Genesis 35 - Jiñi Tsiji' bʌ Wen T'añ cha'añ Estudio

Dios tsi' yʌq'ue i yutslel i t'añ Jacob ya' ti Bet-el

¹ Dios tsi' su'be Jacob: “Ch'ojyen, letsen majlel ti Bet-el, ya' ma' cʌlel ya'i; melben i pulʌntib i majtañ Dios tsa' bʌ i pʌsbeyet i bʌ che' ba' ora woliyet ti puts'el ti' tojlel a wʌscun Esaú.”

² Jiñi cha'añ Jacob tsi' su'be jiñi año' bʌ ti yotot yic'ot pejtelel año' bʌ ti' wenta: —Chocola loq'uel jiñi dios tac am bʌ la' cha'añ, sʌc-esan la' bʌ yic'ot q'uextan la' pislel.

³ Mi caj lac letsel majlel ti Bet-el come ya'i mi caj c melben i pulʌntib i majtañ Dios, jiñi Dios tsa' bʌ i jac'beyon ti jiñi q'uiñ che' bʌ tsa' cu'bi wocol yic'ot tsa' bʌ ajñi quic'ot tic bijlel ya' ba' tsa' c cha'le xʌmbal ñumel.

⁴ Ti' pejtelelob tsi' yʌq'ueyob Jacob pejtelel i dioste'ob yic'ot i yuya' año' bʌ ti' chiquin; Jacob tsi' mucu ti' ye'bal colem te' lʌc'ʌl bʌ ya' ti Siquem.

⁵ Che' bʌ tsa' loq'uiyob majlel. Jiñi año' bʌ ti tejclum tac ya' ti' joytʌlel tsa' cajiyob ti bʌq'uen cha'añ i Dios Jacob, jiñi cha'añ ma'añic tsi' yajñesayob majlel i yalobilob Jacob.

⁶ Tsa' c'oti Jacob yic'ot pejtelel jiñi tsa' bʌ majliyob yic'ot ya' ti Luz, am bʌ ti' lumal Canaán, jiñʌch Bet-el.

⁷ Tsi' melbe i pulʌntib i majtañ Dios ya'i, tsi' yotsʌbe i c'aba' jiñi lum ti “El-bet-el”, come ya'i tsi' pʌsbe i bʌ Dios che' bʌ woli ti puts'el majlel ti' tojlel i yeran.

⁸ Ti jim bʌ ora tsa' chʌmi Débora, jiñi tsa' bʌ i cʌnta Rebeca c'ʌlʌl che' alʌ to; tsa' mujqui ti ye'bal colem te' ya' ti' yentʌlal Bet-el, tsa' bʌ otsʌbenti i c'aba' ti “Alón-bacut.”

⁹ Dios tsi' cha' pʌsʌ i bʌ ti' tojlel Jacob che' bʌ woli i cha' sujtel tilel ti Padan-aram. Tsi' yʌq'ue i yutslel i t'añ.

¹⁰ Dios tsi' su'be: “A c'aba' jiñʌch Jacob; pero ma'añix mi caj a pejcʌntel ti Jacob, mi caj a pejcʌntel ti Israel.” Che'ʌch tsa' ochi i c'aba' ti Israel.

¹¹ Che' ja'el Dios tsi' su'be: “Joñoñʌch jiñi Dios Mach Bʌ Añic i P'isol i p'ʌtʌlel: La' p'ojlic a walobilob; la' ochiquet ti ñuc bʌ tejclum yic'ot la' loq'uicob ca'bʌl tejclum tac ti a tojlel, yic'ot mi caj i loq'uel reyob tilemo' bʌ ti a p'olbal.

¹² Jiñi lum tsa' bʌ cʌq'ue Abraham yic'ot Isaac mi caj cʌq'ueñet, yic'ot mi caj cʌq'ueñob a p'olbal mu' bʌ caj i tilelob.”

¹³ Che' bʌ tsa' letsi majlel Dios ti' tojlel Jacob ya' ba' tsi' pejca,

¹⁴ che' jiñi Jacob tsi' wa'choco xajlel i yejtal cha'añ mi' chʌn ña'tʌntel ya' ba' tsi' pejca Dios; tsi' mulbe i pam jiñi xajlel ti vino yic'ot ti olivo aceite.

¹⁵ Jacob tsi' yotsʌbe i c'aba' jiñi ajñibʌl ti Bet-el, ya' ba' tsi' pejca Dios.

Tsa' chʌmi Raquel

¹⁶ Tsa' loq'uiyob ti Bet-el, tsa' cajiyob ti majlel, che' bʌ ñajt to añob cha'añ mi' c'otelob ti Efrata, Raquel tsa' caji ti bajq'uel cha'añ i yalobil, wen wocol tsi' yu'bi.

¹⁷ Che' woli ti bajq'uel Raquel, jiñi i co' alʌl tsi' su'be: “Mach a cha'len bʌq'uen, come mi caj a wʌc' ti pañimil yam bʌ ch'itoñ bʌ a walobil.”

¹⁸ Che' bʌ woli' loq'uel i ch'ujlel, —come tsa' chʌmi Raquel—, tsi' yotsʌbe i c'aba' ti Benoni, pero i tat tsi' yotsʌbe i c'aba' ti Benjamín.

¹⁹ Che'ʌch tsa' chʌmi Raquel, tsa' mujqui ya' ti' bijlel Efrata, jiñʌch Belén.

²⁰ Jacob tsi' wa'choco xajlel ya' ti mucoñibʌl, jiñʌch i yejtal ba' mucul Raquel c'ʌlʌl wʌle.

²¹ Israel tsa' loq'ui ya'i, tsi' wa'choco pisil bʌ i yotot ti junwejl Migdal Edar.

²² Che' ya' chumul Israel ti ili lum, Rubén tsi' pi'le Bilha, i majan ijñam i tat; pero Israel tsi' yu'bi chuqui tsi' mele Rubén. Añ lajchʌntiquil ch'itoñ bʌ i yalobilob Jacob.

I yalobilob Jacob

²³ I yalobilob Lea jiñobʌch: Rubén, jiñi ascuñʌl bʌ, Simeón, Leví, Judá, Isacar yic'ot Zabulón.

²⁴ I yalobilob Raquel jiñobʌch: José yic'ot Benjamín.

²⁵ I yalobilob Bilha, i criada Raquel, jiñobʌch: Dan yic'ot Neftalí.

²⁶ I yalobilob Zilpa, i criada Lea, jiñobʌch: Gad yic'ot Aser. Jiñobʌch i yalobilob Jacob tsa' bʌ i yilayob pañimil ti Padan-aram.

Tsa' chʌmi Isaac

²⁷ Jacob tsa' c'oti ba'añ Isaac i tat ya' ti Mamre, ya' ti tejclum i c'aba' Arba, jiñʌch Hebrón, ya' ba' tsa' chumleyob Abraham yic'ot Isaac.

²⁸ I ja'bilel Isaac che' bʌ tsa' chʌmi, jiñʌch bolonc'al (180) ja'b ti' pejtelel.

²⁹ Tsa' chʌmi Isaac che' wen ñoxix. Esaú yic'ot Jacob tsi' mucuyob i tat.