Juan 10 - Jiñi Tsiji' bʌ Wen T'añ cha'añ Estudio

Lajiya cha'añ corral ba'añ tʌñʌme'

¹ Isujm, isujm mic su'beñetla: Jiñi mach bʌ añic mi' yochel ti ti' corral ba'añ tʌñʌme', jiñi mu' bʌ i letsel ochel ti pam corral jiñʌch xujch', jiñʌch xchiloñel.

² Pero jiñi mu' bʌ i yochel ti ti' corral jiñʌch xcʌnta tʌñʌme'.

³ Jiñi xcʌnta corral mi' jamben jiñi xcʌnta tʌñʌme', jiñi tʌñʌme' mi yu'biben i t'añ i yaj cʌntaya, mi' pejcan i tʌñʌme' ti' c'aba', mi' pʌy loq'uel.

⁴ Che' mi yujtel i pʌy loq'uel mi' majlel ti ñaxan, jiñi tʌñʌme' mi' tsajcan jiñi xcʌnta tʌñʌme' come mi cʌmben i t'añ.

⁵ Ma'añic mi' tsajcan yam bʌ wiñic, mi' puts'tan, come ma'añic mi' cʌmben i t'añ.

⁶ Che' tsi' cha'le t'añ Jesús ti lajiya, pero jiñi fariseojob ma'añic tsi' ch'ʌmbeyob isujm i t'añ.

Jesús jiñi wen bʌ Xcʌnta tʌñʌme'

⁷ Jiñi cha'añ Jesús tsi' cha' su'beyob: —Isujm, isujm mic su'beñetla: Joñon i ti'on ba' mi' yochel tʌñʌme'.

⁸ Pejtelel tsa' bʌ tiliyob ti ñaxan xujch'ob, xchiloñelob, pero jiñi tʌñʌme' ma'añic tsi' jac'beyob.

⁹ Joñon i ti'on ba' mi' yochel tʌñʌme'. Jiñi mu' bʌ i yochel ti joñon mi caj i coltʌntel; mi' caj ti ochel, yic'ot mi caj i loq'uel, che' ja'el mi caj i taj wen bʌ jam.

¹⁰ Mi' tilel xujch', cha'añ mi' xujch'in, cha'añ mi' tsʌnsan yic'ot cha'añ mi jisan; pero joñon tsa' tiliyon cha'añ mi' tajob i cuxtʌlel, cha'añ oñ mi' tajob pejtelel chuqui wen.

¹¹ Joñon jiñi wen bʌ Xcʌnta tʌñʌme'; jiñi wen bʌ Xcʌnta tʌñʌme' mi' yʌc' i cuxtʌlel cha'añ i tʌñʌme'.

¹² Pero jiñi mu' bʌ i cʌntan tʌñʌme' cha'añ ganar, mach i yumic tʌñʌme', ma'añic mi' cʌntan, che' mi' q'uel bʌte'el ts'i' mu' bʌ i tilel, mi' cʌy jiñi tʌñʌme' mi' puts'el, jiñi bʌte'el ts'i' mi' chuc, yic'ot mi' pam puc.

¹³ Jiñi mu' bʌ i cha'len ganar mi' puts'el come woli jach ti ganar. Mach i wentajic jiñi tʌñʌme'.

¹⁴ Joñon jiñi wen bʌ Xcʌnta tʌñʌme', mij cʌn c tʌñʌme', c tʌñʌme' mi' cʌñon ja'el.

¹⁵ Che' bajche' c Tat mi' cʌñon, joñon ja'el mij cʌn c Tat, mi cʌc' c bʌ ti chʌmel cha'añ jiñi tʌñʌme'.

¹⁶ Añ to yam bʌ c tʌñʌme' mach bʌ ochemic ti jiñi corral; wersa mic pʌy tilel ja'el, mi caj i yu'bin c t'añ, junmojt jach mi caj i yajñelob yic'ot juntiquil Xcʌnta tʌñʌme'.

¹⁷ Jiñi cha'añ c Tat mi' c'uxbiñon come mi cʌc' c bʌ ti chʌmel cha'añ mic cha' cuxtʌyel.

¹⁸ Ma'añic majch mi' yʌc'on ti chʌmel, mic bajñel ac' c bʌ ti chʌmel. Añ c p'ʌtʌlel cha'añ mi cʌc' c bʌ, añ ja'el c p'ʌtʌlel cha'añ mic cha' cuxtʌyel. Jiñʌch i mandar c Tat tsa' bʌ i su'beyon cha'añ mic mel.

¹⁹ Jiñi judíojob tsa' cha' caji i t'oxob i bʌ ti' t'añ, cha'añ i t'añ Jesús.

²⁰ Ca'bʌl tsa' caji i yʌlob: —Añ i xi'bʌjlel, sojquem i jol ¿Chucoch mi la' chʌn u'biben i t'añ?

²¹ Yaño' bʌ tsi' yʌlʌyob: —Mach che'ic mi' cha'len t'añ wiñic am bʌ i xi'bʌjlel che' bajche' jiñi. ¿Mejl ba i camben i wut xpots' jiñi xi'ba?

Jiñi judíojob tsi' ts'a'leyob Jesús

²² Ti jim bʌ ora woli' melob i q'uiñilel Templo ya' ti Jerusalén. I yorajlelix tsʌñal.

²³ Jesús tsa' ñumi ti Templo, tsa' tili ti corredor i melbal bʌ Salomón.

²⁴ Jiñi judíojob tsi' joyoyob Jesús, tsi' c'ajtibeyob: —¿Jayp'ejl to ora mi caj la wʌc'on lojon ti tsic pusic'al? Mi Cristojet, su'beñon lojon ti jamʌl.

²⁵ Jesús tsi' jac'beyob: —Tsa'ix c su'beyetla pero ma'añic mi la' ñop. Jiñi que'tel mu' bʌ c cha'len ti' c'aba' c Tat, mi' yʌc'on ti cʌjñel cha'añ mi la' ña'tan majquiyon;

²⁶ pero jatetla ma'añic mi la' ñop, come mach c tʌñʌme'eticla che' bajche' tsa' c su'beyetla.

²⁷ C tʌñʌme'ob mi' yu'bibeñon c t'añ, joñon mij cʌñob, mi' tsajcañoñob.

²⁸ Mi cʌq'ueñob i cuxtʌlel mach bʌ añic mi' jilel, ma'añic mi caj i jilelob ti pejtelel ora, ma'añic majch mi caj i chilbeñon tij c'ʌb.

²⁹ Ma'añic majch ñumen ñuc bajche' c Tat tsa' bʌ i yʌq'ueyon, ma'añic majch mi mejlel i chil c tʌñʌme' ti' c'ʌb c Tat.

³⁰ Joñon quic'ot c Tat junlajalon lojon.

³¹ Jiñi cha'añ jiñi judíojob tsi' cha' lotoyob xajlel cha'añ mi' julob.

³² Jesús tsi' su'beyob: —Tsa' c pʌsbeyetla ca'bʌl wen bʌ c melbal ch'oyol bʌ tic Tat. ¿Baqui bʌ wen bʌ c melbal yom mi' yʌc'on ti jujlel?

³³ Jiñi judíojob tsi' jac'beyob: —Ma'añic mic julet lojon ti xajlel cha'añ wen bʌ a melbal, pero cha'añ ti caj tsa' cha'le p'ajoñel, come ma' cuy a bʌ ti Dios che' wiñiquet jach.

³⁴ Jesús tsi' jac'beyob: —¿Mach ba ts'ijbubilic ti la' mandar: “Tsa' c su'bu, jatetla diosetla”?

³⁵ Dios, tsi' pejca ti diosob jiñi wiñicob tsa' bʌ i yu'bibeyob i t'añ Dios. (Come i ts'ijbujel Dios mach mejlic ti jejmel).

³⁶ Mi tsi' yajcayon Dios cha'añ mi chocon tilel ti' pañimil ¿Chucoch, che' jiñi, mi la' wʌl tsa' c cha'le p'ajoñel cha'añ tsa' c su'beyetla i Yalobilon Dios?

³⁷ Mi ma'añic mic melben i ye'tel c Tat, mach mi la' ñopon.

³⁸ Mi wolic melben i ye'tel c Tat, anquese ma'añic mi la' ñopon, ñopola que'tel cha'añ mi la' cʌñon, cha'añ mi la' ña'tan ti isujm c Tat añ ti joñon, joñon añon tic Tat.

³⁹ Jiñi judíojob tsi' cha' ñopo i chucob, pero tsa' puts'i loq'uel ti' tojlelob.

⁴⁰ Tsa' cha' majli ti junwejl Jordán ja', ya' ba tsi' ñaxan ac'ʌ ch'ʌmja' Juan, ya' tsa' cʌle Jesús ya'i.

⁴¹ Ca'bʌl wiñicob x'ixicob tsa' tiliyob ba'añ, tsi' yʌlʌyob: —Isujm Juan ma'añic tsi' pʌsʌ i yejtal i p'ʌtʌlel mi junyajlic, pero pejtelel chuqui tac tsi' su'bu cha'añ Jesús, isujmʌch.

⁴² Ca'bʌl tsi' ñopoyob Jesús ya'i.