Genesis 6 - Jiñi Tsiji' bʌ Wen T'añ cha'añ Estudio

I jontolil wiñicob x'ixicob

¹ Che' bʌ tsa' cajiyob ti p'ojlel wiñicob x'ixicob ti pañimil, tsi' yila pañimil xch'oc bʌ i yalobilob.

² Che' bʌ tsi' q'ueleyob i yalobilob Dios jiñi xch'oc bʌ i yalobilob wiñicob che' wen i t'ojolob jax, tsi' pʌyʌyob ti yijñam che' bajche' jaytiquil tsi' mulayob.

³ Jiñi cha'añ lac Yum tsi' yʌlʌ: “Mach ti pejtelelic ora mi caj cuchbeñob i jontolil wiñicob x'ixicob, come wiñicob jach yujil bʌ chʌmel, cojach wʌcc'al (120) ja'b mi caj i yajñelob ti pañimil.”

⁴ Añ wen chaño' bʌ wiñicob x'ixicob ti jim bʌ ora yic'ot ja'el che' bʌ tsi' pi'leyob i bʌ i yalobilob Dios yic'ot jiñi xch'oc bʌ i yalobilob wiñicob, tsa' tili i yalobilob; jiñobʌch ch'ejl bʌ wiñicob año' bʌ ti wajali, tsa' bʌ wen q'uejliyob ti ñuc.

⁵ Lac Yum tsi' q'uele ca'bʌlix i jontolil wiñicob x'ixicob ti pañimil, tsi' q'uele jontol jax ti pejtelel ora pejtelel chuqui añob ti' pusic'al yic'ot pejtelel chuqui mi ña'tañob.

⁶ Tsi' mele i pusic'al lac Yum Dios cha'añ tsi' mele wiñicob x'ixicob ti pañimil, c'ux tsi' yu'bi ti' pusic'al.

⁷ Lac Yum tsi' yʌlʌ: “Mi caj c jisan ti pañimil jiñi wiñicob x'ixicob tsa' bʌ c mele yic'ot bʌte'el yic'ot jʌlʌcña bʌ mi' majlel yic'ot xwejlel mut tac, lolom jach tsa' c meleyob.”

⁸ Pero lac Yum tsi' q'uele ti uts'at jiñi Noé, tsi' pʌsbe i yutslel i pusic'al.

Noé tsi' mele barco

⁹ Jiñobʌch i p'olbal Noé. Toj jiñi Noé, uts'at ti' wut wiñicob x'ixicob; tsi' chʌn cha'le xʌmbal Noé ti' bijlel Dios.

¹⁰ Tsi' yila pañimil uxtiquil ch'itoñ bʌ i yalobilob Noé, jiñobʌch: Sem, Cam yic'ot Jafet.

¹¹ Jiñi año' bʌ ti pañimil tsi' socoyob i bʌ ti jontolil ti' wut Dios, tsa' p'ojli ca'bʌl jontolil ti pañimil.

¹² Dios tsi' q'uele jontolob jax pejtelel wiñicob x'ixicob, come tsi' socoyob i bʌ ti' ca'bʌl jontolil ti pañimil.

¹³ Jiñi cha'añ Dios tsi' su'be Noé: “Mi caj c jisan pejtelel wiñicob x'ixicob, come ca'bʌl tsa' p'ojliyob i jontolil ti pejtelel pañimil; jiñi cha'añ mi caj c jisañob yic'ot pañimil.

¹⁴ Mele barco ti gofer te', ma' mel tsalʌl tac ti' mal, ma' pʌc' yic'ot i yetsel te' ti' mal yic'ot ti' pat.

¹⁵ Mele che' bajche' iliyi: Jo'lujump'ejl i wucc'al (135) metro i ñajtlel, ojlil i yuxp'ejl i cha'c'al (22.5) metro i xujc, ojlil i chʌnlujump'ejl (13.5) metro i chañlel.

¹⁶ Mele ventana ojlil metro i chañlel ti' joytʌlel barco, melben i puertajlel barco ya' ti ti'; uxlajm yom ma' c'ʌc letsel.

¹⁷ Mi caj c choc tilel but'ja' cha'añ mic jisan pejtelel i bʌl pañimil am bʌ i cuxtʌlel, mi' caj ti chʌmel pejtelel cuxul tac bʌ ti pañimil,

¹⁸ pero jatet mi caj cʌq'ueñet xuc'ul bʌ c t'añ, mi caj a wochel ti barco, jatet yic'ot a walobilob yic'ot a wijñam yic'ot i yijñamob a walobilob.

¹⁹ Mi caj a pʌy ochel ti barco pejtelel cuxul tac bʌ ti cha'cha'cojt, juncojt i tat yic'ot juncojt i ña' cha'añ cuxul mi' yajñelob a wic'ot.

²⁰ Mi caj a wotsan ti' ñujp ti' ñujp te'lemut, yic'ot bʌte'el, yic'ot jʌlʌcña bʌ mi' majlel ti lum ti' chajp ti' chajp. Ti' ñujp ti' ñujp mi caj a wotsan cha'añ cuxul mi yajñelob.

²¹ Tempan i buc'bal ti' chajp ti' chajp, otsan ja'el i bʌl a ñʌc' cha'añ mi la' c'ux.”

²² Che'ʌch tsi' mele Noé; tsi' mele pejtelel che' bajche' tsi' yʌlʌ Dios. Ti' tojlel Noé Gn 6.18; 9.9-17 Ti' tojlel Abraham, Isaac yic'ot Jacob Gn 15.18-19; 17.1-14, 21; Ex 2.24; 6.2-5; 2 R 13.23; Gl 3.17 Ti' tojlel Finees Nm 25.12-13 Ti' tojlel David 2 Cr 13.5; 21.7 Ti' tojlel israelob Ex 19.1-8; 24.1-8; 34.10-28; Dt 4.23-24; 7.1-11; 1 Cr 16.12-18; Hch 3.25; Rm 9.4; 2 Cor 3.14; Gl 3.17; Ef 2.12; Heb 9.1, 18, 20 Jiñi tsijib xuc'ul bʌ t'añ Jer 31.31-34; Mt 26.28; Mc 14.24; Lc 22.20; 1 Cor 11.25; 2 Cor 3.6; Heb 7.22; 8.6-13; 9.15; 10.16, 29; 12.24; 13.20