Genesis 2 - Jiñi Tsiji' bʌ Wen T'añ cha'añ Estudio

¹ Che'ʌch tsa' ujti i mel Dios jiñi panchan yic'ot pañimil yic'ot pejtelel i bʌl.

² Ti' wucp'ejlel q'uiñ, Dios tsa' ujti i mel i ye'tel, tsi' c'aja i yoj ti' wucp'ejlel q'uiñ che' ujtemix pejtelel i ye'tel.

³ Jiñi cha'añ Dios tsi' q'uele ti ñuc i wucp'ejlel q'uiñ, tsi' q'uele ti ch'ujul, come ti' wucp'ejlel q'uiñ tsi' c'aja i yoj cha'añ pejtelel i ye'tel tsa' bʌ i mele.

⁴ Jiñʌch i ña'tʌntel che' bajche' Dios tsi' mele panchan yic'ot pañimil. Che' ba' ora lac Yum Dios tsi' mele panchan yic'ot pañimil,

Adán yic'ot Eva ti Edén

⁵ che' maxto pasemic pimel yic'ot che' maxto pasemic jam mu' bʌ i colel ti pʌc'ʌbʌl, lac Yum Dios maxto añic tsi' choco tilel ja'al ti pañimil, yic'ot maxto añic majch tsi' cha'le e'tel ti lum,

⁶ tsa' loq'ui tilel ja' ti lum, tsa' bʌ i yʌch'esa pejtelel jiñi lum.

⁷ Jiñi cha'añ lac Yum Dios tsi' mele wiñic ti' ts'u'bejñal lum, tsi' wujtʌbe i ñi' cha'añ mi' yʌq'ueñ i cuxtʌlel, che' jiñi cuxul tsa' ajñi jiñi wiñic.

⁸ Lac Yum Dios tsi' pʌc'ʌ pʌc'ʌbʌl ti Edén ya' ti' pasibal q'uiñ, ya'i tsi' yʌc'ʌ ti chumtʌl jiñi wiñic tsa' bʌ i mele.

⁹ Lac Yum Dios tsi' yʌc'ʌ ti colel ti lum pejtelel i t'ojol bʌ te' yic'ot uts'at bʌ cha'añ i bʌl ñʌc'ʌl. Tsi' yʌc'ʌ ti colel ja'el ya' ti' yojlil jiñi pʌc'ʌbʌl jiñi te' mu' bʌ i yʌc' laj cuxtʌlel yic'ot jiñi te' mu' bʌ i yʌc' ti cʌjñel chuqui uts'at yic'ot chuqui jontol.

¹⁰ Jump'ejl colem ja' tsa' bʌ loq'ui ya' ti Edén cha'añ mi' yʌch'esan jiñi pʌc'ʌbʌl, ya'i tsa' loq'ui chʌnxʌjc' colem ja'.

¹¹ I c'aba' jiñi ñaxan bʌ ja' jiñʌch Pisón; jiñʌch jiñi ja' am bʌ ti' joytʌlel pejtelel i lumal Havila ya' ba' mi' tajtʌl ca'bʌl oro.

¹² Jiñi oro am bʌ ti jiñi lum wen uts'atax yic'ot añ ja'el te' i c'aba' bedelio yic'ot xajlel i c'aba' ónice.

¹³ I cha'p'ejlel bʌ jiñi ja' jiñʌch Gihón; jiñʌch am bʌ ti' joytʌlel pejtelel i lumal Cus.

¹⁴ I yuxp'ejlel bʌ jiñi ja' jiñʌch Hidekel; mu' bʌ i majlel ti' tojel Asiria ba' mi' pasel q'uiñ. I chʌmp'ejlel bʌ jiñi ja' jiñʌch Éufrates.

¹⁵ Lac Yum Dios tsi' pʌyʌ jiñi wiñic, tsi' yʌq'ue ti' wenta jiñi pʌc'ʌbʌl i c'aba' Edén cha'añ mi' c'ʌn ti e'tel yic'ot cha'añ mi' cʌntan.

¹⁶ Lac Yum Dios tsi' yʌq'ue mandar jiñi wiñic, tsi' yʌlʌ: “Ti pejtelel i wut jiñi te' am bʌ ti pʌc'ʌbʌl mi' mejlel a c'ux;

¹⁷ pero cojach jiñi te' mu' bʌ i yʌq'ueñet a cʌn chuqui uts'at yic'ot chuqui jontol mach a c'ux, come ti jiñi q'uiñ che' ma' c'uxben i wut, isujm mi caj a chʌmel.”

¹⁸ Ti wi'il lac Yum Dios tsi' yʌlʌ: “Mach uts'atic mi' yajñel ti' bajñelil jiñi wiñic: Mi caj c melben i yaj coltaya cha'añ mi' yajñel yic'ot.”

¹⁹ Lac Yum Dios tsi' c'ʌñʌ lum cha'añ mi' mel pejtelel bʌte'el yic'ot alʌc'ʌl yic'ot mut ti' chajp ti' chajp mu' bʌ ti wejlel; tsi' laj pʌyʌ tilel ba'añ jiñi wiñic cha'añ mi' yotsʌben i c'aba'; pejtelel jiñi cuxul tac bʌ tsa' bʌ i yotsʌbe i c'aba' Adán, che'ʌch tsa' cʌle.

²⁰ Adán tsi' yotsʌbe i c'aba' pejtelel bʌte'el tac yic'ot te'lemut tac ti' chajp ti' chajp, yic'ot alʌc'ʌl tac am bʌ ti jamil; pero ma'añic tsa' tajle i yaj coltaya jiñi wiñic cha'añ mi yajñel yic'ot.

²¹ Jiñi cha'añ lac Yum Dios tsi' yotsʌbe tam bʌ i wʌyel Adán, che' bʌ wʌyʌl, Dios tsi' loc'sʌbe junts'ijt i ch'ilat, tsi' cha' ñup'be i bʌc'tal ba' tsa' loq'ui.

²² Ti junts'ijt i ch'ilat tsa' bʌ i loc'sʌbe jiñi wiñic, lac Yum Dios tsi' mele juntiquil x'ixic, tsi' pʌyʌ tilel ba'añ jiñi wiñic.

²³ Jiñi cha'añ Adán tsi' yʌlʌ: Iliyi jiñʌch mero c bʌquel loq'uem bʌ tic bʌquel yic'ot c bʌc'tal loq'uem bʌ tic bʌc'tal. Mi caj i pejcʌntel ti “x'ixic”, come loq'uem ti wiñic.

²⁴ Jiñi cha'añ jiñi wiñic mi' cʌy i tat i ña', cha'añ mi yajñel yic'ot i yijñam, jiñi cha'tiquil mi' yochelob ti juntiquil jach.

²⁵ Pits'ilob ti' cha'ticlel, Adán yic'ot i yijñam, ma'añic tsi' cha'leyob quisin.