Genesis 7 - Jiñi Tsiji' bʌ Wen T'añ cha'añ Estudio

Jiñi but'ja'

¹ Lac Yum tsi' su'be Noé: “Ochen ti barco, yic'ot pejtelel año' bʌ ti a wotot, come tsa' j q'uele cojach jatet tojet tic tojlel yic'ot ti' tojlel pejtelel wiñicob x'ixicob ti pañimil.

² Otsan ti barco wuccojt i tat yic'ot wuccojt i ña'al pejtelel sʌc bʌ bʌte'el ti jujunchajp; cojach jiñi mach bʌ sʌquic, otsan juncojt i tat yic'ot juncojt i ña'al pejtelel bʌte'el ti jujunchajp.

³ Che' ja'el otsan wuccojt i tat yic'ot wuccojt i ña'al mut ti' chajp ti' chajp yujil bʌ wejlel cha'añ cuxul mi' yajñel ti pañimil.

⁴ Che' ñumeñix wucp'ejl q'uiñ, mi caj c choc tilel ja'al ti pañimil cha'c'al q'uiñ yic'ot cha'c'al ac'ʌlel; mi caj c jisan ti pañimil pejtelel cuxul tac bʌ tsa' bʌ c mele.”

⁵ Che' jiñi Noé tsi' mele ti pejtelel che' bajche' tsi' yʌlʌ lac Yum.

⁶ Añ lujunc'al i cha'bajc' (600) i ja'bilel Noé che' bʌ tsa' tili jiñi but'ja' ti pañimil.

⁷ Cha'añ ti' caj but'ja' Noé tsa' ochi ti barco, temel yic'ot i yalobilob yic'ot i yijñam yic'ot i yijñamob i yalobilob.

⁸ Jiñi sʌc bʌ bʌte'el yic'ot jiñi mach bʌ sʌquic bʌ bʌte'el, yic'ot te'lemut tac, yic'ot pejtelel jʌlʌcña bʌ mi' majlel ti lum,

⁹ ti cha'cha'cojt tsa' ochiyob ti barco yic'ot Noé; i tat yic'ot i ña'al ti jujunchajp, che' bajche' Dios tsi' yʌq'ue mandar Noé.

¹⁰ Che' ti' wucp'ejlel q'uiñ tsa' tili but'ja' ti pañimil.

¹¹ Che' lujunc'alix i cha'bajc' (600) i ja'bilel Noé, che' ti' cha'p'ejlel uw yic'ot ti' wuclujump'ejlel q'uiñ, tsa' tojmi pejtelel i yajñib jiñi cuxul tac bʌ ja' am bʌ ti tam bʌ i yajñib yic'ot ma'añix i p'isol tsa' tili ja'al ti panchan,

¹² cha'c'al q'uiñ yic'ot cha'c'al ac'ʌlel tsa' yajli ja'al ti pañimil.

¹³ Ti jiñi jach bʌ q'uiñ che' bʌ tsa' caji ja'al tsa' ochiyob ti barco Noé yic'ot i yalobilob, Sem, Cam yic'ot Jafet, yic'ot i yijñam Noé yic'ot i yijñamob i yalobilob.

¹⁴ Tsa' ochi ja'el ti' chajp ti' chajp pejtelel bʌte'el, yic'ot pejtelel alʌc'ʌl, yic'ot pejtelel jʌlʌcña bʌ mi' majlel, yic'ot pejtelel mut ti jujunchajp yic'ot pejtelel yujil tac bʌ wejlel.

¹⁵ Tsa' ochiyob ti barco ba'añ Noé ti' ñujp ti' ñujp, pejtelel cuxul tac bʌ am bʌ ti pañimil.

¹⁶ Jiñi tsa' bʌ ochiyob jiñʌch i tat yic'ot i ña'al che' bajche' Dios tsi' yʌq'ue mandar Noé; lac Yum tsi' ñup'be i ti' jiñi barco.

¹⁷ Cha'c'al q'uiñ tsa' yajli ja'al ti pañimil. Jiñi ja' tac tsa' tam-a, tsi' ch'uyu letsel jiñi barco.

¹⁸ Jiñi ja' tsa' letsi majlel, tsa' bujt'i pejtelel pañimil. Jiñi barco c'ʌcʌcña ti' pam ja' tsa' majli.

¹⁹ Tsa' wen bujt'i ja' ti pañimil; pejtelel jiñi chañ tac bʌ wits am bʌ ti ye'bal panchan tsa' laj mujlʌyi ti but'ja'.

²⁰ Tsa' pajmi ñumel jiñi ja' ya' ti' pam jiñi chañ tac bʌ wits, che' bajche' ojlil i waxʌcp'ejl metro.

²¹ Tsa' laj chʌmi pejtelel cuxul tac bʌ ti pañimil, che' bajche' mut tac, alʌc'ʌl tac, bʌte'el tac, yic'ot pejtelel jʌlʌcña bʌ mi' majlel ti lum, yic'ot pejtelel wiñicob x'ixicob.

²² Tsa' laj chʌmi pejtelel cuxul tac bʌ am bʌ ti pañimil mu' bʌ i japob ic' ti' ñi'.

²³ Che'ʌch tsi' laj jisa Dios pejtelel cuxul tac bʌ am bʌ ti pañimil, wiñicob x'ixicob yic'ot bʌte'el, yic'ot jiñi jʌlʌcña bʌ mi' majlel, yic'ot xwejlel mut tac; tsa' laj jiliyob. Cojach Noé tsa' cʌle yic'ot jiñi año' bʌ ti barco.

²⁴ Jiñi ja' tsa' ajñi ti' pam lum lujump'ejl i waxʌcc'al (150) q'uiñ.