Hechos 19 - Jiñi Tsiji' bʌ Wen T'añ cha'añ Estudio

Pablo ya' ti Éfeso

¹ Che' ya' to añ Apolos ti Corinto, Pablo tsa' ñumi majlel ba'añ wits, tsa' c'oti ti Éfeso, ya'i tsi' taja cha'tiquil uxtiquil xcʌnt'añob.

² Tsi' c'ajtibeyob: —¿Tsa' ba aq'uentiyetla Ch'ujul bʌ Espíritu che' bʌ tsa' la' ñopo? Tsi' jac'ʌyob: —Ma'añic, maxto añic tsa' cu'bi lojon mi añ Ch'ujul bʌ Espíritu.

³ Jiñi cha'añ tsi' su'beyob: —¿Chuqui ti ch'ʌmja' tsa' aq'uentiyetla? Tsi' jac'ʌyob: —Jiñi tsa' bʌ i yʌc'ʌ Juan.

⁴ Pablo tsi' su'beyob: —Juan tsi' yʌq'ueyob ch'ʌmja' cha'añ mi' cʌyob i mul, tsi' su'beyob wiñicob x'ixicob cha'añ mi' ñopob jiñi tal to bʌ ti' pat, jiñʌch Jesús.

⁵ Che' bʌ tsi' yu'biyob jiñi t'añ, tsi' ch'ʌmʌyob ja' ti' c'aba' lac Yum Jesús.

⁶ Che' bʌ tsi' yʌc'ʌ i c'ʌb Pablo ti' jol wiñicob x'ixicob, tsa' tili jiñi Ch'ujul bʌ Espíritu ti' tojlelob, tsi' cha'leyob yan tac bʌ t'añ, tsi' cha'leyob alt'añ.

⁷ Añob che' bajche' lajchʌntiquil wiñicob ti pejtelel.

⁸ Pablo tsa' ochi ti sinagoga, ch'ejl tsi' cha'le t'añ uxp'ejl uw, tsi' wen cha'leyob t'añ cha'añ i yumʌntel Dios, tsi' xic'beyob cha'añ mi' ñopob,

⁹ pero lamital wiñicob tsa' tsʌts-ayob i pusic'al, ma'añic tsi' ñopoyob, tsi' p'ajayob jiñi woli bʌ i ñopob i bijlel Cristo ti' tojlel wiñicob x'ixicob, jiñi cha'añ Pablo tsa' loq'ui ya' ba' añob, tsi' pʌyʌ majlel xñopt'añob; tsa' caji i cʌntesañob ti jujump'ejl q'uiñ ya' ti escuela i cha'añ Tiranno.

¹⁰ Che'ʌch tsi' mele Pablo, tsi' cha'le cʌntesa cha'p'ejl ja'b, jiñi cha'añ pejtelel jiñi chumulo' bʌ ti Asia, judíojob yic'ot griegojob, tsi' yu'bibeyob i t'añ lac Yum Jesús.

¹¹ Dios tsi' c'ʌñʌ Pablo cha'añ mi' pʌs wen ñuc tac bʌ i melbal,

¹² jiñi cha'añ tsi' ch'ʌmʌyob majlel ba'añ xc'am-ʌjelob jiñi pañuelo tac yic'ot welñʌc'ʌl tac tsa' bʌ i tʌlʌ Pablo, che' jiñi tsa' lajmi i chʌmel pejtelel xc'am-ʌjelob, yic'ot tsa' loq'uiyob i xi'bʌjlel.

¹³ Jiñi xʌn pañimil bʌ judíojob tsa' bʌ i cha'leyob wujt tsi' lon ñopo i c'ʌmbeñob i c'aba' lac Yum Jesús cha'añ mi' chocob loq'uel xi'bajob. Tsi' yʌlʌyob: “Mic su'beñet loq'uel ti' c'aba' Jesús mu' bʌ i su'b Pablo.”

¹⁴ Che'ʌch tsi' meleyob ja'el jiñi wuctiquil wiñicob bʌ i yalobil juntiquil judío i c'aba' Esceva, i yum motomajob.

¹⁵ Pero i xi'bʌjlel wiñic tsi' jac'beyob: “Mij cʌn Jesús, yic'ot mij cʌn ja'el Pablo, pero ixcu jatetla, ¿majquiyetla?”

¹⁶ Jiñi wiñic am bʌ i xi'bʌjlel tsa' tijp'i i chuc jiñi xwujtob, tsa' caji i ñolch'iñob ti pejtelelob, tsa' mʌjli i cha'añ jiñi am bʌ i xi'bʌjlel, tsa' puts'iyob loq'uel ti otot, pits'ilobix, lojwemobix.

¹⁷ Tsa' caji i yu'biñob pejtelel judíojob yic'ot griegojob chumulo' bʌ ti Éfeso, ti pejtelelob tsi' cha'leyob bʌq'uen, tsa' ñuq'uesʌnti i c'aba' lac Yum Jesús.

¹⁸ Ca'bʌl tsa' bʌ i ñopoyob tsa' tili i su'bob i mul. Tsi' bajñel su'buyob i bʌ cha'añ chuqui tac tsi' meleyob ti ñaxan.

¹⁹ Ca'bʌl tsa' bʌ i cha'leyob wujt tsi' tempayob i juñ, tsi' puluyob ti' wut wiñicob x'ixicob. Tsi' tsicbeyob i tojol jiñi juñ tsa' bʌ puli, tsa' loq'ui ti lujump'ejl i yuxc'al mil sʌsʌc taq'uiñ.

²⁰ Jiñi cha'añ ca'bʌl tsa' ñojpi i t'añ Dios, tsa' wen tsictiyi i p'ʌtʌlel.

²¹ Che' bʌ tsa' ujti pejtelel jiñi, Pablo tsi' ña'ta ñumel ti Macedonia yic'ot ti Acaya che' mi' majlel ti Jerusalén. Tsi' yʌlʌ: “Wersa yom mic majlel ti Roma ja'el che' bʌ ñumeñoñix ti Jerusalén.”

²² Jiñi cha'añ tsi' choco majlel ti Macedonia cha'tiquil mu' bʌ i coltañob ti' ye'tel, jiñobʌch Timoteo yic'ot Erasto. Pablo tsa' to ts'ita' jal-a ya' ti Asia.

Wulwul t'añ ya' ti Éfeso

²³ Jiñi éfesojob tsa' cajiyob ti wulwul t'añ ti contra jiñi woli bʌ i ñopbeñob i bijlel Cristo.

²⁴ Come añ juntiquil xten plata i c'aba' Demetrio mu' bʌ i mel ti sʌsʌc taq'uiñ i yotot tac jiñi dios i c'aba' Diana. Wen ca'bʌl tsi' cha'leyob ganar i yaj e'telob.

²⁵ Demetrio tsi' tempa jiñi x'e'telob yic'ot yaño' bʌ lajalob bʌ i ye'tel, tsi' su'beyob: —Wiñicob, la' wujil ca'bʌl mi lac cha'len ganar cha'añ ili e'tel,

²⁶ pero tsa'ix la' q'uele yic'ot tsa'ix la' wu'bi chuqui woli i mel Pablo, mach wʌ'ic jach ti Éfeso, pero ti' pejtelel Asia ja'el, mi' su'beñob cha'añ mach diosic jiñi melbil tac jach bʌ ti c'ʌbʌl.

²⁷ Jiñi cha'añ, mach cojic jach bʌbʌq'uen mi' jilel la que'tel pero mi mejlel i jilel i yotlel jiñi x'ixic dios, Diana, bʌbʌq'uen mi' jisʌntel i ñuclel jiñi dios mu' bʌ i ch'ujutesañob pejtelel año' bʌ ti Asia yic'ot ti pejtelel pañimil.

²⁸ Che' bʌ tsi' yu'biyob jiñi t'añ, tsa' wen mich'ayob, tsi' cha'leyob c'am bʌ t'añ, tsi' yʌlʌyob: ¡Ñuc lac dios Diana wʌ' ti Éfeso!

²⁹ Ti pejtelel tejclum wen ju'ucñayob, ti ora jach tsi' tempayob i bʌ ti parque, tsi' chucuyob Gayo yic'ot Aristarco ch'oyolo' bʌ ti Macedonia, jiñʌch i pi'ʌlob ti xʌmbal Pablo.

³⁰ Pablo yom ochel ba'añ ca'bʌl wiñicob x'ixicob pero jiñi xñopt'añob tsi' tiq'uiyob.

³¹ Che' ja'el cha'tiquil uxtiquil año' bʌ i ye'tel ya' ti Asia, i cʌñʌyo' bʌ Pablo, tsi' choco majlel i wiñicob cha'añ mi' su'beñob ti wocol t'añ Pablo cha'añ mach yomic mi' yochel ti parque.

³² Jelchojcob jax i t'añ jiñi tempʌbilo' bʌ ti parque, ju'ucñayob jax ti t'añ, pero ca'bʌlob mach yujilobic chucoch tsi' tempayob i bʌ.

³³ Jiñi judíojob tsi' chocoyob loq'uel Alejandro ba' p'ulul wiñicob x'ixicob cha'añ mi' pejcañob. Alejandro tsi' letsa i c'ʌb cha'añ mi' ñʌjch'elob, come yom i yʌq'ueñob i ch'ʌmben isujm.

³⁴ Che' yujilobix judíojʌch jiñi Alejandro, cha'p'ejl ora tsi' chʌn cha'leyob c'am bʌ t'añ ti pejtelelob. Tsi' yʌlʌyob: ¡Ñuc lac dios Diana wʌ' ti Éfeso!

³⁵ Jiñi cha'añ, jiñi xts'ijbaya che' bʌ tsa'ix i ñʌch'choco jiñi bajc'ʌl wiñicob x'ixicob, tsi' su'beyob: “Wiñicob, añet bʌ la wʌ' ti Éfeso, ¿baqui añ juntiquil wiñic mach bʌ yujilic mi ti pejtelel lac tejclum Éfeso mi' cʌntʌbentel i yotlel jiñi x'ixic dios Diana yic'ot i yejtal tsa' bʌ i choco ju'bel Júpiter?

³⁶ Jiñi cha'añ, come ma'añic majch mi mejlel i contrajin jiñi t'añ, yom mi la' ñʌjch'el cha'añ mi la' ch'ʌmben isujm chuqui yom mi la' mel.

³⁷ Come ili wiñicob tsa' bʌ la' pʌyʌ tilel, ma'añic chuqui jontol tsi' meleyob ti' tojlel jiñi templo yic'ot ma'añic woli i p'ajob la' dios.

³⁸ Jiñi cha'añ la' tilicob Demetrio yic'ot i pi'ʌlob ti e'tel mi añ chuqui yom i yʌlob ti' contra juntiquil wiñic, jiñi cha'añ añ melobʌjʌl, añ xmeloñelob ja'el, la' i melob i bʌ cha'añ i mul.

³⁹ Mi añ to chuqui woli la' ña'tan, jiñi año' bʌ i ye'tel mi mejlel i yu'biñob ya' ba' mi' tempañob i bʌ.

⁴⁰ Come bʌbʌq'uen mi' sujbel lac mul cha'añ jiñi leto tsa' bʌ ujti sajmʌl, ma'añic mi mejlel lac su'b chucoch tsa' tejchi jiñi ju'ucña bʌ t'añ.”

⁴¹ Che' bʌ tsa' ujti ti t'añ, tsi' su'beyob sujtel jiñi tempʌbilo' bʌ.