Juan 3 - Jiñi Tsiji' bʌ Wen T'añ cha'añ Estudio

Jesús yic'ot Nicodemo

¹ Añ juntiquil fariseo, i c'aba' Nicodemo, i yum judíojob.

² Nicodemo tsa' tili ba'añ Jesús ti ac'ʌlel, tsi' su'be: —Rabí, cujil lojon maestrojet, chocbilet tilel i cha'añ Dios, come ma'añic majqui mi mejlel i pʌs i yejtal i p'ʌtʌlel che' bajche' jatet mi ma'añic Dios yic'ot.

³ Jesús tsi' jac'be Nicodemo: —Isujm, isujm mic su'beñet, jiñi mach bʌ añic mi' cha' ilan pañimil, mach mejlic i q'uel i yumʌntel Dios.

⁴ Nicodemo tsi' c'ajtibe: —¿Bajche' mi mejlel i cha' ilan pañimil wiñic che' ñoxix? ¿Mejl ba i cha' ochel ti' ñʌc' i ña' cha'añ mi' cha' ilan pañimil?

⁵ Jesús tsi' jac'ʌ: —Isujm, isujm mic su'beñet, jiñi mach bʌ añic mi' yilan pañimil yic'ot ja' yic'ot jiñi Espíritu mach mejlic ti ochel ti' yumʌntel Dios.

⁶ Jiñi mu' bʌ i yilan pañimil ti' ña', mi' yʌq'uentel i bʌc'tal. Jiñi mu' bʌ i yilan pañimil ti Espíritu, mi' yʌq'uentel i cuxtʌlel ti' ch'ujlel.

⁷ Mach yomic mi' toj sajtel a pusic'al cha'añ tsa' c su'beyet: Wersa yom ma' cha' ilan pañimil.

⁸ Jiñi ic' mi' ñumel majlel baqui jach yom. Jatet ma' wu'bin i t'añ, mach a wujilic baqui ch'oyol mi baqui mi' majlel; che'ʌch ja'el mi yujtel ti tojlel pejtelel mu' bʌ i yilañob pañimil ti Espíritu.

⁹ Nicodemo tsi' c'ajtibe Jesús: —¿Bajche' mi' mejlel jiñi?

¹⁰ Jesús tsi' jac'ʌ: —Jatet maestrojet ti Israel, ¿Mach ba añic ma' ch'ʌmben isujm iliyi?

¹¹ Isujm, isujm mic su'beñet, mic cha'len lojon t'añ cha'añ chuqui tac cujil lojon. Mic su'b lojon ti isujm chuqui tsa' q'uele lojon, pero ma'añic mi la' ñop c t'añ lojon.

¹² Mi ma'añic mi la' ñop che' mic su'beñetla chuqui tac añ ti pañimil, ¿bajche' mi caj la' ñop che' mic su'beñetla chuqui tac añ ti panchan?

¹³ Ma'añic majch tsa' letsi ti panchan, cojach jiñi tsa' bʌ ju'bi tilel ti panchan, jiñʌch i Yalobil Wiñic [am bʌ ti panchan.]

¹⁴ Che' bajche' Moisés tsi' joc'choco lucum ti te' ti jochol bʌ lum, che'ʌch ja'el mi caj i wersa letsʌntel i Yalobil Wiñic,

¹⁵ cha'añ ma'añic mi' sajtel majqui jach mi' ñop. Mi' taj i cuxtʌlel mach bʌ añic mi' jilel.

Dios tsi' c'uxbi jiñi año' bʌ ti pañimil

¹⁶ Come che'i tsi' wen c'uxbi Dios jiñi año' bʌ ti pañimil, tsi' yʌc'ʌ cojach bʌ i Yalobil; majqui jach mi' ñop i Yalobil, ma'añic mi' sajtel; mi' taj i cuxtʌlel mach bʌ añic mi' jilel.

¹⁷ Come Dios ma'añic tsi' choco tilel i Yalobil ti pañimil cha'añ mi' yotsan ti tojmulil wiñicob x'ixicob. Tsi' choco tilel cha'añ mi' taj i coltʌntel ti' Yalobil.

¹⁸ Jiñi mu' bʌ i ñop ma'añic mi' yochel ti tojmulil pero jiñi mach bʌ añic mi' ñop, ochemix ti tojmulil, come ma'añic tsi' ñopbe i c'aba' jiñi cojach bʌ i Yalobil Dios.

¹⁹ Ti caj ili tojmulil: tsa' tili i sʌclel pañimil pero wiñicob x'ixicob tsi' ñumen c'uxbiyob ic'ch'ipan bʌ pañimil; come jontol i melbalob.

²⁰ Come pejtelel mu' bʌ i cha'leñob jontolil ts'a' mi' q'uelob i sʌclel pañimil, ma'añic mi' tilelob ba'añ i sʌclel pañimil come mi' bʌc'ñañob ame tsictiyic i melbal.

²¹ Pero jiñi mu' bʌ i mel chuqui isujm, mi' ñochtan i sʌclel pañimil, cha'añ mi' tsictiyel i melbal cha'añ tilemʌch ti' p'ʌtʌlel Dios. I cha'añ Dios: Ex 34.6; Dt 7.7-9; Sal 25.6-7, 10; 103.17-18; Is 54.8-10; Os 11.1-4; Jn 3.16; 14.23; 16.27; Rm 5.5, 8; 8.38-39; Ef 1.4-5; 2.4-5; 1 Jn 3.1; 4.7-12, 16-19 I cha'añ Cristo: Jn 13.1, 34; 14.31; 15.9-10, 12; Rm 8.35, 37; 2 Cor 5.14; Gl 2.20; Ef 3.17-18; 5.2; Ap 1.5

C'UXBIYA Jiñi i cʌñʌ bʌ xñujpuñijel

²² Che' bʌ tsa' ujti ti t'añ, tsa' tili Jesús yic'ot xcʌnt'añob i cha'añ ti lumal Judea ba' tsa' jal-a yic'otob. Tsi' yʌc'ʌ ch'ʌmja'.

²³ Juan ja'el woli' yʌc' ch'ʌmja' ya' ti Enón lʌc'ʌl ti Salim, come añ ca'bʌl ja' ya'i; tsa' tiliyob wiñicob x'ixicob i ch'ʌmob ja'.

²⁴ Come maxto otsʌbilic Juan ti cárcel.

²⁵ Che' jiñi tsa' caji i cʌlʌx pejcañob i bʌ judíojob yic'ot xcʌnt'añob i cha'añ Juan, ti chajp ti chajp woliyob ti t'añ che' bajche' yom mi' sʌc-esañob i bʌ.

²⁶ Tsa' tiliyob ba'añ Juan, tsi' su'beyob: —Maestro, q'uele jiñi tsa' bʌ tili ba' añet ti junwejl Jordán ja', jiñi tsa' bʌ a wʌc'ʌ ti cʌjñel che' bʌ tsa' cha'le subt'añ; woli i yʌc' ch'ʌmja', pejtelel wiñicob x'ixicob mi' tsajcañob.

²⁷ Juan tsi' jac'ʌ: —Ma'añic chuqui mi' tajob wiñicob, mi mach aq'uebilic ti Dios ti panchan.

²⁸ Jatetla tsa'ix la' wu'bi c t'añ, la' wujil tsa' c su'bu mach Cristojoñic, tsa' ñaxan chojquiyon tilel ti ñaxan ti' wut Cristo.

²⁹ Jiñi mu' bʌ i pʌy i yijñam, jiñʌch ñoxi'alʌl; wen tijicña i pusic'al i cʌñʌ bʌ, che' añ ti' t'ejl jiñi xñujpuñijel che' mi' yu'biben i t'añ mi' yu'bin ca'bʌl i tijicñʌyel. Jiñi cha'añ c tijicñʌyel c pusic'al tsa'ix ts'ʌctiyi ti Cristo.

³⁰ Wersa mi' ñuq'uesʌntel Cristo, joñon wersa mic ch'och'ocʌyel.

Jiñi ch'oyol bʌ ti chañ

³¹ Jiñi ch'oyol bʌ ti chañ i Yumʌch pejtelel chuqui tac añ. Jiñi ch'oyol bʌ ti pañimil mu' jach i ña'tan chuqui añ ti pañimil; jiñi ch'oyol bʌ ti panchan lac Yumʌch ti lac pejtelel.

³² Mi' su'b chuqui tsi' q'uele yic'ot chuqui tac tsi' yu'bi, ma'añic majqui mi' ñopben i t'añ.

³³ Jiñi mu' bʌ i ñopben i t'añ mi' su'b isujmʌch Dios.

³⁴ Come jiñi tsa' bʌ chojqui tilel cha'añ Dios, mi' su'b i t'añ Dios, come ma'añic i p'isol bajche' mi' yʌc' Dios i yEspíritu.

³⁵ Lac Tat mi' c'uxbin i Yalobil, tsa'ix i yʌc'ʌ ti' wenta i Yalobil pejtelel chuqui tac añ.

³⁶ Jiñi mu' bʌ i ñop i Yalobil Dios, añ i cha'añ i cuxtʌlel mach bʌ añic mi' jilel; jiñi mach bʌ añic mi' ñop i Yalobil Dios mach mejlic i yʌq'uentel i cuxtʌlel, mi' yajñel ti' mich'lel Dios.