Hebreos 4 - Jiñi Tsiji' bʌ Wen T'añ cha'añ Estudio

¹ Jiñi cha'añ la' lac bʌc'ñan Dios, che' woli to i pʌyonla cha'añ mi yʌq'ueñonla laj c'aj la co, jiñi cha'añ yom tsajilonla ame añic ti la' tojlel jiñi mach bʌ añic mi' c'ajob i yoj ti lac Yum.

² Come tsa'ix su'bentiyonla jiñi wen t'añ lajal bajche' tsa' su'bentiyob; pero ma'añic chuqui tsi' tajayob che' bʌ tsi' yu'biyob jiñi wen t'añ, come mach xuc'ulic tsi' ñopoyob.

³ Pero joñonla mu' bʌ lac ñop Dios, ochemonla ba' mi laj c'aj la co, che' bajche' tsi' yʌlʌ: “Mich'on tsa' c su'bu ti isujm, Ma'añic mi caj cʌq'ueñob i c'aj i yoj.” Anquese ujtemix i melbal c'ʌlʌl ti' tejchibal pañimil.

⁴ Come am ba' ts'ijbubil jiñi t'añ cha'añ i wucp'ejlel q'uiñ: “Dios tsi' c'aja i yoj che' ti wucp'ejlel q'uiñ che' bʌ ujtemix pejtelel i ye'tel.”

⁵ Ts'ijbubil ja'el: “Ma'añic mi caj i yochelob ti c'aj-o.”

⁶ Che' ja'el añ to yaño' bʌ maxto bʌ ochemobic ti c'aj-o, ixcu jiñi ñaxaño' bʌ tsa' bʌ su'bentiyob jiñi wen t'añ, ma'añic tsi' tajayob c'aj-o come ti' caj xñusa t'añob,

⁷ tsi' cha' wa'choco i yorajlel c'aj-o, “jiñi tsiji' bʌ wʌle”, che' bajche' tsi' su'bu ti' juñ David ti wi'il che' bʌ ñumeñix ca'bʌl ja'bil, tsi' yʌlʌ: “Mi woli la' wu'biben i t'añ wʌle, mach mi la' wʌc' ti tsʌts-an la' pusic'al.”

⁸ Come tsa'ic i tajayob c'aj-o jiñi israelob ti' tojlel Josué, ma'añic tsi' cha' alʌ Dios jiñi tsiji' bʌ q'uiñ.

⁹ Tsiquil che' jiñi, añ to yam bʌ c'aj-o woli to bʌ i pijtañob jiñi i cha'año' bʌ Dios,

¹⁰ come majqui jach mi' c'aj i yoj ti Dios, mi' c'aj i yoj ti ye'tel che' bajche' Dios tsi' c'aja i yoj che' bʌ ujtemix i ye'tel.

¹¹ La' lac cha'len wersa cha'añ mi laj c'aj la co, ame añic majch mi' yajlel ti mulil che' bajche' la' tatob tsa' bʌ i ñusʌbeyob i t'añ.

¹² Come cuxul i t'añ Dios yic'ot wen p'ʌtʌl. Ñumen jay bajche' espada am bʌ i yej ti' cha'wejlel, mi' sʌl jec' lac pusic'al yic'ot lac ch'ujlel; lac p'aquel yic'ot mi' ñumel ti lac yojlom bʌquel mi' tsictesan chuqui woli' yʌl lac pusic'al yic'ot chuqui yom lac pusic'al.

¹³ Ma'añic chuqui melbil i cha'añ Dios mucul bʌ ti' wut, laj tsiquil ti' wut pejtelel chuqui tac añ; wersa mi caj lac mel lac bʌ ti' tojlel jiñi mu' bʌ i laj q'uel lac melbal.

2. JESÚS, JIÑI C'AX ÑUC BɅ LAC MOTOMAJ ( 4.14—10.18 )

¹⁴ Come añ c'ax ñuc bʌ la caj Motomaj tsa' bʌ ochi ti panchan ti' tojlel Dios, jiñʌch Jesús i Yalobil Dios, jiñi cha'añ la' lac chʌn ac' ti lac pusic'al jiñi tsa' bʌ lac ñopo mu' bʌ lac su'b.

¹⁵ C'ax ñuc la caj motomaj. Yujil i p'untañonla, come yujil c'uñonla. Tsa' pʌjyi ti chajp ti chajp bʌ mulil ja'el, che' bajche' mi lac pʌjyel ti mulil, pero ma'añic tsi' jac'ʌ.

¹⁶ Jiñi cha'añ yom ch'ejl lac pusic'al mi lac lʌc'tesan lac bʌ ba'añ i buchlib Dios cha'añ mi lac taj lac p'untʌntel yic'ot mi laj coltʌntel ti' yutslel i pusic'al ba' ora añ lac wocol.