Levitico 1 - Jiñi Tsiji' bʌ Wen T'añ cha'añ Estudio

1. OFRENDA TAC YIC'OT TSɅNSɅBIL BɅ MAJTAÑɅL ( 1.1—7.38 ) Jiñi pulbil bʌ majtañʌl tac

¹ Lac Yum tsi' pʌyʌ yic'ot tsi' pejca Moisés che' bʌ ya'añ ti Tabernáculo ba' mi' tempañob i bʌ, tsi' yʌlʌ:

² “Pejcan israelob, su'beñob: Che' bʌ añ majqui mi yʌq'ueñon c majtañ ti la' tojlel, yom mi la' c'ʌn alʌc'ʌl tac loq'uem bʌ ti la' wacax yic'ot ti la' tʌñʌme'.”

³ “Mi jiñi pulbil bʌ majtañʌl mu' bʌ la' wʌq'ueñon, mi wacax, yom mi la' yajcan juncojt i tat mach bʌ añic i c'am-ʌjel. Yom mi la' pʌy tilel ti ti' jiñi Tabernáculo ba' mi la' tempan la' bʌ, cha'añ mic ch'ʌm.

⁴ Jiñi woli bʌ i yʌq'ueñon wacax, yom mi' c'ʌcchocon i c'ʌb ya' ti' jol jiñi majtañʌl. Che' jiñi mi caj c ch'ʌm jiñi alʌc'ʌl ti' q'uexol jiñi wiñic cha'añ mi' ñusʌbentel i mul.

⁵ Jiñi motomajob i yalobilob Aarón mi caj i tsʌnsañob jiñi alʌc'ʌl tic tojlel. Mi caj i ch'ʌmob jiñi ch'ich' cha'añ mi' tsijcañob ti' joytʌlel i pulʌntib jiñi majtañʌl am bʌ ti' tojel i ti' jiñi Tabernáculo ba' mi la' tempan la' bʌ.

⁶ Mi caj i ts'ulob jiñi majtañʌl cha'añ mi' bic'ti t'ojob.

⁷ I yalobilob jiñi motomaj Aarón mi caj i xic'ob c'ajc ti' pam jiñi pulʌntib yic'ot mi caj i yotsʌbeñob i si'il jiñi c'aj.

⁸ Ti wi'il i yalobilob Aarón jiñi motomajob mi caj i much'chocobeñob i bʌc'tal jiñi wacax yic'ot i jol yic'ot i lewil i soyta'. Mi caj i yʌc'ob ya' ti' pam pulʌntib ya' ba' woli ti lejmel jiñi c'ajc.

⁹ Mi caj i pocbeñob ti ja' i ya' yic'ot i soyta', che' jiñi, jiñi motomajob mi caj i pulob ya' ti' pulʌntib. Jiñʌch pulbil bʌ majtañʌl xojocña bʌ i yujts'il tic tojlel.”

¹⁰ “Mi jiñi majtañʌl mu' bʌ la' wʌq'ueñon, mi tʌñʌme' o mi chivo, yom i tat bʌ mach bʌ wis añic i c'am-ʌjel.

¹¹ Mi caj i tsʌnsañob ya' ti norte ya' ti' t'ejl i pulʌntib tic tojlel. Jiñi motomajob yic'ot i yalobilob Aarón mi caj i tsijcañob ti ch'ich' ti' joytʌlel jiñi pulʌntib.

¹² Ti wi'il mi caj i bic'ti t'ojob jiñi majtañʌl. Che' jiñi, jiñi motomajob caj i yʌc'ob ya' ti' pam si' am bʌ ti pulʌntib temel yic'ot i jol yic'ot i lewil i soyta'.

¹³ Mi caj i ñaxan pocob ti ja' i soyta' yic'ot i ya', jiñi motomaj mi caj i pul ti pejtelel ya' ti pulʌntib. Jiñʌch pulbil bʌ majtañʌl xojocña bʌ i yujts'il tic tojlel.”

¹⁴ “Mi jiñi majtañʌl mu' bʌ la' wʌq'ueñon, mi te'lemut, yom xpurwoc o x'ujcuts cha'añ pulbil bʌ c majtañ.

¹⁵ Jiñi motomaj mi caj i pʌy majlel jiñi te'lemut ya' ti pulʌntib, mi caj i tsepben i jol cha'añ mi yʌc' ti pulel ya' ti pulʌntib; mi caj i yʌc' ti yajlel i ch'ich'el ya' ti' t'ejl jiñi pulʌntib.

¹⁶ Jiñi motomaj mi caj i loc'sʌben i chuyib, yic'ot mi caj i tujtuñ, mi caj i yʌc' ya' ti' t'ejl i pulʌntib ba' mi' pasel q'uiñ ya' ba'añ i yajñib i tʌñʌl c'ajc.

¹⁷ Che' jiñi mi' chuc ti' wich' cha'añ mi' tsep ti ojlil, pero mach yomic mi' junyajlel ts'ojquel i bʌc'tal; jiñi motomaj mi caj i pul ya' ti' pam pulʌntib. Jiñʌch pulbil bʌ majtañʌl xojocña bʌ i yujts'il tic tojlel.”