Juan 15 - Jiñi Tsiji' bʌ Wen T'añ cha'añ Estudio

Jesús jiñi isujm bʌ Ac'

¹ Joñon jiñi isujm bʌ ac', c Tat jiñʌch xpora.

² Pejtelel i c'ʌb ac' mach bʌ añic mi' yʌc' i wut ti' joñon, mi caj i tsep loq'uel; pejtelel mu' bʌ i yʌc' i wut, mi caj i porajin cha'añ ñumen ca'bʌl mi' yʌc' i wut.

³ Sʌquetixla cha'añ jiñi t'añ tsa' bʌ c su'beyetla.

⁴ Ajñenla ti joñon, joñon ja'el mi caj cajñel ti jatetla. Che' bajche' i c'ʌb ac' ma'añic mi mejlel i yʌc' i wut ti' bajñelil, mi ma'añic mi' yajñel ti' yʌq'uil, che' ja'el jatetla mach mejlic la' wʌc' la' wut, mi ma'añic mi la' wajñel ti joñon.

⁵ Joñon jiñi ac', jatetla j c'ʌbetla, jiñi mu' bʌ i yajñel ti joñon che' bajche' joñon mi cajñel ti jiñi wiñic, jiñʌch mu' bʌ i yʌc' ca'bʌl i wut, come mi ma'añic mi la' wajñel ti joñon, ma'añic chuqui mi' mejlel la' bajñel mel.

⁶ Jiñi mach bʌ añic mi' yajñel ti joñon, mi caj i chojquel loq'uel che' bajche' mach bʌ weñic bʌ i c'ʌb ac', mi' tiquin; mi caj i tempʌyel cha'añ mi' chojquel ochel ti c'ajc cha'añ mi' pulel.

⁷ Mi woli la' wajñel ti joñon, mi woli yajñel c t'añ ti jatetla, c'ajtinla chuqui tac jach la' wom, mi caj la' jac'bentel.

⁸ Mi' caj ti pʌstʌl i ñuclel c Tat, che' mi la' wʌc' ca'bʌl la' wut, che' jiñi, xcʌnt'añetla c cha'añ.

⁹ Che' bajche' tsi' c'uxbiyon c Tat, che' ja'el tsa' c'uxbiyetla, chʌn ajñenla tij c'uxbiya.

¹⁰ Mi woli la' jac'beñon c mandar, mi caj c chʌn c'uxbiñetla, che' bajche' tsa' c jac'be i mandar c Tat, wolic chʌn c'uxbintel tic Tat.

¹¹ Jiñi t'añ tsa' c su'beyetla cha'añʌch mi' yajñel i tijicñʌyel c pusic'al ti la' tojlel, cha'añ mi' ts'ʌctiyel i tijicñʌyel la' pusic'al.

¹² Jiñʌch c mandar: C'uxbin la' bʌ che' bajche' tsa' j c'uxbiyetla.

¹³ Ma'añic majqui ñumen ca'bʌl i c'uxbiya che' bajche' jiñi mu' bʌ i yʌc' i bʌ ti chʌmel cha'añ i pi'ʌlob.

¹⁴ Jatetla c pi'ʌletla che' mi la' mel chuqui mic su'beñetla.

¹⁵ Ma'añic mic chʌn pejcañetla tic wiñic, come jiñi wiñic am bʌ ti' yum mach yujilic chuqui mi' mel i yum; pero joñon mic pejcañetla tic pi'ʌl, come pejtelel chuqui tsa' cu'bi tic Tat, tsa'ix cʌq'ueyetla la' cʌn.

¹⁶ Mach jateticla tsa' la yajcayon, joñon tsa' c yajcayetla, tsa' cʌq'ueyetla la' we'tel cha'añ mi la' majlel la' wʌc' la' wut mu' bʌ caj i jalijel, cha'añ che' jiñi, pejtelel chuqui mi la' c'ajtiben c Tat tij c'aba', mi caj i yʌq'ueñetla.

¹⁷ Jiñʌch c mandar cha'añ mi la' chʌn c'uxbin la' bʌ.

I cha'año' bʌ pañimil mi' ts'a'leñetla

¹⁸ Mi ts'a' mi' q'ueletla jiñi i cha'año' bʌ pañimil, ña'tanla ts'a' tsi' q'ueleyoñob ti ñaxan.

¹⁹ Che' i cha'añeticla pañimil mi' c'uxbiñetla, che' bajche' mi c'uxbiñob i bʌ, pero come mach i cha'añeticla pañimil. Joñon ñaxan tsa' c yajcayetla ti' pañimil, jiñi cha'añ ts'a' mi' q'ueletla jiñi i cha'año' bʌ pañimil.

²⁰ Ña'tanla jiñi t'añ tsa' bʌ c su'beyetla: “Jiñi mu' bʌ i melben i ye'tel i yum mach ñumen ñuquic bajche' i yum.” Mi joñon tsi' tic'layoñob, che' ja'el jatetla mi caj la' tic'lʌntel, mi tsi' jac'ʌyob c t'añ, mi caj i jac'ob la' t'añ ja'el.

²¹ Che'ʌch mi caj i melbeñetla i cha'año' bʌ pañimil cha'añ ti' caj j c'aba', come ma'añic mi' cʌñob jiñi tsa' bʌ i chocoyon tilel.

²² Che' machic jax tsa' tiliyon, che' machic jax tsa' c pejcayob, che' jiñi ma'añobic i mul; pero wʌle mach mejlic i su'bob ma'añobic i mul.

²³ Jiñi mu' bʌ i ts'a'leñon, mi' ts'a'len c Tat ja'el.

²⁴ Che' machic jax tsa' c mele ñuc tac bʌ que'tel mach bʌ añic majqui melbil i cha'añ ti' ñaxan, che' jiñi ma'añobic i mul; pero wʌle tsa'ix i q'ueleyob, mi' ts'a'leñoñob temel quic'ot c Tat.

²⁵ Pero cha'añʌch mi' ts'ʌctiyel jiñi t'añ ts'ijbubil bʌ ti mandar: “Tsi' ts'a'leyoñob che' ma'añic c mul.”

²⁶ Che' ba ora mi' tilel la' waj Pi'leya, mu' bʌ caj chocbeñetla tilel ch'oyol bʌ tic Tat, jiñʌch jiñi Espíritu mu' bʌ i tsictesan isujmlel c t'añ, jiñi mi caj i yʌc'on ti cʌjñel.

²⁷ Jatetla ja'el mi caj la' wʌc'on ti cʌjñel, come añetla quic'ot c'ʌlʌl ti' cajibal j cʌntesa.