Genesis 23 - Jiñi Tsiji' bʌ Wen T'añ cha'añ Estudio

Tsa' chʌmi Sara

¹ Che' wucp'ejlix i wucc'al (127) i ja'bilel Sara; che' añix ca'bʌl i ja'bilel,

² tsa' chʌmi ya' ti Quiriat-arba, jiñʌch Hebrón ya' ti' lumal Canaán; tsa' tili Abraham yic'ot i ch'ijiyemlel i pusic'al cha'añ mi yuc'tan Sara.

³ Ti wi'il tsa' loq'ui majlel Abraham ti' t'ejl jiñi ch'ujlelʌl, tsa' majli i pejcan i yalobilob Het, tsi' yʌlʌ:

⁴ —Tilemon ti yam bʌ lum, poj che' jach woliyon ti chumtʌl ti la' lumal; chombeñon la' lum ba' mi' mejlel c muc quijñam tsa' bʌ chʌmi.

⁵ I yalobilob Het tsi' jac'beyob Abraham, tsi' yʌlʌyob:

⁶ —C yum, u'biñon lojon. Cha'añon lojon, jatet i wiñiquet Dios. Mucu a wijñam ti c'ax uts'at bʌ mucoñibʌl c cha'añ lojon, ma'añic majqui mi caj i mʌctañet mi tsa' c'ʌñʌ mucoñibʌl cha'añ ma' muc a wijñam.

⁷ Abraham tsa' ch'ojyi, tsi' c'uchchoco i bʌ ti' tojlel i yumob jiñi lum, jiñobʌch i yalobilob Het.

⁸ Abraham tsi' pejcayob, tsi' yʌlʌ: —Mi isujm la' wom cha'añ mic pʌy majlel c muc quijñam, ñʌch'tʌbeñonla c t'añ yic'ot poj c'ajtibenla Efrón i yalobil Zohar,

⁹ cha'añ mi' yʌq'ueñon jiñi ch'eñ am bʌ ti Macpela ya' ba' jaxʌl i lum; mic tojben ti ts'ʌcʌl, cha'añ che' jiñi c cha'añʌch jiñi mucoñibʌl am bʌ ti la' tojlel.

¹⁰ Come Efrón, jiñi heteo, ya'ʌch añ ti' tojlel i yalobilob Het, tsi' jac'be Abraham ti' tojlel i pi'ʌlob yic'ot ti' tojlel pejtelel jiñi woli bʌ i yochelob ti ti' i tejclumob:

¹¹ —C yum, u'bibeñon c t'añ: Ma'añic mic chombeñet, mi cʌq'ueñet jiñi lum yic'ot jiñi ch'eñ ja'el. Mi cʌq'ueñet ti' wut wiñicob x'ixicob c pi'ʌlob bʌ cha'añ ma' muc a wijñam.

¹² Che' jiñi Abraham tsi' c'uchchoco i bʌ ti' tojlel jiñi ya' bʌ chumulob ti jiñi lum.

¹³ Tsi' jac'be Efrón ti' tojlel pejtelel wiñicob x'ixicob, tsi' yʌlʌ: —Mi che' yom a pusic'al, awocolic poj u'bibeñon t'añ. Mi caj cʌq'ueñet i tojol jiñi lum; ch'ʌmʌ cha'añ che' jiñi mi caj c muc quijñam ya'i.

¹⁴ Efrón tsi' jac'be Abraham:

¹⁵ —C yum, u'bibeñon c t'añ: I tojol jiñi lum jiñʌch jumbajc' siclo sʌsʌc taq'uiñ, pero ¿chuqui i ye'tel ili taq'uiñ cha'añet yic'ot cha'añon? Mucu a wijñam.

¹⁶ Abraham tsi' ch'ʌmʌ ti' wenta che' bajche' tsi' yʌlʌ Efrón. Ti' wut wiñicob x'ixicob tsi' p'isbe jiñi jumbajc' siclo sʌsʌc taq'uiñ che' bajche' tsi' c'ajti Efrón.

¹⁷ Jiñi cha'añ, jiñi lum i cha'añ bʌ Efrón am bʌ ti Macpela ti' tojel Mamre, jiñi lum ba'añ jiñi ch'eñ yic'ot pejtelel jiñi te'el yic'ot pejtelel am bʌ ti' joytʌlel jiñi lum,

¹⁸ tsa' cʌle ti' wenta Abraham jiñi lum ti' tojlel jiñi heteojob, yic'ot ti' tojlel pejtelel woli bʌ i yochelob ti ti' jiñi tejclum.

¹⁹ Ti wi'il, Abraham tsi' mucu Sara i yijñam ya' ti ch'eñ ba'añ jiñi lum i c'aba' Macpela, am bʌ ti' tojel Mamre (jiñʌch Hebrón), am bʌ ti' lumal Canaán.

²⁰ Jiñi lum yic'ot jiñi ch'eñ tsa' cʌle ti' wenta Abraham che' bajche' mujquibʌl tsa' bʌ i chombeyob jiñi heteojob.