Genesis 38 - Jiñi Tsiji' bʌ Wen T'añ cha'añ Estudio

Judá yic'ot Tamar

¹ Ti jim bʌ ora, Judá tsa' loq'ui majlel ti' tojlel i yerañob, tsa' majli ti yotot juntiquil wiñic i c'aba' Hira ch'oyol bʌ ti Adulam.

² Ya'i tsi' q'uele xch'oc i c'aba' Súa, i yalobil juntiquil cananeo; tsi' pʌyʌ cha'añ i yijñam, tsa' ajñi yic'ot.

³ Tsi' cʌnta i yalobil, tsi' yʌc'ʌ ti pañimil juntiquil ch'itoñ, tsi' yotsʌbe i c'aba' ti Er.

⁴ Tsi' cha' cʌnta i yalobil, tsi' yʌc'ʌ ti pañimil yam bʌ juntiquil ch'itoñ, tsi' yotsʌbe i c'aba' ti Onán.

⁵ Tsi' cha' cʌnta i yalobil, tsi' yʌc'ʌ ti pañimil yam bʌ juntiquil ch'itoñ, tsi' yotsʌbe i c'aba' ti Sela. Ya' chumul Súa ti Quezib che' bʌ tsi' q'uele pañimil Sela.

⁶ Ti wi'il Judá tsi' c'ajtibe i yijñam jiñi ñaxan bʌ i yalobil i c'aba' Er juntiquil xch'oc i c'aba' Tamar.

⁷ Pero Er, jiñi ñaxan bʌ i yalobil Judá, jontol jax ti' wut lac Yum, jiñi cha'añ lac Yum tsi' tsʌnsa.

⁸ Jiñi cha'añ Judá tsi' su'be Onán: —Pʌyʌ i yijñam a wʌscun, come a wentajʌch, aq'uen i yalobil i wentajlel i p'olbal a wʌscun.

⁹ Onán tsi' ña'ta cha'añ i p'olbal mu' bʌ caj i tilel mach i cha'añic; jiñi cha'añ che' ba' ora tsi' pi'le tac i yijñam i yʌscun tsi' choco i p'ʌtʌlel i bʌc'tal ti lum cha'añ ma'añic mi' techben i p'olbal i yʌscun.

¹⁰ Lac Yum tsi' q'uele cha'añ mach weñic chuqui woli i mel, jiñi cha'añ lac Yum tsi' tsʌnsa ja'el.

¹¹ Jiñi cha'añ Judá tsi' su'be Tamar i yʌ'lib: —Ajñen ti' me'ba' ti yotot a tat jinto che' ñuquix calobil Sela. (Tsi' yʌlʌ iliyi come tsi' ña'ta ti' pusic'al: “Ame chʌmic ja'el che' bajche' i yʌscuñob.”) Jiñi cha'añ tsa' majli Tamar ti chumtʌl ti yotot i tat.

¹² Che' ñumeñix ca'bʌl ja'bil tsa' chʌmi i yijñam Judá, i yalobil bʌ Súa. Che' bʌ tsa'ix cha' ñuc-a i pusic'al Judá, tsa' majli ti Timnat (ya' ba'añ jiñi mu' bʌ i tsepbeñob i tsutsel i tʌñʌme') temel yic'ot i yamigo Hira ch'oyol bʌ ti Adulam.

¹³ Tsi' su'beyob Tamar: “Jiñi a ñij-al woli i majlel ti Timnat i set'ben i tsutsel i tʌñʌme' tac.”

¹⁴ Che' jiñi tsi' jocho loq'uel i bujc mu' bʌ i lʌp me'ba'ob, tsi' moso i wut ti pisil cha'añ ma'añic mi' cʌjñel, tsa' majli ti buchtʌl ti ti' Enaim am bʌ ti' t'ejl i bijlel Timnat; come tsi' q'uele cha'añ Sela tsa'ix coli pero ma'añic woli' pʌy cha'añ i yijñam.

¹⁵ Ba' ora Judá tsi' q'uele ili x'ixic, tsi' ña'ta jiñʌch juntiquil xts'i'lel x'ixic come jiñi x'ixic mosbil i wut.

¹⁶ Jiñi cha'añ tsi' cʌyʌ i bijlel, cha'añ mi' lʌc'tesan i bʌ ba'añ jiñi x'ixic, mach yujilic mi jiñʌch i yʌ'lib, tsi' su'be: —Com c pi'leñet wʌle. —¿Chuqui ma' wʌq'ueñon cha'añ ma' pi'leñon? —Che' tsi' yʌlʌ jiñi x'ixic.

¹⁷ Judá tsi' yʌlʌ: —Mic chocbeñet tilel juncojt alʌ chivo. —Aq'ueñon i yejtal am bʌ a cha'añ, cha'añ mic ña'tan mi muc'ʌch caj a choc tilel —che' tsi' yʌlʌ jiñi x'ixic.

¹⁸ —¿Chuqui mi' mejlel cʌq'ueñet? —Che' tsi' c'ajti Judá. Jiñi x'ixic tsi' yʌlʌ: —Aq'ueñon a sello yic'ot i ch'ajñal, yic'ot jiñi barajte' am bʌ ti a c'ʌb. Judá tsi' yʌq'ue jiñi tsa' bʌ i c'ajti jiñi x'ixic, jiñi cha'añ tsi' pi'le; che' jiñi tsa' caji i cʌntʌben i yalobil Judá.

¹⁹ Ti wi'il tsa' ch'ojyi jiñi x'ixic, tsa' majli; tsi' jocho loq'uel i pislel tsa' bʌ i mosbe i wut, tsi' cha' lʌpʌ i pislel mu' bʌ i lʌp me'ba' x'ixicob.

²⁰ Judá tsi' choco majlel jiñi alʌ chivo ti' tojlel i yamigo jiñi ch'oyol bʌ ti Adulam, cha'añ mi' cha' ch'ʌm jiñi tsa' bʌ i cʌybe jiñi x'ixic; pero ma'añic tsi' taja.

²¹ Jiñi cha'añ tsi' c'ajtibe jiñi wiñicob ya' bʌ chumulob ti jiñi lum, tsi' yʌlʌ: —¿Baqui añ jiñi xts'i'lel x'ixic buchul bʌ ti bij ya' ti Enaim? —Ma'añic ba' woli i yajñel xts'i'lel x'ixic ilayi —che' tsi' yʌlʌyob.

²² Jiñi cha'añ tsa' cha' majli ba'añ Judá, tsi' su'be: —Ma'añic tsa' c taja. Che' ja'el jiñi wiñicob ya' bʌ añob tsi' yʌlʌyob: “Ma'añic ba' woli i yajñel xts'i'lel x'ixic ilayi.”

²³ Judá tsi' jac'ʌ: —La' toj cʌlec ti' pejtelel yic'ot jiñi x'ixic, cha'añ ma'añic majqui mi' wajleñonla. Joñon tsa' c chocbe majlel jiñi alʌ chivo pero ma'añic tsa' taja jiñi x'ixic.

²⁴ Che' ñumeñix uxp'ejl uw tsa' su'benti Judá: —Tamar, jiñi a wʌ'lib tsi' cha'le ts'i'lel, cʌntʌbilix i yalobil cha'añ i ts'i'lel. Jiñi cha'añ Judá tsi' yʌlʌ: —¡Pʌyʌla loq'uel, pulula ti c'ajc!

²⁵ Che' bʌ tsa' pʌjyi tilel jiñi x'ixic, tsi' choco majlel t'añ ba'añ i ñij-al: “I yum ili sello yic'ot i ch'ajñal yic'ot i barajte', jiñʌch i yalobil ili cʌntʌbil bʌ c cha'añ.” Tsi' yʌlʌ ja'el: “Q'uele wʌle majqui i cha'añ pejtelel iliyi.”

²⁶ Che' ba' ora Judá tsi' cʌñʌ tac i chu'bʌañ, tsi' yʌlʌ: “Tojʌch jiñi x'ixic, joñon ajñel jiñi mach bʌ tojic, come ma'añic tsa' cʌq'ue calobil Sela.” Jiñi cha'añ Judá ma'añic ba' ora tsi' chʌn pi'le jiñi x'ixic.

²⁷ Che' bʌ tsa' c'oti i yorajlel cha'añ mi' yilan pañimil i yalobil, tsa' tajle cha'añ cʌntʌbil i cha'añ loj bʌ i yalobil.

²⁸ Che' woli ti bajq'uel tsa' juli ti pañimil junts'ijt i c'ʌb alʌl, jiñi i co' tsi' chucbe, tsi' cʌchbe i c'ʌb ti chʌchʌc bʌ puy, tsi' yʌlʌ: “Ñaxan tsa' loq'ui iliyi.”

²⁹ Pero che' bʌ tsi' cha' tujc'a ochel i c'ʌb jiñi alʌl, ñaxan tsi' yila pañimil i yeran; i co' tsi' yʌlʌ: ¡Ajye', bajche'ʌchix tsa' choco loq'uel a bʌ! Jiñi cha'añ tsi' yotsʌbe i c'aba' ti Fares.

³⁰ Ti wi'il tsi' yila pañimil i yeran am bʌ chʌchʌc bʌ puy ti' c'ʌb, tsi' yotsʌbe i c'aba' ti Zara.