Juan 11 - Jiñi Tsiji' bʌ Wen T'añ cha'añ Estudio

Tsa' chʌmi Lázaro

¹ Añ juntiquil wiñic i c'aba' Lázaro, tsa' c'am-a, ch'oyol ti Betania, i tejclum María yic'ot i chich i c'aba' Marta.

² (María jiñʌch tsa' bʌ i boño lac Yum ti perfume, tsa' bʌ i sujcube i yoc ti tsutsel i jol. Ti jump'ejl bʌ q'uiñ tsa' c'am-a Lázaro).

³ Jiñi cha'añ jiñi cha'tiquil bʌ x'ixic bʌ i yerañob Lázaro tsi' chocoyob majlel t'añ ba'añ Jesús, tsi' su'beyob: —C Yum, c'am jiñi mu' bʌ a c'uxbin.

⁴ Che' bʌ tsi' yu'bi Jesús, tsi' yʌlʌ: —Ili c'am-ʌjel, mach cha'añic chʌmel, cha'añʌch mi' tsictiyel i ñuclel Dios, yic'ot cha'añ mi' tsictiyel i ñuclel i Yalobil Dios ti' c'am-ʌjel Lázaro.

⁵ Jesús tsi' c'uxbi Marta yic'ot i yijts'in yic'ot Lázaro.

⁶ Che' bʌ tsi' yu'bi c'am Lázaro, tsa' to cʌle Jesús yam bʌ cha'p'ejl q'uiñ ya' baqui añ.

⁷ Ti wi'il Jesús tsi' su'be xcʌnt'añob i cha'añ: —Cha' conla ya' ti Judea.

⁸ Jiñi xcʌnt'añob tsi' su'beyob: —Maestro, maxto jali tsi' ñopo i juletob ti xajlel ¿Cha' a womix majlel ya'i?

⁹ Jesús tsi' jac'beyob: —¿Mach ba añic lajchʌmp'ejl ora ti jump'ejl q'uiñ? Jiñi mu' bʌ i cha'len xʌmbal ti q'uiñil ma'añic mi' yajlel, come mi' q'uel i sʌclel pañimil.

¹⁰ Pero jiñi mu' bʌ i cha'len xʌmbal ti ac'ʌlel mi' yajlel, come ma'añic i sʌclel pañimil yic'ot.

¹¹ Che' bʌ tsa' ujti i su'b jiñi t'añ tsi' su'beyob: —Wʌyʌlix lac queran Lázaro, mic majlel c ñijcan ch'ojyel ti wʌyel.

¹² Jiñi xcʌnt'añob i cha'añ tsi' su'beyob: —C Yum, mi wʌyʌlix mi' caj i lajmel ti' c'am-ʌjel.

¹³ Jesús tsi' cha'le lajiya che' bʌ tsi' yʌlʌ wʌyʌl Lázaro che' chʌmeñix, jiñi xcʌnt'añob tsi' lon ña'tayob ti' pusic'al wolix i c'aj i yoj Lázaro ti wʌyel.

¹⁴ Jiñi cha'añ Jesús tsi' su'beyob ti toj cha'añ mi' ch'ʌmbeñob isujm: —Chʌmeñix Lázaro.

¹⁵ Tijicñayon cha'añetla che' mach ya'ic añon ya'i, cha'añ mi la' ñop, pero conla ya' ba'añ.

¹⁶ Jiñi Tomás, mu' bʌ i pejcʌntel ti xloj ti' pi'ʌlob, tsa' caji i su'beñob i pi'ʌlob ti xcʌnt'añob: —Conla ja'el cha'añ mi lac chʌmel la quic'ot Jesús.

Jesús xtech Ch'ujlelʌl

¹⁷ Che' bʌ tsa' c'oti Jesús, tsi' taja cha'añ chʌmp'ejlix q'uiñ mucul Lázaro ti mucoñibʌl.

¹⁸ Lʌc'ʌl Betania ti Jerusalén, añ i ñajtlel che' bajche' uxp'ejl kilómetro.

¹⁹ Ca'bʌl judíojob tsa' tiliyob ba'añ Marta yic'ot María cha'añ mi' ñuq'uesʌbeñob i pusic'al cha'añ ti' caj tsa' chʌmi i yʌscun.

²⁰ Che' bʌ tsi' yu'bi Marta woli' tilel Jesús, tsa' loq'ui majlel i taj, pero María tsa' cʌle ti otot.

²¹ Jiñi Marta tsi' su'be Jesús: —C Yum, che' wʌ'ic añet ma'añic tsa' chʌmi cʌscun.

²² Pero cujil ja'el mi caj i yʌq'ueñet Dios pejtelel mu' bʌ a c'ajtiben.

²³ Jesús tsi' su'be: —Mi caj i cha' ch'ojyel a wʌscun.

²⁴ Marta tsi' su'be: —Cujil mi caj i cha' ch'ojyel ti jiñi cojix bʌ q'uiñ.

²⁵ Jesús tsi' su'be: —Joñon xtech ch'ujlelʌlon, i cuxtʌlelon jiñi año' bʌ ti pañimil, jiñi mu' bʌ i ñopon anquese mi' chʌmel cuxul mi caj i yajñel.

²⁶ Pejtelel cuxulo' bʌ, mu' bʌ i ñopoñob, ma'añic mi' chʌmelob ti pejtelel ora. ¿Mu' ba a ñop jiñi?

²⁷ Marta tsi' su'be: —Mu' cu, c Yum. Joñon tsa'ix c ñopo cha'añ Cristojet, i Yalobilet Dios tsa' bʌ tiliyet ti pañimil.

Jesús tsi' cha'le uq'uel ya' ba' mucul Lázaro

²⁸ Che' bʌ tsa' ujti ti t'añ Marta, tsa' majli i pʌy tilel María i yijts'in; ti mucul tsi' su'be: —Wʌ'an lac Maestro woli' pʌyet.

²⁹ Che' bʌ tsi' yu'bi María, tsa' ch'ojyi ti ora, tsa' majli ba'añ Jesús.

³⁰ Maxto ochemic Jesús ti tejclum, ya' to añ ba' tsi' taja Marta.

³¹ Jiñi judíojob woli bʌ i ñuq'uesʌbeñob i pusic'al María ya' ti' yotot che' bʌ tsi' q'ueleyob tsa' bʌc' ch'ojyi María tsa' loq'ui majlel, tsa' caji i tsajcañob majlel, come tsi' yʌlʌyob: —Woli majlel ti mucoñibʌl cha'añ mi' cha'len uq'uel ya'i.

³² Che' bʌ tsa' c'oti María ba'añ Jesús, che' bʌ tsi' q'uele, tsi' ñocchoco i bʌ ti' tojel, tsi' su'be: —C Yum, che' wʌ'ic jax añet ma'añic tsa' chʌmi cʌscun.

³³ Che' bʌ tsi' q'uele Jesús woli ti uq'uel María, temel yic'ot jiñi judíojob tsa' bʌ tiliyob yic'ot, tsi' yu'bi ca'bʌl i ch'ijiyemlel i pusic'al, tsi' p'unta.

³⁴ Jesús tsi' c'ajtibeyob: —¿Baqui tsa' la' wʌc'ʌ? Tsi' su'beyob: —C Yum, la' q'uele.

³⁵ Jesús tsa' caji ti uq'uel.

³⁶ Jiñi judíojob tsi' yʌlʌyob: —Q'uelela c'uxatax tsi' yu'bi.

³⁷ Lamital tsi' yʌlʌyob: —Jiñi tsa' bʌ i cambe i wut xpots', ¿mach ba añic tsa' mejli i coltañ ja'el Lázaro cha'añ ma'añic mi' chʌmel?

Jesús tsi' teche ch'ojyel Lázaro

³⁸ Jesús tsi' cha' u'bi i ch'ijiyemlel i pusic'al, tsa' tili ti mucoñibʌl, jiñi mucoñibʌl jiñʌch jump'ejl ch'eñ, ñʌc mʌcbil yic'ot jump'ejl xajlel ti ti'.

³⁹ Jesús tsi' yʌlʌ: —Loc'sanla jiñi xajlel. Marta i yijts'in jiñi tsa' bʌ chʌmi, tsi' su'be: —C Yum, tuwix, come chʌmp'ejlix q'uiñ mucul.

⁴⁰ Jesús tsi' su'be: —¿Mach ba añic tsa' c su'beyet, mi tsa' ñopo mi caj a q'uel i ñuclel Dios?

⁴¹ Jiñi cha'añ tsi' loc'sayob jiñi xajlel ti ti' ba' tsa' ajq'ui jiñi chʌmeñ bʌ, Jesús tsi' letsa i wut ti panchan, tsi' yʌlʌ: —Wocolix a wʌlʌ c Tat, come tsa' wu'bibeyon c t'añ.

⁴² Cujil ma' chʌn u'bibeñon c t'añ, tsa' cʌlʌ jiñi t'añ cha'añ mi' yu'biñob jiñi año' bʌ tic joytʌlel, cha'añ mi' ñopob, jatet tsa' chocoyon tilel.

⁴³ Che' bʌ ujtem i yʌl iliyi, c'am tsi' cha'le t'añ: —Lázaro, la' ti loq'uel.

⁴⁴ Jiñi tsa' bʌ chʌmi tsa' loq'ui tilel, bʌc'ʌl i c'ʌb i yoc ti pisil, mosol i wut ti pisil. Jesús tsi' su'beyob: —Jitila, la' majlic.

Tsi' temeyob i t'añ cha'añ mi' tsʌnsañob Jesús

⁴⁵ Jiñi cha'añ ca'bʌl judíojob tsa' bʌ tiliyob ba'añ María tsi' q'ueleyob chuqui tsi' mele Jesús, tsi' ñopoyob.

⁴⁶ Pero lamital tsa' majli i su'beñob fariseojob chuqui tsi' mele Jesús.

⁴⁷ Jiñi cha'añ tsi' tempayob i bʌ ñuc bʌ motomajob yic'ot fariseojob, tsi' yʌlʌyob: —¿Chuqui yom mi lac mel? Come ca'bʌl mi' pʌs i yejtal i p'ʌtʌlel jiñi wiñic.

⁴⁸ Mi che' jach mi lac q'uel, mi caj i ñopob pejtelel wiñicob x'ixicob, mi caj i tilelob romanojob, mi caj i jisañob lac templo yic'ot lac lumal.

⁴⁹ Jiñi cha'añ juntiquil motomaj i c'aba' Caifás, tsa' bʌ i mele i ye'tel ti ñuc bʌ motomaj ti jiñi jach bʌ ja'bil, tsi' su'beyob: —Ma'añic chuqui la' wujil jatetla.

⁵⁰ ¿Mach ba la wujilic cha'añ ñumen uts'at mi' chʌmel juntiquil wiñic cha'añ i q'uexol pejtelel wiñicob x'ixicob cha'añ ma'añic mi lac laj jilel ti lac lumal?

⁵¹ Mach tilemic jiñi t'añ ti' bajñel pusic'al, cha'añ ti' caj tsi' mele i ye'tel ti ñuc bʌ motomaj ti jiñi ja'bil, jiñi cha'añ tsi' wʌn alʌ mi caj i chʌmel Jesús cha'añ i q'uexol wiñicob x'ixicob ti' lumal.

⁵² Mach cha'añic jach jiñi año' bʌ ti' lumal, cha'añʌch ja'el mi' tempañob ti junmojt i yalobilob Dios tsa' bʌ pam pujquiyob.

⁵³ Ti jiñi jach bʌ ora tsi' ña'tayob cha'añ mi' tsʌnsañob Jesús.

⁵⁴ Jiñi cha'añ Jesús ma'añic tsi' chʌn cha'le xʌmbal ya' ba'añ judíojob, tsa' loq'ui ya'i, tsa' majli ti tejclum i c'aba' Efraín lʌc'ʌl ti jochol bʌ lum, ya'i tsa' ajñi yic'ot xcʌnt'añob i cha'añ.

⁵⁵ Lʌc'ʌlix i q'uiñilel Pascua mu' bʌ i melob judíojob, ca'bʌl wiñicob x'ixicob tsa' loq'uiyob ti' lumal tac ba' chumulob cha'añ mi' majlelob ti Jerusalén, cha'añ mi' sʌc-esañob i bʌ cha'añ Pascua.

⁵⁶ Jiñi judíojob tsa' caji i sʌclañob Jesús, che' ya'añob ti' templo, tsi' c'ajtibeyob i bʌ: —¿Bajche' mi la' wʌl? ¿Mach ba talic ti' q'uiñijel mi la' wʌl?

⁵⁷ Jiñi ñuc bʌ motomajob yic'ot fariseojob tsi' yʌc'ʌyob mandar cha'añ mi' añ majqui yujil baqui añ Jesús, yom mi' su'bentelob, come yom i chucob.