Levitico 13 - Jiñi Tsiji' bʌ Wen T'añ cha'añ Estudio

Mandar che' añ leco bʌ tsoy

¹ Lac Yum tsi' pejca Moisés yic'ot Aarón, tsi' su'be:

² “Che' mi' sijt'el i pʌchʌlel wiñic, mi leselix ti' pʌchʌlel, mi tsa' coli i chʌcajl tac o sʌc petepet bʌ ti' pʌchʌlel, bʌ'bʌq'uen mi' tejchel leco bʌ i tsoy; yom mi' pʌjyel majlel ba'añ Aarón jiñi motomaj, o ti' tojlel i yalobilob.

³ Jiñi motomaj mi caj i q'uelben i tsoy ti' bʌc'tal; mi sʌsʌquix tsa' sujti i tsutsel ya' ti' pʌchʌlel, mi tsa'ix jili majlel i bʌc'tal ti' tsoy, che' jiñi lecojix bʌ tsoy. Jiñi motomaj mi caj i cʌñ che' jiñi mux i tsictesan cha'añ bi'bi'ix jiñi wiñic.”

⁴ “Pero mi to'o sʌc petan jaxto i pʌchʌlel i bʌc'tal, o mi ma'añic woli i jilel majlel i bʌc'tal, yic'ot mi mach sʌsʌquic woli' majlel i tsutsel, che' jiñi, jiñi motomaj mi caj i ñup' wucp'ejl q'uiñ.

⁵ Che' ti' wucp'ejlel q'uiñ jiñi motomaj mi caj i cha' q'uel, mi yic'ol jach i tsoy, mi ma'añic woli' pam pujquel ti pejtelel i pʌchʌlel, jiñi cha'añ jiñi motomaj mi caj i cha' ñup' yam bʌ wucp'ejl q'uiñ.

⁶ Che' ti wucp'ejlel q'uiñ yom mi' cha' q'uel jiñi motomaj bajche' yilal. Mi tsa'ix sʌc jili jiñi leco bʌ i tsoy, mi ma'añic tsa' pam pujqui ti' pʌchʌlel, che' jiñi añ ti' wenta jiñi motomaj cha'añ mi' tsictesan sʌquix jiñi wiñic: Jiñi tsoy tsa' bʌ i taja jiñʌch sac'an pʌchʌlel. Yom mi' wuts' i pislel, che' jiñi sʌc mi' cʌytʌl.”

⁷ “Pero mi ñumeñix tsa' p'ojli i tsoy che' bajche' ti ñaxan che' bʌ tsi' pʌsʌ i bʌ ti' tojlel jiñi motomaj cha'añ mi' q'uel mi lajmeñix, yom mi' cha' pʌs i bʌ ti' tojlel jiñi motomaj.

⁸ Che' mi' cha' q'uel jiñi motomaj, mi tsi' q'uele tsa'ix utsi pam pujqui ti pejtelel i pʌchʌlel, mi caj i tsictesan cha'añ bi'bi'ix jiñi wiñic: come añ leco bʌ i tsoy.”

⁹ “Che' mi' pasel leco tac bʌ i tsoy jiñi wiñic, yom mi' pʌjyel majlel ba'añ jiñi motomaj.

¹⁰ Jiñi motomaj mi caj i wen q'uel mi jiñʌch leco bʌ tsoy am bʌ ti' pʌchʌlel, mi wolix i sʌc'an i tsutsel i pʌchʌlel o mi woli i jilel majlel i bʌc'tal ti' tsoy,

¹¹ jiñʌch jontol bʌ tsoy am bʌ ti' pʌchʌlel. Jiñi motomaj mi caj i tsictesan cha'añ bi'bi'ix jiñi wiñic, ma'añix mi' chʌn ac' ti ñujp'el come bi'bi'ix.”

¹² “Pero mi jiñi leco bʌ tsoy tsa' utsi caji ti p'ojlel ti pamol i pʌchʌlel, mi tejchem c'ʌlʌl ti jol c'ʌlʌl ti' yoc, c'ʌlʌl baqui jaxʌl mi q'uel jiñi motomaj,

¹³ che' jiñi mi caj i tsictesan cha'añ c'oq'uix jiñi am bʌ leco bʌ i tsoy, come laj sʌsʌquix i pʌchʌlel, tsa'ix lajmi.

¹⁴ Pero mi' yic'ol jach cuxul i tsoy ti' bʌc'tal, bi'bi' mi' cʌytʌl jiñi wiñic.

¹⁵ Jiñi motomaj mi caj i wen q'uelben i tsoyil i bʌc'tal, mi caj i tsictesan ti bi'bi' jiñi wiñic come añʌch leco bʌ i tsoy.”

¹⁶ “Pero ba' ora mi cha' q'uextʌyel ti sʌsʌc i pʌchʌlel ba'añ i tsoy, che' jiñi yom mi' cha' pʌs i bʌ ba'añ jiñi motomaj,

¹⁷ che' mi' wen q'uel jiñi motomaj, mi tsa'ix junyajlel lajmi i pʌchʌlel, yom mi' cha' tsictesan cha'añ lajmeñix jiñi wiñic am bʌ leco bʌ i tsoy che' jiñi sʌquix mi' cʌlel.”

¹⁸ “Che' ba ora añ juntiquil am bʌ i tsoy ti' pʌchʌlel, pero ora jach mi' lajmel,

¹⁹ pero mi sit'il o mi sʌc petan o mi chʌc petan, yom mi' pʌsbentel jiñi motomaj.

²⁰ Jiñi motomaj mi caj i wen q'uel; mi tsa'ix utsi p'ojli majlel ti' pʌchʌlel yic'ot mi sʌsʌquix tsa' majli i tsutsel i pʌchʌlel, jiñi motomaj mi caj i tsictesan cha'añ bi'bi'ix, come añ i cha'añ leco bʌ tsoy.

²¹ Pero mi jiñi motomaj tsi' q'uele ma'añic tsiquil sʌsʌc bʌ i tsutsel, yic'ot mi ma'añic woli i colel majlel ti' bʌc'tal cojach cha'añ i'ic', che' jiñi, jiñi motomaj mi caj i ñup' wucp'ejl q'uiñ.

²² Pero mi tsa' utsi caji ti pujquel majlel ti' pʌchʌlel, jiñi motomaj mi caj i tsictesan bi'bi' jiñi wiñic: jiñʌch leco bʌ tsoy.

²³ Pero mi sʌc petan jach i pʌchʌlel yic'ot ma'añic tsa' pam pujqui majlel ti' pʌchʌlel, i yejtal jax i tsoy; jiñi motomaj mi caj i tsictesan cha'añ sʌquix.”

²⁴ “Che' ja'el che' añ majqui mi' pulel i bʌc'tal ti c'ajc, mi tsa' cʌle i yejtal ba' tsa' puli, mi sʌc petan, mi chʌchʌc o sʌsʌc,

²⁵ la' i wen q'uel jiñi motomaj. Mi sʌsʌquix tsa' sujti i tsutsel ba' tsa' puli, mi woli' tam-añ ochel i tsoy, jiñʌch leco bʌ tsoy tsa' bʌ i taja ti pulel. Jiñi motomaj mi caj i tsictesan cha'añ bi'bi'ix jiñi wiñic come añ i cha'añ leco bʌ tsoy.

²⁶ Pero che' mi' q'uel jiñi motomaj, mi mach sʌsʌquic tsa' cʌle i tsutsel ya' ba' tsa' puli, mi ma'añic tsa' tam-a ochel i tsoy, cojach cha'añ ic'petañ tsa' cʌle; jiñi motomaj yom mi' ñup' wucp'ejl q'uiñ.

²⁷ Che' ti' wucp'ejlel q'uiñ jiñi motomaj mi caj i cha' q'uel bajche' yilal; mi tsa' utsi pujqui ti' pʌchʌlel, jiñi motomaj mi caj i tsictesan cha'añ bi'bi'ix jiñi wiñic: come añ i cha'añ leco bʌ tsoy.

²⁸ Pero mi ma'añix tsa' pujqui majlel i tsoy ti' pʌchʌlel, i yejtal jax tsa' cʌle ba' tsa' puli. Jiñi motomaj mi caj i tsictesan sʌquix jiñi wiñic, come i yejtal jax i pulel añ yic'ot.”

²⁹ “Mi añ juntiquil wiñic o juntiquil x'ixic mu' bʌ i pasel i tsoy ti' jol o ti' tsucti',

³⁰ jiñi motomaj mi caj i wen q'uel bajche' yilal i tsoy. Mi tsi' q'uele tam i tsoy ti' bʌc'tal, mi c'ʌnc'ʌñix woli i majlel i tsutsel yic'ot ya' wen biq'uitix, jiñi cha'añ jiñi motomaj mi caj i tsictesan bi'bi'ix jiñi wiñic: jiñʌch leco bʌ tsoy jiñi am bʌ ti' jol o ti' tsucti'.

³¹ Che' ujtemix i wen q'uel jiñi motomaj, mi tsi' q'uele ya' jach añ ti' pʌchʌlel, ma'añic tsa' tam-a majlel i tsoy yic'ot mi mach i'ic' i tsutsel ya' ti' pʌchʌlel, che' jiñi mi caj i ñup' wucp'ejl q'uiñ jiñi am bʌ i tsoy.

³² Jiñi motomaj mi caj i cha' q'uel che' ti' wucp'ejlel q'uiñ, mi ma'añic tsa' chʌn pujqui majlel i tsoy, mi mach c'ʌnc'ʌñic tsa' majli i tsutsel, yic'ot mi mach tamic tsa' majli i tsoy ti' bʌc'tal,

³³ jiñi cha'añ mi caj i yʌc' ti tsejpel i tsutsel, cojach ya' ba'añ i tsoy ma'añic mi' tsepben i tsutsel; jiñi motomaj mi caj i ñup' yam bʌ wucp'ejl q'uiñ jiñi am bʌ i tsoy.

³⁴ Che' ti' wucp'ejlel q'uiñ jiñi motomaj mi caj i cha' wen q'uelben i tsoy, mi ma'añic tsa' pujqui majlel i tsoy ti' pʌchʌlel yic'ot mach tamic i tsoyil, jiñi motomaj mi caj i tsictesan sʌquix jiñi wiñic o x'ixic; mi caj i wuts' i pislel che' jiñi sʌquix mi' cʌytʌl.

³⁵ Pero mi tsa' pujqui majlel i tsoy ti' pʌchʌlel che' bʌ tsa'ix sujbi cha'añ sʌquix jiñi wiñic o x'ixic,

³⁶ jiñi cha'añ jiñi motomaj mi caj i cha' q'uelben i tsoy, mi tsa' utsi pujqui majlel ti' pʌchʌlel; jiñi motomaj ma'añix mi caj i chʌn q'uelben mi c'ʌnc'ʌñix i tsutsel, la' i tsictesan bi'bi'ix jiñi wiñic o x'ixic

³⁷ Pero mi' yejtal i tsoy junsujm jach añ, yic'ot woli i cha' colel i'ic' bʌ i tsutsel, che' jiñi lajmeñix; jiñi motomaj mi caj i tsictesan cha'añ tsa'ix lajmi yic'ot sʌquix ja'el jiñi wiñic o x'ixic.”

³⁸ “Che' ja'el mi añ juntiquil wiñic o mi juntiquil x'ixic añ sʌc petepet bʌ ti' pʌchʌlel,

³⁹ jiñi motomaj mi caj i wen q'uel, mi mach wen sʌsʌquic i tsoy, jiñʌch tsoy mach bʌ jontolic tsa' bʌ pasi ti' pʌchʌlel: che' jiñi sʌquix jiñi wiñic o x'ixic.”

⁴⁰ “Mi añ juntiquil wiñic tsa' bʌ bojqui i tsutsel i jol, mi xpiri jol tsa' cʌle, sʌcʌch jiñi wiñic.

⁴¹ Mi tsa' bojqui i tsutsel i pam, sʌcʌch jiñi wiñic.

⁴² Pero mi ya' ba' ma'añix i tsutsel i jol añ ts'ita' i tsoyil, mi sʌsʌc, mi chʌchʌc, jiñʌch leco bʌ tsoy woli bʌ i cajel.

⁴³ Che' ja'el, jiñi motomaj mi caj i wen q'uel. Mi añ ts'ita' i tsoyil ya' ti' jol, mi sʌsʌc, mi chʌchʌc, o mi jontol yilal,

⁴⁴ awilan jiñʌch leco bʌ tsoy. Jiñi motomaj mi caj i tsictesan cha'añ bi'bi', come añ i tsoyil ya' ti' jol.”

⁴⁵ Jiñi am bʌ leco bʌ i tsoy yom mi' lʌp tsijlemix bʌ i bujc yic'ot mach yomic mosbil i jol. Che' ts'ita' mosbil i wut mi caj i yʌl ti c'am bʌ t'añ: “¡Bi'bi'oñix! ¡Bi'bi'oñix!”

⁴⁶ Ti pejtelel ora che' añ to leco bʌ i tsoy, bi'bi' mi yajñel yic'ot mi' bajñel chumtʌl ti' pat jiñi tejclum.

⁴⁷ “Mi añ i cuxemal bujcʌl melbil bʌ ti lino o melbil bʌ ti' tsutsel tʌñʌme',

⁴⁸ o jalbil bʌ ti lino o ti' tsutsel tʌñʌme', o ti pʌchi, o ti baqui jach bʌ pʌchi,

⁴⁹ mi yʌxquich'an o mi chʌcquich'an jiñi pisil o ti pʌchi, o ti jiñi jalbil bʌ pisil, o ti baqui jach bʌ pʌchi, jiñʌch i yejtal leco bʌ i cuxemal, jiñi cha'añ wersa yom mi' pʌsbentel jiñi motomaj.

⁵⁰ Jiñi motomaj mi caj i wen q'uel bajche' yilal jiñi i cuxemal, mi caj i yʌc' ti ñujp'el wucp'ejl q'uiñ.

⁵¹ Che' ti' wucp'ejlel q'uiñ mi caj i cha' wen q'uel, mi tsa' utsi pujqui i cuxemal ya' ti bujcʌl, o ya' ti jalbil bʌ pisil, o ya' ti pʌchi o chuqui jach melbil bʌ ti pʌchi, che' jiñi jiñʌch jontol bʌ i cuxemal: jiñi añ tac bʌ ya'i bi'bi' mi' cʌytʌl.

⁵² Mi caj i pulel jiñi bujcʌl, mi jalbil bʌ pisil o lino, o chuqui jach melbil bʌ ti pʌchi am bʌ i cuxemal, come jiñʌch jontol bʌ i cuxemal, jiñi cha'añ yom mi' pulel ti c'ajc.

⁵³ Pero mi tsi' q'uele jiñi motomaj, ma'añix tsa' chʌn pujqui i cuxemal ya' ti bujcʌl o ya' ti jalbil bʌ pisil o ti chuqui jach melbil bʌ ti pʌchi,

⁵⁴ che' jiñi, jiñi motomaj mi caj i yʌc' ti wujts'el o pojquel ya' ba'añ i cuxemal, che' jiñi mi caj i cha' ñup' yam bʌ wucp'ejl q'uiñ.”

⁵⁵ “Ti wi'il che' bʌ wuts'bilix o che' pocbilix i cuxemal, jiñi motomaj mi caj i cha' wen q'uel, mi tsi' q'uele ma'añic tsa' q'uextʌyi i cuxemal, anquese ma'añic tsa' pujqui majlel; jiñi am bʌ i cuxemal bi'bi' mi' cʌytʌl, che' jiñi yom mi' pulel ti c'ajc, come wen toybilix i cha'añ.

⁵⁶ Pero mi tsi' q'uele jiñi motomaj tsa' ts'ita' jili i cuxemal che' bʌ tsa'ix wujts'i o pojqui, mi caj i tsep loq'uel i cuxemal ya' ti bujcʌl o ya' ti pʌchi o ti jalbil bʌ pisil.

⁵⁷ Pero mi tsa' cha' caji ti tsictiyel i cuxemal ya' ti bujcʌl, o ya' ti jalbil bʌ pisil o chuqui jach melbil bʌ ti pʌchi, mi tsa' caji ti pujquel majlel, mi caj i pulel ti c'ajc.

⁵⁸ Pero mi ma'añix tsa' chʌn tsictiyi che' wuts'bilix jiñi bujcʌl o jiñi jalbil bʌ pisil o che' pocbilix chuqui tac jach melbil bʌ ti pʌchi, yom mi' cha' wujts'el o mi' cha' pojquel ti' cha'yajlel, che' jiñi sʌquix mi' cʌytʌl.”

⁵⁹ Iliyi jiñʌch mandar cha'añ jiñi leco tac bʌ i cuxemal mu' bʌ i loq'uel ti bujcʌl melbil bʌ ti' tsutsel tʌñʌme' o melbil bʌ ti lino bʌ pisil, o ti jalbil bʌ pisil o chuqui tac jach melbil bʌ ti pʌchi, cha'añ mi' tsictiyel mi sʌc o mi bi'bi'.