Levitico 20 - Jiñi Tsiji' bʌ Wen T'añ cha'añ Estudio

I tojol cha'añ i melol jontolil

¹ Lac Yum tsi' pejca Moisés, tsi' su'be:

² “Lajal mi caj a su'ben pejtelel israelob:” “Majqui jach bʌ wiñic ti Israel, mi jiñi ñajt bʌ ch'oyolob woliyo' bʌ ti chumtʌl ba'añ israelob, majqui jach mi yʌc' i yalobil cha'añ i majtañ jiñi dios Moloc, ti isujm mi caj i chʌmel: jiñi wiñicob x'ixicob mi caj i julob ti xajlel.

³ Joñon mi caj j contrajin jiñi wiñic, mi caj c choc loq'uel ti' tojlel i pi'ʌlob, come tsa'ix i yʌc'ʌ juntiquil i yalobil cha'añ i majtañ Moloc; tsa'ix i bi'b-esa jiñi Ch'ujul bʌ Ajñibʌl yic'ot tsa'ix i q'uele ti lolom jiñi ch'ujul bʌ j c'aba'.

⁴ Mi añ tsa' bʌ i q'uele wiñic cha'añ tsi' yʌc'ʌ i yalobil ba'añ Moloc, mi che' jach tsi' q'uele, cha'añ mach yomic mi' tsʌnsʌntel,

⁵ che' jiñi, joñon mi caj j contrajin jiñi wiñic yic'ot año' bʌ ti yotot, yic'ot mi caj c chocob loq'uel ti' tejclum yic'ot pejtelel i pi'ʌlob woli bʌ i tsajcañob jiñi dios Moloc.”

⁶ “Jiñi wiñic mu' bʌ i majlel ba'añ payxo x'alt'añob o ba'añ xwujtob cha'añ mi' tsajcʌbeñob i melbal, mi caj j contrajin jiñi wiñic yic'ot mi caj c choc loq'uel ti' tojlel i pi'ʌlob.”

⁷ “Jiñi cha'añ yom mi la' sʌc-esan la' bʌ yic'ot yom ch'ujul mi la' wajñel, come Joñon, la' Yumon, la' Dioson.

⁸ Yom mi la' chʌn jac'beñon c mandar yic'ot yom mi la' mel che' bajche' mic su'beñetla, come Joñoñʌch la' Yumon, mu' bʌ c sʌc-esañetla.”

⁹ “Majqui jach mi' p'aj i tat i ña' ti isujm mi caj i tsʌnsʌntel, come tsi' p'aja i tat i ña': la' ajñic ti' bajñel wenta jiñi mulil.”

¹⁰ “Mi añ juntiquil wiñic mu' bʌ i pi'len i yijñam i pi'ʌl, wersa mi' tsʌnsʌntelob ti' cha'ticlel.”

¹¹ “Majqui jach mi' pi'len i yijñam i tat, tsa'ix i yʌc'ʌ ti quisin i tat, wersa mi caj i tsʌnsʌntelob ti' cha'ticlel: la' ajñic jiñi mulil ti' wentajob.”

¹² “Mi añ mu' bʌ i pi'len i yʌ'lib, ti' cha'ticlelob mi caj i tsʌnsʌntel; come c'ax bi'bi' jiñi tsa' bʌ i meleyob: la' ajñic jiñi mulil ti' wentajob.”

¹³ “Mi añ wiñic mu' bʌ i pi'len yam bʌ wiñic che' bajche' mi' pi'lentel x'ixic, mi caj i tsʌnsʌntelob ti' cha'ticlel, come tsi' meleyob chuqui bi'bi': la' ajñic jiñi mulil ti' wentajob.”

¹⁴ “Jiñi mu' bʌ i pʌy x'ixic cha'añ i yijñam temel yic'ot i ña', c'ax ñucʌch i mul. Yom mi' wersa pulelob ti yuxticlelob, cha'añ ma'añic chuqui leco ti la' tojlel.”

¹⁵ “Majqui jach mi' pi'len alʌc'ʌl, yom mi' tsʌnsʌntel temel yic'ot jiñi alʌc'ʌl.”

¹⁶ “Mi añ juntiquil x'ixic mu' bʌ i yʌc' i bʌ ti pi'lentel ti' tojlel alʌc'ʌl, wersa mi' tsʌnsʌntel jiñi x'ixic yic'ot jiñi alʌc'ʌl: la' ajñic jiñi mulil ti' wentajob.”

¹⁷ “Mi añ wiñic mu' bʌ i pi'len xch'oc bʌ i yeran, i yalobil bʌ i tat o i ña', c'ax ñucʌch i mul come quisintic jax chuqui tsi' meleyob; jiñi cha'añ mi caj i tsʌnsʌntelob ti' wut pejtelel israelob; la' ajñic jiñi mulil ti' wenta.”

¹⁸ “Majqui jach mi' pi'len x'ixic che' woli' q'uel i c'am-ʌjel, yom mi' chojquelob loq'uel ti' tojlel i pi'ʌlob come tsa'ix i q'uelbe i c'am-ʌjel.”

¹⁹ “Jiñi wiñic mach yomic mi' pi'len xch'oc bʌ i yeran i tat, o xch'oc bʌ i yeran i ña', come che' mi' pi'len i cʌñʌ bʌ, mi caj i tojob i mul.”

²⁰ “Majqui jach mi' pi'len i yijñam i yumijel, ti' cha'ticlel mi caj i tojob i mul: mi caj i chʌmelob che' ma'añobic i yalobil.”

²¹ “Jiñi mu' bʌ i pi'len i yijñam i yeran, bi'bi'ʌch ti q'uelol, cha'añ ti' caj iliyi: ma'añic mi caj i tilel i yalobilob.”

²² “Yom mi la' jac'beñon pejtelel c mandar yic'ot pejtelel mu' bʌ c su'beñetla, yom mi la' mel che' bajche' mi yʌl jiñi mandar, ame chojquiquetla loq'uel ti jiñi lum ba' tsa' c pʌyʌyetla ochel cha'añ mi la' chumtʌl.

²³ Mach yomic mi la' ñopben i melbal jiñi tejclum tac mu' bʌ caj c choc loq'uel ti la' tojlel, come jontol jax pejtelel chuqui tsi' meleyob, jiñi cha'añ bi'bi'obʌch tic tojlel.

²⁴ Pero jatetla tsa'ix c su'beyetla: cha'añ mi caj la' ch'ʌmbeñob i lum, joñon mi caj cʌq'ueñetla cha'añ mi la' chumtʌl, jiñi lum, mi yʌc' ca'bʌl leche yic'ot cha'b.” “Joñoñʌch la' Yumon, la' Dioson, tsa' bʌ c yajcayetla ti' tojlel pejtelel jiñi yan tac bʌ tejclum.

²⁵ Jiñi cha'añ jatetla yom mi la' cʌn baqui bʌ jiñi sʌc bʌ alʌc'ʌl yic'ot jiñi bi'bi' bʌ alʌc'ʌl, che' ja'el sʌc bʌ xwejlel mut yic'ot bi'bi' bʌ. Mach mi la' bi'b-esan la' bʌ yic'ot jiñi tic'bil bʌ alʌc'ʌl tac, mi yic'otic jiñi tic'bil bʌ xwejlel mut, mi yic'otic jiñi jʌlʌcña tac bʌ mi' majlel ti lum, come bi'bi'ʌch.

²⁶ Yom ch'ujul mi la' wajñel tic tojlel, come Joñon, la' Yumon, Ch'ujulon. Jiñi cha'añ tsa' c yajcayetla cha'añ mi la' wochel tic cha'añ bʌ.”

²⁷ “Jiñi wiñic o jiñi x'ixic mu' bʌ i pejcʌben i ch'ujlel xchʌmelob, o jiñi mu' bʌ i lon ña'tan chuqui tac mi caj i yujtel, mi caj i jujlelob ti xajlel jinto mi' chʌmelob, jiñi mulil mi' cʌytʌlob ti' wenta.”