Hechos 2 - Jiñi Tsiji' bʌ Wen T'añ cha'añ Estudio

1. TSA' SUJBI JIÑI WEN T'AÑ TI JERUSALÉN ( 2.1—8.3 ) Tsa' ju'bi tili jiñi Ch'ujul bʌ Espíritu

¹ Che' bʌ tsa' c'oti i yorajlel i q'uiñilel Pentecostés, temel añob ti jump'ejl jach ajñibʌl.

² Ti ora jach, tsa' tili ju'ucña bʌ ic' ti panchan wen tsʌts tsa' c'oti, tsa' bujt'i i mal jiñi otot ba' buchulob.

³ Ya' ti' tojlelob tsa' tsictiyi ca'bʌl pujquem bʌ alʌ c'ajc, che' yilal che' bajche' la cac', tsa' c'oti ti' pamob i jol ti jujuntiquil.

⁴ Tsa' laj bujt'iyob ti Ch'ujul bʌ Espíritu, tsa' cajiyob ti t'añ ti yan tac bʌ t'añ che' bajche' tsi' yʌq'ueyob t'añ jiñi Espíritu.

⁵ Jiñi judíojob chumulo' bʌ ti Jerusalén, jiñobʌch mu' bʌ i ch'ujutesañob Dios, tilemo' bʌ ti jujunpejt lum tac.

⁶ Che' bʌ tsi' yu'biyob jiñi ju'ucña bʌ ic', bajc'ʌl wiñicob x'ixicob tsi' tempayob i bʌ; ma'añic tsi' ch'ʌmbeyob isujmlel chuqui woli' yujtel, come ti jujuntiquilob tsi' yu'biyob i t'añ ti t'añob.

⁷ Tsa' toj sajtiyob i pusic'al, tsi' yʌlʌyob: —Awilan, ¿mach ba ch'oyolobic ti Galilea pejtelel ili wiñicob woliyo' bʌ ti t'añ?

⁸ ¿Bajche' che' jiñi, ti jujuntiquilonla wolix la cu'bin lac t'añ tsa' bʌ lac ñopo ti' tojlel lac tat lac ña'?

⁹ Ch'oyolon la ti Partia, ti Media, ti Elam, ti Mesopotamia, ti Judea, ti Capadocia, ti Ponto, ti Asia,

¹⁰ ti Frigia, ti Panfilia, ti Egipto, ti yan tac bʌ tejclum am bʌ ti África ti yam bʌ junwejl Cirene; wʌ'añob ja'el romanojob ti lac tojlel; lamital tsi' q'ueleyob pañimil tic lumal lojon, yaño' bʌ tsi' sutq'uiyob i bʌ ti judíojob.

¹¹ Wʌ' añob judíojob yic'ot mach bʌ judíojobic tilemo' bʌ ti Creta yic'ot ti Arabia, ti pejtelelonla woli la cu'bin ti lac t'añ jiñi ñuc bʌ i ye'tel Dios.

¹² Tsa' toj sajtiyob i pusic'al, ma'añic tsi' ch'ʌmbeyob isujm chuqui woli' yujtel, tsa' caji i c'ajtibeñob i bʌ: —¿Chuqui isujmlel jiñi?

¹³ Yaño' bʌ tsi' wajleyob, tsi' yʌlʌyob: —Yʌcobix ti lembal.

Ñaxan bʌ i subt'añ Pedro

¹⁴ Jiñi cha'añ Pedro, tsa' wa'le yic'ot jiñi junlujuntiquil, c'am tsi' cha'le t'añ, tsi' su'beyob: Wiñicob israelob yic'ot pejtelel añet bʌ la ti Jerusalén, yom la' wujil iliyi, wen u'binla ili mu' bʌ caj c su'b.

¹⁵ Ili wiñicob mach yʌcobic che' bajche' woli la' ña'tan ti la' pusic'al, come bolomp'ejl jaxto ora.

¹⁶ Pero ili woli bʌ ti ujtel jiñʌch tsa' bʌ i su'bu jiñi x'alt'añ Joel:

¹⁷ “Dios mi' yʌl: Ti jiñi cojix bʌ q'uiñ tac, mi caj cʌq'ueñob quEspíritu pejtelel wiñicob x'ixicob, jiñi ch'itoñ yic'ot xch'oc bʌ la' walobilob mi caj i cha'leñob alt'añ; jiñi ch'itoñ wiñicob mi caj i q'uelob chuqui mi' pʌsbentelob ti espíritu, jiñi ñoxobix bʌ mi' cajelob ti ñajal.

¹⁸ Isujm ti jim bʌ ora mi caj cʌq'ueñob quEspíritu c wiñicob, mi caj i cha'leñob alt'añ.

¹⁹ Mi caj c pʌs bʌbʌq'uen tac bʌ ti panchan, yic'ot i yejtal tac c p'ʌtʌlel ti pañimil, ch'ich' yic'ot c'ajc yic'ot buts';

²⁰ mi caj i yic'an jiñi q'uiñ, jiñi uw mi caj i chʌc-an che' bajche' ch'ich', che' maxto tilemic i q'uiñilel lac Yum jiñi ñuc bʌ q'uiñ mu' bʌ caj i tilel.

²¹ Pejtelel jiñi mu' bʌ i pejcañob i c'aba' lac Yum mi caj i coltʌntel.”

²² Israelob, u'binla jiñi t'añ: Dios tsi' pʌsbeyetla cha'añ uts'at jiñi Jesús ch'oyol bʌ ti Nazaret, come Dios tsi' c'ʌñʌ cha'añ mi' pʌs jiñi ñuc bʌ i melbal yic'ot jiñi bʌbʌq'uen tac bʌ i yejtal i p'ʌtʌlel ti la' tojlel che' bajche' la' wujil.

²³ Jesús tsa' ajq'ui ti' c'ʌb wiñicob che' bajche' wʌn ña'tʌbil i cha'añ Dios ti wajali, jatetla tsa' la' wʌc'ʌ ti chucol yic'ot tsa' la' tsʌnsa ti' c'ʌb xñusa mandarob cha'añ mi' ch'ijob ti cruz.

²⁴ Pero Dios tsi' teche ch'ojyel Jesús, tsi' loc'sa ti' p'ʌtʌlel chʌmel, come mach mejlic ti cʌytʌl ba'añ chʌmeño' bʌ.

²⁵ Come David tsi' yʌlʌ jiñi t'añ cha'añ Jesús: “Tsa' j q'uele c Yum ti' tojel c wut ti pejtelel ora, come añ tic ñoj, cha'añ xuc'ul mi cajñel.

²⁶ Jiñi cha'añ tijicña c pusic'al tsa' cu'bi, tijicña mic cha'len t'añ, jiñi c bʌc'tal mi caj i yajñel ti pijtaya;

²⁷ come ma'añic mi caj a cʌy c ch'ujlel ba'añ chʌmeño' bʌ che' ja'el ma'añic mi caj a wʌc' ti oc'mʌl jiñi Ch'ujul bʌ a cha'añ.

²⁸ Tsa'ix a pʌsbeyon i bijlel j cuxtʌlel; Ma' ñuq'uesʌbeñon c pusic'al che' wʌ'añet quic'ot.”

²⁹ Hermañujob, mi mejlel c su'beñetla ti isujm, jiñi lac tat David tsa' chʌmi, tsa' mujqui, jiñi mucoñibʌl ba' tsa' mujqui c'ʌlʌl wʌle wʌ'an la quic'ot.

³⁰ Come David x'alt'añʌch, yujilʌch cha'añ Dios tsi' yʌq'ue xuc'ul bʌ i t'añ cha'añ ti' p'olbal mi caj loq'uel jiñi Cristo mu' bʌ caj i buchtʌl ti' yumʌntel.

³¹ David tsi' wʌn ña'ta cha'añ mi caj i cha' ch'ojyel Cristo, yic'ot cha'añ ma'añic mi caj i cʌytʌl Cristo ba'añ chʌmeño' bʌ, yic'ot ma'añic mi caj i yoc'mʌl i bʌc'tal.

³² Dios tsi' teche ch'ojyel Jesús, tic pejtelel lojon testigojon lojon.

³³ Tsa'ix aq'uenti i ñuclel Jesús ti' ñoj Dios, tsa' ts'ʌctiyi i t'añ i Tat tsa' bʌ i su'be Jesús cha'añ mi caj i yʌc' Ch'ujul bʌ Espíritu. Tsa'ix i choco tilel jiñʌch jiñi woli bʌ la' q'uel yic'ot jiñi woli bʌ la' wu'bin.

³⁴ David ma'añic tsa' letsi majlel ti panchan, pero jiñi tsi' yʌlʌ: “Jiñi lac Yum tsi' su'be c Yum: Buchi' tic ñoj

³⁵ jinto mi cʌq'ueñet a t'uchtan a contrajob.”

³⁶ Ña'tanla che' jiñi, ti isujm pejtelel jatetla wiñicob x'ixicob ti Israel, jiñi Jesús tsa' bʌ la' ch'iji ti cruz, Dios tsi' yotsa ti lac Yum jiñi Cristo yajcʌbil bʌ.

³⁷ Che' bʌ tsa'ix ujti i yu'biñob ili t'añ, ch'ijiyemob i pusic'al tsa' cʌleyob, tsi' c'ajtibeyob Pedro yic'ot yam bʌ apóstolob: —Hermañujob, ¿chuqui yom mic mel lojon?

³⁸ Pedro tsi' su'beyob: —Cʌyʌx la' mul, ch'ʌmʌxla ja' ti jujuntiquiletla ti' c'aba' Jesucristo, cha'añ mi' ñusʌntel la' mul; che' jiñi mi caj la' wʌq'uentel Ch'ujul bʌ Espíritu ti la' majtañ.

³⁹ Come albilix cha'añ jatetla yic'ot la' walobilob mi caj la' wʌq'uentel jiñi Espíritu yic'ot ja'el jiñi año' bʌ ti ñajtʌl; che' bajche' jaytiquil mi' pʌjyelob tilel ba'añ lac Yum Dios.

⁴⁰ Añ to ca'bʌl t'añ tsa' bʌ i su'bu Pedro, tsi' xic'beyob, tsi' su'beyob: —Taja la' coltʌntel cha'añ mi la' cʌy la' mel che' bajche' jiñi lecojo' bʌ i melbal.

⁴¹ Jiñi tsa' bʌ i jac'beyob i t'añ tsi' ch'ʌmʌyob ja'. Ti jiñi jach bʌ q'uiñ tsa' ochiyob che' bajche' uxp'ejl mil wiñicob x'ixicob.

⁴² Tsi' chʌn u'bibeyob i cʌntesʌbal jiñi chocbilo' bʌ majlel ti subt'añ, tsi' wen c'uxbiyob i bʌ, tsi' chʌn xet'eyob waj yic'ot tsi' chʌn pejcayob Dios.

I cuxtʌlel jiñi ñaxan bʌ xñopt'añob

⁴³ Tsa' cajiyob ti bʌq'uen ti jujuntiquil; yic'ot ca'bʌl ñuc tac bʌ i yejtal i p'ʌtʌlel Dios tsi' pʌsʌyob jiñi apóstolob.

⁴⁴ Pejtelel tsa' bʌ i ñopoyob temel añob, pejtelel i chu'bʌañob i tem cha'añob jach.

⁴⁵ Tsi' choñoyob i chu'bʌañ yic'ot i lum, tsi' t'oxbeyob i bʌ cha'añ mi' yʌq'ueñtelob jiñi mach bʌ añobic i chu'bʌañ.

⁴⁶ Temel tsa' chʌn ajñiyob ti Templo ti jujump'ejl q'uiñ. Tsi' xet'eyob waj ti' yotot tac, temel tsi' cha'leyob we'el ti tijicñʌyel yic'ot jump'ejlob jach i pusic'al.

⁴⁷ Tsi' su'buyob i ñuclel Dios. Ti pejtelel tejclum uts'at tsi' q'ueleyob wiñicob x'ixicob. Ti jujump'ejl q'uiñ lac Yum tsi' p'ojlesa xñopt'añob woli bʌ i coltʌntelob.