Levitico 15 - Jiñi Tsiji' bʌ Wen T'añ cha'añ Estudio

Jiñi bi'bi' tac bʌ ti' tojlel wiñicob x'ixicob

¹ Lac Yum tsi' pejca Moisés yic'ot Aarón, tsi' su'be:

² “Yom ma' pejcan i yalobilob Israel, su'beñob: Majqui jach bʌ wiñic mu' bʌ i loq'uel i pujwil i wiñiclel, bi'bi' mi yajñel.

³ Jiñʌch i bi'bi'lel ti jujunyajl che' mi' loq'uel i p'ʌtʌlel i bʌc'tal: mi' woli i bajñel choc loq'uel i p'ʌtʌlel i bʌc'tal o che' tsa'ix ujti i choc loq'uel, bi'bi'ʌch mi' cʌytʌl.

⁴ Pejtelel wʌyibʌl ba' mi' wʌyel jiñi wiñic mu' bʌ i choc loq'uel i p'ʌtʌlel, bi'bi' mi' cʌytʌl, yic'ot pejtelel baqui tac jach mi' buchtʌl, bi'bi' mi' cʌytʌl.

⁵ Majqui jach mi' tʌlben i wʌyib, yom mi' wuts' i pislel, che' ja'el yom mi' cha'len ts'ʌmel, bi'bi'ʌch mi' cʌytʌl c'ʌlʌl mi yic'an.

⁶ Majqui jach mi' buchtʌl ya' ba' tsa' buchle jiñi tsa' bʌ i choco i p'ʌtʌlel, yom mi' wuts' i pislel yic'ot yom mi' cha'len ts'ʌmel, bi'bi'ʌch mi cʌytʌl c'ʌlʌl mi yic'an.

⁷ Che' ja'el jiñi mu' bʌ i tʌlben i bʌc'tal jiñi tsa' bʌ i choco i p'ʌtʌlel, yom mi' wuts' i pislel, yic'ot yom mi' cha'len ts'ʌmel, bi'bi'ʌch mi' cʌytʌl c'ʌlʌl mi yic'an.

⁸ Jiñi wiñic tsa' bʌ i choco i p'ʌtʌlel, mi tsi' tujba wiñic mach bʌ bi'bi'ic, yom mi' wuts' i pislel jiñi tsa' bʌ tujbʌnti, anquese tsa'ix i cha'le ts'ʌmel, bi'bi'ʌch mi' cʌytʌl c'ʌlʌl mi yic'an.

⁹ Pejtelel i monturajlel caballo ba' mi' c'ʌchtʌl jiñi wiñic tsa' bʌ i choco i p'ʌtʌlel, bi'bi' mi' cʌytʌl.

¹⁰ Majqui jach mi' tʌl chuqui tac tsi' c'ʌñʌ jiñi wiñic, bi'bi'ʌch mi' cʌytʌl c'ʌlʌl mi yic'an. Jiñi mu' bʌ i ch'ʌm majlel chuqui tac tsi' c'ʌñʌ jiñi wiñic, yom mi' wuts' i pislel, yic'ot che' ujtem ti ts'ʌmel, bi'bi'ʌch mi' cʌytʌl c'ʌlʌl mi yic'an.

¹¹ Majqui jach mi' chucben i c'ʌb jiñi wiñic tsa' bʌ i choco i p'ʌtʌlel che' maxto pocolic i c'ʌb ti ja', yom mi' wuts' i pislel, che' ja'el yom mi' cha'len ts'ʌmel, bi'bi'ʌch mi' cʌytʌl c'ʌlʌl mi yic'an.

¹² Che' ja'el jiñi wiñic tsa' bʌ i choco i p'ʌtʌlel mi tsi' tʌlʌ p'ejt melbil bʌ ti lum, yom mi' tojp'el yic'ot pejtelel p'ejt melbil bʌ ti te', yom mi' pojquel.”

¹³ “Che' bʌ tsa'ix i sʌc-esa i bʌ jiñi wiñic woli bʌ i loq'uel i p'ʌtʌlel i bʌc'tal, mi caj i tsic wucp'ejl q'uiñ cha'añ i sʌc-esʌntel. Che' jiñi mi caj i wuts' i pislel yic'ot yom mi' cha'len ts'ʌmel ba' woli ti ajñel ja', che' jiñi sʌc mi' cʌytʌl.

¹⁴ Ti' waxʌcp'ejlel q'uiñ mi caj i ch'ʌm tilel cha'cojt xpurwoc o cha'cojt x'ujcuts, mi caj i tilel ti' tojlel lac Yum ya' ti ti' jiñi Tabernáculo ba' mi' la' tempan la' bʌ, mi caj i yʌq'ueñ jiñi motomaj.

¹⁵ Jiñi motomaj mi caj i yʌc' juncojt che' bajche' majtañʌl cha'añ i mul jiñi wiñic; jiñi yam bʌ mi yʌc' che' bajche' pulbil bʌ majtañʌl. Jiñi motomaj che'ʌch mi' sʌc-esan tic tojlel jiñi wiñic tsa' bʌ loq'ui i p'ʌtʌlel.”

¹⁶ “Che' ba' ora jiñi wiñic mi' loq'uel i p'ʌtʌlel i bʌc'tal, yom mi' cha'len ts'ʌmel, bi'bi' mi' cʌytʌl c'ʌlʌl mi yic'an.

¹⁷ Pejtelel pisil o pʌchi mu' bʌ i taj i pʌc' ti' p'ʌtʌlel i bʌc'tal jiñi wiñic, mi caj i pojquel ti ja', bi'bi' mi' cʌytʌl c'ʌlʌl mi yic'an.”

¹⁸ “Che' mi' pi'leñob i bʌ wiñic yic'ot x'ixic, yic'ot che' mi' loq'uel i p'ʌtʌlel i bʌc'tal, yom mi' cha'leñob ts'ʌmel, bi'bi' mi' cʌytʌlob c'ʌlʌl mi yic'an.”

¹⁹ “Che' mi' q'uel i c'am-ʌjel jiñi x'ixic, wucp'ejl q'uiñ yom mi' yajñel ti' bajñelil. Majqui jach mi' tʌl jiñi x'ixic, bi'bi' mi' cʌytʌl c'ʌlʌl mi yic'an.

²⁰ Pejtelel ya' ba' mi' ñoltʌl jiñi x'ixic che' woli' q'uel i c'am-ʌjel, bi'bi' mi' cʌytʌl. Che' ja'el baqui jach mi' buchtʌl, bi'bi' mi' cʌytʌl.

²¹ Majqui jach mi' tʌlben i wʌyib jiñi x'ixic, mi caj i wuts' i pislel yic'ot che' ujtemix ti ts'ʌmel, bi'bi' mi' cʌytʌl c'ʌlʌl mi yic'an.

²² Che' ja'el che' añ majqui mi' tʌl ba' tsa' buchle jiñi x'ixic, yom mi' wuts' i pislel; ti wi'il mi caj i cha'len ts'ʌmel, yic'ot bi'bi' mi' cʌytʌl c'ʌlʌl mi yic'an.

²³ Jiñi mu' bʌ i tʌl chuqui tac añ ti' wʌyib yic'ot chuqui tac añ ba' mi' buchtʌl, bi'bi' mi' cʌytʌl c'ʌlʌl mi yic'an.

²⁴ Mi añ wiñic mu' bʌ i ñoltʌl yic'ot jiñi x'ixic, mi tsi' pʌc'ʌ i c'am-ʌjel, bi'bi' mi' cʌytʌl wucp'ejl q'uiñ; yic'ot pejtelel wʌyibʌl ba' mi' wʌyel, bi'bi' mi' cʌytʌl.”

²⁵ “Che' añ juntiquil x'ixic mu' bʌ i chʌn q'uel i c'am-ʌjel che' ñumeñix i yorajlel bajche' mi' q'uel ti uw ti uw, o che' ma'añic mi' tijq'uel i c'am-ʌjel, bi'bi' mi' yajñel che' bajche' bi'bi' che' woli i q'uel i c'am-ʌjel.

²⁶ Pejtelel wʌyibʌl ba' mi' ñoltʌl jiñi x'ixic che' woli i q'uel i c'am-ʌjel, bi'bi' mi' cʌytʌl che' bajche' bi'bi' i wʌyib che' woli i q'uel i c'am-ʌjel yic'ot pejtelel ba' mi' buchtʌl, bi'bi' mi' cʌytʌl che' bajche' bi'bi' che' woli i q'uel i c'am-ʌjel.

²⁷ Majqui jach mi' tʌl jiñi wʌyibʌl yic'ot jiñi buchlibʌl, bi'bi' mi' cʌytʌl, yom mi' wuts' i pislel, yic'ot yom mi' cha'len ts'ʌmel, pero bi'bi' to mi' cʌytʌl c'ʌlʌl mi yic'an.”

²⁸ “Che' ujtemix i q'uel i c'am-ʌjel jiñi x'ixic, mi caj i tsic wucp'ejl q'uiñ, ti wi'il mux i q'uejlel ti sʌc.

²⁹ Che' ti' waxʌcp'ejlel q'uiñ yom mi' ch'ʌm tilel cha'cojt xpurwoc o cha'cojt x'ujcuts cha'añ mi' yʌq'ueñ jiñi motomaj ya' ti ti' jiñi Tabernáculo ba' mi la' tempan la' bʌ.

³⁰ Jiñi motomaj mi caj i yʌc' juncojt tsʌnsʌbil bʌ cha'añ i tojol mulil, jiñi yam bʌ mi caj i yʌc' che' bajche' pulbil bʌ majtañʌl. Che'ʌch jiñi motomaj mi caj i sʌc-esan tic tojlel jiñi x'ixic cha'añ i bi'bi'lel.”

³¹ “Che'ʌch yom ma' sʌc-esan jiñi israelob ti' bi'bi'lelob, cha'añ ma'añic mi' chʌmelob cha'añ ti' caj i bi'bi'lel cha'añ tsi' bi'b-esayob jiñi Tabernáculo am bʌ ti' tojlelob.”

³² Jiñʌch mandar cha'añ wiñic mu' bʌ i bi'b-esan i bʌ cha'añ ti' caj woli ti loq'uel i p'ʌtʌlel i bʌc'tal, cha'añ ti' caj iliyi bi'bi' mi' cʌytʌl;

³³ yic'ot cha'añ jiñi x'ixic woli bʌ i q'uel i c'am-ʌjel; yic'ot cha'añ jiñi wiñic mu' bʌ i loq'uel i p'ʌtʌlel i bʌc'tal o cha'añ jiñi wiñic mu' bʌ i wʌyel yic'ot x'ixic mach bʌ sʌquic.