Genesis 31 - Jiñi Tsiji' bʌ Wen T'añ cha'añ Estudio

¹ Jacob tsi' yu'bibeyob i t'añ ch'itoñ bʌ i yalobilob Labán che' bʌ tsi' yʌlʌyob: “Jacob tsa'ix i ch'ʌmʌ pejtelel i yʌlac' lac tat. Cha'añ ti' caj i chu'bʌañ lac tat tsa'ix i taja ca'bʌl i chu'bʌañ.”

² Che' ja'el Jacob tsi' q'uele Labán q'uexelix i wut, mach chʌn lajalix che' bajche' ti ñaxan.

³ Jiñi cha'añ lac Yum tsi' su'be Jacob: “Sujten ti' lumal a tat ba'añ a pi'ʌlob, joñon mi caj cajñel a wic'ot.”

⁴ Jacob tsi' choco ti pʌyol Raquel yic'ot Lea ya' ti jamil ba'añ i tʌñʌme',

⁵ tsi' su'beyob: —Cujil ma'añix mi' chʌn q'uelon ti uts'at la' tat che' bajche' ti ñaxan; pero i Dios c tat woli' yajñel quic'ot.

⁶ Jatetla la' wujil tsa' c melbe i ye'tel la' tat ti pejtelel c p'ʌtʌlel;

⁷ pero la' tat tsi' lotiyon, lujunyajl tsi' q'uexta i t'añ cha'añ i tojol que'tel, pero Dios tsi' tiq'ui cha'añ ma'añic mi' tic'lañon.

⁸ Come tsi' yʌlʌ: “Jiñi pinto tac bʌ jiñʌch i tojol a we'tel.” Che' jiñi tsi' yʌc'ʌ pinto tac bʌ i yal pejtelel jiñi tʌñʌme'; ti wi'il tsi' yʌlʌ: “Jiñi barsintic tac bʌ jiñʌch i tojol a we'tel.” Che' jiñi tsi' yʌc'ʌ barsintic tac bʌ i yal ti pejtelel tʌñʌme'.

⁹ Jiñʌch che' bajche' Dios tsi' chilbe i tʌñʌme' la' tat, cha'añ mi' yʌq'ueñon.

¹⁰ Che' ba' ora tsi' chucuyob i bʌ jiñi tʌñʌme', tsa' j can q'uele pañimil tic ñajal, tsa' j q'uele xpinto tac yic'ot xbarsin tac bʌ xtat tʌñʌme' woli' chucob i ña'al.

¹¹ I yángel Dios tsi' su'beyon tic ñajal: “Jacob.” Tsa' c jac'be: “Wʌ'añon.”

¹² Che' jiñi tsi' yʌlʌ: “Letsan a wut, mi caj a q'uel barsintic yic'ot pintotic yic'ot motol tac bʌ i ts'ijbal pejtelel jiñi xtat chivo mu' bʌ i chuc i ña'al, come tsa'ix j q'uele pejtelel tsa' bʌ i melbeyet Labán.

¹³ Joñoñʌch jiñi Dios tsa' bʌ a q'uele ti Bet-el ya' ba' tsa' mulu jiñi xajlel yic'ot ba' tsa' wa'choco a t'añ tic tojlel. Ch'ojyen wʌle, loq'uen ti ili lum; cha' sujten ti jiñi lum ya' ba' tsa' wila pañimil.”

¹⁴ Raquel yic'ot Lea tsi' jac'ʌyob: —¿Añ to ba c chu'bʌañ lojon ti yotot lac tat mu' bʌ caj i yʌq'ueñon lojon?

¹⁵ ¿Mach ba muq'uic i q'uelonla bajche' jiñi ñajt bʌ ch'oyolob? Come tsi' choñoyonla, tsa'ix i laj jisa jiñi tsa' bʌ aq'uenti cha'añ lac tojol.

¹⁶ Pejtelel i chu'bʌañ lac tat, Dios tsi' chilbe cha'añ mi' yʌq'ueñonla yic'ot la calobilob. Jiñi cha'añ wʌle mele che' bajche' tsi' su'beyet Dios.

Jacob tsi' puts'ta Labán

¹⁷ Jiñi cha'añ Jacob tsi' c'ʌchchocoyob i yalobilob yic'ot i yijñamob ti' pat camello tac;

¹⁸ tsi' choco majlel pejtelel i wacax yic'ot pejtelel i chu'bʌañ tsa' bʌ i tempa ya' ti Padan-aram. Tsa' caji ti majlel ba'añ Isaac i tat, ya' ti' lumal Canaán.

¹⁹ Che' bʌ Labán tsa' majli i tsepben i tsutsel i tʌñʌme' tac, Raquel tsi' xujch'ibe majlel i dios tac i tat.

²⁰ Jacob tsi' loti Labán jiñi arameo, come ma'añic tsi' su'be mi mux caj i majlel.

²¹ Tsa' puts'i majlel yic'ot pejtelel i cha'año' bʌ. Tsa' caji ti majlel, tsa' ñumi ti colem ja' i c'aba' Éufrates, tsa' majli ti' tojel wits i c'aba' Galaad.

²² Che' ti yuxp'ejlel q'uiñ tsi' su'beyob Labán cha'añ Jacob tsa'ix puts'i majlel.

²³ Che' jiñi Labán tsi' pʌyʌ majlel i pi'ʌlob cha'añ mi' tsajcan majlel Jacob. Ti' wucp'ejlel q'uiñ tsa' c'oti i taj ya' ti wits i c'aba' Galaad.

²⁴ Pero ti jiñi ac'ʌlel Dios tsi' su'be Labán jiñi arameo ti' ñajal, tsi' su'be: “Tsajiletme, mach me a pejcan Jacob ti tsʌts bʌ t'añ.”

²⁵ Labán tsa' c'oti i taj Jacob che' wa'chocobilix pisil bʌ i yotot ya' ti wits; che' ja'el Labán tsi' wa'choco pisil bʌ i yotot temel yic'ot i pi'ʌlob ya' ti wits i c'aba' Galaad.

²⁶ Jiñi cha'añ Labán tsi' su'be Jacob: —¿Chuqui tsa' mele? ¿Chucoch tsa' lotiyon yic'ot tsa' pʌyʌyob tilel calobilob che' bajche' jiñi chucbilo' bʌ majlel cha'añ guerra?

²⁷ ¿Chucoch mucul jach tsa' loq'uiyet tilel? ¿Chucoch tsa' lotiyon? ¿Chucoch ma'añic tsa' su'beyon cha'añ mic choquet majlel ti' tijicñʌyel c pusic'al, yic'ot c'ay tac, yic'ot tambor, yic'ot arpa?

²⁸ Mi tsa'ic toj a wʌq'ueyon c ts'ujts'un calobilob yic'ot c butsob. Tonto jax bajche' tsa' mele.

²⁹ Añ c p'ʌtʌlel cha'añ mi cʌq'uetla ti wocol, pero sajmʌl ti ac'ʌlel tsi' pejcayon i Dios a tat, tsi' su'beyon: “Tsajiletme, mach me a pejcan Jacob ti tsʌts bʌ t'añ.”

³⁰ Isujm wolix a majlel, come cujil a wom sujtel ti' yotot a tat, pero ¿chucoch tsa' xujch'ibeyon jiñi c dios tac?

³¹ Jacob tsi' jac'be Labán: —Come tsa' c cha'le bʌq'uen, tsa' c ña'ta mi caj a wersa chilbeñon a wixic'alob.

³² Mi añ majqui tsi' ch'ʌmʌ a dios tac, la' chʌmic. Wʌ' ti' tojlel lac pi'ʌlob yom ma' q'uel mi añ a chu'bʌañ quic'ot lojon, ch'ʌmʌ majlel a cha'añ bʌ. Isujm Jacob ma'añic tsi' ña'ta mi jiñʌch Raquel tsa' bʌ i xujch'ibe i dios tac i tat.

³³ Labán tsa' ochi ti pisil bʌ i yotot Jacob yic'ot ti yotot Lea, tsa' ochi ja'el ti pisil bʌ i yotot jiñi cha'tiquil criadajob, ma'añic chuqui tsi' taja. Tsa' loq'ui ti' yotot Lea, tsa' ochi ti' yotot Raquel.

³⁴ Pero Raquel tsi' ch'ʌmʌ jiñi dios tac, tsi' yotsa ti' monturajlel camello, tsi' buchta. Labán tsi' laj sʌcla ñumel ti' mal jiñi pisil bʌ otot, pero ma'añic tsi' taja.

³⁵ Jiñi cha'añ Raquel tsi' su'be i tat: —Mach me mich'an c yum, mi ma'añic mic mejlel ti ch'ojyel ti a tojlel come wolij q'uel j c'am-ʌjel che' bajche' i tilel x'ixicob. Labán tsi' chʌn sʌcla i dios tac, pero ma'añic tsi' taja.

³⁶ Jacob tsa' mich'a, tsa' caji i tsʌts bʌ pejcan Labán, tsi' su'be: —¿Chuqui c sajtemal tsa' c taja? ¿Chuqui c mul cha'añ ma' tilel a sʌclañon?

³⁷ Tsa' laj sʌcla ñumel ti pejtelel c chu'bʌañ. ¿Tsa' ba a taja a chu'bʌañ loq'uem bʌ ti a wotot? Ac'ʌ ilayi ti tojel c pi'ʌlob yic'ot ti' tojel a cha'año' bʌ, la' i ña'tañob majqui añ i mul.

³⁸ Junc'al ja'b tsa' ajñiyon a wic'ot; i ña'al a tʌñʌme' yic'ot i ña'al a chivo ma'añic ba' ora tsi' ñusa i yal, mi tsa'ic j c'uxu i tat tʌñʌme'.

³⁹ Ma'añic ba' ora tsa' c pʌybeyet tilel jiñi lojwem tac bʌ tsa' bʌ i c'uxu bʌte'el: Joñon tsa' cʌq'ueyet i q'uexol; tsa' c wersa q'uextʌbeyet jiñi tsa' bʌ i xujch'iyob ti q'uiñil yic'ot ti ac'ʌlel, come tsa' c'ajtibeyon i tojol.

⁴⁰ Ti q'uiñil tsa' c cu'bi ca'bʌl ticwal ixcu ti ac'ʌlel tsa' cu'bi ca'bʌl tsʌñal, ma'añic tsa' mejliyon ti wʌyel.

⁴¹ Che'ʌch tsa' ajñiyon junc'al ja'b ti a wotot: Tsa' c melbeyet a we'tel chʌnlujump'ejl (14) ja'b cha'añ jiñi xch'oc bʌ a walobilob yic'ot wʌcp'ejl ja'b cha'añ a wʌlac' yic'ot lujunyajl tsa' yʌñʌ tac a t'añ cha'añ ma' chilbeñon i tojol que'tel.

⁴² Machic tsi' coltayon i Dios c tat, i Dios Abraham tsa' bʌ i bʌc'ña Isaac, p'ump'uñon jax wʌle tsa' loq'uiyon ti a wotot; pero Dios tsi' q'uele jiñi wocol tsa' bʌ cu'bi ti a tojlel yic'ot jiñi wocol e'tel tsa' bʌ c cha'le, jiñi cha'añ Dios tsi' tiq'uiyet sajmʌl ti ac'ʌlel cha'añ ma'añic ma' chañ-esan a bʌ tic tojlel.

⁴³ Labán tsi' jac'be Jacob, tsi' su'be: —Jiñobʌch calobilob jiñi a wijñamob yic'ot i yalobilob. C cha'añʌch jiñi alʌc'ʌl yic'ot pejtelel jiñi am bʌ a cha'añ: ¿Chuqui mi' mejlel c tumben wʌle ili xch'oc bʌ calobilob yic'ot i yalobilob tsa' bʌ i yʌc'ʌyob ti pañimil?

⁴⁴ La' lac tem mel jump'ejl xuc'ul bʌ lac t'añ, cha'añ mi' lac chʌn ña'tan.

⁴⁵ Jiñi cha'añ Jacob tsi' ch'ʌmʌ jump'ejl xajlel, tsi' wa'choco cha'añ i yejtal jiñi xuc'ul bʌ t'añ tsa' bʌ i meleyob.

⁴⁶ Jacob tsi' su'be i pi'ʌlob: —Tempanla xajlel. Tsa' caji i much'quiñob xajlel, tsi' c'uxuyob waj ti pam jiñi much'ul bʌ xajlel.

⁴⁷ Labán tsi' yotsʌbe i c'aba' ti “Jegar Sahaduta”; ixcu Jacob tsi' pejca ti “Galaad.”

⁴⁸ Jiñi cha'añ Labán tsi' yʌlʌ: —Ili much'quibil bʌ xajlel jiñʌch testigo cha'añonla. Jiñi cha'añ tsa' otsʌbenti i c'aba' ti Galaad;

⁴⁹ che' ja'el tsi' yotsʌbe i c'aba' ti Mizpa, come tsi' yʌlʌ: —La' i q'uelonla Dios che' ñajtix añonla.

⁵⁰ Mi tsa' tic'layob jiñi calobilob o mi tsa' pʌyʌ yam bʌ x'ixicob cha'añ a wijñam che' cuxulob to calobilob, anquese ma'añic wiñic mu' bʌ i q'uelonla, pero Dios testigojʌch ti lac tojlel.

⁵¹ Labán tsi' cha' su'be Jacob: —Q'uele jiñi much'ul bʌ xajlel come jiñʌch i yejtal xuc'ul bʌ lac t'añ tsa' bʌ lac wa'choco.

⁵² Ili much'quibil bʌ xajlel yic'ot ili wa'chocobil bʌ lac cha'añ, jiñʌch lac mojon i wenta lac testigo. Ma'añic mi caj c ñusan jiñi much'ul bʌ xajlel cha'añ mic tic'lañet. Mi jatetic mi caj a ñusan jiñi much'ul bʌ xajlel yic'ot ili yejtal xuc'ul bʌ lac t'añ cha'añ ma' tic'lañon.

⁵³ La' i melonla i Dios lac ñojte'el, i Dios Abraham, yic'ot i Dios Nacor. Jacob tsi' wa'choco i t'añ ti' tojlel jiñi Dios tsa' bʌ i bʌc'ña i tat Isaac.

⁵⁴ Jacob tsi' tsʌnsʌbe i majtañ Dios ya' ti wits, tsi' pʌyʌ i pi'ʌlob ti c'ux waj. Tsi' c'uxuyob waj, tsa' wʌyiyob ti jiñi ac'ʌlel ya' ti wits.

⁵⁵ Che' ti wen sʌc'ajel, Labán tsa' ch'ojyi, tsi' ts'ujts'u i butsob yic'ot i yixic'alob; tsi' yʌq'ueyob i yutslel i t'añ, tsa' sujti majlel ti' lumal.