ che' bajche' mi' melob yam bʌ i pi'ʌlob.”

⁵ “Mach yomic mi' jujchiñob i tsutsel i jol, mi yomic mi' set'beñob i ñi' i tsucti', mi yomic mi' lowob i bʌc'tal.

⁶ Yom ch'ujulob tic tojlel yic'ot mach yomic mi bi'b-esañob j c'aba', come mi yʌq'ueñoñob pulbil bʌ c majtañ yic'ot waj; jiñi cha'añ, yom ch'ujulob.”

⁷ “Mach yomic mi' cha'leñob ñujpuñijel yic'ot xts'i'lel x'ixic o mach bʌ weñic i ñusa q'uiñ, mi cʌybil bʌ x'ixic ti' ñoxi'al, come jiñi motomaj wa'chocobilʌch cha'añ mi' mel que'tel.

⁸ Jiñi cha'añ, yom ma' sʌc-esañob, come jiñobʌch jiñi mu' bʌ i yʌq'ueñoñob jiñi waj tic majtañ; yom ch'ujul ma' q'uelob, come Joñon Ch'ujulon, la' Yum, mu' bʌ c sʌc-esañetla.”

⁹ “Mi tsa' caji ti ts'i'lel jiñi xch'oc bʌ i yalobil jiñi motomaj, woli' p'aj i tat; mi caj i pulel ti c'ajc.”

¹⁰ “Jiñi c'ax ñuc bʌ motomaj ti' tojlel i pi'ʌlob, tsa' bʌ mujli i jol ti olivo aceite, lʌpbil bʌ i cha'añ jiñi yajcʌbil bʌ i pislel, mach yomic che' mach xi'bʌbilic i jol, mi yomic mi' tsil i pislel,

¹¹ mi yomic mi' yochel ba'añ xchʌmel; anquese mi' tat o mi' ña', mach yomic mi' bi'b-esan i bʌ.

¹² Mach yomic mi' loq'uel ti jiñi Ch'ujul bʌ Ajñibʌl mi yomic mi' bi'b-esan, come wa'chocobilʌch ti ye'tel che' bʌ tsa' mujli ti olivo aceite, come Joñon, la' Yumon.”

¹³ “Yom mi' pʌy cha'añ i yijñam xch'oc maxto bʌ pi'lebilic.

¹⁴ Mach yomic mi' pʌy me'ba' x'ixic, mi cʌybilix bʌ x'ixic, mi mach bʌ weñic i ñusa q'uiñ bʌ x'ixic, mi ts'i'lel x'ixic, pero yom mi' pʌy ti' tojlel i pi'ʌlob xch'oc maxto bʌ pi'lebilic,

¹⁵ cha'añ ma'añic mi' q'uejlel ti leco i p'olbal ti' tojlel i pi'ʌlob, come Joñon, la' Yumon, mu' bʌ c sʌc-esañetla.”

¹⁶ Lac Yum tsi' pejca Moisés, tsi' su'be:

¹⁷ “Pejcan Aarón, su'ben: Mach mejlic i lʌc'tesan i bʌ cha'añ mi yʌq'ueñon waj cha'añ c majtañ mi juntiquilic a p'olbal am bʌ i c'am-ʌjel.

¹⁸ Mach mejlic i lʌc'tesan i bʌ tic tojlel mi juntiquilic wiñic mach bʌ c'oq'uic: mi xpots', mi xbor oc, mi q'uichuña bʌ mi' cha'len xʌmbal,

¹⁹ mi jiñic xujlem bʌ i yoc o i c'ʌb,

²⁰ mi jiñic cotol bʌ i pat o pec' bʌ wiñic, o am bʌ tocal ti' wut, o am bʌ Sal ti' bʌc'tal o i tsoy o cujbil bʌ i bʌc' i wiñiclel.

²¹ Majqui jach mach c'oq'uic ti' tojlel i p'olbal jiñi motomaj Aarón, mach mejlic ti ochel ba'añon cha'añ mi' pulbeñon c majtañ. Mach mejlic i lʌc'tesan i bʌ cha'añ mi yʌq'ueñon waj cha'añ c majtañ, come mach c'oq'uic.

²² Mi' mejlel i c'ux jiñi ch'ujul bʌ c waj, jiñi c'ax ch'ujul bʌ c majtañ.

²³ Pero mach mejlic ti ochel ya' ti' junwejlel tsalʌl bʌ pisil, mi muq'uic i mejlel i lʌc'tesan i bʌ ya' ba'añ pulʌntib, come mach c'oq'uic jiñi wiñic; cha'añ ma'añic mi' bi'b-esan jiñi Ch'ujul bʌ Cajñib, come Joñon, la' Yumon, mu' bʌ c sʌc-esañob.”

²⁴ Che'ʌch tsi' pejca Moisés cha'añ mi' su'ben Aarón yic'ot i yalobilob, yic'ot pejtelel i yalobilob israelob.