Levitico 17 - Jiñi Tsiji' bʌ Wen T'añ cha'añ Estudio

4. JIÑI MANDAR CHA'AÑ CH'UJUL MI YAJÑELOB ( 17.1—25.55 ) Jiñi cojach bʌ Ch'ujul bʌ Ajñibʌl

¹ Lac Yum tsi' pejca Moisés, tsi' yʌlʌ:

² “Su'ben Aarón yic'ot i yalobilob yic'ot pejtelel israelob, su'beñob: Pejtelel iliyi jiñʌch mandar tsa' bʌ i yʌlʌ lac Yum:”

³ “Majqui jach bʌ wiñic ti' tojlel israelob mu' bʌ i tsʌnsan juncojt tat wacax o juncojt tat tʌñʌme' o juncojt i ña'al chivo ti jiñi tejclum o ti' pat jiñi tejclum,

⁴ mi ma'añic tsi' pʌyʌ tilel ti ti' jiñi Tabernáculo ba' mi la' tempan la' bʌ cha'añ mi' yʌc' che' bajche' i majtañ Dios ya' ti' tojel jiñi Tabernáculo i cha'añ lac Yum, añ i mul jiñi wiñic cha'añ tsi' bec'be i ch'ich'el jiñi alʌc'ʌl. Jiñi wiñic tsa' bʌ i beq'ue ch'ich' yom mi' chojquel loq'uel ti' lumal,

⁵ cha'añ ma'añic mi' tsʌnsʌbeñon c majtañ ya' ti cholel jiñi israelob, come yom mi' ch'ʌmbeñob tilel jiñi motomaj tic tojlel wʌ' ti ti' jiñi Tabernáculo ba' mi la' tempan la' bʌ, che' jiñi mi yʌq'ueñoñob c majtañ cha'añ i ñʌch'tʌlelob i pusic'al tic tojlel.

⁶ Jiñi motomaj mi caj i tsijcʌben i ch'ich'el ya' ti pulʌntib i cha'añ lac Yum ti ti' jiñi Tabernáculo ba' mi la' tempan la' bʌ yic'ot mi caj i pulben i lewil che' bajche' xojocña bʌ majtañʌl tic tojlel.

⁷ Ma'añix ba' ora mi caj i chʌn aq'ueñob i majtañ jiñi xi'bajob, che' bajche' tsi' meleyob ti' ts'i'lel. Mach yomic mi' wis ñajʌyel la' cha'añ ili mandar ti pejtelel ora.”

⁸ “Mi caj a su'beñob ja'el: Majqui jach bʌ wiñic ti' tojlel israelob o tilem bʌ ti yam bʌ lum ya' bʌ chumul la' wic'ot, mi' tsi' yʌc'ʌ tsʌnsʌbil bʌ o pulbil bʌ majtañʌl,

⁹ pero mi' ma'añic tsi' ch'ʌmʌ tilel ti ti' jiñi Tabernáculo ba' mi la' tempan la' bʌ cha'añ mi' yʌq'ueñon, jiñi wiñic mi' chojquel loq'uel ja'el ti' tojlel i pi'ʌlob.”

Tic'bil ti' c'uxol ch'ich'

¹⁰ “Mi añ majqui mi' c'ux ch'ich' ti' tojlel israelob o ti' tojlel jiñi ñajt bʌ ch'oyolob ya' bʌ chumul la' wic'ot, mach uts'atic mi caj q'uel jiñi mu' bʌ i c'ux ch'ich', jiñi cha'añ mi caj c choc loq'uel ti' lumal,

¹¹ come i cuxtʌlel jiñi alʌc'ʌl añ ti' ch'ich'el, come joñon tsa' cʌq'ueyetla cha'añ mi' tsijcʌntel ya' ti pulʌntib cha'añ mi' ñusʌntel la' mul, come jiñi ch'ich' jiñʌch mu' bʌ i yʌc' ti ñusʌntel la' mul.”

¹² “Jiñi cha'añ, tsa'ix c su'beyob jiñi israelob yic'ot jiñi ñajt bʌ ch'oyolob ya' bʌ chumul la' wic'ot cha'añ mach mejlic la' c'ux jiñi ch'ich'.

¹³ Majqui jach bʌ israelob o jiñi ñajt bʌ ch'oyolob ya' bʌ chumul la' wic'ot mi tsi' chucu bʌte'el o te'lemut cha'añ mi' c'ux, yom mi' bec'beñob i ch'ich'el yic'ot yom mi' mujlañob ti lum,

¹⁴ come i cuxtʌlel pejtelel jiñi cuxul tac bʌ añ ti' ch'ich'el. Jiñi cha'añ tsa' c su'beyob jiñi israelob: Mach mi la' c'uxben i ch'ich'el pejtelel cuxul tac bʌ, come i cuxtʌlelob añ ti' ch'ich'el, jiñi mu' bʌ i c'uxben i ch'ich'el mi caj i chojquel loq'uel ti' lumal.”

¹⁵ “Majqui jach mi' c'ux chʌmeñ bʌ bʌte'el, mi jiñi israelob o jiñi ñajt bʌ ch'oyolob, che' tsʌnsʌbil i cha'añ yam bʌ bʌte'el, mi caj i wuts' i pislel yic'ot mi caj i cha'len ts'ʌmel, pero bi'bi' mi' cʌytʌl c'ʌlʌl mi yic'an. Che' jiñi mux i cha' q'uejlel ti sʌc.

¹⁶ Mi ma'añic tsi' wuts'u i pislel, mi ma'añic tsi' cha'le ts'ʌmel, mi' cʌytʌl ti' bajñel wenta i mul.”