Levitico 14 - Jiñi Tsiji' bʌ Wen T'añ cha'añ Estudio

¹ Lac Yum tsi' pejcan Moisés, tsi' su'be:

² “Jiñʌch mandar cha'añ jiñi am bʌ leco bʌ i tsoy che' mi' lajmel: Yom mi' pʌjyel majlel ba'añ motomaj.

³ Jiñi motomaj mi caj i majlel ti junwejl i ti' tejclum cha'añ mi' wen q'uel jiñi wiñic. Mi tsi' q'uele cha'añ lajmeñix jiñi leco bʌ i tsoy,

⁴ jiñi motomaj mi caj i choc ti ch'ʌmol cha'cojt cuxul to bʌ mut yic'ot sʌc bʌ ja'el, yic'ot yom mi' ch'ʌm i te'el ch'ujte' yic'ot chʌchʌc bʌ chij yic'ot hisopo cha'añ mi' sʌc-esʌntel jiñi wiñic tsa' bʌ lajmi.

⁵ Jiñi motomaj mi caj i yʌc' ti tsʌnsʌntel juncojt mut ti' mal jump'ejl p'ejt melbil bʌ ti lum ba' woli ti ajñel ja'.

⁶ Ti wi'il mi' ch'ʌm jiñi cuxul to bʌ mut, yic'ot jiñi ch'ujte' yic'ot jiñi chʌchʌc bʌ chij yic'ot jiñi hisopo, mi caj i laj ts'aj ti' ch'ich'el jiñi chʌmeñix bʌ mut tsa' bʌ tsʌnsʌnti ba' woli ti ajñel jiñi ja'.

⁷ Wucyajl mi caj i tsijcan jiñi ch'ich' ti' pam i bʌc'tal jiñi wiñic tsa' bʌ lajmi leco bʌ i tsoy. Jiñi motomaj mi caj i tsictesan lajmeñix. Che' jiñi yom mi' cha' col jiñi cuxul to bʌ mut cha'añ mi' cha' wejlel majlel ti mate'el.”

⁸ “Jiñi wiñic tsa' bʌ lajmi mi caj i wuts' i pislel, mi caj i jujchin pejtelel i tsutsel i bʌc'tal, mi caj i cha'len ts'ʌmel, che' jiñi sʌc mi' cʌytʌl. Ti wi'il mi caj i cha' ochel ti' mal jiñi tejclum, pero yom to mi' ñumel wucp'ejl q'uiñ cha'añ mi' cha' ochel ti yotot.

⁹ Che' ti' wucp'ejlel q'uiñ mi caj i jujchin i tsutsel i jol yic'ot i tsucti' yic'ot i mʌtsablel i wut, jiñʌch yom i yʌl pejtelel i tsutsel; mi caj i wuts' i pislel yic'ot mi caj i cha'len ts'ʌmel, che' jiñi sʌc mi' cʌytʌl.

¹⁰ Che' ti' waxʌcp'ejlel q'uiñ mi caj i pʌy tilel cha'cojt tat tʌñʌme', mach bʌ wis añic i c'am-ʌjel mi i lojwemal, yic'ot juncojt xch'oc tʌñʌme' am bʌ jump'ejl i ja'bilel mach bʌ wis añic i c'am-ʌjel mi i lojwemal, yic'ot wʌcp'ejl kilo harina wen juch'bil bʌ trigo xajc'ubil bʌ ti olivo aceite, yic'ot ojlil litro olivo aceite.

¹¹ Jiñi motomaj mu' bʌ caj i sʌc-esan jiñi wiñic mi caj i yʌc' ti' tojlel lac Yum yic'ot pejtelel woli bʌ i yʌc' jiñi wiñic ya' ti ti' jiñi Tabernáculo ba' mi' tempañob i bʌ.

¹² Jiñi motomaj mi caj i ch'ʌm juncojt tat tʌñʌme' mi caj i yʌc' cha'añ i tojol i mul jiñi wiñic yic'ot ojlil litro olivo aceite, mi caj i jʌmts'un che' bajche' ofrenda jʌmts'ubil bʌ ti' tojlel lac Yum.

¹³ Mi caj i tsʌnsan jiñi tʌñʌme' ba' mi' tsʌnsʌntel jiñi alʌc'ʌl cha'añ i tojol mulil yic'ot mu' bʌ i laj pulel, ya' ti Tabernáculo. Come jiñi majtañʌl cha'añ i tojol mulil yic'ot jiñi majtañʌl cha'añ i ñusʌntel mandar i cha'añʌch motomaj. Jiñʌch wen ch'ujul bʌ majtañʌl.”

¹⁴ “Ti wi'il jiñi motomaj mi caj i ch'ʌmben i ch'ich'el jiñi tʌñʌme' cha'añ i ñusʌntel mandar, mi caj i bomben ya' ti' c'unlel ñoj bʌ i chiquin jiñi woli bʌ i sʌc-esʌntel, yic'ot ya' ti ñoj bʌ i ña'al i c'ʌb yic'ot ja'el ti ñoj bʌ i ña'al i yoc.

¹⁵ Che' ja'el jiñi motomaj mi caj i ch'ʌm olivo aceite, mi caj i je'b ti' mal ts'ej bʌ i c'ʌb,

¹⁶ mi caj i yʌch'esan jiñi ñoj bʌ i yal i c'ʌb ti olivo aceite am bʌ ti ts'ej bʌ i c'ʌb, mi caj i tsijcan wucyajl ti' tojel lac Yum.

¹⁷ Jiñi olivo aceite mu' bʌ i cʌytʌl ti' mal i c'ʌb jiñi motomaj, mi caj i bomben ti' c'unlel ñoj bʌ i chiquin yic'ot ti ñoj bʌ i ña'al i c'ʌb yic'ot ti ñoj bʌ i ña'al i yoc jiñi wiñic, ya' ti' pam jiñi ch'ich' tsa' bʌ bombenti cha'añ i ñusʌntel mandar.

¹⁸ I colojbal jiñi olivo aceite tsa' bʌ cʌle ti' c'ʌb, mi caj i bomben ti' jol jiñi woli bʌ ti sʌc-esʌntel. Che'ʌch mi caj i mel jiñi motomaj ti' tojel lac Yum cha'añ i tojol i mul jiñi wiñic.

¹⁹ Wi'ilix jiñi motomaj mi caj i yʌc' jiñi majtañʌl cha'añ mi' ñusʌbentel i mul jiñi wiñic, cha'añ sʌquix mi' cʌytʌl ti' bi'bi'lel; ti wi'il mi caj i tsʌnsan jiñi majtañʌl mu' bʌ i pulel,

²⁰ yic'ot mi caj i pul jiñi pulbil bʌ majtañʌl yic'ot jiñi trigo bʌ majtañʌl ya' ti' pulʌntib. Che'ʌch mi caj i mel jiñi motomaj cha'añ i ñusʌntel i mul jiñi wiñic, che' jiñi sʌc-esʌbilix mi' cʌytʌl.”

²¹ “Mi p'ump'un jiñi wiñic, mi mach jasʌlic cha'añ mi' mʌn jiñi yom bʌ, che' jiñi mi caj i pʌy tilel juncojt alʌ tat tʌñʌme' cha'añ mi yʌc' che' bajche' majtañʌl mu' bʌ i jʌmts'untel cha'añ i ñusʌntel mandar cha'añ mi' taj i ñusʌntel i mul yic'ot yom cha'p'ejl kilo wen juch'bil bʌ harina xajc'ubil bʌ yic'ot olivo aceite cha'añ jiñi majtañʌl yic'ot ojlil litro olivo aceite,

²² che' ja'el yom mi' ch'ʌm tilel cha'cojt xpurwoc o cha'cojt x'ujcuts, che' bajche' mi' mejlel i cha'añ; juncojt cha'añ i ñusʌntel i mul, jiñi yam bʌ jiñʌch cha'añ pulbil bʌ majtañʌl.

²³ Che' waxʌcp'ejlelix q'uiñ i sʌc-esʌntel jiñi wiñic, mi caj i ch'ʌmben tilel jiñi motomaj pejtelel iliyi ya' ti ti' jiñi Tabernáculo ba' mi la' tempan la' bʌ tic tojlel.

²⁴ Jiñi motomaj mi caj i ch'ʌm jiñi tʌñʌme' cha'añ i tojol i ñusʌntel mandar yic'ot ojlil litro olivo aceite, mi caj i jʌmts'un ti' tojel jiñi pulʌntib che' bajche' jʌmts'ubil bʌ majtañʌl tic tojlel.

²⁵ Ti wi'il jiñi motomaj mi caj i tsʌnsan jiñi tʌñʌme' cha'añ i ñusʌntel mandar, mi caj i ch'ʌmben i ch'ich'el cha'añ mi' bomben ti' c'unlel ñoj bʌ i chiquin jiñi wiñic mu' bʌ i sʌc-esʌntel yic'ot ti ñoj bʌ i ña'al i c'ʌb yic'ot ti ñoj bʌ i ña'al i yoc.

²⁶ Jiñi motomaj mi caj i je'b olivo aceite ti' mal ts'ej bʌ i c'ʌb,

²⁷ yic'ot i yal ñoj bʌ i c'ʌb mi caj i tsijcan jiñi olivo aceite am bʌ ti' ts'ej bʌ i c'ʌb, wucyajl mi caj i tsijcan tic tojlel.

²⁸ Che' ja'el jiñi motomaj mi caj i c'ʌn jiñi olivo aceite am bʌ ti' c'ʌb cha'añ mi' bomben i c'unlel ñoj bʌ i chiquin jiñi wiñic woli bʌ i sʌc-esan i bʌ yic'ot i ña'al ñoj bʌ i c'ʌb yic'ot i ña'al ñoj bʌ i yoc, ya' ti' pam ba' tsi' yʌq'ue i ch'ich'el jiñi majtañʌl.

²⁹ Jiñi olivo aceite mu' bʌ i colojbajel ti' c'ʌb jiñi motomaj, mi caj i bomben i jol jiñi wiñic woli bʌ i sʌc-esʌntel, cha'añ mi' ñusʌbentel i mul tic tojlel.

³⁰ Che' ja'el mi caj i yʌc' juncojt xpurwoc o juncojt x'ujcuts, che' bajche' mi' mejlel i cha'añ;

³¹ juncojt cha'añ i ñusʌntel mulil, jiñi yam bʌ cha'añʌch pulbil bʌ majtañʌl yic'ot trigo bʌ majtañʌl. Che'ʌch mi caj i mel jiñi motomaj ti' tojlel jiñi mu' bʌ caj i sʌc-esʌntel tic tojlel.”

³² Jiñʌch mandar cha'añ jiñi año' bʌ leco bʌ i tsoy che' mach jasʌlic jiñi majtañʌl cha'añ i sʌc-esʌntel.

³³ Che' ja'el lac Yum tsi' su'be Moisés yic'ot Aarón, tsi' yʌlʌ:

³⁴ “Che' ochemetixla ya' ti Canaán, ti jiñi lum mu' bʌ caj cʌq'ueñetla, mi tsa' cotsʌbe i cuxemal la' wotot ya' ti la' lum,

³⁵ jiñi am bʌ i cuxemal i yotot mi caj i majlel i tsictesʌben jiñi motomaj, mi caj i su'ben: Añ i cuxemal cotot yilal.”

³⁶ “Jiñi cha'añ jiñi motomaj mi caj i yʌc' ti ñaxan jochtesʌntel jiñi otot cha'añ mi' wen q'uelben i cuxemal, cha'añ ma'añic mi' laj toy jiñi am bʌ ti otot. Ti wi'il jiñi motomaj mi caj i yochel i wen q'uel.”

³⁷ “Mi tsi' q'uele jiñi motomaj laj pʌjq'uem i ñʌc' jiñi ts'ajc ya' ti' mal jiñi otot, mi yʌx quich'an o mi chʌc quich'an, mi tsa' tam-a ochel ti jiñi ts'ajc,

³⁸ jiñi motomaj mi' loq'uel ya' ti otot, mi caj i ñup' wucp'ejl q'uiñ.

³⁹ Che' ti' wucp'ejlel q'uiñ jiñi motomaj mi caj i cha' tilel cha'añ mi' cha' wen q'uel; mi tsa'ix pam pujqui i cuxemal ya' ti ts'ajc ya' ti' mal otot,

⁴⁰ che' jiñi, jiñi motomaj mi caj i su'beñob cha'añ mi' loc'sañob jiñi xajlel am bʌ i cuxemal, yom mi' chocob loq'uel ti' pat jiñi tejclum ba' mi' chojquel misujelʌl.

⁴¹ Ti wi'il mi caj i yʌc' ti jujchintel ti pejtelel i mal otot, mi caj i chojquel loq'uel pejtelel i bi'bi'lel ya' ti' pat jiñi tejclum ya' ba' mi' chojquel chuqui tac bi'bi'.

⁴² Che' jiñi mi caj i ch'ʌm yam bʌ xajlel tac cha'añ mi yʌc' ti' q'uexol jiñi xajlel tsa' bʌ loc'sʌnti, che' jiñi mi caj i ch'ʌm oc'ol cha'añ mi' cha' bojñel ti tsijib jiñi otot.”

⁴³ “Mi tsa' cha' loq'ui i cuxemal jiñi otot che' bʌ tsa'ix i loc'sa jiñi xajlel yic'ot che' bʌ tsa'ix i jujchi jiñi otot, yic'ot che' bʌ tsa'ix i cha' boño ti tsijib,

⁴⁴ che' jiñi, jiñi motomaj mi caj i cha' ochel i q'uel; mi tsi' q'uele tsa' utsi p'ojli i cuxemal tac ya' ti' mal jiñi otot, che' jiñi, jiñʌch jiñi leco bʌ i cuxemal. Bi'bi'ix mi' cʌytʌl jiñi otot.

⁴⁵ Jiñi otot mi caj i jejmel. Pejtelel i xajlelal, i te'el yic'ot i ts'ajquil, mi caj i laj chojquel loq'uel ti ti' jiñi tejclum ya' ba' mi' chojquel chuqui tac bi'bi'.

⁴⁶ Majqui jach mi' yochel ti jiñi otot che' ñup'ul, bi'bi' mi' cʌytʌl c'ʌlʌl mi yic'an.

⁴⁷ Majqui jach mi' wʌyel ya' ti otot la' i wuts' i pislel; che' ja'el majqui jach mi' c'ux i waj ya'i, la' i wuts' i pislel.”

⁴⁸ “Pero mi tsa' ochi jiñi motomaj cha'añ mi' wen q'uel, mi ma'añic tsa' wen pujqui i cuxemal ya' ti otot che' bʌ cha' ujtemix ti bojñel, jiñi motomaj mi caj i tsictesan sʌcʌch jiñi otot, come tsa'ix jili i cuxemal.

⁴⁹ Cha'añ i sʌc-esʌntel jiñi otot, yom cha'cojt xwejlel mut, yic'ot ch'ujte', yic'ot chʌchʌc bʌ chij, yic'ot hisopo;

⁵⁰ mi caj i tsʌnsan juncojt xwejlel mut ti' mal jump'ejl p'ejt ba'añ ja' woli bʌ ti ajñel.

⁵¹ Mi caj i ts'aj jiñi ch'ujte' yic'ot jiñi hisopo yic'ot jiñi chʌchʌc bʌ chij yic'ot jiñi cuxul to bʌ mut ya' ti' ch'ich'el jiñi mut tsa' bʌ tsʌnsʌnti ya' ti ja' woli bʌ ti ajñel, mi caj i tsijcan wucyajl jiñi otot.

⁵² Che'ʌch mi caj i sʌc-esʌntel jiñi otot yic'ot i ch'ich'el xwejlel mut yic'ot jiñi ja' woli bʌ ti ajñel, yic'ot jiñi cuxul to bʌ mut yic'ot jiñi ch'ujte', jiñi hisopo yic'ot jiñi chʌchʌc bʌ chij.

⁵³ Ti wi'il mi caj i col jiñi cuxul to bʌ xwejlel mut ya' ti' pat jiñi tejclum cha'añ mi' majlel ti mate'el. Che'ʌch mi' sʌc-esʌntel jiñi otot, che' jiñi sʌc mi' cʌytʌl.”

⁵⁴ Jiñʌch mandar cha'añ leco bʌ tsoy yic'ot yan tac bʌ tsoy,

⁵⁵ yic'ot i cuxemal la' pislel yic'ot la' wotot,

⁵⁶ yic'ot che' mi' sijt'el la' pʌchʌlel yic'ot che' añ la' tsoy tac, yic'ot che' añ ba' sʌcpetepet ti la' pʌchʌlel,

⁵⁷ jiñʌch cha'añ la' cʌntesʌntel cha'añ mi la' cʌñ jiñi bi'bi' bʌ yic'ot jiñi sʌc tac bʌ. Jiñʌch mandar cha'añ leco bʌ tsoy yic'ot i cuxemal otot o lac pislel.