Genesis 37 - Jiñi Tsiji' bʌ Wen T'añ cha'añ Estudio

Tsa' chojñi José cha'añ i yʌscuñob

¹ Jacob tsa' chumle ti jiñi lum ba' tsa' ñumi ti chumtʌl i tat, ya' ti' lum Canaán.

² Jiñʌch i ña'tʌntel che' bajche' tsa' ajñi i p'olbal Jacob: Che' añix wuclujump'ejl (17) i ja'bilel José, tsi' cʌnta tʌñʌme' yic'ot i yʌscuñob; jiñi ch'itoñ José tsa' ajñi yic'ot i yalobilob Bilha yic'ot i yalobilob Zilpa, i yijñamob i tat. José tsi' su'be i tat chuqui tac mach uts'atic tsi' meleyob i yʌscuñob.

³ Israel tsi' ñumen c'uxbi José che' bajche' yaño' bʌ i yalobilob, come José tsi' yila pañimil che' ñoxix i tat yic'ot tsi' melbe pʌl bʌ i bujc am bʌ ca'bʌl i ts'ijbal.

⁴ Che' bʌ tsi' q'ueleyob i yʌscuñob ñumen c'uxbibil José bajche'ob, tsi' ts'a'leyob yic'ot mach chʌn uts'atix tsa' caji pejcañob.

⁵ José tsi' cha'le ñajal, tsi' su'be i yʌscuñob chuqui tsi' q'uele ti' ñajal; ixcu i yʌscuñob tsa' caji ñumen ts'a'leñob.

⁶ José tsi' su'beyob: —Wʌle ñʌch'tanla chuqui tsa' c ñajle:

⁷ Woli lac set cʌche' trigo ya' ti jamil, jiñi jam set cʌchbil bʌ c cha'añ tsa' wa'le, ixcu jiñi jam set cʌchbil bʌ la' cha'añ tsi' joy tempayob i bʌ, tsi' c'uchchocoyob i bʌ ti' tojlel jiñi set cʌchbil bʌ c cha'añ.

⁸ I yʌscuñob José tsi' jac'beyob: —¿Mu' ba caj a cha'len yumʌntel tic tojlel lojon o mu' ba caj a wochel tic yum lojon? Ñumen tsa' caji ts'a'leñob José bajche' ti yam bʌ ora, cha'añ ti' caj i ñajal yic'ot i t'añ.

⁹ Ti wi'il tsi' cha' cha'le ñajal, tsi' cha' su'beyob i yʌscuñob, tsi' yʌlʌ: —Tsa' c cha' cha'le ñajal. Tsa' c ñajle cha'añ jiñi q'uiñ yic'ot uw yic'ot junlujump'ejl ec' tsi' c'uchchocoyob i bʌ tic tojlel.

¹⁰ José tsi' su'be i tat yic'ot i yʌscuñob chuqui tsi' ñajle; ixcu i tat tsi' tiq'ui José, tsi' su'be: —¿Chuqui isujmlel a ñajal? ¿Mu' ba caj j c'uchchocon lojon c bʌ ti lum ti a tojlel quic'ot a ña' yic'ot a werañob?

¹¹ I yerañob tsʌytsʌyñayob i pusic'al ti' tojlel José, pero i tat tsi' chʌn ña'tʌbe i t'añ.

¹² Ti jump'ejl bʌ q'uiñ i yerañob José tsa' majliyob i cʌntʌbeñob i tʌñʌme' i tat ya' ti Siquem.

¹³ Jiñi cha'añ Israel tsi' su'be José: —Jiñi a wʌscuñob ya'añob ti Siquem cha'añ i buc'sʌntel tʌñʌme'. La', mi caj c choquet majlel ba'añ a wʌscuñob. —Wʌ'añon —che' tsi' jac'ʌ José.

¹⁴ —Wʌle mi caj a majlel a q'uelob mi uts'at añob a wʌscuñob yic'ot jiñi tʌñʌme' tac, ma' cha' sujtel tilel cha'añ ma' su'beñon —che'en Israel. Che'ʌch tsi' choco majlel che' ya' añob ti joctʌl i c'aba' Hebrón. José tsa' c'oti ti Siquem.

¹⁵ Juntiquil wiñic tsa' c'oti i taj che' woli ti xʌmbal ñumel ti jamil, come tsa' sajti ti bij; jiñi wiñic tsi' c'ajtibe: —¿Chuqui woli a sajcan?

¹⁶ José tsi' jac'ʌ: —Woli c sajcan querañob; awocolic poj pʌsbeñon baqui woli' buc'sañob tʌñʌme'.

¹⁷ Jiñi wiñic tsi' jac'be: —Tsa'ix majliyob wʌ'i; tsa' cu'bi tsi' yʌlʌyob: “Conla ti Dotán”. Jiñi cha'añ José tsi' sajca majlel i yʌscuñob, tsa' c'oti i tajob ya' ti Dotán.

¹⁸ Ba' ora i yʌscuñob tsi' q'ueleyob che' ñajt to i tilel José, che' maxto c'otemic José ba'añob, tsi' tem ña'tayob cha'añ mi' tsʌnsañob.

¹⁹ Tsi' tem su'beyob i bʌ: —¡Ya' tilel jiñi xñajal!

²⁰ Wʌle la' lac tsʌnsan, la' lac choc ochel ti pozo, ti wi'il mi lac su'b: “Tsi' c'uxu jontol bʌ bʌte'el.” Che' jiñi mi caj laj q'uel bajche' mi caj i loq'uel isujmlel i ñajal.

²¹ Ba' ora tsi' yu'bi Rubén iliyi, tsi' colta loq'uel José ti' c'ʌb i yʌscuñob. Tsi' yʌlʌ: —Mach yomic mi lac tsʌnsan.

²² Tsi' yʌlʌ ja'el: —Mach la' bec' ch'ich'; chocola ochel ti pozo am bʌ ti jochol bʌ lum, pero mach yomic mi' chʌmel ti la' c'ʌb. Che'ʌch tsi' ñopo i coltañ José ti' c'ʌb i yʌscuñob cha'añ mi' mejlel i cha' pʌy sujtel ti' tojlel i tat.

²³ Che' ba' ora tsa' c'oti José ba'añ i yʌscuñob, tsi' jochbeyob jiñi pʌl bʌ i bujc, —lʌpʌl bʌ i cha'añ am bʌ ca'bʌl i ts'ijbal—,

²⁴ tsi' chucuyob, tsi' chocoyob ochel ti pozo; pero jiñi pozo ma'añic i ya'lel.

²⁵ Ti wi'il tsa' buchleyob ti c'ux waj. Ti jimbʌ ora tsi' letsayob i wut, tsi' q'ueleyob woli' tilel ti Galaad junmojt ismaelob yic'ot camello tac woli bʌ i cuch majlel xojocña tac bʌ ts'ac, yic'ot bálsamo yic'ot mirra ya' ti Egipto.

²⁶ Che' jiñi Judá tsi' su'be i yerañob: —¿Chuqui mi caj lac taj mi tsa' lac tsʌnsa la quijts'in, yic'ot che' mi lac cha'len lot cha'añ tsa' chʌmi?

²⁷ Conla, La' lac chombeñob ismaelob; pero mach yomic mi lac tsʌnsan, come la querañʌch, yic'ot lac pi'ʌlʌch lac bʌ. I yerañob uts'at tsi' yu'biyob.

²⁸ Che' woli' ñumelob xchoñoñelob ch'oyolo' bʌ ti Madián, tsi' loc'sayob José ti jiñi pozo, tsi' chombeyob jiñi ismaelob ti junc'al plata taq'uiñ. Jiñi ismaelob tsi' pʌyʌyob majlel José ti Egipto.

²⁹ Ti wi'il Rubén tsa' cha' majli ya' ti pozo, che' bʌ tsi' q'uele ma'añix tsiquil José, tsi' tsili i pislel.

³⁰ Ti wi'il tsa' cha' majli ba'añ i yerañob, tsi' su'beyob: —Jiñi ch'itoñ ma'añix tsiquil; ixcu joñon, ¿bajche' mi cujtel?

³¹ Che' jiñi tsi' ch'ʌmʌyob jiñi pʌl bʌ i pislel José, tsi' tsʌnsayob juncojt chivo, tsi' bombeyob i pislel ti' ch'ich'el chivo.

³² Tsi' chocbeyob majlel i tat jiñi pʌl bʌ i bujc José am bʌ ca'bʌl i ts'ijbal, yic'ot tsi' su'beyob ili t'añ: “Tsa' c taja lojon iliyi, q'uele wʌle mi' bujc o mi mach i bujquic a walobil”.

³³ Che' ba' ora Jacob tsi' cʌmbe i pislel José, tsi' su'beyob: “Jiñʌch i bujc calobil; i tajolʌch juncojt jontol bʌ bʌte'el tsi' tsʌnsa, tsa'ix i bic'ti xut'u.”

³⁴ Che' jiñi Jacob tsi' tsili i pislel, tsi' lʌpʌ jayquexan bʌ i pislel, tsi' yuc'ta i yalobil ca'bʌl q'uiñ.

³⁵ Tsa' tiliyob ch'itoño' bʌ yic'ot xch'octaco' bʌ i yalobilob cha'añ mi' ñuq'uesʌbeñob i pusic'al i tat, pero Jacob mach yomic i ñuq'uesʌbentel i pusic'al, tsi' yʌlʌ: “Mi caj c majlel yic'ot c ch'ijiyemlel c'ʌlʌl ba'añ calobil ti' yajñib chʌmeño' bʌ.” Che'ʌch tsi' yuc'ta i yalobil.

³⁶ Jiñi madiañob tsi' choñoyob José ya' ti Egipto, tsi' chombeyob Potifar, ñuc bʌ i ye'tel ti' tojlel faraón yic'ot jiñʌch i capitán xcʌntayajob.