Hebreos 11 - Jiñi Tsiji' bʌ Wen T'añ cha'añ Estudio

I xuc'tʌlel jiñi ñaxaño' bʌ

¹ Jiñi mu' bʌ i ñop Dios, xuc'ul i pusic'al mi' pijtan jiñi mu' bʌ caj yʌq'uentel; mi' ñop ti isujm tal jiñi maxto bʌ tsiquilic.

² Che'ʌch tsi' ñopoyob Dios jiñi ñaxan bʌ wiñicob, jiñi cha'añ Dios tsi' q'ueleyob ti uts'at.

³ Cha'añ tsa'ix lac ñopo Dios, jiñi cha'añ la cujil tsa' mejli pañimil ti' p'ʌtʌlel jach i t'añ Dios, ma'añic tsi' c'ʌñʌ chuqui tac tsiquil ti lac wut cha'añ mi' mel jiñi pañimil woli bʌ laj q'uel wʌle.

⁴ Cha'añ tsi' ñopo Dios Abel tsi' yʌq'ue ñumen wen bʌ i majtañ bajche' Caín, jiñi cha'añ Dios tsi' q'uele ti toj, tsi' su'bu cha'añ uts'at i majtañ tsa' bʌ i yʌc'ʌ Abel; anquese chʌmeñix, woli to i cʌntesañonla cha'añ tsi' ñopo Dios.

⁵ Cha'añ tsi' ñopo Dios Enoc ma'añic tsa' chʌmi, cuxul tsa' pʌjyi letsel ti panchan, ma'añix majch tsa' mejli i chʌn q'uel, come Dios tsi' pʌyʌ letsel; ts'ijbubilix uts'at tsa' ajñi Enoc yic'ot Dios wʌ' ti pañimil, tsi' tijicñesʌbe i pusic'al.

⁶ Mi ma'añic mi lac ñop Dios, mach mejlic i q'uelonla ti uts'at, come majqui jach yom i cʌn Dios, wersa mi' ñop mi añ Dios, come jiñʌch mu' bʌ i yʌq'ueñ i chobejtʌbal majqui jach mi' tsajcan.

⁷ Noé tsi' ñopo Dios, jiñi cha'añ tsi' jac'be i t'añ ba' ora tsi' su'be chuqui mi' caj ti ujtel che' maxto tsiquilic, tsi' mele jiñi colem barco cha'añ mi' coltañ pejtelel año' bʌ ti' yotot. Cha'añ tsi' ñopo Dios, Noé tsi' tsictesʌbeyob i mul pejtelel año' bʌ ti pañimil, tsa' aq'uenti toj bʌ i pusic'al cha'añ mi' yochel ti' cha'añ bʌ Dios yic'ot pejtel mu' bʌ i ñopob.

⁸ Abraham tsi' ñopo Dios, jiñi cha'añ tsi' jac'ʌ i pʌyol, tsa' majli i taj i lum tsa' bʌ su'benti mi caj i yʌq'uentel; tsa' loq'ui ti' lumal anquese mach yujilic baqui woli' majlel.

⁹ Cha'añ tsi' ñopo Dios, Abraham tsa' chumle ya' ti jiñi yajcʌbil bʌ lum che' bajche' tsi' su'be lac Yum, ya' tsa' chumle ti' lumal yam bʌ yumʌlob, tsa' chumle ti pisil bʌ otot che' bajche' Isaac yic'ot Jacob tsa' bʌ aq'uentiyob jiñi jach bʌ t'añ albil bʌ cha'añ Dios,

¹⁰ come Abraham tsi' pijta jiñi tejclum xuc'ul bʌ i c'ʌclib, chajpʌbil bʌ yic'ot melbil bʌ i cha'añ Dios.

¹¹ Che' ja'el Sara tsi' ñopo Dios, anquese to'ol wa'al jach bʌ x'ixic, pero tsa' aq'uenti i p'ʌtʌlel cha'añ mi cʌntan yic'ot cha'añ mi yilan pañimil i yalobil, anquese ca'bʌlix i ja'bilel, come tsi' ñopo cha'añ mi caj i ts'ʌctiyel i t'añ Dios che' bajche' tsi' su'be.

¹² Jiñi cha'añ anquese wen ñoxix Abraham, tsa' ochi ti' tat ca'bʌl i p'olbal che' bajche' jiñi ec' am bʌ ti panchan, yic'ot i ji'il i ti' mar mach bʌ mejlic ti tsijquel.

¹³ Ti pejtelelob xuc'ul to tsi' ñopoyob Dios c'ʌlʌl che' bʌ tsa' chʌmiyob, anquese maxto añic tsa' aq'uentiyob chuqui tsa' su'bentiyob; tsa' jach i ñajti q'ueleyob yilal jiñi albil bʌ t'añ, tsi' ñopoyob, tsi' pijtayob, tsi' yʌlʌyob mach i lumalic ili pañimil, xñumelob jach.

¹⁴ Pejtel mu' bʌ i yʌlob yambʌyʌch i lumal mi' yʌc'ob i bʌ ti cʌjñel, come woli' to i sʌclañob mero i lumal,

¹⁵ tsa'ic i ña'tayob jiñʌch i lumal tsa' bʌ i cʌyʌyob, che' jiñi tsa' mejliyob ti cha' sujtel ya'i.

¹⁶ Pero tsi' pijtayob jiñi ñumen wen bʌ i lumal am bʌ ti panchan; jiñi cha'añ ma'añic mi' cha'len quisin Dios che' mi' Diosiñob, come tsa'ix i melbeyob i tejclum.

¹⁷ Cha'añ tsi' ñopo Dios Abraham, che' bʌ tsa' ilʌbenti i pusic'al tsi' yʌc'ʌ Isaac jiñi cojach bʌ i yalobil cha'añ i majtañ Dios,

¹⁸ tsa' su'benti Abraham: “Loq'uem ti Isaac mi caj i tilel mero a p'olbal”,

¹⁹ come Abraham tsi' ña'ta añ i p'ʌtʌlel Dios cha'añ mi' cha' tech ch'ojyel ba'añ chʌmeño' bʌ; che'ʌch tsa' ujti yilal, tsi' cha' pʌyʌ sujtel.

²⁰ Cha'añ tsi' ñopo Dios Isaac, tsi' yʌq'ue i yutslel i t'añ Jacob yic'ot Esaú, tsi' wʌn su'beyob chuqui tac mi' caj ti ujtel.

²¹ Cha'añ tsi' ñopo Dios Jacob, tsi' yʌq'ue i yutslel i t'añ jujuntiquil i yalobilob José che' yomix chʌmel, tsi' c'uchchoco i bʌ cha'añ mi' ch'ujutesan Dios che' chucul i cha'añ i barajte' mu' bʌ i c'ʌn ti xʌmbal.

²² Cha'añ tsi' ñopo Dios José, tsi' wʌn ac'ʌ i t'añ cha'añ che' mi' chʌmel yom mi' mucob ti' lumal, come tsi' yʌlʌ cha'añ jiñi israelob mi caj i loq'uelob ti Egipto.

²³ Cha'añ tsi' ñopoyob Dios i tat i ña' Moisés, che' bʌ alʌ to tsi' mucuyob uxp'ejl uw; come jiñi alʌ ch'itoñ tsi' q'ueleyob wen i t'ojol jax, ma'añic tsi' bʌc'ñʌbeyob i mandar jiñi rey tsa' bʌ i yʌc'ʌ cha'añ mi' tsʌnsʌntel alʌlob.

²⁴ Cha'añ tsi' ñopo Dios Moisés, che' wiñiquix, ma'añic tsi' pejca ti' ña' i yixic'al faraón,

²⁵ tsi' yʌc'ʌ i bʌ ti tic'lʌntel yic'ot i cha'año' bʌ Dios, ma'añic tsi' yajca cha'añ mi' poj tijicñesan i pusic'al jumuc' ti mulil,

²⁶ tsi' ña'ta ti' pusic'al ñumen añ i c'ʌjñibal lac tic'lʌntel cha'añ Cristo che' bajche' pejtelel chu'bʌañʌl ti Egipto. Come xuc'ul tsi' pijta i chobejtʌbal.

²⁷ Cha'añ tsi' ñopo Dios, tsa' loq'ui Moisés ti Egipto, ma'añic tsi' bʌc'ñʌbe i mich'ajel jiñi rey; come xuc'ul jach tsa' ajñi, lajal che' bajche' woli i q'uel jiñi mach bʌ tsiquilic ti lac wut.

²⁸ Cha'añ tsi' ñopo Dios, tsi' teche Pascua, yic'ot tsijcʌbil bʌ i ch'ich'el ti ti' i yotot, cha'añ mi' coltʌntel jiñi ñaxan bʌ alʌlob i cha'añ israelob, ba' ora mi' ñumel jiñi ángel cha'añ mi' jisan jiñi ñaxan bʌ i yalobil Egiptojob.

²⁹ Cha'añ tsi' ñopoyob Dios, tsa' c'axiyob ti jiñi Chʌchʌc bʌ mar che' bajche' ti tiquin bʌ lum; jiñi egiptojob tsa' chʌmiyob ti ja' che' bʌ tsi' lon ñopoyob c'axel.

³⁰ Cha'añ tsi' ñopoyob Dios, tsa' yajli jiñi ts'ajc am bʌ ti' joytʌlel Jericó che' bʌ ujtemix i joyojtañob wucp'ejl q'uiñ.

³¹ Cha'añ tsi' ñopo Dios Rahab, jiñi tsa' bʌ i cha'le ca'bʌl ts'i'lel, ma'añic tsa' tsʌnsʌnti yic'ot jiñi xñusa t'añob, come tsi' pʌyʌ ochel jiñi xtsajiyajob cha'añ mi' coltañob.

³² ¿Chuqui to yom mic su'b? Ma'añic i yorajlel cha'añ mic laj su'b chuqui tsi' meleyob Gedeón, Barac, Sansón, Jefté, David, Samuel, yic'ot x'alt'añob.

³³ Cha'añ tsi' ñopoyob Dios, tsa' mʌjli i cha'añob ti' contra reyob, tsi' cha'leyob chuqui toj, tsi' tajayob chuqui tac albil, tsi' mʌcbeyob i yej bajlum,

³⁴ tsi' yʌpʌyob jiñi bʌbʌq'uen tac bʌ c'ajc, tsi' puts'tayob i yej espada, che' c'uñob tsa' p'ʌt-esʌntiyob, tsa' p'ʌt-ayob ti guerra, tsi' yajñesayob i contra ch'oyolo' bʌ ti yam bʌ lum.

³⁵ Añ me'ba' x'ixicob tsa' bʌ cha' ch'ojyi chʌmeñ bʌ i pi'ʌlob; yaño' bʌ tsa' p'ump'un tic'lʌntiyob, ma'añic tsi' c'ajtiyob i colel, come yomob i taj jiñi ñumen uts'at bʌ mu' bʌ caj i yʌq'ueñtelob ba' ora mi' cha' ch'ojyelob jiñi chʌmeño' bʌ.

³⁶ Yaño' bʌ tsa' wajlentiyob, tsa' jajts'iyonla ti asiyal, yaño' bʌ tsa' cʌjchiyob ti cadena, tsa' ochiyob ti cárcel.

³⁷ Tsa' jujliyob ti xajlel, tsa' setuntiyob ti sierra, tsa' tsʌnsʌntiyob ti espada; lʌpʌl i cha'añob i pʌchʌlel tʌñʌme' yic'ot chivo, tsa' pam ñumiyob ti xʌmbal, ma'añobic i chu'bʌañ, tic'lʌbilob ti ca'bʌl wocol.

³⁸ Pero wen uts i pusic'al ti' tojlel jiñi jontolo' bʌ, tsiquil mach i lumalic ili pañimil, tsa' pam ñumiyob ti tiquin lum yic'ot ti wits tac, tsa' chumleyob ti ch'eñ yic'ot ti ye'bal xajlel.

³⁹ Ti pejtelelob tsa' q'uejliyob ti uts'at cha'añ tsi' ñopoyob Dios, pero ma'añic tsa' aq'uentiyob ti pañimil jiñi albil bʌ i cha'añ Dios,

⁴⁰ come Dios tsi' ña'ta ñumen uts'at mi' pijtañob chuqui ñumen ñuc mu' bʌ caj i tajob yic'otonla che' temel mi la cʌq'uentel lac wenlel yic'otob ba' ora mi' ts'ʌctiyel i t'añ.