Levitico 12 - Jiñi Tsiji' bʌ Wen T'añ cha'añ Estudio

I sʌc-esʌntel x'ixic che' mi yilan pañimil i yalobil

¹ Lac Yum tsi' pejca Moisés, tsi' su'be:

² “Pejcan jiñi israelob, su'beñob: Jiñi x'ixic che' mi yʌc' ti pañimil ch'itoñ bʌ i yalobil, wucp'ejl q'uiñ bi'bi' mi caj i q'uejlel che' bajche' ba' ora mi' q'uel i c'am-ʌjel.

³ Che' ti' waxʌcp'ejlel q'uiñ yom mi' tsepbentel i pʌchʌlel jiñi alʌ ch'itoñ.

⁴ Pero jiñi x'ixic yom mi yajñel uxlujump'ejl i cha'c'al (33) q'uiñ cha'añ mi' sʌc-esan i bʌ. Mach yomic mi' tʌl chuqui tac ch'ujul, mach yomic mi' majlel ti Tabernáculo, jinto mi' ts'ʌctiyel jiñi q'uiñ cha'añ mi' sʌc-esan i bʌ.

⁵ Mi xch'oc i yalobil mu' bʌ i yʌc' ti pañimil, cha'p'ejl semana mi caj i q'uejlel ti bi'bi' che' bajche' mi' q'uel i c'am-ʌjel ti uw ti uw. Yom yam bʌ wʌcp'ejl i chʌnc'al (66) q'uiñ ti pejtelel cha'añ mi' sʌc-esan i bʌ.”

⁶ “Che' ts'ʌctiyemix jiñi q'uiñ che' mi' sʌc-esan i bʌ cha'añ i yalobil, mi ch'itoñ mi xch'oc, la' i pʌy majlel ti' ti' Tabernáculo ba' mi la' tempan la' bʌ juncojt alʌ tʌñʌme' am bʌ jump'ejl i ja'bilel cha'añ pulbil bʌ c majtañ, yic'ot juncojt x'ujcuts o juncojt xpurwoc cha'añ i ñusʌntel mulil.

⁷ Jiñi motomaj mi caj i yʌq'ueñon c majtañ cha'añ i mul jiñi x'ixic. Che' jiñi mi' taj i sʌc-esʌntel cha'añ i c'am-ʌjel.” Jiñʌch ili mandar che' añ majqui mi' yʌc' ti pañimil i yalobil mi ch'itoñ o mi xch'oc.

⁸ Mi ma'añic ca'bʌl i taq'uiñ cha'añ mi' mʌn juncojt tʌñʌme', la' i pʌy tilel cha'cojt x'ujcuts o cha'cojt xpurwoc. Juncojt mi caj i yʌc' cha'añ pulbil bʌ c majtañ, jiñi yam bʌ mi caj i yʌc' cha'añ i mul. Jiñi motomaj mi caj i yʌq'ueñon ili majtañʌl tac cha'añ i ñusʌntel i mul, che' jiñi sʌc mi' cʌytʌl.