Levitico 2 - Jiñi Tsiji' bʌ Wen T'añ cha'añ Estudio

Jiñi majtañʌl tac

¹ “Che' añ juntiquil yom bʌ i yʌq'ueñon trigo tic majtañ, la' i yʌq'ueñon wen juch'bil bʌ trigo yic'ot olivo aceite yic'ot pom.

² La' i yʌq'ueñob i yalobilob Aarón, jiñi motomajob. Juntiquil motomaj mi caj i ch'ʌm junmujch' majtañʌl loq'uem bʌ ti juch'bil bʌ trigo yic'ot olivo aceite yic'ot pom cha'añ mi' pul ti' pam i pulʌntib majtañʌl cha'añ mic chʌn ña'tʌntel. Jiñʌch majtañʌl xojocña bʌ i yujts'il mi cu'bin.

³ Jiñi i colojbal jiñi juch'bil bʌ trigo, jiñʌch majtañʌl wen ch'ujul bʌ cha'añ mic pulbentel, i cha'añix Aarón yic'ot i yalobilob cha'añ i bʌlob i ñʌc'.”

⁴ “Ba' ora ma' wʌc' c majtañ tiq'uesʌbil bʌ ti horno, jiñʌch waj melbil bʌ ti juch'bil bʌ trigo mach bʌ añic i levadurajlel, yom xajc'ubil yic'ot olivo aceite, pero mach yomic yic'ot levadura, yic'ot mi' mejlel a wʌq'ueñon galleta, pero mach yomic yic'ot levadura, yom ma' bon ti olivo aceite.”

⁵ “Pero mi tsa' wʌc'ʌ majtañʌl ch'ilbil bʌ ti sartén, yom jiñi wen juch'bil bʌ harina, mach bʌ añic yic'ot levadura, yom xajc'ubil yic'ot olivo aceite.

⁶ Mi caj a bic'ti xut' yic'ot mi caj a wʌq'uen olivo aceite. Jiñʌch majtañʌl.”

⁷ “Mi tsa' wʌc'ʌ majtañʌl ch'ʌxbil bʌ ti p'ejt, yom wen juch'bil bʌ trigo yic'ot olivo aceite.

⁸ Jiñi majtañʌl chajpʌbil tac bʌ che' bajche' iliyi, yom mi la' ch'ʌmbeñon tilel; mi caj la' wʌq'uen jiñi motomaj cha'añ mi' yʌc' ya' ti pulʌntib.

⁹ Jiñi motomaj mi caj i pul lamital jiñi majtañʌl cha'añ c ña'tʌntel, jiñʌch pulbil bʌ majtañʌl xojocña bʌ i yujts'il mi cu'bin.

¹⁰ I colojbal jiñi majtañʌl mu' to bʌ i cʌytʌl i cha'añix Aarón yic'ot i yalobilob cha'añ mi' c'uxob. Pero ch'ujulʌch c majtañ ti' pejtelel.”

¹¹ “Mi junchajpic majtañʌl mi caj la' pulbeñon xʌbil bʌ ti cha'b o ti levadura.

¹² Mi' mejlel la' wʌq'ueñon cha'b yic'ot jiñi levadura lajal bajche' ñaxan bʌ i wut pʌc'ʌbʌl, pero mach yomic mi la' wʌc' ti' pulʌntib majtañʌl che' bajche' xojocña bʌ c majtañ.”

¹³ “Yom ma' wotsʌben i yʌts'mil pejtelel majtañʌl mu' bʌ a wʌq'ueñon, come jiñi ats'am jiñʌch i yejtal jiñi xuc'ul bʌ c t'añ tsa' bʌ cʌq'ueyetla. Ti pejtelel jiñi majtañʌl mu' bʌ a wʌq'ueñon yom añ i yʌts'mil.”

¹⁴ “Mi tsa' wʌq'ueyon jiñi ñaxan bʌ i wut a pʌc'ʌb, yom ma' ch'il ti c'ajc jiñi yaxto bʌ i wut jiñi trigo, yom cujbil jiñi ñaxan bʌ i wut a trigo.

¹⁵ Yom ma' wʌq'uen olivo aceite yic'ot pom, come majtañʌlʌch.

¹⁶ Cha'añ c ña'tʌntel, jiñi motomaj mi caj i pul ts'ita' jiñi juch'bil bʌ trigo yic'ot olivo aceite yic'ot pom. Jiñʌch pulbil bʌ majtañʌl cha'añon.” Alʌc'ʌl tac mu' bʌ i laj pulel: Lv 1.2-17; 6.8-13; 7.7-8; 8.14-17, 23-25 Majtañʌl tac i bʌl bʌ ñʌc'ʌl mu' bʌ i yʌq'uentel lac Yum: Ex 29.15-18; Lv 2.1-16; 8.18-21 Majtañʌl tac che' bajche' i wut cebada yic'ot trigo: Lv 2.1; 6.14-18; 7.9-10 Majtañʌl mu' bʌ i yʌjq'uel che' ti' q'uiñilel i ñusʌntel mulil: Lv 23.26-32; Nm 29.7-11 Majtañʌl ti' chajp ti' chajp: Ex 29.23-27; Lv 8.29 Majtañʌl tac cha'añ i q'uiñilel tsiji' bʌ ja'bil: Lv 23.23-25; Nm 29.1-6 Majtañʌl tac cha'añ i q'uiñilel lejchempat: Lv 23.33-34; Nm 29.12-38 Majtañʌl tac cha'añ jiñi ñaxan bʌ i wut pʌc'ʌbʌl: Lv 23.9-22; Nm 28.26-31 Majtañʌl tac cha'añ i q'uiñilel che' mi' pasel uw Nm 28.1-15 Majtañʌl tac cha'añ i q'uiñilel waj mach bʌ añic i levadurajlel: Lv 23.6-8; Nm 28.17-25 Majtañʌl tac che' mi' ch'ʌmob i ye'tel ti motomaj: Ex 29.19-22, 31-34; Lv 6.19-23; 8.22-28, 31-32 Majtañʌl tac cha'añ ñʌch'tʌlel: Lv 3.1-17; 7.11-21, 28-34 Majtañʌl tac che' ti' q'uiñilel c'aj-o: Nm 28.9-10 Majtañʌl tac mu' bʌ i yʌjq'uel ti jujump'ejl q'uiñ: Ex 29.38-46; Nm 28.1-8 Tsʌnsʌbil bʌ majtañʌl che' bʌ mach tsajilic i cha'añ: Lv 5.14—6.7; 7.1-6, 7-8; 14.11-18, 21-32 Tsʌnsʌbil bʌ majtañʌl cha'añ i ñusʌntel mulil: Ex 29.10-14; Lv 4.1—5.23; 6.24-30; Nm 15.22-29