Genesis 43 - Jiñi Tsiji' bʌ Wen T'añ cha'añ Estudio

Tsi' pʌyʌyob majlel Benjamín

¹ Tsa' wen p'ojli ca'bʌl wi'ñal ti' lumal Canaán.

² Che' bʌ tsa'ix jili i c'uxob jiñi trigo tsa' bʌ i ch'ʌmʌyob tilel ti Egipto, Jacob tsi' su'be i yalobilob: —Cha' cucula ti Egipto, mʌñʌla tilel ts'ita' i bʌl lac ñʌc'.

³ Judá tsi' su'be: —Jiñi wiñic tsi' wersa su'beyon lojon: “Ma'añic mi caj la' q'uel c wut mi ma'añic mi la' pʌy tilel la' wijts'in.”

⁴ Mi muc'ʌch a choc majlel quijts'in quic'ot lojon, mic majlel c mʌn lojon tilel i bʌl lac ñʌc'.

⁵ Pero mi ma'añic ma' choc majlel, ma'añic mi caj c majlel lojon, come jiñi wiñic tsi' yʌlʌ: “Ma'añic mi caj la' q'uel c wut mi ma'añic mi la' pʌy tilel la' wijts'in la' wic'ot.”

⁶ Jiñi cha'añ Israel tsi' yʌlʌ: —¿Chucoch tsa' la' su'be jiñi wiñic mi añ yam bʌ la' wijts'in cha'añ mi la' wʌc'on ti wocol?

⁷ Tsi' jac'ʌyob: —Jiñi wiñic tsi' wen c'ajtibeyon lojon jaytiquilon lojon quic'ot c pi'ʌlob lojon, ba' tsi' yʌlʌ: “¿Cuxul to ba la' tat? ¿Am ba yam bʌ la' weran?” Tsa' c jac'be lojon che' bajche' tsi' c'ajtibeyon lojon. ¿Tsa' ba c ña'ta lojon mi mux caj i su'beñon lojon: “Pʌyʌla tilel la' wijts'in?”

⁸ Jiñi cha'añ Judá tsi' su'be Israel i tat: —La' c pʌy lojon majlel jiñi ch'itoñ; che' jiñi mic majlel lojon, cha'añ cuxul mi lac cajñel, ame laj chʌmiconla ti lac pejtelel, jatet yic'ot calobilob lojon.

⁹ Mux c ch'ʌm tic wenta jiñi ch'itoñ; mux c cha' pʌy tilel. Mi ma'añic mic cha' pʌy tilel, mi ma'añic mic cha' aq'ueñet, añʌch c mul ti a tojlel ti pejtelel ora.

¹⁰ Machic jax woli la cʌc' ti ñumel ca'bʌl q'uiñ, tic'ʌl tsajñiyoñix lojon cha'yajl.

¹¹ Jiñi cha'añ Israel tsi' su'beyob: —Mi che'ʌch yom, melela che' bajche' jiñi; ch'ʌmʌla majlel ti la' coxtal jiñi wen uts'at bʌ i wut lum, ch'ʌmbenla majlel jiñi wiñic cha'añ i majtañ, ch'ʌmʌla majlel ts'ita' bálsamo, ts'ita' cha'b, xojocña bʌ ts'ac, yic'ot mirra, yic'ot nuez yic'ot almendra tac.

¹² Ch'ʌmʌla majlel cha'yajl i ñumel taq'uiñ che' bajche' tsa' la' ch'ʌmʌ majlel ti ñaxan yic'ot ja'el ch'ʌmbenla majlel jiñi taq'uiñ tsa' bʌ i cha' otsa ti mal la' coxtal; i tajolʌch ma'añic tsi' ña'ta chuqui tsi' mele.

¹³ Che' ja'el pʌyʌla majlel la' wijts'in, cha' cucula ba'añ jiñi wiñic.

¹⁴ Jiñi Dios Mach Bʌ Añic i P'isol i P'ʌtʌlel, la' i melben i pusic'al jiñi wiñic cha'añ mi' p'untañetla yic'ot la' i colbeñetla la' weran yic'ot Benjamín; mi tsa' cʌleyon che' ma'añix calobil, la' ajñicon ti me'ba'.

¹⁵ Jiñi cha'añ jiñi wiñicob tsi' ch'ʌmbeyob majlel i majtañ, yic'ot tsi' ch'ʌmʌyob majlel ca'bʌl taq'uiñ, yic'ot tsi' pʌyʌyob majlel Benjamín. Tsa' cajiyob ti majlel ti Egipto, tsa' c'otiyob ti' tojlel José.

¹⁶ José tsi' q'uele Benjamín yic'otob, tsi' su'be jiñi xcʌnta otot i cha'añ: —Pʌyʌ majlel ti otot jiñi wiñicob, tsʌnsan juncojt wacax, mux a chajpan, come jiñi wiñicob mi caj i c'uxob waj quic'ot che' ti xinq'uiñil.

¹⁷ Jiñi wiñic tsi' mele che' bajche' tsi' yʌlʌ José, tsi' pʌyʌyob majlel jiñi wiñicob ti yotot José.

¹⁸ Jiñi cha'añ jiñi wiñicob tsa' cajiyob ti bʌq'uen, come tsa' pʌjyiyob majlel ti yotot José. Tsa' caji i yʌlob: —Woli lac pʌjyel tilel cha'añ jiñi taq'uiñ tsa' bʌ cha' otsʌbentiyonla ti laj coxtal ti ñaxan; cha'añ mi' tajbeñonla lac mul, cha'añ mi' contrajiñonla, yic'ot cha'añ mi' yotsañonla ti' x'e'tel i cha'añ temel yic'ot lac burro.

¹⁹ Tsi' lʌc'tesayob i bʌ ba'añ jiñi xq'uel e'tel ti yotot José, tsi' pejcayob ya' ti ti' otot.

²⁰ Tsi' su'beyob: —¡Ah, c yum lojon! Isujm i cha'yajlelix woli c tilel lojon cha'añ mic mʌn lojon i bʌl c ñʌc'.

²¹ Che' ba' ora tsa' c'otiyon lojon ya' ba' tsa' jijliyon lojon, tsa' c jiti lojon i ti' tac lojon coxtal, tsa' c q'uele lojon cha' ya' añ c taq'uiñ lojon ti jujuntiquilon lojon ti ti' j coxtal ti ts'ʌcʌl, tsa' c cha' ch'ʌmʌ lojon tilel.

²² Tsa' c ch'ʌmʌ lojon tilel yam bʌ taq'uiñ cha'añ mic mʌn lojon i bʌl lojon c ñʌc'. Mach cujilic lojon majqui tsi' yotsa c taq'uiñ lojon tij coxtal lojon.

²³ Jiñi wiñic tsi' jac'beyob: —La' ñʌch'lec la' pusic'al, mach la' cha'len bʌq'uen. Jiñi la' Dios yic'ot i Dios la' tat jiñʌch tsa' bʌ i yʌq'ueyetla jiñi taq'uiñ ti la' coxtal; come la' taq'uiñ tsa' c ch'ʌmʌ. Tsi' colbeyob Simeón.

²⁴ Ti wi'il jiñi wiñic tsi' pʌyʌyob majlel jiñi wiñicob ti yotot José; tsi' yʌq'ueyob ja' cha'añ mi' pocob i yoc, yic'ot tsi' yʌq'ue i buc'bal i burro tac.

²⁵ I yerañob José tsi' chajpʌbeyob i majtañ, come mi caj i c'otel che' ti xinq'uiñil, come tsi' yu'biyob pʌybilob tilel ti c'ux waj yic'ot.

²⁶ Che' bʌ tsa' ochi José ti yotot, tsi' yʌq'ueyob i majtañ tsa' bʌ i ch'ʌmbeyob tilel, tsi' c'uchchocoyob i bʌ ti lum ti' tojlel José.

²⁷ Che' jiñi José tsi' c'ajtibeyob bajche' yilalob, tsi' yʌlʌ: —¿Uts'at ba añ jiñi la' tat, jiñi ñoxix bʌ wiñic tsa' bʌ la' su'beyon? ¿Cuxul to ba?

²⁸ I yerañob tsi' jac'beyob: —Jiñi a wiñic, jiñi c tat lojon, uts'at añ, cuxul to. Tsi' c'uchchocoyob i bʌ, tsi' q'ueleyob ti ñuc José.

²⁹ José tsi' ts'ita' letsa i wut, tsi' q'uele Benjamín i yijts'in, lajal bʌ i ña' yic'ot, tsi' yʌlʌ: —¿Jim ba ili wiñic cojix bʌ la' wijts'in, tsa' bʌ la' su'beyon? Tsi' yʌlʌ ja'el: —Calobil, la' i yʌq'ueñet Dios i yutslel i pusic'al.

³⁰ Jiñi cha'añ José tsa' loq'ui ti ora, come tsi' wen c'uxbi i yijts'in, tsi' sajca baqui tsa' mejli ti uq'uel ti' bajñelil; tsa' ochi ti yam bʌ i mal i yotot, ya'i tsi' cha'le uq'uel.

³¹ Che' tsa'ix ñʌjch'i, tsi' poco i wut, tsa' loq'ui tilel, tsi' yʌlʌ: “Luchux la jiñi waj.”

³² Tsi' yʌq'ueyob José i bʌl i ñʌc' ti' bajñelil, ixcu ja'el i yerañob tsa' aq'uentiyob ti' bajñelilob che' ja'el parte tsi' yʌq'ueyob egiptojob tsa' bʌ i c'uxuyob waj yic'ot José, come ma'añic mi' c'uxob waj egiptojob yic'ot hebreojob, come bi'bi'jax ti' wut egiptojob.

³³ Tsa' buchleyob i pi'ʌlob ti' tojel José, ñaxan jiñi ascuñʌl bʌ quepecña tsa' majli che' bajche' tsi' yilayob pañimil ti' tac' ti' tac' c'ʌlʌl ti jiñi ijts'iñʌl bʌ; jiñi wiñicob tsa' toj sajtiyob i pusic'al, tsa' caji i q'uelob i bʌ

³⁴ José tsi' ch'ʌmʌ jiñi we'elʌl am bʌ ti' mesa, tsi' yʌq'ueyob i pi'ʌlob pero ñumen oñ tsi' yʌq'ue Benjamín, jo'lujch i ñumel i bʌl i ñʌc' che' bajche' yaño' bʌ. Tsi' cha'leyob uch'el, tijicña tsi' yu'biyob yic'ot José.