Hebreos 9 - Jiñi Tsiji' bʌ Wen T'añ cha'añ Estudio

¹ Jiñi cha'añ ti ili ora Dios tsi' yʌq'ueyonla mandar yic'ot jiñi ñaxan bʌ xuc'ul bʌ t'añ, tsi' cʌntesayonla bajche' yom mi lac ch'ujutesan yic'ot bajche' yom mi' yujtel i ye'tel ti ch'ujul bʌ ajñibʌl ila ti pañimil,

² tsa' mejli jiñi pisil bʌ otot che' bajche' iliyi, ya' ti ñaxan bʌ i mal i c'aba' Ch'ujul bʌ Ajñibʌl ya'añ jiñi lámpara yic'ot mesa ba' tsa' ajq'ui jiñi ch'ujul bʌ waj.

³ Añ yam bʌ i mal ti' pat i cha'tsajlel bʌ i mal jiñi pisil bʌ otot i c'aba' C'ax Ch'ujul bʌ Ajñibʌl.

⁴ Ya'añ i pulʌntib pom melbil bʌ ti oro yic'ot Arca laj pixbil bʌ ti oro ba' lotol jiñi xuc'ul bʌ t'añ, ya' ti mal Arca añ p'ejt melbil bʌ ti oro ba' lotol maná, ya'añ ja'el i barajte' Aarón tsa' bʌ loq'ui i buts, yic'ot jiñi xajlel ba' ts'ijbubil jiñi lujump'ejl mandar.

⁵ Ya' ti' pam jiñi Arca añ i yejtal querubiñob mu' bʌ i ñuq'uesañob Dios, mi' mosob ti' wich' i pam i majc jiñi Arca ba' tsa' ñusʌbentiyob i mul wiñicob. Wʌle mach mejlic laj tsictesʌbeñetla isujmlel i bʌl jiñi otot.

⁶ Che' chajpʌbilix jiñi otot, muq'uix i yochelob jiñi motomajob ti jiñi ñaxan bʌ i mal cha'añ mi' melob i ye'tel ti jujump'ejl q'uiñ.

⁷ Pero ti' cha'tsajlel i mal jiñi otot, cojach mi' yochel jiñi ñuc bʌ motomaj junyajl ti jump'ejl ja'b, pero wersa yom mi' ch'ʌm ochel ch'ich' mu' bʌ i yʌc' cha'añ i bajñel mul yic'ot i mul wiñicob x'ixicob che' mach tsajilobic i cha'añ.

⁸ Che' bajche' jiñi, jiñi Ch'ujul bʌ Espíritu mi' yʌq'ueñonla lac ña'tan maxto tsictiyemic bajche' mi caj la cochel ti jiñi C'ax Ch'ujul bʌ Ajñibʌl che' wa'al to jiñi ñaxan bʌ otot.

⁹ Jiñi pisil bʌ otot, jiñʌch i yejtal jiñi isujm bʌ otot mu' bʌ i yʌq'ueñonla Cristo wʌle; ti jiñi pisil bʌ otot tsa' aq'uenti Dios i majtañ tac yic'ot tsʌnsʌbil bʌ i majtañ mach bʌ mejlic i junyajlel ñʌch'chocobeñob i pusic'al jiñi mu' bʌ i cha'leñob ch'ujutesaya.

¹⁰ Ili waj yic'ot jiñi japbil tac bʌ i melbal jach wiñicob, mi' pocob ti ja', pero i yejtal jach jiñi mero isujm bʌ, che' mi' tilel jiñi isujm bʌ, mux i jilel i c'ʌjñibal jiñi yam bʌ.

¹¹ Wʌle tsa'ix tili Cristo, jiñi c'ax ñuc bʌ la caj motomaj mu' bʌ i yʌq'ueñonla jiñi uts'at bʌ, come jiñi otot ba' mi' mel i ye'tel ñumen ñuc yic'ot wen ts'ʌcʌl melbil, jiñʌch mero i chumlib Dios, mach melbilic ti c'ʌbʌl che' bajche' jiñi melbil bʌ ti pañimil.

¹² Tsa' junyajlel ochi Cristo ya' ti c'ax Ch'ujul bʌ Ajñibʌl, mach cha'añic mi yʌc' i ch'ich'el alʌ chivo mi alʌ tat wacax, pero yic'ot i bajñel ch'ich'el tsa' ochi ti jiñi c'ax Ch'ujul bʌ Ajñibʌl ya' ti chañ, come tsi' mʌñʌyonla cha'añ mi la cajñel yic'ot ti pejtelel ora.

¹³ I ch'ich'el tat wacax yic'ot i ch'ich'el alʌ chivo yic'ot i tʌñʌl ña'a wacax tsa' bʌ i puluyob tsa' mejli i poj sʌc-esʌbeñob i bʌc'tal jiñi bi'bi'o' bʌ che' bʌ tsa' tsijcʌntiyob ti' pam i bʌc'tal.

¹⁴ Pero ñumen i c'ʌjñibal i ch'ich'el Cristo, come mi' poc loq'uel ti lac pusic'al jiñi tsucul bʌ lac melbal cha'añ mi lac melben i ye'tel jiñi cuxul bʌ Dios, ti' p'ʌtʌlel jiñi Espíritu mach bʌ yujilic jilel, Cristo tsi' yʌc'ʌ i bʌ che' bajche' ch'ujul bʌ i majtañ Dios mach bʌ añic i mul.

¹⁵ Jiñi cha'añ Cristo tsi' mele jiñi tsijib bʌ xuc'ul bʌ t'añ cha'añ mi' yʌq'ueñtelob jiñi pʌybilo' bʌ ti Dios jiñi bendición tsa' bʌ i wʌn ña'ta i yʌq'ueñob, añ i p'ʌtʌlel Cristo cha'añ mi' mel iliyi, come tsa' chʌmi cha'añ mi' ñusʌbeñob i mul jiñi añob to bʌ ti' wenta ñaxan bʌ xuc'ul bʌ t'añ,

¹⁶ che' añ majqui mi' chʌmel, mi tsa'ix i wʌn mele ts'ijbubil bʌ juñ ba' mi' yʌl cha'añ woli' t'ox i chu'bʌañ, che' jiñi ma'añic majqui mi' mejlel i ch'ʌm jinto mi' chʌmel i yum jiñi chu'bʌañʌl.

¹⁷ Che' chʌmeñix mux i yujtel che' bajche' ts'ijbubil, mach mejlic i ch'ʌmbentel i chu'bʌañ che' cuxul to i yum tsa' bʌ i ts'ijba.

¹⁸ Jiñi ñaxan bʌ xuc'ul bʌ t'añ ja'el ma'añic i p'ʌtʌlel jinto tsa' bejq'ui ch'ich'.

¹⁹ Moisés tsi' su'bu pejtelel i mandar Dios ti' tojlel pejtelel wiñicob; ti wi'il tsi' ch'ʌmʌ i ch'ich'el alʌ wacax yic'ot i ch'ich'el chivo yic'ot ja', yic'ot chʌchʌc bʌ i tsutsel tʌñʌme', yic'ot pimel cha'añ mi' tsijcan i juñilel mandar yic'ot pejtelel wiñicob x'ixicob.

²⁰ Tsi' yʌlʌ: “Jiñʌch i ch'ich'el alʌc'ʌl cha'añ mi' ts'ʌctiyel jiñi xuc'ul bʌ t'añ tsa' bʌ i yʌlʌ Dios che' bʌ tsi' yʌq'ueyetla i mandar.”

²¹ Che' ja'el tsi' tsijca ti ch'ich' jiñi pisil bʌ otot yic'ot pejtelel i bʌl mu' bʌ i c'ʌjñel ti' ye'tel Dios.

²² Che' bajche' mi' yʌl jiñi mandar, cojach yic'ot ch'ich' mi' sʌc-esʌntel ti pejtelel; machic mi' bejq'uel i ch'ich'el i majtañ Dios, ma'añic i ñusʌntel mulil.

Tsa' chʌmi Cristo cha'añ mi jisan i p'ʌtʌlel mulil

²³ Che' bajche' jiñi tsa' wersa sʌc-esʌnti jiñi tabernáculo yic'ot i bʌl, jiñʌch i yejtal chuqui tac añ ti panchan; pero tsa' sʌc-esʌnti i cha'año' bʌ Dios yic'ot yam bʌ tsʌnsʌbil bʌ i majtañ Dios, ñumen wen bʌ.

²⁴ Come Cristo ma'añic tsa' ochi ti Ch'ujul bʌ Ajñibʌl melbil bʌ ti c'ʌbʌl, i yejtal jach bʌ panchan, tsa' ochi ti panchan, jiñʌch jiñi mero Ch'ujul bʌ Ajñibʌl ba' woli' pʌs i bʌ ti' tojlel Dios cha'añ mi' c'ajtin laj coltʌntel.

²⁵ Junyajl jach tsa' ochi ti panchan cha'añ mi' yʌc' i bʌ che' bajche' tsʌnsʌbil bʌ i majtañ, mach che'ic bajche' jiñi ñuc bʌ motomaj mu' bʌ i yochel ti jujump'ejl ja'b ti C'ax Ch'ujul bʌ Ajñibʌl yic'ot ch'ich', mach bʌ i ch'ich'elic.

²⁶ Che'ic bajche' jiñi, wersa yom mi' chʌmel Cristo ti jujunmuc' c'ʌlʌl ti' cajibal pañimil; pero mach che'ic, jasʌl junyajl tsa' tsictiyi Cristo che' lʌc'ʌlix jiñi cojix bʌ q'uiñ tac, tsi' yʌc'ʌ i bʌ ti tsʌnsʌntel cha'añ mi' jisʌbeñonla lac mul.

²⁷ Che' bajche' junyajl jach mi' chʌmelob wiñicob x'ixicob, che' mi' yujtelob ti chʌmel, mi' melob i bʌ,

²⁸ che' ja'el, Cristo junyajl jach tsa' ajq'ui cha'añ mi' cuchbeñob i mul ca'bʌlob, mi caj i tsictiyel ti' cha'yajlel cha'añ mi' coltañ jiñi woli bʌ i pijtañob, pero ma'añix mi caj i chʌn cuch mulil.