Levitico 16 - Jiñi Tsiji' bʌ Wen T'añ cha'añ Estudio

I q'uiñilel i ñusʌntel mulil

¹ Lac Yum tsi' pejca Moisés che' bʌ tsa' ujti ti chʌmel jiñi cha'tiquil i yalobil Aarón che' bʌ tsi' lʌc'tesayob i bʌ ti' tojlel lac Yum.

² Lac Yum tsi' su'be Moisés: “Su'ben a wʌscun Aarón, cha'añ mach yomic mi' yochel ya' ti Ch'ujul bʌ Ajñibʌl baqui jach bʌ ora ame chʌmic. Jiñi Ch'ujul bʌ Ajñibʌl jiñʌch am bʌ ti' junwejlel jiñi tsalʌl bʌ pisil, ya' ti' tojel jiñi Arca ba' mi' ñusʌntel mulil, come joñon mic pʌs c bʌ ti tocal ya' ti' pam ba' mi' ñusʌntel mulil.

³ Aarón mi caj i yochel ya' ti ch'ujul bʌ ajñibʌl, mi caj i pʌy tilel juncojt alʌ tat wacax cha'añ i ñusʌntel mulil, yic'ot juncojt i tat tʌñʌme' cha'añ mic pulbentel.

⁴ Yom mi' cha'len ts'ʌmel, yom mi' lʌp jiñi ch'ujul bʌ i bujc melbil bʌ ti lino yic'ot i yalʌ wex lino bʌ pisil; yic'ot yom mi' cʌch i cajchiñʌc' melbil bʌ ti lino bʌ pisil yic'ot yom mi' cʌch ti' jol jiñi lino bʌ pisil.”

⁵ “Jiñi israelob mi caj i ch'ʌmob tilel cha'cojt i tat chivo cha'añ i ñusʌntel mulil, yic'ot juncojt i tat tʌñʌme' cha'añ mic pulbentel.

⁶ Aarón mi caj i yʌq'ueñon jiñi tat wacax cha'añ i ñusʌntel i mul yic'ot jiñi año' bʌ ti yotot.

⁷ Ti wi'il yom mi' pʌy tilel cha'cojt tat chivo tic tojlel ya' ti ti' jiñi Tabernáculo ba' mi la' tempan la' bʌ.

⁸ Ti wi'il Aarón mi caj i cha'len yajcaya ti alas cha'añ mi' tsictiyel baqui bʌ i cha'añ lac Yum, yic'ot baqui bʌ i cha'añ Azazel.

⁹ Mi caj i pʌy tilel jiñi tat chivo tsa' bʌ i yajcʌnti cha'añ mi cʌq'uentel cha'añ mi' tsʌnsʌntel cha'añ i ñusʌntel mulil.

¹⁰ Pero jiñi yam bʌ chivo tsa' bʌ yajcʌnti cha'añ Azazel, yom mi' pʌjyel tilel che' cuxul to tic tojlel cha'añ mi' tajob i ñusʌntel i mul yic'ot mi caj i col majlel ti' tiquiñal lum cha'añ Azazel.”

¹¹ “Aarón mi caj i yʌc' ti tsʌnsʌntel jiñi alʌ tat wacax cha'añ i bajñel ñusʌntel i mul yic'ot jiñi año' bʌ ti' yotot; mi caj i jec' cha'añ i q'uexol i mul.

¹² Ti wi'il yom mi' ch'ʌm tilel i yajñib pom but'ul bʌ ti ñich c'ajc tsa' bʌ i loc'sa ti pulʌntib ya' tic tojlel, yic'ot cha'mujch' xojocña bʌ ts'ac wen juch'bil bʌ cha'añ mi' ch'ʌm majlel ya' ti' junwejlel tsalʌl bʌ pisil.

¹³ Yom mi' yotsan jiñi xojocña bʌ ts'ac ti c'ajc tic tojlel, ixcu i buts'il jiñi perfume mi caj i mos jiñi ajñibʌl ti' pam Arca ba' mic ñusan mulil, cha'añ ma'añic mi' chʌmel.

¹⁴ Ti wi'il mi caj i ch'ʌmben i ch'ich'el jiñi alʌ tat wacax cha'añ mi' tsijcan ti yal i c'ʌb jiñi ch'ujul bʌ ajñibʌl ya' ti' pasibal q'uiñ ba' mi' ñusʌntel mulil, yic'ot wucyajl mi caj i tsijcan jiñi ch'ich' ya' ti' tojel jiñi ajñibʌl.

¹⁵ Ti wi'il mi caj i tsʌnsan jiñi tat chivo cha'añ i ñusʌntel i mul wiñicob x'ixicob, mi caj i ch'ʌmben majlel i ch'ich'el ya' ti' junwejlel tsalʌl bʌ pisil ya' ti' mal, mi caj i tsijcan ya' ti' pam yic'ot ti' tojel jiñi ch'ujul bʌ ajñibʌl ba' mi' ñusʌntel mulil che' bajche' tsi' mele yic'ot i ch'ich'el jiñi tat wacax.

¹⁶ Che'ʌch mi caj i sʌc-esʌntel jiñi Ch'ujul bʌ Ajñibʌl, cha'añ ti' caj i bi'bi'lelob yic'ot cha'añ i jontolilob yic'ot cha'añ pejtelel i mul jiñi israelob. Che'ʌch yom mi' sʌc-esan ja'el jiñi Tabernáculo am bʌ ti' tojlelob cha'añ i mul.”

¹⁷ “Mach yomic mi yochel mi juntiquilic wiñic ya' ti' mal jiñi Tabernáculo ba' mi la' tempan la' bʌ che' mi yochel Aarón ti Ch'ujul bʌ Ajñibʌl cha'añ mi yʌc' ti ñusʌntel i mul wiñicob x'ixicob c'ʌlʌl jinto mi' loq'uel. Che' laj ujtemix i c'ajtin i ñusʌntel i bajñel mul yic'ot i mul jiñi año' bʌ ti yotot, yic'ot i mul pejtelel israelob,

¹⁸ yom mi' loq'uel majlel ya' ba'añ jiñi pulʌntib am bʌ tic tojlel cha'añ sʌc mij q'uel jiñi pulʌntib: Mi caj i ch'ʌmben tilel i ch'ich'el jiñi tat wacax yic'ot i ch'ich'el jiñi chivo, mi caj i bomben i xulub tac jiñi pulʌntib.

¹⁹ Wucyajl yom mi' tsijcan yic'ot i yal i c'ʌb jiñi ch'ich' ya' ti pulʌntib. Che'ʌch mi caj i sʌc-esʌntel yic'ot cha'añ ch'ujul mi' cʌytʌl jiñi tsa' bʌ i bi'b-esayob ti' mul pejtelel israelob.”

²⁰ “Che' ujtemix i sʌc-esʌntel jiñi Ch'ujul bʌ Ajñibʌl, jiñi Tabernáculo ba' mi' tempañob i bʌ yic'ot jiñi pulʌntib, mi caj i pʌy tilel jiñi tat chivo che' cuxul to.

²¹ Aarón mi caj i c'ʌcchocon ti' cha'ts'ijtlel i c'ʌb ti' jol jiñi tat chivo cuxul to bʌ, mi caj i tsictesan pejtelel i mul israelob yic'ot i ñusa t'añob. Che'ʌch mi yʌc' ti' jol jiñi tat chivo, mi caj i choc majlel ti jochol bʌ lum ti' wenta juntiquil wiñic wa'chocobil bʌ.

²² Jiñi i tat chivo mi' ch'ʌmbeñob majlel i mul pejtelel wiñicob ya' ba' ma'añic xchumtʌl; jiñi wiñic mi caj i col jiñi tat chivo ya' ti' tiquiñal pañimil.

²³ Ti wi'il mi' cha' majlel Aarón ti Tabernáculo ba' mi la' tempan la' bʌ cha'añ mi' joch i pislel tsa' bʌ i lʌpʌ che' bʌ tsa' ochi ti Ch'ujul bʌ Ajñibʌl yic'ot ya' yom mi' cʌy i pislel.

²⁴ Ti jiñi jach bʌ ora mi caj i cha'len ts'ʌmel ya' ti ch'ujul bʌ ajñibʌl; che' bʌ tsa'ix i lʌpʌ i pislel, mi caj i loq'uel i yʌc' pulbil bʌ majtañʌl cha'añ i bajñel mul yic'ot cha'añ i mul wiñicob x'ixicob; mi caj i ñusʌbentel i bajñel mul yic'ot i mul jiñi israelob,

²⁵ yic'ot mi caj i pulben i lewil jiñi majtañʌl cha'añ i tojol mulil.

²⁶ Jiñi wiñic tsajñi bʌ i cʌy jiñi tat chivo cha'añ Azazel, la' i wuts' i pislel, la' i cha'len ts'ʌmel, ti wi'il mi' cha' ochel ti tejclum.”

²⁷ “Ti wi'il mi' ch'ʌjmel majlel ti junwejl i ti' tejclum jiñi alʌ tat wacax yic'ot jiñi tat chivo tsa' bʌ tsʌnsʌnti cha'añ mulil, tsa' bʌ c'ʌjñi i ch'ich'el ya' ti Ch'ujul bʌ Ajñibʌl cha'añ mi' ñusʌbentelob i mul wiñicob x'ixicob. Yom mi' pulel ti c'ajc i pʌchʌlel yic'ot i bʌc'tal yic'ot i soyta'.

²⁸ Jiñi mu' bʌ i pul yom mi' wuts' i pislel, yom mi' cha'len ts'ʌmel ti ja', ti wi'il mi' mejlel ti cha' ochel ti jiñi tejclum.”

²⁹ “Jiñʌch c mandar yom bʌ mi la' mel ti pejtelel ora: Che' ti' wucp'ejlel uw, che' ti' lujump'ejlel q'uiñ, yom mi la' cha'len ch'ajb, mach yomic mi la' wis cha'len e'tel, mi jiñic la' pi'ʌlob, mi jiñic ñumel jach bʌ woliyob ya' ba'añetla,

³⁰ come ti ili q'uiñ mi la' ñusʌbentel la' mul, che' jiñi sʌc-esʌbiletixla tic tojlel.

³¹ I yorajlelʌch c'aj-o cha'añetla, jiñi cha'añ yom mi la' cha'len ch'ajb. Che'ʌch yom ti pejtelel ora.

³² Jiñi motomaj yajcʌbil bʌ cha'añ mi yochel ti' q'uexol i tat, añ ti' wenta cha'añ mi yʌc' majtañʌl cha'añ mulil; mi caj i lʌp ch'ujul bʌ i pislel melbil bʌ ti lino,

³³ yic'ot añ ti' wenta cha'añ mi' yʌq'ueñon c majtañ cha'añ i sʌc-esʌntel jiñi Ch'ujul bʌ Ajñibʌl, jiñi Tabernáculo ba' mi la' tempan la' bʌ; che' ja'el añ ti' wenta cha'añ mi' yʌq'ueñon c majtañ cha'añ mi' sʌc-esʌntel jiñi pulʌntib yic'ot cha'añ jiñi motomajob yic'ot cha'añ pejtelel israelob.”

³⁴ “Jiñʌch c mandar yom bʌ mi la' mel ti pejtelel ora cha'añ junyajl ti jujump'ejl ja'b mi' ñusʌbentelob i mul israelob.” Moisés tsi' mele che' bajche' tsi' yʌq'ue mandar lac Yum.