Genesis 8 - Jiñi Tsiji' bʌ Wen T'añ cha'añ Estudio

¹ Che' jiñi Dios tsi' ña'ta Noé yic'ot pejtelel bʌte'el yic'ot pejtelel alʌc'ʌl am bʌ ti barco; tsi' choco tilel ic' cha'añ mi' sajp'el jiñi ja' am bʌ ti' pam jiñi lum.

² Tsa' tijq'ui ti loq'uel jiñi cuxul bʌ ja' am bʌ ti tam bʌ i yajñib yic'ot tsa' lajmi jiñi ja'lel tsa' bʌ yajli ju'bel ti panchan.

³ C'unte' c'unte' tsa' caji ti sajp'el jiñi ja'; che' tsa' ñumi lujump'ejl i waxʌcc'al (150) q'uiñ tsa' tiqui jiñi ja' ti' pam jiñi lum.

⁴ Tsa' c'ʌc cʌle jiñi barco ti' pam wits i c'aba' Ararat che' ti' wuclujump'ejl q'uiñ che' ti' wucp'ejlel uw.

⁵ Tsa' chʌn sajp'i ju'bel jiñi ja' c'ʌlʌl che' ti' lujump'ejlel uw, che' ti ñaxan bʌ tsic, tsa' tsictiyi tac wits.

⁶ Che' bʌ tsa' ñumi cha'c'al q'uiñ, Noé tsi' jamʌ jiñi ventana tsa' bʌ i mele ti barco,

⁷ che' jiñi tsi' choco majlel x'ac'xi', tsa' wejli majlel, tsa' majli tac yic'ot tsa' cha' sujti tac tilel, c'ʌlʌl jinto tsa' tiqui jiñi lum.

⁸ Tsi' choco majlel ja'el x'ujcuts cha'añ mi' ña'tan mi sʌp'ʌlix jiñi ja'.

⁹ Jiñi x'ujcuts ma'añic tsi' taja i t'uchlib, jiñi cha'añ tsa' cha' sujti tilel ti barco come añ to ja' ti pejtelel pañimil. Jiñi cha'añ Noé tsi' loc'sa i c'ʌb, tsi' cha' chucu ochel ti barco jiñi x'ujcuts.

¹⁰ Tsa' to i pijta yam bʌ wucp'ejl q'uiñ, tsi' cha' choco loq'uel x'ujcuts ti barco.

¹¹ Che' iq'uix tsa' cha' c'oti jiñi x'ujcuts ti barco, tsi' ch'ʌmʌ c'otel i yopol olivo te' ti' ñi', che' jiñi Noé tsi' ña'ta sʌp'ʌlix ja' ti lum.

¹² Tsi' cha' pijta yam bʌ wucp'ejl q'uiñ, tsi' cha' choco loq'uel x'ujcuts, che' jiñi ma'añix tsa' chʌn sujti.

¹³ Che' ti lujunc'al i cha'bajc' yic'ot jump'ejl (601) i ja'bilel Noé, che' ti ñaxan bʌ uw, ti ñaxan bʌ tsic, tsa'ix tiqui jiñi ja' ti jiñi lum; jiñi cha'añ Noé tsi' jambe i jol jiñi barco, tsi' q'uele jiñi lum, tiquiñix.

¹⁴ Che' ti' cha'p'ejlel uw, ti' wucp'ejl i cha'c'al tsic tiquiñix jiñi ja' ti lum.

¹⁵ Jiñi cha'añ Dios tsi' su'be Noé:

¹⁶ “Loq'uen ti barco yic'ot a wijñam yic'ot a walobilob yic'ot i yijñamob a walobilob.

¹⁷ Che' ja'el mi caj a loc'san pejtelel alʌc'ʌl tac ya' bʌ añ a wic'ot, jiñi mut, jiñi bʌte'el yic'ot pejtelel jʌlʌcña bʌ mi' majlel ti lum; la' pujquic majlel ti pejtelel pañimil, la' cha' p'ojlic.”

¹⁸ Jiñi cha'añ Noé tsa' loq'ui yic'ot i yalobilob yic'ot i yijñam yic'ot i yijñamob i yalobilob.

¹⁹ Pejtelel bʌte'el yic'ot pejtelel jʌlʌcña bʌ mi' majlel ti lum, yic'ot pejtelel mut tac, yic'ot yan tac bʌ mu' bʌ ti xʌmbal ti pañimil ti jujunchajp, tsa' loq'ui ti barco.

²⁰ Ti wi'il Noé tsi' melbe i pulʌntib i majtañ lac Yum, tsi' yajca sʌc bʌ alʌc'ʌl yic'ot sʌc bʌ mut, tsi' yʌq'ue Dios pulbil bʌ i majtañ ya' ti pulʌntib.

²¹ Che' bʌ tsi' yu'bi lac Yum jiñi xojocña bʌ i yujts'il, tsi' yʌlʌ ti' pusic'al: “Ma'añix mi caj c chʌn jisan jiñi pañimil cha'añ i mul wiñicob x'ixicob come jontol chuqui mi' ña'tañob ti' pusic'al c'ʌlʌl che' ch'itoñob to; ma'añix mi caj c chʌn jisan pejtelel cuxul tac bʌ che' bajche' tsa' c jisa.”

²² “Che' woli ti chʌn jalijel pañimil mux i tilel i yorajlel pac' yic'ot c'ajbal, tsʌñal yic'ot ticwal, jajmel yic'ot ja'lel, q'uiñil yic'ot ac'ʌlel.”