Hebreos 8 - Jiñi Tsiji' bʌ Wen T'añ cha'añ Estudio

Jesús jiñʌch xcoltaya cha'añ jiñi tsiji' bʌ xuc'ul bʌ t'añ

¹ Añ ñuc bʌ isujmlel jiñi woli bʌ c su'b lojon tilel, jiñʌch iliyi: Añ c'ax ñuc bʌ la caj motomaj tsa' bʌ buchle ti' ñoj jiñi C'ax Ñuc bʌ woli bʌ ti yumʌntel ya' ti panchan.

² Woli' mel i ye'tel ti motomaj ya' ti jiñi C'ax Ch'ujul bʌ Ajñibʌl, jiñi mero isujm bʌ otot tsa' bʌ i wa'choco lac Yum, mach jiñic pisil bʌ otot tsa' bʌ i wa'choco wiñicob.

³ Come ti' pejtelel ñuc bʌ motomajob añob i ye'tel cha'añ mi' yʌq'ueñob Dios i majtañ yic'ot tsʌnsʌbil bʌ i majtañ; jiñi cha'añ, jiñi ñuc bʌ lac Motomaj wersa añ chuqui mi' yʌq'ueñonla ja'el.

⁴ Wʌ'ic añ ti pañimil Jesús, mach motomajic, come wʌ'ʌch añ motomajob mu' bʌ i yʌq'ueñob i majtañ che' bajche' ts'ijbubil ti' mandar Moisés.

⁵ Pero jiñi motomajob woli' jach i pʌsob i yejtal yic'ot i yʌxñʌlel chuqui añ ti panchan, ba' ora Moisés tsi' mele jiñi Tabernáculo, Dios tsi' su'be: “Yom ma' wen q'uel cha'añ lajal ma' mel ti pejtelel che' bajche' tsa' c pʌsbeyet ya' ti wits.”

⁶ Pero jiñi c'ax ñuc bʌ la caj motomaj tsa'ix i taja ñumen ñuc bʌ i ye'tel cha'añ mi yʌq'ueñonla ñumen wen bʌ xuc'ul bʌ t'añ ti' tojlel Dios cha'añ mi lac pijtan chuqui tac uts'at, albil bʌ i cha'añ Dios.

⁷ Come tsa'ic mejli i coltañonla jiñi ñaxan bʌ xuc'ul bʌ t'añ che' jiñi ma'añic tsa' ajq'ui i cha'p'ejlel,

⁸ pero Dios tsi' q'uele wiñicob x'ixicob che' bʌ mach tojobic, tsi' yʌlʌ: “Awilan, tal i yorajlel, mi caj c wa'chocon tsijib xuc'ul bʌ t'añ yic'ot i p'olbal Israel yic'ot i p'olbal Judá.

⁹ Mach lajalic bajche' jiñi xuc'ul bʌ t'añ tsa' bʌ c mele yic'ot i ñojte'elob, che' bʌ tsa' c chucbeyob i c'ʌb, cha'añ mic pʌyob loq'uel ti' lumal Egipto, ma'añic tsi' wen jac'ʌyob, jiñi cha'añ tsa' c tʌts'ʌ c bʌ ti' tojlelob, che'en lac Yum.

¹⁰ Mi caj c mel yam bʌ xuc'ul bʌ t'añ yic'ot jiñi israelob che' ñumeñix ca'bʌl q'uiñ: Mi caj cotsʌbeñob c mandar ti' ña'tʌbal yic'ot mi caj c ts'ijbubeñob ti' pusic'al, mi caj i c'uxbiñoñob come i Dioson, mi caj c cha'añiñob.

¹¹ Mach wersajix mi caj i cʌntesan i pi'ʌlob mi i yerañob. Ma'añic majqui mi caj i chʌn al: Ñopo lac Yum, come ti' pejtelelob mi caj i ñopoñob, jiñi alʌlob yic'ot jiñi ñoxobix bʌ,

¹² come mi caj c ñusʌbeñob i mul, ma'añic mi caj c chʌn ña'tʌbeñob i mul mi i jontolil.”

¹³ Che' bʌ tsi' yʌlʌ tsijib jiñi pacto, tsa'ix i tsictesa cha'añ ma'añix i c'ʌjñibal jiñi oñiyix bʌ; pejtelel chuqui tac mach tsijibic woli bʌ ti tsuculʌyel mach jalix mi' sʌc jilel.