Genesis 34 - Jiñi Tsiji' bʌ Wen T'añ cha'añ Estudio

Dina tsa' ajq'ui ti quisin

¹ Dina, jiñi xch'oc bʌ i yalobil Jacob tsa' bʌ i yʌq'ue Lea, tsa' loq'ui majlel i q'uel xch'octacob ya' bʌ chumulob ti jiñi tejclum.

² Jiñi Siquem i yalobil bʌ Hamor, jiñi heveo, i yum jiñi lum; tsi' ñolch'i jiñi xch'oc, tsa' ñole yic'ot, tsi' wersa pi'le.

³ Pero Siquem tsi' wen mula Dina i yalobil bʌ Lea, c'ux tsi' yu'bi, tsi' pejca ti uts bʌ t'añ.

⁴ Jiñi cha'añ Siquem tsi' pejca Hamor i tat: —C'ajtibeñon ili xch'oc cha'añ quijñam.

⁵ Jacob tsi' yu'bi cha'añ Siquem tsi' ñolch'i cha'añ mi' pi'len Dina i yalobil. Jiñi wiñico' bʌ i yalobilob Jacob ya'añob ti jamil yic'ot i yʌlac', ma'añic chuqui tsi' yʌlʌ Jacob jinto tsa' sujtiyob tilel i yalobilob.

⁶ Hamor, i tat Siquem, tsa' tili i pejcan Jacob.

⁷ I yalobilob Jacob tsa' sujtiyob tilel ti yotot, che' bʌ tsi' yu'biyob; tsi' meleyob i pusic'al yic'ot tsa' wen mich'ayob come tsa' tic'lʌnti Israel che' ba' ora tsa' wersa pi'lenti xch'oc bʌ i yalobil Jacob, jiñʌch junchajp mach bʌ yomic mi' yujtel.

⁸ Hamor tsi' pejcayob, tsi' yʌlʌ: —Jiñi calobil Siquem woli' wen mulan jiñi xch'oc bʌ a walobil; awocolic aq'ueñix jiñi xch'oc cha'añ i yijñam.

⁹ La' i cha'leñob ñujpuñijel la calobilob, aq'ueñon lojon xch'oc bʌ la' walobilob, che' ja'el pʌyʌla xch'oc bʌ calobilob lojon.

¹⁰ Cha'lenla chumtʌl quic'ot lojon, come jochol jiñi lum ti la' tojlel; cha'lenla chumtʌl yic'ot cha'lenla e'tel ti ili lum; taja la' chu'bʌañ ilayi.

¹¹ Che' ja'el Siquem tsi' su'be i tat Dina yic'ot i yʌscuñob: —La' c taj i yutslel la' pusic'al, che' jiñi mi caj cʌq'ueñetla chuqui tac jach mi la' c'ajtibeñon.

¹² C'ajtibeñonla che' bajche' c'amel la' wom jiñi majtañʌl, mi caj cʌq'ueñetla che' bajche' mi la' c'ajtibeñon; pero aq'ueñonla jiñi xch'oc cha'añ quijñam.

¹³ I yalobilob Jacob tsi' jac'beyob Siquem yic'ot Hamor i tat ti lot bʌ t'añ, come Siquem tsi' ñolch'i cha'añ mi' pi'len Dina i yijts'iñob.

¹⁴ Tsi' su'beyob: —Mach mejlic c mel lojon iliyi che' mi c'ʌc lojon quijts'in ti' tojlel wiñic mach bʌ tsepbilic i pʌchʌlel, come tic tojlel lojon bi'bi'jax.

¹⁵ Mic cʌq'ueñet lojon jiñi xch'oc mi la' wom la' jac' che' bajche' mi cʌl lojon: Cha'añ mi la' wajñel che' bajche' añon lojon, yic'ot mi' laj tsepbentel i pʌchʌlel pejtelel wiñicob ti a lumal.

¹⁶ Che' jiñi mi' mejlel cʌq'ueñet lojon xch'oc bʌ calobilob lojon yic'ot mi' mejlel c pʌy lojon jiñi xch'oc bʌ la' walobilob ja'el; mi lac tem cha'len chumtʌl cha'añ junmojt jax mi la cajñel.

¹⁷ Pero mi ma'añic tsa' la' wʌc'ʌ ti tsepol la' pʌchʌlel, mic pʌy lojon majlel jiñi xch'oc, mic majlel lojon.

¹⁸ Uts'at tsi' yu'biyob ili t'añ Hamor yic'ot Siquem i yalobil

¹⁹ Jiñi ch'itoñ tsi' mele ti ora iliyi, come tsi' mula i yalobil Jacob. Ñumen ñuc tsa' q'uejli jiñi ch'itoñ ti yotot i tat bajche' i pi'ʌlob.

²⁰ Jiñi cha'añ Hamor yic'ot Siquem i yalobil tsa' majliyob ba'añ i ti' tejclum, cha'añ mi pejcañob jiñi wiñicob ti jiñi tejclum, tsi' su'beyob:

²¹ —Ili wiñicob wen uts'atob i pusic'al la quic'ot; la' chumlecob ti ili lum; la' i cha'leñob choñoñel ilayi, come colem jiñi lum cha'añ mi lac tem ajñel; mi' mejlel lac pʌybeñob xch'oc bʌ i yalobilob cha'añ la quijñam yic'ot mi' mejlel lac sijibeñob xch'oc bʌ la calobilob ja'el.

²² Pero cojach junchajp yom cha'añ mi' mejlel lac tem ajñel yic'ot ili wiñicob: Yom mi' tsejpel lac pʌchʌlel ti jujuntiquilonla wiñicon bʌ la che' bajche' tsepbilob i pʌchʌlel.

²³ I yʌlac' yic'ot i chu'bʌañ yic'ot pejtelel i yʌlac' yujil bʌ cuchijel, lac cha'añʌch; cojach yom mi lac jac'ben i t'añ, che' jiñi mux i chumtʌlob la quic'ot.

²⁴ Ti pejtelelob jiñi tsa' bʌ loq'uiyob ti ti' jiñi tejclum, tsi' jac'beyob i t'añ Hamor yic'ot i t'añ Siquem i yalobil, tsa' tsepbentiyob i pʌchʌlel pejtelel wiñicob tsa' bʌ loq'uiyob ti ti' jiñi tejclum.

²⁵ Pero che' ti' yuxp'ejlel q'uiñ che' wen c'ux to woli i yu'biñob ba' tsa' tsepbentiyob i pʌchʌlel, jiñi Simeón yic'ot Leví i yʌscuñob Dina, tsi' ch'ʌmʌyob ti jujuntiquil i yespada; tsa' ochiyob ti jiñi tejclum che' mach yʌxʌlobic i yoj, tsi' tsʌnsayob pejtelel wiñicob.

²⁶ Ti espada tsi' tsʌnsayob Hamor yic'ot Siquem i yalobil. Tsi' pʌyʌyob loq'uel Dina ti yotot Siquem, tsa' sujtiyob.

²⁷ I yalobilob Jacob tsa' ñumiyob ba'añ jiñi tsʌnsʌbilo' bʌ, tsi' laj ch'ʌmʌyob majlel jiñi am bʌ ti jiñi tejclum, cha'añ ti' caj tsi' yʌc'ʌyob ti quisin i yijts'in che' bʌ tsa' pi'lenti.

²⁸ Tsi' pʌyʌyob majlel pejtelel tʌñʌme', wacax, burro yic'ot chuqui tac añ ti jiñi tejclum yic'ot chuqui añ tac ti jamil.

²⁹ Tsi' ch'ʌmbeyob majlel pejtelel i chu'bʌañ yic'ot pejtelel i yalobilob yic'ot i yijñamob. Tsi' xujch'ibeyob pejtelel chuqui añob i cha'añ ti yotot.

³⁰ Che' jiñi Jacob tsi' su'be Simeón yic'ot Leví: —Tsa'ix la' wotsayon ti ñuc bʌ wocol cha'añ ti la' caj. Jiñi chumulo' bʌ ti ili lum mi caj i ts'a'leñoñob jiñi cananeojob yic'ot ferezeojob, come ts'ita' jach c wiñicob, mi caj i tempañob i bʌ tij contra, mi caj i jisañon yic'ot pejtelel año' bʌ ti cotot.

³¹ I yalobilob tsi' jac'ʌyob: —¿Mu' ba caj i q'uel quijts'in lojon che' bajche' juntiquil ts'i'lel x'ixic?