Hebreos 2 - Jiñi Tsiji' bʌ Wen T'añ cha'añ Estudio

Jiñi ñuc bʌ laj coltʌntel

¹ Jiñi cha'añ wersa yom mi lac wen ac' ti lac pusic'al jiñi t'añ tsa' bʌ la cu'bi, ame muq'uic laj cʌy mi mach yʌxʌlic la co.

² Mi isujmʌch jiñi t'añ tsa' bʌ i su'bu jiñi ángelob, pejtelel majqui jach mi' ñusʌbeñob i t'añ mi' wersa tajob i tojol i mul, come ma'añic tsi' jac'ʌyob.

³ ¿Bajche' mi mejlel lac puts'el joñonla mi woli lac ñusan jiñi ñuc bʌ laj coltʌntel? Lac Yum tsi' teche i su'b laj coltʌntel, jiñi tsa' bʌ i yu'bibeyob i t'añ, tsa'ix i cha' su'beyonla ja'el cha'añ isujmʌch,

⁴ che' ja'el Dios tsi' yʌc'ʌ ti cʌjñel i t'añ yic'ot ca'bʌl ñuc tac bʌ i yejtal i p'ʌtʌlel, ñuc tac bʌ i melbal yic'ot bʌbʌq'uen tac bʌ, tsi' yʌq'ueyob i c'ʌjñibal ti chajp ti chajp ti jiñi Ch'ujul bʌ Espíritu che' bajche' yom i pusic'al.

Jesús jiñʌch xcoltaya lac cha'añ

⁵ Come Dios ma'añic tsi' yʌq'ue ti' wenta jiñi ángelob jiñi tal to bʌ pañimil mu' bʌ lac su'b;

⁶ pero añʌch majqui tsi' yʌlʌ, ts'ijbubil ti salmos: “¿Chucoch ma' p'untan wiñicob x'ixicob yic'ot i yalobil wiñic, chucoch ma' c'uxbin?

⁷ Tsa' mele yoma lajal che' bajche' ángelob, [tsa' wʌq'ue i ñuclel yic'ot i c'uxbintel ti' tojlel pejtelel chuqui tac añ.]

⁸ Tsa' wʌq'ue i yumʌntel ti' tojlel pejtelel chuqui tac añ.” Che' bʌ tsi' yotsa ti' wenta pejtelel chuqui tac añ, ma'añic chuqui tsa' cʌle mach bʌ aq'uebilic ti' wenta, anquese wʌle maxto añic woli laj q'uelben i yumʌntel.

⁹ Pero mi laj q'uel cha'añ Jesús, tsa' bʌ poj peq'uesʌnti ba' mach i tajayic i ñuclel ángelob, tsa'ix cha' aq'uenti i ñuclel yic'ot i c'uxbintel, cha'añ tsi' yʌc'ʌ i bʌ ti chʌmel, come ti' yutslel i pusic'al Dios tsa' chʌmi cha'añ pejtelonla.

¹⁰ Dios tsi' mele pejtelel chuqui tac añ, woli' cʌntan cha'añ mi' tsictesan i ñuclel pejtelel i yalobilob. Jiñi cha'añ tsi' ts'ʌctesa i ye'tel ti Jesucristo la caj Coltaya che' bʌ tsi' yʌc'ʌ ti wocol cha'añ mi' coltañonla, cha'añ mi lac taj lac ñuclel ti' tojlel.

¹¹ Jiñi mu' bʌ i sʌc-esan wiñicob x'ixicob yic'ot jiñi mu' bʌ i sʌc-esʌntelob añ jach juntiquil i Tat ti pejtelob, jiñi cha'añ ma'añic mi' cha'len quisin Jesús che' mi' yermañujiñob,

¹² tsi' yʌlʌ: “Mi caj c tsictesʌbeñob a c'aba' jiñi quermañujob, ti' tojlel jiñi tempʌbilo' bʌ mi caj j c'ʌyin a ñuclel.”

¹³ Tsi' yʌlʌ ja'el: “Mi caj c wen ñop Dios.” Tsi' cha' alʌ: “Wʌ'añon quic'ot calobilob tsa' bʌ i yʌq'ueyon Dios.”

¹⁴ Che' bajche' i yalobil wiñicob x'ixicob añob i bʌc'tal yic'ot i ch'ich'el, che'ʌch ja'el Jesús tsi' ch'ʌmʌ i bʌc'tal yic'ot i ch'ich'el cha'añ mi' yʌc' i bʌ ti chʌmel, che' bʌ tsa' chʌmi tsi' jisʌbe i p'ʌtʌlel jiñi mu' bʌ i yʌc' ti chʌmel wiñicob x'ixicob, jiñʌch xi'ba,

¹⁵ che' jiñi tsi' jiti pejtelel jiñi cʌchʌlo' bʌ ti xi'ba, woli bʌ i bʌc'ñañob chʌmel.

¹⁶ Melel ma'añic tsa' tili i coltañ ángelob, pero tsa' tili i coltañ i p'olbal Abraham.

¹⁷ Jiñi cha'añ wersa tsi' ch'ʌmʌ i bʌc'tal Jesús lajal bajche' i bʌc'tal i yermañujob cha'añ mi' yochel ti ñuc bʌ Motomaj yujil bʌ p'untaya. Xuc'ul i pusic'al ti' ye'tel Dios cha'añ mi' tojben i mul pejtelel wiñicob x'ixicob.

¹⁸ Tsi' yu'bi wocol che' bʌ tsa' pʌjyi ti mulil, jiñi cha'añ añ i p'ʌtʌlel cha'añ mi' mejlel i coltañ jiñi woli bʌ i pʌjyelob ti mulil.