Genesis 3 - Jiñi Tsiji' bʌ Wen T'añ cha'añ Estudio

Adán yic'ot Eva tsi' ñusʌbeyob i t'añ Dios

¹ Jiñi lucum ñumen p'ip' i pusic'al bajche' pejtelel yan tac bʌ bʌte'el tsa' bʌ i mele lac Yum Dios. Jiñi lucum tsi' su'be jiñi x'ixic: —¿Isujm ba tsi' su'beyetla Dios: “Mach yomic mi la' c'uxben i wut pejtelel jiñi te' am bʌ ti jiñi pʌc'ʌbʌl”?

² Jiñi x'ixic tsi' su'be jiñi lucum: —Mi' mejlel j c'ux lojon i wut jiñi te' tac am bʌ ti pʌc'ʌbʌl,

³ pero i wut jiñi te' am bʌ ti yojlil jiñi pʌc'ʌbʌl, Dios tsi' yʌlʌ: “Mach mi la' c'ux, mach la' tʌl ame chʌmiquetla.”

⁴ Jiñi cha'añ jiñi lucum tsi' su'be jiñi x'ixic: —Ma'añic mi caj la' chʌmel.

⁵ Come yujil Dios che' ba' ora mi la' c'uxben i wut jiñi te' mux i cajñel la' wut, lajal mi caj la' wajñel bajche' Dios, mi caj la' cʌn chuqui tac uts'at yic'ot chuqui tac jontol.

⁶ Che' bʌ tsi' q'uele jiñi x'ixic uts'atax i wut jiñi te' cha'añ mi' c'ux, mulantic tsi' q'uele yic'ot añ i c'ʌjñibal cha'añ mi' yʌq'ueñ i ña'tʌbal, tsi' tuc'u i wut jiñi te', tsi' c'uxu; yic'ot tsi' yʌq'ue i ñoxi'al, che' jiñi tsi' c'uxu ja'el che' bajche' jiñi x'ixic.

⁷ Che' jiñi tsa' cajñiyob i wut ti' cha'ticlel, tsa' caji i q'uelob i bʌ cha'añ pits'ilob. Tsi' ts'isiyob i yopol higuera te' cha'añ mi' mosob i bʌ.

⁸ Che' yomix bʌjlel q'uiñ, tsi' yu'biyob i t'añ lac Yum Dios che' woli ti xʌmbal ñumel ti pʌc'ʌbʌl; jiñi wiñic yic'ot i pi'ʌl tsi' mujcuyob i bʌ ti' tojlel lac Yum Dios ya' ti te'el am bʌ ti pʌc'ʌbʌl.

⁹ Pero lac Yum Dios tsi' pejca jiñi wiñic, tsi' c'ajtibe: —¿Baqui añet?

¹⁰ Jiñi wiñic tsi' jac'ʌ: —Tsa' cu'bi woliyet ti t'añ ti pʌc'ʌbʌl, tsa' c cha'le bʌq'uen come pits'ilon; jiñi cha'añ tsa' c mujcu c bʌ.

¹¹ Jiñi cha'añ Dios tsi' c'ajtibe: —¿Majqui tsi' su'beyet cha'añ pits'ilet? ¿Tsa' ba a c'uxu i wut jiñi te' tsa' bʌ c su'beyet cha'añ mach yomic ma' c'ux?

¹² Jiñi wiñic tsi' jac'be: —Jiñi x'ixic tsa' bʌ a wʌq'ueyon cha'añ mi' yajñel quic'ot tsi' yʌq'ueyon i wut jiñi te', tsa' j c'uxu.

¹³ Jiñi cha'añ lac Yum Dios tsi' su'be jiñi x'ixic: —¿Chuqui jiñi tsa' bʌ a mele? Jiñi x'ixic tsi' yʌlʌ: —Jiñi lucum tsi' lotiyon, tsa' j c'uxu.

¹⁴ Lac Yum Dios tsi' su'be jiñi lucum: —Cha'añ ti' caj tsa' mele iliyi, ñumen ts'a'lebilet bajche' pejtelel alʌc'ʌl yic'ot pejtelel bʌte'el tac. Jexecña mi caj a majlel ti a ñʌc', yic'ot mi caj a mʌc' ts'u'bejn ti pejtelel ora.

¹⁵ Mi caj cʌq'ueñet la' contrajin la' bʌ jatet yic'ot jiñi x'ixic, mi caj i contrajiñob i bʌ i p'olbal jiñi x'ixic yic'ot a p'olbal; i p'olbal jiñi x'ixic mi caj i low a jol, ixcu jatet mi caj a lowben i tuñ'oc.

¹⁶ Dios tsi' su'be jiñi x'ixic: —Mi caj c wen p'ojlesan a wocol che' cʌntʌbil a walobil. Mi caj a cha'len bajq'uel che' mi' yilan pañimil a walobilob, yom ma' wajñel yic'ot a ñoxi'al, jiñi mi caj i su'beñet chuqui yom ma' mel.

¹⁷ Dios tsi' su'be jiñi wiñic: —Cha'añ ti' caj tsa' jac'be i t'añ a wijñam yic'ot cha'añ tsa' c'uxu i wut jiñi te' tsa' bʌ c su'beyet: “Mach yomic ma' c'ux”, asiyemix jiñi lum cha'añet; wocol jax mi caj a taj i bʌl a ñʌc' ti lum c'ʌlʌl jinto ma' chʌmel.

¹⁸ Jiñi lum mi caj i yʌq'ueñet ch'ix yic'ot wisi q'uiñ. Mi caj a c'ux pimel mu' bʌ i colel ti lum.

¹⁹ Mi caj a cha'len bu'lich cha'añ wersa e'tel cha'añ ma' taj a waj, c'ʌlʌl jinto ma' sujtel ti lum, come tsa' c meleyet ti ts'u'bejn; ts'u'bejñet jiñi cha'añ mi caj a cha' sujtel ti ts'u'bejn.

²⁰ Jiñi wiñic tsi' yotsʌbe i c'aba' i pi'ʌl ti Eva, come i ña'ʌch pejtelel jiñi cuxulo' bʌ.

²¹ Lac Yum Dios tsi' melbe i bujc Adán yic'ot i bujc i pi'ʌl melbil bʌ ti pʌchi, yic'ot tsi' lʌpbeyob.

²² Ti wi'il lac Yum Dios tsi' yʌlʌ: “Wʌle, jiñi wiñic lajal bajche' joñonla, cʌñʌl i cha'añ chuqui tac uts'at yic'ot chuqui tac jontol; wʌle bʌbʌq'uen mi' yotsan i c'ʌb i tuc'ben i wut jiñi te' mu' bʌ i yʌq'ueñ i cuxtʌlel, ame i c'ux cha'añ cuxul mi' yajñel ti pejtelel ora”.

²³ Jiñi cha'añ lac Yum Dios tsi' choco loq'uel Adán ti pʌc'ʌbʌl i c'aba' Edén, cha'añ mi' cha'len e'tel ti jiñi lum tsa' bʌ i c'ʌñʌ Dios i mel Adán.

²⁴ Dios tsi' choco loq'uel jiñi wiñic. Ya' ti jiñi pʌc'ʌbʌl i c'aba' Edén ti' tojel i pasibal q'uiñ, Dios tsi' wa'choco querubiñob bʌ ángelob, yic'ot tsi' yʌc'ʌ junts'ijt espada woli bʌ ti lejmel, woli bʌ ti wijlel ñumel cha'añ mi' mʌctañ i bijlel jiñi te' mu' bʌ i yʌq'ueñonla laj cuxtʌlel.