Levitico 10 - Jiñi Tsiji' bʌ Wen T'añ cha'añ Estudio

I mul Nadab yic'ot Abiú

¹ Nadab yic'ot Abiú, i yalobilob Aarón, ti jujuntiquil tsi' ch'ʌmʌyob i yajñib pom, che' jiñi tsi' tsuc'uyob c'ajc ya' ti yajñib pom, tsi' yotsayob pom ya' ti' pam c'ajc, tsi' tsuc'uyob c'ajc ti' tojlel lac Yum mach bʌ albilic i cha'añ.

² Jiñi cha'añ tsa' loq'ui tilel c'ajc ba'añ lac Yum cha'añ mi' pulob, che' jiñi tsa' chʌmiyob ti' tojlel lac Yum.

³ Moisés tsi' su'be Aarón: Jiñʌch tsa' bʌ i yʌlʌ lac Yum: “Jiñi mu' bʌ i lʌc'tesañob i bʌ, wersa mi' q'ueloñob ti ch'ujul. Wersa mi cʌq'uentel c ñuclel ti' tojlelob wiñicob x'ixicob.” Che' jiñi ñʌch'ʌl tsa' cʌle Aarón.

⁴ Ti wi'il Moisés tsi' pʌyʌ tilel Misael yic'ot Elzafán i yalobilob Uziel jiñi i yumijel Aarón, tsi' su'beyob: “Yom mi la' majlel la' loc'san jiñi chʌmeñ bʌ ya' ti Tabernáculo, ch'ʌmʌla majlel ya' ti' junwejlel jiñi tejclum.”

⁵ Che' jiñi tsa' majli i ch'ʌmob loq'uel jiñi chʌmeñ bʌ yic'ot i pislel, tsi' ch'ʌmʌyob majlel ya' ti' junwejlel jiñi tejclum che' bajche' tsi' yʌlʌ Moisés.

⁶ Che' jiñi Moisés tsi' su'be Aarón yic'ot jiñi cha'tiquil i yalobilob, Eleazar yic'ot Itamar: “Mach yomic mi la' loc'san i pislel la' jol, mach mi la' tsil la' pislel i yejtal la' ch'ijiyemlel, ame chʌmiquetla ja'el, ame mich'lenticob pejtelel israelob ti' tojlel Dios. Pero la' i cha'leñob uq'uel yaño' bʌ israelob cha'añ tsa' chʌmiyob Nadab yic'ot Abiú che' bʌ tsi' choco tilel lac Yum jiñi bʌ'bʌq'uen bʌ c'ajc.

⁷ Mach yomic mi la' wis tʌts' loq'uel la' bʌ ya' ti jiñi Tabernáculo ba' mi lac tempan lac bʌ, ame chʌmiquetla, come mulbiletla ti olivo aceite ti' tojlel lac Yum.” Jiñi cha'añ Aarón yic'ot i yalobilob tsi' jac'ʌyob che' bajche' tsi' yʌlʌ Moisés.

⁸ Che' jiñi lac Yum tsi' pejca Aarón tsi' su'be:

⁹ “Mi jatetic o mi jiñic a walobilob, mach yomic mi la' jap jiñi paj-esʌbil bʌ i ya'lel ts'usub che' mi la' wochel ti Tabernáculo ba' mi la' tempan la' bʌ, ame chʌmiquetla. Jiñʌch xuc'ul bʌ c mandar cha'añ pejtelel la' p'olbal ti jujunlajm,

¹⁰ cha'añ mi la' cʌn jiñi ch'ujul bʌ yic'ot jiñi mach bʌ ch'ujulic, jiñi sʌc bʌ yic'ot jiñi bi'bi' bʌ,

¹¹ yic'ot ja'el añ ti la' wenta cha'añ mi la' cʌntesan israelob ti' pejtelel jiñi mandar che' bajche' tsa' cʌq'ue Moisés.”

¹² Moisés tsi' su'be Aarón, yic'ot i yalobilob i c'aba' Eleazar yic'ot Itamar, jiñi tsa' to bʌ cʌleyob: “Ch'ʌmʌla jiñi trigo bʌ majtañʌl tsa' bʌ colojbaji che' bʌ tsa' la' wʌq'ue i majtañ lac Yum ya' ti pulʌntib. Yom mi la' c'ux jiñi waj mach bʌ añic i levadurajlel ya' ti' t'ejl jiñi pulʌntib, come ch'ujulʌch jiñi majtañʌl.

¹³ Jiñi cha'añ yom mi la' c'ux ya' ti Ch'ujul bʌ Ajñibʌl, come jiñʌch tsa' bʌ aq'uentiyetla cha'añ mi la' c'ux, jatetla yic'ot ch'itoñ bʌ la' walobilob. Loq'uemʌch ti pulbil tac bʌ i majtañ lac Yum che' bajche' tsi' su'beyon.

¹⁴ Pero i bʌc'tal i tajñ yic'ot i ya' jʌmts'ubil bʌ ti' tojlel lac Yum mi' mejlel la' c'ux jatet, yic'ot ch'itoñ bʌ yic'ot xch'oc bʌ la' walobilob baqui jach la' wom ya' ba' sʌc jiñi ajñibʌl, come ti isujm la' cha'añʌch cha'añ i bʌl la' ñʌc'. Loq'uemʌch ti' majtañ lac Yum mu' bʌ i yʌc'ob i yalobilob Israel cha'añ i ñʌch'tʌlelob i pusic'al.

¹⁵ Mi caj i ch'ʌmob tilel jiñi i ya' yic'ot i tajñ tsa' bʌ aq'uenti lac Yum che' bʌ tsa' puli i lewil. Che' bʌ tsa'ix i jʌmts'uyob ti' tojlel lac Yum mi caj la' ch'ʌm yic'ot la' pi'ʌlob, come che'ʌch tsi' yʌc'ʌ mandar lac Yum.”

¹⁶ Che' jiñi Moisés tsa' caji i c'ajtibeñob baqui tsi' yʌc'ʌyob jiñi i tat chivo cha'añ i ñusʌntel mulil, pero tsa' tsictiyi cha'añ tsa'ix puli. Moisés tsi' mich'le Eleazar yic'ot Itamar, i yalobilob Aarón jiñi tsa' bʌ cʌleyob yic'ot, tsi' su'beyob:

¹⁷ —¿Chucoch ma'añic tsa' la' c'uxbe i bʌc'tal majtañʌl ila ti Ch'ujul bʌ Ajñibʌl? Come wen ch'ujulʌch, Dios tsi' yʌq'ueyetla ili majtañʌl cha'añ i ñusʌntel i mul israelob yic'ot cha'añ mi yajñelob ti junmojt ti' tojlel lac Yum.

¹⁸ Q'uelela, ma'añic tsa' la' ch'ʌmʌ ochel jiñi ch'ich' ya' ti Ch'ujul bʌ Ajñibʌl yic'ot ya' yom mi la' c'ux jiñi alʌc'ʌl ya' ti Ch'ujul bʌ Ajñibʌl che' bajche' tsa' c su'beyetla.

¹⁹ Pero Aarón tsi' jac'be Moisés: —Q'uele, sajmʌl tsa'ix i yʌc'ʌyob jiñi majtañʌl cha'añ mi' ñusʌbentelob i mul yic'ot jiñi pulbil bʌ majtañʌl. Pero, leco jax chuqui tsa' ujti sajmʌl tic tojlel lojon, tsa'ic j c'uxu jiñi we'elʌl cha'añ i ñusʌntel mulil, ¿uts'at ba mi' q'uel lac Yum?

²⁰ Che' bʌ tsi' yu'bi Moisés ili t'añ, tijicña tsa' cʌle.