Genesis 17 - Jiñi Tsiji' bʌ Wen T'añ cha'añ Estudio

Jiñi tsep pʌchʌlel, i yejtal xuc'ul bʌ t'añ

¹ Che' bolomlujump'ejlix i jo'c'al (99) i ja'bilel Abram, lac Yum tsi' pʌsbe i bʌ Abram, tsi' su'be: —Joñon jiñi Dios Mach Bʌ Añic i P'isol i P'ʌtʌlel. Yom ma' wajñel tic tojlel yic'ot yom wen uts'at ma' wajñel.

² Mi caj c wa'chocon xuc'ul bʌ c t'añ a wic'ot yic'ot mi caj cʌq'ueñet ca'bʌl a p'olbal.

³ Jiñi cha'añ Abram tsi' ñuc choco i bʌ ti' tojlel Dios. Dios tsi' cha'le t'añ yic'ot, tsi' yʌlʌ:

⁴ —Jiñʌch jiñi xuc'ul bʌ c t'añ a wic'ot: Mi caj a wochel ti' tat bajc'ʌl wiñicob x'ixicob.

⁵ Ma'añix mi caj a chʌn pejcʌntel ti Abram, wʌle mi caj a pejcʌntel ti Abraham, come woli c wa'chocoñet ti' tat bajc'ʌl wiñicob x'ixicob.

⁶ Mi caj cʌq'ueñet ca'bʌl a p'olbal, ti a tojlel mi caj i loq'uel ca'bʌl tejclum tac yic'ot reyob.

⁷ Mi caj c wa'chocon jump'ejl xuc'ul bʌ c t'añ a wic'ot yic'ot ti' tojlel a p'olbal ti' lajm ti' lajm ti' pejtelel ora; cha'añ mi cochel ti a Dios yic'ot ti' Dios pejtelel a p'olbal.

⁸ Mi caj cʌq'ueñet yic'ot a p'olbal pejtelel i lumal Canaán ba' woliyet ti chumtʌl wʌle, mi caj la' cha'añin ti pejtelel ora, joñon mi caj cochel ti' Diosob.

⁹ Dios tsi' cha' su'be Abraham: —Añ ti a wenta cha'añ ma' jac' jiñi xuc'ul bʌ c t'añ, jatet yic'ot a p'olbal ti' lajm ti' lajm ti pejtelel ora.

¹⁰ Jiñʌch xuc'ul bʌ c t'añ quic'otet yic'ot pejtelel a p'olbal mu' bʌ caj i tilel: Pejtelel ch'itoñ bʌ la' walobilob mi caj i tsepbentel i pʌchʌlel.

¹¹ Mi caj la' ch'ʌm tsep pʌchʌlel, i yejtal xuc'ul bʌ c t'añ tsa' bʌ c wa'choco yic'otetla.

¹² Che' ti' waxʌcp'ejl q'uiñ i yilʌbe pañimil pejtelel ch'itoñ am bʌ ti la' tojlel, yom mi' tsepbentel i pʌchʌlel; che'ʌch yom mi' yujtel c'ʌlʌl ti pejtelel ora. Mi caj i tsepbentel i pʌchʌlel jiñi mu' bʌ i yilan pañimil ti a wotot yic'ot jiñi mʌmbilo' bʌ a cha'añ ti' tojlel yaño' bʌ mach bʌ a p'olbalic.

¹³ Yom mi' tsepbentel i pʌchʌlel jiñi mu' bʌ i yilan pañimil ti a wotot yic'ot jiñi mu' bʌ a mʌn ti a taq'uiñ, cha'añ che' jiñi mi' tsictiyel ti la' bʌc'tal i yejtal xuc'ul bʌ c t'añ ti pejtelel ora.

¹⁴ Pero jiñi mach bʌ añic mi' tsepbentel i pʌchʌlel, mi caj i chojquel loq'uel ti' tojlel i pi'ʌlob cha'añ tsi' ñusa jiñi xuc'ul bʌ c t'añ.

¹⁵ Dios tsi' su'be ja'el jiñi Abraham: —Jiñi Sarai a wijñam, ma'añix mi caj a pejcan ti Sarai, mi caj a pejcan ti Sara.

¹⁶ Mi caj cʌq'uen Sara i yutslel c t'añ yic'ot mi caj i yʌq'ueñet Sara juntiquil ch'itoñ bʌ a walobil. Isujmʌch, mi caj cʌq'uen Sara i yutslel c t'añ, yic'ot mi caj i pejcʌntel ti' ña' wiñicob x'ixicob ti ca'bʌl lum; mi caj i yilan pañimil reyob ti' tojlel.

¹⁷ Jiñi cha'añ Abraham tsi' ñuc choco i bʌ, tsa' caji ti tse'ñal, tsi' yʌlʌ ti' pusic'al: “¿Mejl to ba i tilel i yalobil juntiquil wiñic che' añix jo'c'al (100) i ja'bilel? ¿Ixcu Sara che' añix lujump'ejl i jo'c'al (90) i ja'bilel, mu' to ba i mejlel i cʌntan i yalobil?”

¹⁸ Abraham tsi' su'be Dios: —Aq'uen i wenlel Ismael ti a tojlel.

¹⁹ Dios tsi' jac'ʌ: —Isujm Sara jiñi a wijñam mi caj i yʌq'ueñet juntiquil ch'itoñ bʌ a walobil, mi caj a wotsʌben i c'aba' ti Isaac. Mi caj c wa'chocon xuc'ul bʌ c t'añ yic'ot Isaac, yic'ot i p'olbal ti pejtelel ora.

²⁰ Ixcu Ismael, mi caj cʌq'uen i yutslel c t'añ ja'el che' bajche' tsa' c'ajtibeyon. Mi caj c p'ojlesʌben i yalobil, ca'bʌl mi' caj ti p'ojlelob. Mi caj cʌq'uen lajchʌntiquil i yalobilob mu' bʌ i caj i yochelob ti rey. I p'olbal mi caj i sujtel ti colem tejclum.

²¹ Pero joñon mi caj c wa'chocon xuc'ul bʌ c t'añ yic'ot Isaac mu' bʌ caj i yʌc' ti pañimil Sara che' bajche' ti ili ora ti yam bʌ ja'b.

²² Che' bʌ tsa' ujti ti t'añ Dios yic'ot Abraham, tsi' tʌts'ʌ i bʌ ti' tojlel.

²³ Jiñi cha'añ Abraham tsi' pʌyʌ Ismael i yalobil yic'ot pejtelel x'e'telob i cha'añ tsa' bʌ i yilayob pañimil ti yotot yic'ot jiñi mʌmbilo' bʌ i cha'añ ti' taq'uiñ, yic'ot pejtelel wiñicob año' bʌ ti yotot Abraham, tsi' tsepbeyob i pʌchʌlel ti jiñi jach bʌ q'uiñ, che' bajche' Dios tsi' su'be.

²⁴ Bolonlujump'ejlix i jo'c'al (99) i ja'bilel Abraham che' bʌ tsa' tsepbenti i pʌchʌlel.

²⁵ Uxlujump'ejlix (13) i ja'bilel Ismael i yalobil Abraham che' bʌ tsa' tsepbenti i pʌchʌlel.

²⁶ Ti jiñi jach bʌ q'uiñ tsa' tsepbenti i pʌchʌlel Abraham yic'ot Ismael i yalobil.

²⁷ Tsa' tsepbenti i pʌchʌlel pejtelel jiñi wiñicob año' bʌ ti yotot Abraham, yic'ot jiñi x'e'telob tsa' bʌ i yilayob pañimil ti yotot yic'ot mʌmbilo' bʌ ti taq'uiñ ch'oyolo' bʌ ti yam bʌ lum.