Genesis 9 - Jiñi Tsiji' bʌ Wen T'añ cha'añ Estudio

Xuc'ul bʌ i t'añ Dios yic'ot Noé

¹ Dios tsi' yʌq'ue i yutslel i t'añ Noé yic'ot i yalobilob, tsi' su'beyob: “La' tilic la' p'olbal, la' p'ojliquetla, but'ula jiñi pañimil.

² Mi caj i bʌc'ñañetla pejtelel bʌte'el ti pañimil yic'ot pejtelel xwejlel mut, yic'ot pejtelel jʌlʌcña bʌ mi' majlel ti lum, yic'ot chʌy tac am bʌ ti mar; ti pejtelel mi cʌq'ueñetla ti la' wenta.

³ Pejtelel cuxul tac bʌ mu' bʌ ti xʌmbal, mi' mejlel la' c'ux, yic'ot ja'el jiñi pimel tac yic'ot yam bʌ i wut lum, mi cʌq'ueñetla ti' pejtelel cha'añ i bʌl la' ñʌc'.

⁴ Pero mach la' c'ux we'elʌl yic'ot i ch'ich'el, come i ch'ich'el jiñʌch i cuxtʌlel.

⁵ Come ti isujm mi caj j q'uextʌben i jontolil jiñi mu' bʌ i cha'len tsʌnsa mi bʌte'el o mi wiñic. Joñon mi caj j q'uextʌben i mul jiñi mu' bʌ i tsʌnsan i pi'ʌl.”

⁶ “Jiñi mu' bʌ i bec'ben i ch'ich'el wiñic, mi caj i tsʌnsʌntel ja'el, come Dios tsi' mele wiñic ti yejtal.

⁷ Pero jatetla la' p'ojliquetla, la' wen p'ojlic la' walobilob. La' bujt'ic pañimil ti la' p'olbal.”

⁸ Dios tsi' su'be Noé yic'ot i yalobilob:

⁹ “Joñon mi cʌq'ueñetla xuc'ul bʌ c t'añ ti la' tojlel yic'ot ti' tojlel jiñi talto bʌ la' p'olbal;

¹⁰ yic'ot ti' tojlel pejtelel cuxul tac bʌ am bʌ ti la' tojlel, che' bajche' mut tac, alʌc'ʌl tac yic'ot pejtelel bʌte'el che' bajche' jaycojt tsa' loq'ui ti barco.

¹¹ Mi caj c wa'chocon xuc'ul bʌ c t'añ yic'otetla, ma'añix mi caj chʌn jisan pejtelel cuxul tac bʌ yic'ot but'ja', yic'ot ja'el ma'añix ba' ora chʌn tal but'ja' cha'añ mi' jisan pañimil.”

¹² Che' ja'el, Dios tsi' yʌlʌ: “Jiñʌch i yejtal xuc'ul bʌ c t'añ mu' bʌ c wa'chocon ti pejtelel ora yic'otetla yic'ot pejtelel cuxul tac bʌ am bʌ la' wic'ot:

¹³ Mi cʌc' t'oxja' ti tocal, i yejtalʌch jiñi xuc'ul bʌ c t'añ mu' bʌ cʌq'ueñob jiñi año' bʌ ti pañimil.

¹⁴ Che' ba' ora mic pʌy tilel tocal ti pañimil, mi caj i pʌs i bʌ c t'oxja' ti tocal.

¹⁵ Che' jiñi mi caj c ña'tan xuc'ul bʌ c t'añ tsa' bʌ cʌq'ueyetla, yic'ot tsa' bʌ cʌq'ueyob pejtelel cuxul tac bʌ ti jujunchajp; ma'añix ba' ora chʌn tal but'ja' cha'añ mi' jisan pejtelel cuxul tac bʌ ti pañimil.

¹⁶ Mi caj i tilel t'oxja' ti tocal; mi caj j q'uel cha'añ mic ña'tan xuc'ul bʌ c t'añ tsa' bʌ cʌq'ueyob ti pejtelel ora jiñi cuxul tac bʌ am bʌ ti pañimil.”

¹⁷ Dios tsi' su'be Noé: “Jiñʌch i yejtal xuc'ul bʌ c t'añ tsa' bʌ c mele yic'ot pejtelel cuxul tac bʌ ti pañimil.”

Tsa' yʌc-a Noé

¹⁸ I yalobilob Noé tsa' bʌ loq'uiyob ti barco jiñobʌch Sem, Cam yic'ot Jafet. Cam jiñʌch i tat Canaán.

¹⁹ Ili uxtiquil wiñicob jiñobʌch i yalobilob Noé. I ñojte'elobʌch pejtelel wiñicob x'ixicob ti pañimil.

²⁰ Noé tsa' caji i cha'len e'tel ti lum, tsi' pʌc'ʌ ts'usubil.

²¹ Tsi' japbe i ya'lel ts'usub, tsa' yʌc-a, tsi' jocho i pislel, pits'il tsa' ajñi ya' ti mal pisil bʌ i yotot.

²² Cam, i tat Canaán, tsi' q'uele pits'il i tat, tsa' loq'ui majlel i su'beñob jiñi cha'tiquil i yerañob año' bʌ ti jumpat.

²³ Che' jiñi Sem yic'ot Jafet tsi' ch'ʌmʌyob pisil, tsi' lij q'uecheyob tilel pisil ti' quejlab ti' cha'ticlel, wʌlʌc pat tsa' ochiyob, tsi' mosoyob i tat che' pits'il. Che' wʌlʌc pat añob, ma'añic tsi' q'ueleyob i tat che' pits'il.

²⁴ Che' c'ajalix i yoj Noé, tsi' yu'bi chuqui tsi' mele jiñi ijts'iñʌl bʌ i yalobil,

²⁵ tsi' yʌlʌ: “¡La' chojquic Canaán! ¡Mux i yochel ti majtañ e'tel ti' tojlel i yerañob!”

²⁶ Tsi' yʌlʌ ja'el: “¡La' aq'uentic Sem i yutslel i t'añ lac Yum Dios; la' ochic Canaán ti x'e'tel i cha'añ!

²⁷ ¡La' i yʌq'ueñ Dios i ñuclel Jafet, la' chumlec ti pisil bʌ i yotot tac Sem; la' ochic Canaán ti x'e'tel i cha'añ!”

²⁸ Che' bʌ ñumeñix but'ja', tsa' to jal-a Noé ti pañimil jo'lujunc'al yic'ot lujump'ejl i yuxc'al (350) ja'b.

²⁹ Ti pejtelel i ja'bilel Noé jiñʌch cha'bajc' yic'ot lujump'ejl i waxʌcc'al (950) i ja'bilel, che' jiñi tsa' chʌmi.