Genesis 29 - Jiñi Tsiji' bʌ Wen T'añ cha'añ Estudio

Jacob tsi' melbe i ye'tel Labán cha'añ Raquel yic'ot Lea

¹ Jacob tsa' cha' caji ti xʌmbal majlel, tsa' c'oti ti' lumal jiñi año' bʌ ti' tojel i pasibal q'uiñ.

² Tsi' q'uele ya'añ jump'ejl pozo ti jiñi lum yic'ot uxmojt tʌñʌme' ya' bʌ pʌcʌlob ti' t'ejl jiñi pozo, come ti jiñi pozo ya'ʌch ba' mi' luchob ja' cha'añ mi' yʌq'ueñob i jap tʌñʌme', añ jump'ejl colem xajlel am bʌ ti ti' jiñi pozo.

³ Che' mi' tempañob i tʌñʌme' ya'i, jiñi xcʌnta tʌñʌme'ob mi' loc'sañob jiñi xajlel ti ti' pozo cha'añ mi' yʌq'ueñob i jap ja' i tʌñʌme', che' mi' yujtel, mi' cha' ac'ob jiñi xajlel ti ti' jiñi pozo.

⁴ Jacob tsi' c'ajtibeyob: —C pi'ʌlob, ¿Baqui ch'oyoletla? —Ch'oyolon lojon ti Harán —che'ob.

⁵ Tsi' cha' c'ajtibeyob: —¿La' cʌñʌ ba Labán, i yalobil bʌ Nacor? —J cʌñʌ cu lojon —che'ob.

⁶ Jacob tsi' cha' c'ajtibeyob: —¿Uts'at ba añ? —Uts'at cu —che' tsi' yʌlʌyob jiñi xcʌnta tʌñʌme'ob—. Q'uele, ya' tilel Raquel i yalobil yic'ot i tʌñʌme'.

⁷ Jacob tsi' yʌlʌ: —Chañ to q'uiñ, maxto i yorajlelic mi' tempʌntel alʌc'ʌl. Aq'uenla i jap ja' la' tʌñʌme', cucula aq'uen i buc'bal.

⁸ Jiñi xcʌnta tʌñʌme'ob tsi' jac'ʌyob: —Mach mejlicon lojon jinto mi' laj tempʌyel tʌñʌme' ti jujunmojt, che' jiñi mic loc'san lojon jiñi xajlel ti ti' jiñi pozo. Che' jiñi mi cʌq'uen lojon i jap ja' jiñi tʌñʌme'.

⁹ Che' woli to ti t'añ Jacob yic'otob jiñi xcʌnta tʌñʌme'ob, tsa' c'oti Raquel yic'ot i tʌñʌme' i tat, come jiñʌch xcʌnta tʌñʌme'.

¹⁰ Che' ba' ora Jacob tsi' q'uele Raquel, i yalobil bʌ Labán, i yʌscun i ña', yic'ot i tʌñʌme' Labán. Tsa' majli ti pozo, tsi' loc'sa jiñi xajlel am bʌ ti ti' jiñi pozo, tsi' yʌq'ue i jap ja' i tʌñʌme' Labán.

¹¹ Ti wi'il Jacob tsi' ts'ujts'u Raquel, c'am tsi' cha'le uq'uel.

¹² Jacob tsi' su'be Raquel cha'añ i cʌñʌyʌch i tat come i yalobilʌch Rebeca; jiñi cha'añ Raquel ajñel tsa' majli i su'ben i tat.

¹³ Che' bʌ tsi' yu'bi Labán ya'añ Jacob i yalobil i yijts'in, ajñel tsa' majli i taj, tsi' meq'ue, tsi' ts'ujts'u, tsi' pʌyʌ majlel ti yotot. Che' jiñi Jacob tsi' laj su'be Labán pejtelel chuqui tsa' ujti ti' tojlel.

¹⁴ Jiñi Labán tsi' su'be: —Isujm mero laj cʌñʌ lac bʌ. Jacob tsa' cʌle jump'ejl uw ba'añ Labán.

¹⁵ Jiñi cha'añ Labán tsi' su'be Jacob: —Cha'añ ti' caj laj cʌñʌ lac bʌ ¿Yom ba' ma' to'ol melbeñon que'tel? Su'beñon bajche' a wom mic tojet.

¹⁶ Añ cha'tiquil xch'oc bʌ i yalobilob Labán. I c'aba' jiñi chichʌl bʌ jiñʌch Lea, i c'aba' jiñi ijts'iñʌl bʌ jiñʌch Raquel.

¹⁷ Lea uts'atax i wut, pero Raquel wen i t'ojol jax ti' pejtelel.

¹⁸ Jacob tsi' c'uxbi Raquel, tsi' yʌlʌ: —Mi caj melbeñet a we'tel wucp'ejl ja'b cha'añ mic pʌy Raquel jiñi ijts'iñʌl bʌ a walobil.

¹⁹ Labán tsi' jac'ʌ: —Ñumen uts'at mi cʌq'ueñet jatet, mach uts'atic che' mi' cʌq'uen yam bʌ wiñic; cʌlejen quic'ot.

²⁰ Che'ʌch tsi' cha'le e'tel Jacob wucp'ejl ja'b cha'añ mi' pʌy Raquel; mach ca'bʌlic q'uiñ tsi' yu'bi Jacob jiñi wucp'ejl ja'b, come c'uxatax tsi' yu'bi Raquel.

²¹ Ti jump'ejl bʌ q'uiñ Jacob tsi' su'be Labán: —Aq'ueñoñix quijñam come tsa'ix ts'ʌctiyi wucp'ejl ja'b que'tel cha'añ mic pʌy.

²² Jiñi cha'añ Labán tsi' pʌyʌ tilel pejtelel wiñicob x'ixicob ya' bʌ chumulob cha'añ mi' cha'leñob q'uiñijel.

²³ Pero che' ti ac'ʌlel Labán tsi' pʌyʌ majlel Lea ba'añ Jacob; Jacob tsa' ajñi yic'ot ti jiñi ac'ʌlel.

²⁴ Labán tsi' yʌq'ue i criada i c'aba' Zilpa cha'añ mi' melben i ye'tel Lea.

²⁵ Che' bʌ tsa' sʌc'a pañimil, Jacob tsi' q'uele jiñʌch Lea tsa' bʌ i pʌyʌ, Jacob tsi' su'be Labán: —¿Chuqui tsa' melbeyon? ¿Mach ba tsa'ic melbeyet a we'tel cha'añ mic pʌy Raquel? ¿Chucoch tsa' lotiyon?

²⁶ Labán tsi' jac'ʌ: —Mach che'ic mic mel lojon ilayi, ñaxan mic sijin lojon jiñi chichʌl bʌ, wi'ilix jiñi ijts'iñʌl bʌ.

²⁷ Ts'ʌctesan jump'ejl semana ajñel a wic'ot Lea, che' jiñi mi caj cʌq'ueñet i yijts'in cha'añ yam bʌ wucp'ejl ja'b a we'tel mu' bʌ caj a melbeñon.

²⁸ Che'ʌch tsi' mele Jacob. Tsa' ajñi jump'ejl semana yic'ot Lea, che' jiñi Labán tsi' yʌq'ue Raquel cha'añ mi' pʌy ti yijñam.

²⁹ Labán tsi' yʌq'ue Raquel i criada i c'aba' Bilha cha'añ mi' melben i ye'tel Raquel.

³⁰ Jacob tsa' ajñi yic'ot Raquel ja'el, ñumen tsi' c'uxbi Raquel bajche' Lea. Tsi' melbe i ye'tel Labán yam bʌ wucp'ejl ja'b.

I yalobilob Jacob

³¹ Lac Yum tsi' q'uele mach c'uxbibilic Lea, jiñi cha'añ tsi' yʌq'ue i yalobilob pero Raquel ma'añic i yalobil.

³² Lea tsa' caji i cʌntan i yalobil, tsi' yʌc'ʌ ti pañimil juntiquil ch'itoñ bʌ i yalobil, tsi' yotsʌbe i c'aba' ti Rubén, come tsi' yʌlʌ: “Dios tsi' q'uele c wocol, wʌle c ñoxi'al mi caj i c'uxbiñon.”

³³ Tsi' cha' cʌnta i yalobil, tsi' yʌc'ʌ ti pañimil yam bʌ ch'itoñ bʌ i yalobil, tsi' yʌlʌ: “Cha'añ ti' caj tsi' yu'bi lac Yum cha'añ ts'a'lebilon, jiñi cha'añ tsi' yʌq'ueyon yam bʌ calobil.” Tsi' yotsʌbe i c'aba' ti Simeón.

³⁴ Tsi' cha' cʌnta i yalobil, tsi' yʌc'ʌ ti pañimil yam bʌ ch'itoñ bʌ i yalobil, tsi' yʌlʌ: “Wʌle c ñoxi'al mi caj i yajñel quic'ot, come tsa'ix cʌq'ue uxtiquil ch'itoñ bʌ i yalobil.” Jiñi cha'añ tsi' yotsʌbe i c'aba' ti Leví.

³⁵ Tsi' cha' cʌnta i yalobil, tsi' yʌc'ʌ ti pañimil yam bʌ ch'itoñ bʌ i yalobil, tsi' yʌlʌ: “Ti ili ora mi caj ch'ujutesan lac Yum;” jiñi cha'añ tsi' yotsʌbe i c'aba' ti Judá. Tsi' cʌyʌ i yʌc' ti pañimil i yalobil.