Genesis 47 - Jiñi Tsiji' bʌ Wen T'añ cha'añ Estudio

¹ José tsa' majli ba'añ faraón, tsi' su'be: —Jiñi c tat yic'ot querañob yic'ot i tʌñʌme'ob, yic'ot i wacaxob yic'ot pejtelel i chu'bʌañob, tsa' tiliyob ti' lumal Canaán; wʌle ya'añob ti' lumal Gosén.

² José tsi' yajca jo'tiquil i yerañob, tsi' pʌsbeyob faraón.

³ Jiñi cha'añ faraón tsi' su'beyob: —¿Chuqui la' we'tel? Tsi' jac'beyob faraón: —Xcʌnta tʌñʌme'on lojon, x'e'telon bʌ lojon a cha'añ temel yic'ot c tat lojon.

⁴ Tsi' su'beyob ja'el faraón: —Tsa' tiliyon lojon ti chumtʌl ti a lumal, come ma'añic lojon c jamil cha'añ c tʌñʌme' lojon, x'e'telon bʌ lojon a cha'añ, come tsʌts jiñi wi'ñal ti' lumal Canaán; jiñi cha'añ awocolic ac'ʌ a t'añ cha'añ mic poj chumtʌl lojon, x'e'telon bʌ lojon a cha'añ ya' ti' lumal Gosén.

⁵ Jiñi cha'añ faraón tsi' su'be José: —Jiñi a tat yic'ot a werañob tsa' tiliyob ti a tojlel.

⁶ Wʌ'an i lumal Egipto ti' tojel a wut. La' majlicob ti chumtʌl a tat yic'ot a werañob ba' wen jiñi lum; la' chumlecob ti' lumal Gosén; mi añ cʌñʌlo' bʌ a cha'añ yujilo' bʌ i q'uelol alʌc'ʌl ti' tojlelob, aq'ueñob i cʌntan cʌlac'.

⁷ José tsi' pʌyʌ ochel ja'el Jacob i tat, tsi' yʌc'ʌ ti cʌjñel ti' tojlel faraón. Jacob tsi' yʌq'ue i yutslel i t'añ faraón.

⁸ Jiñi faraón tsi' c'ajtibe Jacob: —¿Jayp'ejlix a ja'bilel?

⁹ Jacob tsi' jac'be faraón: —Añix lujump'ejl i wucc'al (130) ja'b c ja'bilel wolic ñusan ti pañimil. Maxto ca'bʌlic c ja'bilel woli' ñumel c cha'añ yic'ot ca'bʌlix c wocol; maxto c'otemic c ja'bilel bajche' i ja'bilel c ñojte'elob jal bʌ tsa' ñumiyob ti pañimil.

¹⁰ Jacob tsi' yʌq'ue i yutslel i t'añ faraón, ti wi'il tsa' loq'ui majlel.

¹¹ Che'ʌch tsi' yʌc'ʌ José ti chumtʌl i tat yic'ot i yerañob ya' ti Egipto; tsi' yʌq'ueyob wen bʌ lum, am bʌ ti' lumal Ramesés che' bajche' tsi' yʌlʌ faraón.

¹² José tsi' yʌq'ueyob i bʌl i ñʌc' i tat yic'ot i yerañob yic'ot pejtelel jiñi año' bʌ ti' wenta i tat che' bajche' jaytiquil i yalobilob.

¹³ Ma'añic bʌl ñʌc'ʌl ti pejtelel jiñi lum, come wen tsʌts jiñi wi'ñal, jiñi cha'añ yomobix chʌmel cha'añ wi'ñal ti pejtelel i lumal egiptojob yic'ot ti' lumal cananeojob.

¹⁴ José tsi' tempa pejtelel i tojol jiñi trigo tsa' bʌ i mʌñʌyob jiñi año' bʌ ti' lumal Egipto yic'ot ti' lumal Canaán; José tsi' ch'ʌmʌ ochel jiñi taq'uiñ ti yotot faraón.

¹⁵ Che' bʌ tsa' laj jiliyob i taq'uiñ jiñi año' bʌ ti Egipto yic'ot jiñi año' bʌ ti' lumal Canaán, tsa' tiliyob ba'añ José pejtelel egiptojob, tsi' yʌlʌyob: —Aq'ueñon lojon i bʌl lojon c ñʌc'; ¿mu' ba caj a wʌc'on lojon ti chʌmel cha'añ ti' caj tsa'ix jili lojon c taq'uiñ?

¹⁶ José tsi' jac'ʌ: —Mi tsa'ix jili la' taq'uiñ, aq'ueñon la' wʌlac', che' jiñi mi caj cʌq'ueñetla trigo ti' q'uexol la' wʌlac'.

¹⁷ Tsi' pʌyʌyob tilel i yʌlac' ba'añ José, che' jiñi José tsi' yʌq'ueyob i bʌlob i ñʌc' ti' q'uexol caballo tac, ti tʌñʌme' tac, ti wacax tac yic'ot ti burro tac; tsi' yʌq'ueyob i bʌlob i ñʌc' jump'ejl ja'b ti' q'uexol pejtelel i yʌlac'ob.

¹⁸ Che' ñumeñix jiñi ja'bil, tsa' cha' tiliyob ba'añ José ti' cha'p'ejlel ja'b, tsi' su'beyob: —Ma'añic mic mucbeñet lojon c yum, tsa'ix laj jili lojon c taq'uiñ yic'ot pejtelel cʌlac' lojon laj a cha'añix c yum lojon. Ma'añix chuqui añ c cha'añ lojon ti' tojel a wut, cojax c bʌc'tal lojon yic'ot c lum lojon.

¹⁹ ¿Yom ba mic chʌmel lojon ti wi'ñal ti' tojel a wut yic'ot yom ba jochol mi' cʌytʌl c lum lojon? Mʌñʌyon lojon yic'ot c lum lojon cha'añ i tojol lojon c waj, che' jiñi i cha'añon lojon faraón temel yic'ot c lum lojon; aq'ueñon lojon trigo cha'añ cuxul mi cajñel lojon cha'añ ma'añic mic chʌmel lojon yic'ot cha'añ mach jocholic mi cʌlel lac lumal.

²⁰ Jiñi cha'añ José tsi' mʌñʌ pejtelel i lumal Egipto cha'añ mi ch'ʌm faraón, come jiñi egiptojob tsi' choñoyob i lum ti jujuntiquil, come wen tsʌts jiñi wi'ñal woli bʌ ti ñumel ti' tojlelob. Jiñi cha'añ jiñi lum tsa' ochi ti' wenta faraón.

²¹ José tsi' pʌyʌ loq'uel pejtelel wiñicob x'ixicob ti xchumtʌl tac ti pejtelel Egipto, tsi' chocoyob majlel ti chumtʌl ti tejclum tac.

²² Cojach jiñi lum i cha'año' bʌ motomajob ma'añic tsi' mʌñʌ, come faraón tsi' yʌq'ueyob trigo cha'añ mi' c'uxob ti' majtañ jach; jiñi cha'añ ma'añic tsi' choñoyob i lum.

²³ Ti wi'il José tsi' su'beyob wiñicob x'ixicob: —Wʌle mʌmbiletixla c cha'añ, jatetla, yic'ot la' lum, i cha'añetixla faraón; wʌle umba'añ la' pac' cha'añ mi la' pʌc' ti jiñi lum.

²⁴ Che' ti yorajlel mi la' lotben i wut la' trigo mi caj la' wʌq'uen faraón cha'yajl i diezmojlel; jiñi yonlel bʌ la' cha'añʌch cha'añ la' pac' yic'ot cha'añ i bʌl la' ñʌc' yic'ot la' pi'ʌlob yic'ot la' walobilob.

²⁵ Tsi' jac'ʌyob: —Tsa' coltayon lojon. La' c taj lojon i yutslel a pusic'al c yum, yic'ot la' ochicon lojon ti x'e'tel i cha'añ faraón.

²⁶ Jiñi cha'añ José tsi' yʌc'ʌ mandar c'ʌlʌl ti ili ora ti' tojlel egiptojob cha'añ mi' yʌq'uentel faraón jump'is ti jo'p'is pejtelel i wut pʌc'ʌbʌl. Cojach i lum motomajob ma'añic tsi' ch'ʌmʌ faraón.

²⁷ Che'ʌch tsa' chumle Israel ti' lumal Egipto ya' ti lum i c'aba' Gosén; ya'i tsa' chumleyob, tsa' wen p'ojliyob i yalobilob.

²⁸ Wuclujump'ejl (17) ja'b tsa' chumle Jacob ti' lumal Egipto, che' jiñi añix wucp'ejl i waxʌcc'al (147) ja'b i ja'bilel Jacob ti' pejtelel.

²⁹ Che' ba' ora mach jalix mi caj i chʌmel Israel, tsi' pʌyʌ tilel José i yalobil, tsi' su'be: —Mi tsa' c taja i yutslel a pusic'al, awocolic ac'ʌ a c'ʌb tic ya' yic'ot yom ma' p'untañon ti' xuc'tʌlel a pusic'al. Awocolic mach a mucon ti Egipto.

³⁰ Ba' ora mic chʌmel, q'uecheyon loq'uel ti Egipto; ya' com ma' mucon ti mucoñibʌl ba'añ c tatob. José tsi' jac'ʌ: —Mi caj c mel che' bajche' tsa' wʌlʌ.

³¹ Israel tsi' yʌlʌ: —Yom ma' wersa aq'ueñon a t'añ. Jiñi cha'añ José tsi' wersa aq'ue i t'añ. Che' jiñi Israel tsi' c'uchchoco i bʌ ya' ti' jol i wʌyib.