Genesis 4 - Jiñi Tsiji' bʌ Wen T'añ cha'añ Estudio

Caín yic'ot Abel

¹ Adán tsi' pi'le Eva i yijñam, tsa' caji i cʌntan i yalobil, tsi' yʌc'ʌ Caín ti pañimil, tsi' yʌlʌ: “Cha'añ che' yom lac Yum tsi' coltayon cha'añ mi cʌc' ti pañimil juntiquil ch'itoñ”.

² Ti wi'il tsi' yʌc'ʌ ti pañimil Abel i yijts'in Caín. Abel tsi' cʌnta tʌñʌme', Caín tsi' cha'le e'tel ti lum.

³ Che' ñuquix Caín tsi' ch'ʌmʌ tilel i wut i pʌc'ʌb cha'añ mi' yʌq'ueñ i majtañ lac Yum.

⁴ Che' ja'el Abel tsi' ch'ʌmʌ tilel ñaxan bʌ i yal tac i tʌñʌme' wen jujp'em tac bʌ, tsi' tsʌnsʌbe i majtañ Dios. Lac Yum tsi' q'uele ti uts'at Abel yic'ot i majtañ;

⁵ pero mach uts'atic tsi' q'uele Caín yic'ot i majtañ. Caín tsa' wen mich'a, mich'icña jax i wut.

⁶ Jiñi cha'añ lac Yum tsi' su'be Caín: —¿Chucoch mich'et? ¿Chucoch tsa' jili a tijicñʌyel?

⁷ Mi uts'at chuqui ma' mel, ¿mach ba uts'atic mi caj a q'uejlel? Pero mi mach uts'atic chuqui ma' mel, jiñi mulil lʌc'ʌl añ ti a tojlel, woli' chijtañet. Wersa yom i tajet mulil pero yom mi' mʌjlel a cha'añ.

⁸ Caín tsi' su'be i yijts'in Abel: [Conla ti jamil]. Che' ya' añob ti jamil, Caín tsi' jats'ʌ i yijts'in Abel, tsi' tsʌnsa.

⁹ Jiñi cha'añ lac Yum tsi' pejca Caín: —¿Baqui añ a wijts'in Abel? Caín tsi' jac'ʌ: —Mach cujilic. ¿C wenta ba cha'añ mij cʌntan quijts'in?

¹⁰ Lac Yum tsi' su'be: —¿Chuqui tsa' mele? I ch'ich'el a wijts'in tsa' bʌ a tsʌnsa woli' c'ajtibeñon yu'bil cha'añ mi cʌq'ueñet a toj a mul.

¹¹ Jiñi cha'añ wocol mi caj a taj i bʌl a ñʌc' ti pañimil come jiñi lum tsi' cawa i yej yilal cha'añ mi' japben i ch'ich'el a wijts'in tsa' bʌ a tsʌnsa.

¹² Che' ma' cha'len e'tel ti jiñi lum, ma'añix chuqui mi caj a taj, xputs'elet ti pejtelel ora, xtsuctsucñʌyelet ti pañimil.

¹³ Che' jiñi Caín tsi' su'be lac Yum: —Mach cujchic c cha'añ jiñi wocol.

¹⁴ Wʌle tsa' chocoyon loq'uel ti lum, tsa'ix a cʌyʌyon, xputs'elon ti pejtelel ora, xtsuctsucñʌyelon ti pañimil; che' añ majqui mi' tajon mi caj i tsʌnsañon.

¹⁵ Lac Yum tsi' su'be: —Isujm mi añ majqui mi' tsʌnsan Caín, wucyajl mi caj j q'uextʌben i mul. Jiñi cha'añ lac Yum tsi' yʌq'ue Caín i yejtal cha'añ ma'añic majqui mi' tsʌnsan che' mi' taj.

¹⁶ Caín tsa' loq'ui majlel ti' tojlel lac Yum, tsa' chumle ti lum i c'aba' Nod am bʌ ti' tojel Edén ba' mi' pasel q'uiñ.

I p'olbal Caín

¹⁷ Caín tsi' pi'le i yijñam, tsi' cʌnta i yalobil, tsi' yʌc'ʌ ti pañimil Enoc; Caín tsi' wa'choco jump'ejl tejclum, tsi' yotsʌbe i c'aba' jiñi tejclum ti Enoc che' bajche' i c'aba' i yalobil.

¹⁸ Enoc i tatʌch Irad, jiñi Irad i tatʌch Mehujael; Mehujael i tatʌch Metusael, jiñi Metusael i tatʌch Lamec.

¹⁹ Lamec tsi' pʌyʌ cha'tiquil i yijñam: I c'aba' juntiquil jiñʌch Ada, i c'aba' jiñi yam bʌ jiñʌch Zila.

²⁰ Ada tsi' yʌc'ʌ ti pañimil Jabal, jiñi Jabal i tatʌch jiñi mu' bʌ i chumtʌlob ti pisil bʌ otot, yic'ot jiñobʌch tsa' bʌ i p'oloyob wacax.

²¹ I c'aba' i yijts'in jiñʌch Jubal, jiñi Jubal i tatʌch pejtelel mu' bʌ i ñijcañob arpa yic'ot flauta.

²² Zila tsi' yʌc'ʌ ti pañimil Tubal-caín, jiñʌch tsa' bʌ i mele e'tijibʌl ti c'ʌnc'ʌn taq'uiñ yic'ot ti tsucul taq'uiñ. Naama jiñʌch xch'oc bʌ i yijts'in Tubal-caín.

²³ Jump'ejl bʌ q'uiñ Lamec tsi' su'be i yijñamob: “Ada yic'ot Zila, u'bibeñonla c t'añ, jatetla quijñamet bʌ la: Tsa' c tsʌnsa juntiquil wiñic cha'añ ti' caj tsi' lowoyon yic'ot juntiquil ch'itoñ wiñic cha'añ ti' caj tsi' jats'ʌyon.

²⁴ Mi wucyajl mi' q'uextʌbentel i mul majqui jach mi' tsʌnsan Caín, isujm wucyajl che' ti lujunyajl i chʌnc'al mi caj i q'uextʌbentel i mul jiñi mu' bʌ i tsʌnsan Lamec”.

I yuxticlel bʌ i yalobil Adán yic'ot Eva

²⁵ Adán tsi' cha' pi'le i yijñam, tsa' cha' caji i cʌntan ch'itoñ bʌ yalobil, tsi' yotsʌbe i c'aba' ti Set, tsi' yʌlʌ: “Dios tsi' yʌq'ueyon yam bʌ ch'itoñ bʌ calobil cha'añ i q'uexol Abel, tsa' bʌ i tsʌnsa Caín”.

²⁶ Tsi' yila pañimil ja'el ch'itoñ bʌ i yalobil Set, tsi' yotsʌbe i c'aba' ti Enós. Ti jim bʌ ora wiñicob x'ixicob tsa' caji i ch'ujutesañob i c'aba' lac Yum.