Genesis 21 - Jiñi Tsiji' bʌ Wen T'añ cha'añ Estudio

Tsi' yila pañimil Isaac

¹ Lac Yum tsi' ña'ta Sara, tsi' mele che' bajche' tsi' wʌn su'be.

² Sara tsa' caji i cʌntan i yalobil, tsi' yʌq'ue Abraham ch'itoñ bʌ i yalobil che' ñoxix che' bajche' tsi' wʌn su'be lac Yum.

³ Abraham tsi' yotsʌbe i c'aba' ti Isaac i yalobil, tsa' bʌ i yʌc'ʌ ti pañimil Sara.

⁴ Abraham tsi' tsepbe i pʌchʌlel Isaac che' waxʌcp'ejlix q'uiñ i yilʌbe pañimil, che' bajche' tsi' yʌq'ue mandar Dios.

⁵ Añ jo'c'al (100) i ja'bilel Abraham che' bʌ tsi' yila pañimil Isaac.

⁶ Che' jiñi Sara tsi' yʌlʌ: “Dios tsi' yʌc'ʌyon ti tijicña bʌ tse'ñal. Majqui jach mi' yu'bin mi' cajel ti tse'ñal quic'ot.”

⁷ Tsi' yʌlʌ ja'el: “Ma'añic majch tsi' ña'ta mi mux caj j cʌntʌben i yalobil Abraham. Tsa' cʌq'ue ch'itoñ bʌ i yalobil c ñoxi'al che' ñoxix.”

Tsa' chojqui loq'uel Agar yic'ot Ismael ti' yotot Abraham

⁸ Tsa' coli jiñi alʌ ch'itoñ, tsa' chilbenti i chu'. Abraham tsi' mele q'uiñijel che' bʌ tsa' chilbenti i chu' Isaac.

⁹ Pero Sara tsi' q'uele jiñi ch'itoñ, i yalobil bʌ Agar ch'oyol bʌ ti Egipto, tsa' bʌ i yʌq'ue Abraham, woli i wajlen Isaac i yalobil.

¹⁰ Jiñi cha'añ Sara tsi' su'be Abraham: “Choco loq'uel jiñi criada yic'ot i yalobil, come i yalobil jiñi criada ma'añic mi caj i t'oxbentel a chu'bʌañ yic'ot Isaac jiñi calobil.”

¹¹ Wen wocol tsi' yu'bi Abraham cha'añ i t'añ Sara come Ismael i yalobilʌch ja'el.

¹² Jiñi cha'añ Dios tsi' su'be Abraham: “Mach a mel a pusic'al cha'añ ili ch'itoñ yic'ot a criada. Mele che' bajche' tsi' su'beyet Sara, come ti Isaac mi caj i pejcʌntel ti a p'olbal.

¹³ Che' ja'el mi caj c p'ojlesan i yalobil jiñi criada, come a p'olbalʌch.”

¹⁴ Ti yijc'ʌlal, se'b tsa' ch'ojyi Abraham, tsi' ch'ʌmʌ waj yic'ot ja' ti pʌchi bʌ i yajñib, tsi' yʌq'ue Agar. Tsi' yʌq'ue ti' quejlab, tsi' choco majlel Agar yic'ot jiñi ch'itoñ. Agar tsa' caji i xʌn majlel jiñi jochol bʌ lum i c'aba' Beerseba.

¹⁵ Che' bʌ tsa' jili jiñi ja' am bʌ ti pʌchi, Agar tsi' yʌc'ʌ jiñi ch'itoñ ti ye'bal juntejc te',

¹⁶ tsa' majli ti buchtʌl ti' tojel i yalobil, che'ʌch i ñajtlel bajche' mi' c'otel i te'el jalʌjb che' mi' chocob, come tsi' yʌlʌ: “Mach comic j q'uel jiñi ch'itoñ che' mi' chʌmel,” che' bʌ ya' buchul ti' tojel, jiñi ch'itoñ tsa' caji ti c'am bʌ t'añ yic'ot uq'uel.

¹⁷ Dios tsi' yu'bibe i t'añ jiñi ch'itoñ. I yángel Dios ti panchan tsi' pʌyʌ Agar, tsi' su'be: “¿Chuqui woli a cha'len Agar? Mach a cha'len bʌq'uen, come Dios tsi' yu'bibe i t'añ jiñi ch'itoñ ya' ba'añ.

¹⁸ Ch'ojyen, cucu teche ch'ojyel jiñi ch'itoñ, chucu ti c'ʌb, come mi caj c p'ojlesan cha'añ mi' sujtel ti colem tejclum.”

¹⁹ Che' jiñi Dios tsi' cambe i wut Agar, tsi' q'uele pozo ba' woli i loq'uel ja'. Tsa' majli Agar tsi' but'u ja' ti pʌchi, tsi' yʌq'ue i jap jiñi ch'itoñ.

²⁰ Dios tsi' cʌnta jiñi ch'itoñ, tsa' coli, tsa' chumle ti jochol bʌ lum yic'ot wen yujil julbʌl ti jalʌjb.

²¹ Tsa' chumle ti jochol bʌ lum i c'aba' Parán. Jiñi i ña' tsi' c'ajtibe i yijñam ti' lumal Egipto.

Xuc'ul bʌ i t'añ Abraham yic'ot Abimelec

²² Ti jim bʌ ora Abimelec yic'ot i wiñic Ficol, i yum soldadojob, tsi' su'beyob Abraham: —Dios woli' coltañet ti pejtelel chuqui ma' mel.

²³ Jiñi cha'añ wʌle yom ma' wʌc' a t'añ ti' tojlel Dios cha'añ ma'añic mi caj a tic'lañon mi jiñic calobil mi jiñic c buts, che' bajche' tsa' c melbeyet chuqui uts'at che'ʌch yom ma' melbeñon ja'el yic'ot jiñi año' bʌ ti ili lum ba' chumulet wʌle.

²⁴ Abraham tsi' jac'ʌ: —Mi cʌc' c t'añ.

²⁵ Abraham tsi' su'be Abimelec cha'añ mach uts'atic bajche' tsi' mele i wiñicob come tsi' chilbeyob i pozo am bʌ i ya'lel.

²⁶ Abimelec tsi' jac'ʌ: —Mach cujilic majqui tsi' cha'le bajche' jiñi, ma'añic tsa' su'beyon ja'el, cojax to woli cu'bin wʌle.

²⁷ Che' jiñi Abraham tsi' pʌyʌ tilel tʌñʌme' yic'ot wacax, tsi' yʌq'ue Abimelec. Ti' cha'ticlelob tsi' meleyob xuc'ul bʌ t'añ.

²⁸ Pero Abraham tsi' bajñel ac'ʌ wuccojt xch'oc tʌñʌme' ti junwejl,

²⁹ jiñi cha'añ Abimelec tsi' c'ajtibe: —¿Chuqui isujmlel jiñi wuccojt xch'oc tʌñʌme' tsa' bʌ a bajñel ac'ʌ ti junwejl?

³⁰ Abraham tsi' jac'ʌ: —Cha'añʌch mi cʌq'ueñet ili wuccojt xch'oc tʌñʌme', cha'añ mi' yʌc' ti ña'tʌntel cha'añ joñon tsa' c piqui ili pozo.

³¹ Jiñi cha'añ tsa' otsʌbenti i c'aba' jiñi ajñibʌl ti Beerseba, come ya'i tsi' wa'chocoyob i t'añ.

³² Tsi' meleyob xuc'ul bʌ t'añ ya' ti Beerseba. Ti wi'il tsa' cajiyob ti majlel Abimelec yic'ot Ficol, i yum soldadojob, tsa' sujtiyob majlel ti' lumal filisteojob.

³³ Abraham tsi' pʌc'ʌ juntejc te' i c'aba' tamarisco ya' ti Beerseba, ya'i tsi' pejca ti c'aba' lac Yum, jiñi Dios am bʌ ti pejtelel ora.

³⁴ Abraham tsa' wen jal-a ti chumtʌl ti' lumal filisteojob.