Hechos 23 - Jiñi Tsiji' bʌ Wen T'añ cha'añ Estudio

¹ Jiñi cha'añ Pablo tsi' ch'ujch'uj q'uele jiñi año' bʌ i ye'tel, tsi' yʌlʌ: —Hermañujob, ma'añic mi' tejchel t'añ tic pusic'al come uts'at tsa' c ñusa q'uiñ ti' wut Dios, c'ʌlʌl wʌle.

² Jiñi c'ax ñuc bʌ motomaj i c'aba' Ananías, tsi' yʌq'ue mandar jiñi ya' bʌ wa'alo' ti' t'ejl cha'añ mi' jats'beñob i yej Pablo.

³ Jiñi cha'añ Pablo tsi' su'be: —¡Dios mi caj i jats'et, come lajalet che' bajche' bombil bʌ otot ti tañ! Buchulet ti meloñel tic tojlel che' bajche' mi yʌl jiñi mandar, pero wola' ñusan jiñi mandar che' ma' wʌc'on ti jajts'el.

⁴ Jiñi ya' bʌ wa'alo' ti' t'ejl tsi' yʌlʌyob: —¿Chucoch ma' p'aj jiñi ñuc bʌ motomaj i cha'añ Dios?

⁵ Pablo tsi' yʌlʌ: —C pi'ʌlob, ma'añic tsa' j cʌñʌ mi jiñʌch jiñi ñuc bʌ motomaj, come ts'ijbubil: “Mach yomic ma' p'aj jiñi yumʌl am bʌ i ye'tel ti la' tojlel.”

⁶ Jiñi cha'añ Pablo tsi' q'uele ya'añob cha'mojt wiñicob, jiñobʌch saduceojob yic'ot fariseojob, c'am tsi' cha'le t'añ ti' tojlel jiñi año' bʌ i ye'tel, tsi' yʌlʌ: —C pi'ʌlob, fariseojon, i yalobilon fariseo, mic ñop añ i pijtaya jiñi chʌmeño' bʌ come mi' cha' ch'ojyelob chʌmeño' bʌ, jiñi cha'añ tsa' pʌjyiyon tilel cha'añ mi la' melon.

⁷ Che' bʌ tsa' ujti i su'b jiñi t'añ, jiñi fariseojob yic'ot saduceojob tsa' caji i cʌlʌx pejcañob i bʌ, jiñi tempʌbilo' bʌ tsi' t'oxoyob i bʌ.

⁸ Come jiñi saduceojob mi' yʌlob ma'añic mi lac cha' ch'ojyel, ma'añic ángel, ma'añic espíritu, pero mach che'ic mi' yʌlob jiñi fariseojob.

⁹ Che' jiñi wen ju'ucña tsa' cajiyob ti t'añ. Jiñi xts'ijbayajob i cha'añ fariseojob tsa' wa'leyob, tsi' wersa alʌyob: —Mi cʌl lojon ma'añic i mul ili wiñic; tic'ʌl mi Pablo tsi' pejca juntiquil espíritu o juntiquil ángel, mach yomic mi laj contrajin Dios.

¹⁰ Come wen mich'obix yic'ot wolix i cʌlʌx pejcañob i bʌ, jiñi ñuc bʌ i ye'tel ti' tojlel soldadojob tsi' cha'le bʌq'uen ame i tsʌnsañob Pablo, jiñi cha'añ tsi' yʌc'ʌ mandar cha'añ mi' tilelob soldadojob cha'añ mi' wersa chucob loq'uel Pablo ya' ba' añob, cha'añ mi' pʌyob ochel ti' yotlel soldadojob.

¹¹ Che' bʌ tsa' ic'a tsa' wa'le lac Yum ti' t'ejl Pablo, tsi' su'be: Xuc'chocon a pusic'al Pablo, che' bajche' tsa' wʌc'ʌyon ti cʌjñel ti Jerusalén, che' ja'el mi caj a wʌc'on ti cʌjñel ti Roma.

Tsi' temeyob i t'añ cha'añ mi' tsʌnsañob Pablo

¹² Ti wen sʌc'ajel ca'bʌl judíojob tsi' tempayob i bʌ, tsi' temeyob i t'añ cha'añ mi' tsʌnsañob Pablo. Tsi' bajñel ch'ʌcʌyob i bʌ cha'añ ma'añic chuqui mi caj i c'uxob, ma'añic chuqui mi caj i japob jinto mi' tsʌnsañob Pablo.

¹³ Ñumen ti cha'c'al wiñicob tsa' bʌ i temeyob i t'añ.

¹⁴ Tsa' majliyob ba'añ i yumob motomajob yic'ot xñoxob año' bʌ i ye'tel, tsi' yʌlʌyob: —Tsa'ix c wersa wa'choco lojon c t'añ che' bʌ tsa' c bajñel ch'ʌcʌ lojon c bʌ, ma'añic mi caj c wis c'ux lojon i bʌl lojon c ñʌc' jinto mic tsʌnsan lojon Pablo.

¹⁵ Jiñi cha'añ wʌle, jatetla yic'ot jiñi año' bʌ i ye'tel, c'ajtibenla jiñi am bʌ ñuc bʌ i ye'tel cha'añ ijc'ʌl mi' cha' pʌy tilel Pablo ba'añetla, su'benla cha'añ añ chuqui la' wom la' cha' c'ajtiben, chajpʌbilon lojon cha'añ mic tsʌnsan lojon che' maxto c'otemic ba'añetla.

¹⁶ Pero i yalobil jiñi x'ixic bʌ i yeran Pablo, tsi' yu'bi che' bajche' woli i chajpañob i bʌ cha'añ mi caj i chijtañob, jiñi cha'añ tsa' majli, tsa' ochi ti yotlel soldadojob, tsi' su'be Pablo che' bajche' woli i ña'tañob.

¹⁷ Pablo tsi' pʌyʌ tilel juntiquil i yaj capitán soldadojob, tsi' yʌlʌ: —Pʌyʌ majlel ili ch'itoñ ya' ba'añ jiñi ñuc bʌ i ye'tel, come añ chuqui yom i su'ben.

¹⁸ I yaj capitán soldadojob tsi' pʌyʌ majlel, tsa' majliyob ba'añ jiñi ñuc bʌ i ye'tel, tsi' su'be: —Tsi' pʌyʌyon jiñi xñujp'el Pablo, tsi' c'ajtibeyon cha'añ mic pʌy tilel ili ch'itoñ ba' añet come añ chuqui yom i su'beñet.

¹⁹ Jiñi ñuc bʌ i ye'tel tsi' chucbe i c'ʌb jiñi ch'itoñ, tsi' pʌyʌ majlel ba' mucul, tsi' c'ajtibe: —¿Chuqui a wom a su'beñon?

²⁰ Jiñi ch'itoñ tsi' su'be: —Tsa'ix i tempayob i bʌ judíojob cha'añ mi' c'ajtibeñetob cha'añ ma' pʌy ju'bel Pablo ijc'ʌl ba'añ jiñi año' bʌ i ye'tel, mi caj i poj alob cha'añ añ chuqui yom i cha' c'ajtibeñob Pablo.

²¹ Mach a jac'beñob i t'añ, come añ ñumen ti cha'c'al wiñicob woli' chijtañob, tsa'ix i bajñel ch'ʌcʌyob i bʌ cha'añ ma'añic chuqui mi caj i c'uxob, ma'añic chuqui mi caj i japob jinto mi' tsʌnsañob Pablo, tsa'ix i chajpayob i bʌ, woli jax i pijtañob a t'añ.

²² Jiñi cha'añ, jiñi ñuc bʌ i ye'tel tsi' su'be sujtel jiñi ch'itoñ, tsi' tiq'ui cha'añ ma'añic mi' su'ben yam bʌ chuqui tsa'ix i tsictesʌbe.

Tsa' chojqui majlel Pablo ba'añ Félix

²³ Tsi' pʌyʌ tilel cha'tiquil i yaj capitán soldadojob, tsi' su'beyob cha'añ mi' chajpañob lujunc'al soldadojob mu' bʌ xʌñob majlel ti lum yic'ot lujuntiquil i chʌnc'al c'ʌchʌlo' bʌ ti caballo yic'ot lujunc'al año' bʌ i lanza cha'añ mi' majlelob ti Cesarea che' bolomp'ejlix ora ti ac'ʌlel

²⁴ yic'ot tsi' chajpʌbeyob i c'ʌchlib Pablo ja'el cha'añ c'ʌchʌl mi' pʌyob majlel ti uts'at ba'añ Félix, jiñi gobernador.

²⁵ Tsi' ts'ijba juñ, tsi' yʌlʌ:

²⁶ “Joñon Claudio Lisias, mic chocbeñet tilel cortesía, c'ax uts'at bʌ gobernador Félix.

²⁷ Jiñi judíojob tsi' chucuyob ili wiñic, colelix i tsʌnsañob, tsa' majli j coltañ lojon quic'ot jiñi soldadojob, come tsa' cu'bi lojon cha'añ chucbil i c'aba' ya' ti Roma.

²⁸ Come com cu'bin chuqui i mul Pablo, tsa' c pʌyʌ majlel ya' ba' tsi' tempayob i bʌ jiñi judíojob año' bʌ i ye'tel.

²⁹ Tsa' j q'uele woli' tajbeñob i mul cha'añ jach i mandarob, pero ma'añic i mul cha'añ mi' tsʌnsʌntel, mi cha'añic mi' yochel ti cárcel.

³⁰ Che' bʌ tsa' cu'bi cha'añ jiñi judíojob woli' chijtañob ili wiñic, tsa' c bʌc' choco majlel ba' añet. Tsa' c su'beyob i contrajob cha'añ mi' majlelob i su'beñet chuqui i mul. Ajñen ti uts'at.”

³¹ Jiñi soldadojob tsi' pʌyʌyob majlel Pablo che' bajche' tsa' su'bentiyob che' ti ac'ʌlel c'ʌlʌl ti Antípatris.

³² Ti yijc'ʌlal tsa' sujtiyob ti yotot, pero jiñi soldadojob c'ʌchʌlo' bʌ tsa' cʌleyob yic'ot Pablo.

³³ Che' bʌ tsa' c'otiyob ya' ti Cesarea, tsi' yʌq'ueyob juñ jiñi gobernador, yic'ot ja'el tsi' pʌyʌyob majlel Pablo.

³⁴ Che' bʌ tsa' ujti i q'uel juñ jiñi gobernador, tsi' c'ajtibe baqui ch'oyol Pablo; tsa' su'benti ya' ch'oyol ti Cilicia.

³⁵ Jiñi gobernador tsi' su'be: —Che' mi' julel a contrajob mi caj cu'bin a t'añ. Tsi' yʌc'ʌ mandar cha'añ mi' cʌntʌntel Pablo ya' ti' yotot Herodes.