Genesis 41 - Jiñi Tsiji' bʌ Wen T'añ cha'añ Estudio

José yic'ot i ñajal faraón

¹ Che' ñumeñix cha'p'ejl ja'b, faraón tsi' cha'le ñajal. Tsi' q'uele i bʌ ti' ñajal ya' wa'al ti ti' colem ja',

² tsa' loq'ui ti colem ja' wuccojt i ña'al wacax wen i t'ojol tac bʌ ti q'uelol, wen jujp'em tac, woli i c'uxob jam ya' ti ti' ja'.

³ Ti wi'il tsa' loq'ui tilel yam bʌ wuccojt i ña'al wacax mach bʌ i t'ojolix, wen yajyaj tac bʌ; tsa' cotle tac ya' ba'añ jiñi i t'ojol tac bʌ i ña'al wacax ya' ti ti' colem ja';

⁴ jiñi i ña'al wacax tac mach bʌ i t'ojolic, jiñi yajyaj tac bʌ, tsi' c'uxuyob ti' wuccojtlel jiñi i t'ojol tac bʌ i ña'al wacax, jiñi wen jujp'em tac bʌ. Jiñi faraón tsa' cajñi i wut,

⁵ pero tsa' cha' ochi i wʌyel, tsa' cha' caji ti ñajal: Tsi' q'uele tsa' loq'ui wucts'ijt i te'el trigo wen uts'at tac bʌ i wut ti juntejc trigo,

⁶ ti wi'il tsa' loq'ui tilel yam bʌ wucts'ijt i te'el trigo pojts' tac bʌ i wut yic'ot pulbil tac bʌ i cha'añ ticʌw bʌ ic' loq'uem bʌ ti' pasibal q'uiñ;

⁷ jiñi wucts'ijt pojts' tac bʌ trigo tsi' jisa jiñi wucts'ijt trigo t'uñul tac bʌ yic'ot uts'at tac bʌ i wut. Jiñi faraón tsa' cajñi i wut, tsi' ña'ta woli jach ti ñajal.

⁸ Che' ti sʌc'ajel wen ch'ijiyem i pusic'al, tsi' choco ti pʌyol pejtelel xwujtob año' bʌ ti Egipto yic'ot pejtelel i wiñicob año' bʌ ca'bʌl i ña'tʌbal. Faraón tsi' su'beyob chuqui tsi' q'uele ti' ñajal pero ma'añic majqui tsa' mejli i su'ben isujmlel.

⁹ Jiñi cha'añ jiñi i yum xñusa vinojob tsi' su'be faraón: —Wʌle woli c ña'tan añ c mul.

¹⁰ Che' bʌ tsa' mich'ayet ti' contra x'e'telob a cha'añ, tsa' wotsayon lojon ti mʌjquibʌl am bʌ ti yotot i capitán xcʌntayajob, joñon yic'ot i yum xmel pañob.

¹¹ Tic cha'ticlel lojon tsa' c cha'le lojon ñajal ti jiñi jach bʌ ac'ʌlel, ti jujump'ejl c ñajal lojon añʌch isujmlel ti' chajp ti' chajp.

¹² Ya'añ juntiquil ch'itoñ wiñic hebreo bʌ, x'e'tel bʌ i cha'añ i capitán xcʌntayajob. Tsa' c su'be lojon c ñajal, jiñi ch'itoñ tsi' su'beyon lojon isujmlel, tsi' tsictesʌbeyon lojon bajche' mi caj cujtel lojon ti jujuntiquil.

¹³ Che' bajche' tsi' su'beyon lojon isujmlel, che'ʌch tsa' ujti: Joñon tsa' cha' aq'uentiyon que'tel, jiñi yam bʌ tsa' jijch'i.

¹⁴ Jiñi cha'añ faraón tsi' choco ti pʌyol José; tsa' bʌc' pʌjyi loq'uel ti mʌjquibʌl, tsi' jujchi i tsucti', tsi' q'uexta i pislel; tsa' tili ba'añ faraón.

¹⁵ Jiñi faraón tsi' su'be José: —Joñon tsa' c cha'le ñajal, ma'añic majqui mi' mejlel i su'beñon isujmlel; pero tsa' cu'bi cha'añ jatet mi' mejlel a su'b isujmlel ñajal che' ma' ñʌch'tan.

¹⁶ José tsi' jac'be faraón: —Mach joñoñic mi' mejlel c su'b isujmlel; jiñʌch Dios mu' bʌ caj i pʌsben faraón isujmlel.

¹⁷ Jiñi cha'añ faraón tsi' su'be José: —Tic ñajal tsa' j q'uele wa'alon ti ti' colem ja'.

¹⁸ Ti jiñi ja' tsa' loq'ui tilel wuccojt i ña'al wacax, wen jujp'em tac bʌ, wen i t'ojol jax ti q'uelol, woli i c'uxob jam ti ti' ja'.

¹⁹ Ti wi'il tsa' tili yam bʌ wuccojt i ña'al wacax wen yajyaj tac bʌ mach bʌ i t'ojolix ti q'uelol. Ma'añic ba' q'uelel c cha'añ i ña'al wacax ti pejtelel i lumal Egipto mach bʌ junyajlel weñix che' bajche' jiñi.

²⁰ Jiñi ña'al wacax yajyaj tac bʌ, mach bʌ i t'ojolix ti q'uelol, tsi' c'uxuyob jiñi wuccojt i ña'al wacax jujp'em tac bʌ;

²¹ anquese tsi' c'uxuyob, ma'añic tsiquil mi tsa' ochi ti' ñʌc' yilal come ñumen tsa' yaj-ayob che' bajche' ti ñaxan. Che' jiñi tsa' cajñi c wut.

²² Ti wi'il tsa' c cha' cha'le ñajal, tsa' j q'uele tsa' loq'ui ti juntejc trigo wucts'ijt i te'el trigo wen uts'at tac bʌ i wut.

²³ Ti wi'il tsa' loq'ui yam bʌ wucts'ijt i te'el trigo yajyaj tac jax bʌ, ya' tiquin pots'ol tac jax bʌ i wut cha'añ tsi' pulu ticʌw ic'.

²⁴ Jiñi yajyaj tac bʌ i te'el trigo tsi' c'uxu jiñi wucts'ijt wen i t'ojol tac jax bʌ. Pejtelel iliyi tsa' c su'beyob jiñi mu' bʌ i ña'tañob chuqui mi caj i yujtel, pero ma'añic majqui tsa' mejli i su'beñon isujmlel.

²⁵ Jiñi cha'añ José tsi' su'be faraón: —Junchajp jach isujmlel i ñajal faraón. Dios tsi' pʌsbe faraón chuqui mi caj i mel ti' tojlel.

²⁶ Jiñi wuccojt i t'ojol tac bʌ i ña'al wacax, jiñʌch wucp'ejl ja'b. Jiñi wucts'ijt wen bʌ i te'el trigo, jiñʌch wucp'ejl ja'b. Junsujm jach isujmlel a ñajal.

²⁷ Jiñi wuccojt yajyaj tac bʌ i ña'al wacax mach bʌ i t'ojolix tsa' bʌ loq'uiyob ti wi'il, jiñʌch yam bʌ wucp'ejl ja'b. Jiñi wucts'ijt i te'el trigo pojts' tac bʌ i wut, tsa' bʌ i pulu ticwʌ ic', jiñʌch wucp'ejl ja'b wi'ñal mu' bʌ caj i tilel.

²⁸ Jiñʌch isujmlel mu' bʌ c su'ben faraón. Dios tsi' pʌsbe chuqui mi caj i mel ti' tojlel faraón.

²⁹ Tal wucp'ejl ja'b che' mi caj i yʌc' ca'bʌl i wut pʌc'ʌbʌl ti pejtelel i lumal Egipto.

³⁰ Ti wi'il mi caj i tilel wucp'ejl ja'b wi'ñal: Mi caj i ñajʌyel ti' pusic'al wiñicob pejtelel jiñi wen tac bʌ i wut pʌc'ʌbʌl, wen wocol mi caj i yu'biñob wiñicob x'ixicob cha'añ wi'ñal ti jiñi lum.

³¹ Ma'añix mi caj i chʌn ña'tʌntel i wut pʌc'ʌbʌl cha'añ jiñi wi'ñal mu' bʌ caj i tilel, come wen wocol jax.

³² Isujmlel cha'añ cha'yajl tsi' cha'le ñajal faraón, jiñʌch cha'añ xuc'ul jiñi mu' bʌ caj i mel Dios yic'ot mi caj i mel ti ora.

³³ Jiñi cha'añ faraón yom mi' sajcan wiñic p'ip' bʌ i pusic'al, am bʌ i ña'tʌbal, yom mi' wa'chocon ti ye'tel ti pejtelel Egipto.

³⁴ La' i mel faraón iliyi: La' i wa'chocon gobernadorob ti' lumal Egipto, la' i lotob cha'yajl i diezmojlel i wut pʌc'ʌbʌl ti pejtelel Egipto ili wucp'ejl ja'b che' mi caj i yʌc' ca'bʌl i wut pʌc'ʌbʌl.

³⁵ La' i tempañob pejtelel bʌl ñʌc'ʌl ili wucp'ejl ja'b mu' bʌ caj i tilel, la' i lotob trigo ti' wenta faraón cha'añ mi' c'uxob wiñicob x'ixicob che' ti yorajlel wi'ñal.

³⁶ Ili bʌl ñʌc'ʌl yom mi' lojtel cha'añ jiñi wucp'ejl ja'b wi'ñal mu' bʌ caj la cu'bin ti' lumal Egipto; cha'añ ma'añic mi' chʌmelob wiñicob x'ixicob cha'añ wi'ñal.

José tsa' ochi ti gobernador ti Egipto

³⁷ Tsi' ña'ta faraón yic'ot pejtelel i wiñicob, cha'añ uts'atʌch chuqui tsi' yʌlʌ José.

³⁸ Faraón tsi' su'be i wiñicob: —¿Mu' ba i mejlel lac taj yam bʌ wiñic che' bajche' José, am bʌ i cha'añ i yEspíritu Dios?

³⁹ Faraón tsi' su'be José: —Dios tsi' pʌsbeyet pejtelel iliyi, ma'añic yam bʌ p'ip' bʌ i pusic'al yic'ot i ña'tʌbal che' bajche' jatet.

⁴⁰ Jatet mi caj a cha'len a yumʌntel ti cotot, mi caj i melob che' bajche' ma' wʌl pejtelel wiñicob x'ixicob tic lumal; cojach tic buchlib ba' mic cha'len que'tel ñumen ñucon bajche' jatet.

⁴¹ Faraón tsi' su'be José: —Joñon tsa' c wa'chocoyet ti a we'tel ti' pejtelel i lumal Egipto.

⁴² Che' jiñi faraón tsi' loc'sa i mʌtc'ʌb, tsi' yotsʌbe ti' c'ʌb José; tsi' yʌq'ue i lʌp i bujc fino bʌ melbil bʌ ti lino bʌ pisil, yic'ot tsi' yʌq'ue ti' bic' ujʌl melbil bʌ ti oro;

⁴³ ti wi'il tsi' yʌc'ʌ ti letsel José ti' cha'cojtlel bʌ i carreta; tsi' yʌlʌyob ti' tojel i wut José: “Ñocchocon la' bʌ.” Che'ʌch tsa' cʌle José ti' ye'tel ti pejtelel Egipto.

⁴⁴ Ti wi'il faraón tsi' su'be José: —Joñon jiñi faraón; ma'añic majqui mi caj i letsan i c'ʌb mi yoc, mi ma'añic ma' wʌc' a t'añ cha'añ chuqui mi' melob ti pejtelel Egipto.

⁴⁵ Faraón tsi' yotsʌbe yam bʌ i c'aba' José ti Zafnat-panea, yic'ot tsi' yʌq'ue i yijñam i c'aba' Asenat i yalobil bʌ Potifera, motomaj bʌ ti On. Che'ʌch tsa' cʌle José ti ye'tel ti pejtelel i lumal Egipto.

⁴⁶ Añ lujump'ejl i cha'c'al (30) i ja'bilel José che' bʌ tsa' wa'le ti' tojlel faraón i rey egiptojob. José tsa' loq'ui ti' tojlel faraón, tsa' caji ti ñumel ti pejtelel i lumal Egipto.

⁴⁷ Wucp'ejl ja'b tsi' yʌc'ʌ ca'bʌl i wut pʌc'ʌbʌl ti jiñi lum.

⁴⁸ José tsi' tempa bʌl ñʌc'ʌl wucp'ejl ja'b ti pejtelel i lumal egiptojob, tsi' loto bʌl ñʌc'ʌl ti' joytʌlel jujump'ejl tejclum tac.

⁴⁹ José tsi' tempa i wut trigo che' bajche' i ji'il colem mar, ma'añix tsa' mejli ti tsijquel come wen oñ.

⁵⁰ Che' maxto añic wi'ñal, tsi' yilayob pañimil cha'tiquil ch'itoñ bʌ i yalobilob José yic'ot Asenat, i yalobil bʌ Potifera, motomaj bʌ ti On.

⁵¹ José tsi' yotsʌbe i c'aba' jiñi ñaxan bʌ i yalobil ti Manasés, come tsi' yʌlʌ: “Dios tsi' yʌc'ʌ ti ñajʌyel tic pusic'al pejtelel c wocol yic'ot pejtelel c pi'ʌlob ti' yotot c tat.”

⁵² Ixcu jiñi i cha'ticlel bʌ i yalobil tsi' yotsʌbe i c'aba' ti Efraín, come tsi' yʌlʌ: “Dios tsi' yʌq'ueyon c p'olbal ti ili lum ba' tsa' cu'bi wocol.”

⁵³ Che'ʌch tsa' ts'ʌctiyi wucp'ejl ja'b che' bʌ tsi' yʌc'ʌ ca'bʌl i wut pʌc'ʌbʌl ti' lumal Egipto.

⁵⁴ Tsa' caji jiñi wucp'ejl ja'b wi'ñal che' bajche' tsi' wʌn alʌ José. Tsi' yu'biyob wi'ñal ti pejtelel tejclum tac ti pañimil, pero ti' pejtelel i lumal Egipto añob i bʌl i ñʌc'.

⁵⁵ Che' bʌ tsa' caji i yu'biñob wi'ñal jiñi wiñicob x'ixicob ti pejtelel i lumal Egipto, tsi' c'ajtibeyob faraón i bʌlob i ñʌc'. Faraón tsi' su'beyob pejtelel jiñi egiptojob: “Cucula ba'añ José, melela chuqui mu' bʌ i su'beñetla.”

⁵⁶ Ba' ora tsa' caji i yu'biñob wi'ñal ti pejtelel tejclum tac, José tsi' jamʌ pejtelel i yotlel ba' lotbil trigo, tsi' chombeyob egiptojob, come wen wocol jax jiñi wi'ñal ti' lumal Egipto.

⁵⁷ Ti pejtelel pañimil tsa' tiliyob ti Egipto cha'añ mi' mʌñob trigo ba'añ José, come woli i ñumel wi'ñal ti pejtelel pañimil.