Hechos 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-26 ) Jiñi albil bʌ t'añ cha'añ jiñi ch'ujul bʌ Espíritu

¹ C'uxbibil bʌ Teófilo, ti jiñi ñaxan bʌ juñ tsa' c ts'ijbubeyet pejtelel chuqui tsi' mele Jesús yic'ot chuqui ti cʌntesa tac tsi' cha'le,

² c'ʌlʌl ti jiñi q'uiñ che' bʌ tsa' pʌjyi letsel Jesús ti panchan, che' bʌ tsa' ujti i yʌq'ueñob mandar ti p'ʌtʌlel ch'ujul bʌ Espíritu jiñi apóstolob yajcʌbilo' bʌ i cha'añ.

³ Che' bʌ tsa'ix ujti i yu'bin wocol Jesús, tsi' cha' pʌsʌ i bʌ ti tsiquil ti' tojlel jiñi chocbilo' bʌ majlel ti subt'añ cha'añ cha' cuxulix, cha'c'al to q'uiñ tsi' cha' pʌsʌ i bʌ ti' tojlel wiñicob x'ixicob tsi' su'beyob che' bajche' añ i yumʌntel Dios.

⁴ Che' temel añob tsi' su'beyob: —Mach yomic mi la' loq'uel ti Jerusalén, ya' yom mi la' pijtan jiñi albil bʌ t'añ i cha'añ lac Tat mu' bʌ caj i yʌq'ueñetla, che' bajche' u'bibilix la' cha'añ ti joñon.

⁵ Come Juan tsi' yʌq'ueyetla ch'ʌmja', pero Dios mach jalix mi caj i yʌq'ueñetla la' ch'ʌm Ch'ujul bʌ Espíritu.

Tsa' pʌjyi letsel Jesús ti panchan

⁶ Jiñi tempʌbilo' bʌ yic'ot, tsi' c'ajtibeyob: —C Yum, ¿I yorajlelix ba mi caj a cha' wa'chocon i yumʌntel Israel ti ili ora?

⁷ Jesús tsi' su'beyob: —Mach la' wentajic cha'añ mi la' ña'tan baqui bʌ q'uiñ mi baqui bʌ ora mi caj i yujtel jiñi, come jiñi lac Tat tsi' bajñel ch'ʌmʌ ti' wenta;

⁸ pero mi caj la' wʌq'uentel la' p'ʌtʌlel, che' mi' yochel ti la' pusic'al jiñi Ch'ujul bʌ Espíritu. Ya' ti Jerusalén yic'ot ti pejtelel judea yic'ot ti Samaria c'ʌlʌl ti ñajt bʌ pañimil mi cajel la' su'b chuqui tac tsa' la' q'uele.

⁹ Che' bʌ tsa' ujti i laj su'b jiñi t'añ, che' woli to i q'uelob, tsa' pʌjyi letsel, tsa' mʌjqui ti tocal, ma'añix tsi' chʌn q'ueleyob.

¹⁰ Che' woli' chʌn q'uelob panchan, che' woli ti letsel majlel Jesús, tsa' wa'leyob ti lʌc'ʌl cha'tiquil wiñicob wen sʌsʌco' bʌ i pislel,

¹¹ tsi' su'beyob: —Wiñicob, añet bʌ la ti Galilea, ¿chucoch woli la' chʌn q'uel jiñi panchan? Jiñi Jesús, tsa' bʌ pʌjyi letsel ti panchan loq'uem bʌ ti la' tojlel, mi caj i cha' tilel che' bajche' tsa' la' q'uele che' bʌ tsa' majli ti panchan.

Tsa' yajcʌnti Matías cha'añ i q'uexol Judas

¹² Che' jiñi tsa' sujtiyob majlel ti Jerusalén, tsi' cʌyʌyob jiñi wits i c'aba' Olivo, che'ʌch i ñajtlel bajche' jump'ejl mil metro.

¹³ Che' bʌ tsa' c'otiyob, tsa' letsiyob ti' cha'lajmlel i mal otot ba' jijlemob Pedro yic'ot Jacobo, Juan, Andrés, Felipe, Tomás, Bartolomé, Mateo, Jacobo i yalobil Alfeo, yic'ot Simón Zelote, yic'ot Judas i yijts'in Jacobo.

¹⁴ Ti pejtelelob, ti jump'ejlob jach i pusic'al woli' chʌn pejcañob Dios, temel yic'ot jiñi x'ixicob, yic'ot María i ña' Jesús, yic'ot i yijts'iñob.

¹⁵ Ti jim bʌ ora Pedro tsa' wa'le ti ojlil ba'añ hermañujob, (tic'ʌl mi añob wʌcc'al jiñi ya' bʌ tempʌbilob), tsi' yʌlʌ:

¹⁶ —Quermañujob, wersa mi' ts'ʌctiyel i Ts'ijbujel Dios che' bajche' tsi' yʌlʌ jiñi Ch'ujul bʌ Espíritu ti wajali ti yej David cha'añ Judas, jiñʌch Judas tsa' bʌ i toj-esa majlel wiñicob cha'añ mi chucob Jesús.

¹⁷ Come jiñi Judas tsa' tsijqui quic'ot lojon, tsa' aq'uenti i ye'tel ja'el.

¹⁸ Yic'ot jiñi taq'uiñ tsa' bʌ i taja cha'añ i tsʌnsa tsi' mʌñʌ jumpejt jamil, ya'i tsa' xit yajli, tsa' tojmi i ñʌc', tsa' p'ul loq'ui i soyta'.

¹⁹ Pejtelel jiñi año' bʌ ti Jerusalén tsi' laj u'biyob chuqui tsa' ujti, jiñi cha'añ jiñi jamil tsa' otsʌbenti i c'aba' Acéldama, (am bʌ isujmlel ti' t'añob “jamil mʌmbil bʌ ti' tojol i ch'ich'el wiñic”).

²⁰ Come ts'ijbubil ti Salmo tac: “La' ochic ti jochol bʌ lum ili chumlibʌl, ma'añic majch yom mi chumtʌl ya'i.” Ts'ijbubil ja'el: “La' i ch'ʌmben ye'tel yam bʌ wiñic.”

²¹ Wersa yom mi' wa'chocontel juntiquil tsa' bʌ i pi'leyonla ti xʌmbal c'ʌlʌl che' bʌ tsa' juli lac Yum Jesús ti lac tojlel c'ʌlʌl che' bʌ tsa' cha' loq'ui ti lac tojlel,

²² c'ʌlʌl che' bʌ tsi' yʌc'ʌ ch'ʌmja' Juan, c'ʌlʌl ti jiñi q'uiñ che' bʌ tsa' pʌjyi letsel Jesús ti lac tojlel, juntiquil wʌ'ʌch bʌ añ la quic'ot wersa mi' yʌq'uentel i ye'tel ti testigo cha'añ mi' su'b ti isujm cha'añ tsa' cha' ch'ojyi Jesús.

²³ Jiñi cha'añ tsi' yajcayob cha'tiquil: Jiñʌch José, mu' bʌ i pejcʌntel ti Barsabás, am bʌ i cha'chajplel i c'aba' Justo yic'ot Matías.

²⁴ Tsi' pejcayob Dios che' bajche' iliyi: Jatet, c Yum, ma' cʌmben i pusic'al pejtelel wiñicob, wʌ'an cha'tiquil, pʌsʌ majqui jiñi yajcʌbil bʌ a cha'añ,

²⁵ cha'añ mi' ch'ʌm i ye'tel ti subt'añ tsa' bʌ i cʌyʌ Judas cha'añ i mul, cha'añ mi' majlel ti' yajñib tsa' bʌ i yajca.

²⁶ Jiñi cha'añ tsi' cha'leyob yajcaya ti alas, tsa' c'oti ti' wenta Matías; jiñi cha'añ tsa' tsijqui yic'ot jiñi junlujuntiquil chocbilo' bʌ majlel ti subt'añ.