Genesis 16 - Jiñi Tsiji' bʌ Wen T'añ cha'añ Estudio

Agar yic'ot Ismael

¹ Ma'añic i yalobil Sarai, i yijñam Abram; pero añ i criada i c'aba' Agar ch'oyol bʌ ti Egipto.

² Sarai tsi' su'be Abram: —Woli a q'uel cha'añ lac Yum Dios tsi' yotsayon ti to'ol wa'al jach bʌ x'ixic; jiñi cha'añ ti wocol t'añ mic su'beñet, yom ma' pi'len jiñi criada c cha'añ, tic'ʌl mi' mejlel c taj calobil ti Agar. Abram tsi' jac'be i t'añ Sarai.

³ Che' lujump'ejlix ja'b chumul Abram ti' lumal Canaán, Sarai i yijñam Abram, tsi' pʌyʌ Agar i criada ch'oyol bʌ ti Egipto, tsi' yʌq'ue Abram i ñoxi'al cha'añ mi' pi'len.

⁴ Abram tsi' pi'le Agar, tsa' caji i cʌntan i yalobil; pero che' ba' ora Agar tsi' ña'ta wolix i cʌntan i yalobil, tsa' caji i ts'a'len Sarai i yum.

⁵ Jiñi cha'añ Sarai tsi' su'be Abram: —¡La' ochic ti a wenta ili wocol woli bʌ cu'bin! Tsa' cʌq'ueyet j criada Agar cha'añ ma' pi'len, pero che' bʌ tsi' q'uele cʌntʌbilix i yalobil, tsa' caji i ts'a'leñon. ¡La' i melonla lac Yum!

⁶ Abram tsi' jac'be Sarai: —Awilan, a criada añʌch ti a wenta. Melben chuqui a wom. Jiñi cha'añ Sarai tsʌts tsa' caji i pejcan Agar, jinto tsi' yʌc'ʌ ti ca'bʌl wocol; che' jiñi Agar tsa' puts'i loq'uel ti' tojlel Sarai.

⁷ I yángel lac Yum tsi' taja Agar ba'añ cuxul bʌ ja' ti jochol bʌ lum, jiñi cuxul bʌ ja' am bʌ ti' bijlel Shur.

⁸ Tsi' su'be: —Agar, i criadajet bʌ Sarai, ¿baqui tsa' tiliyet? ¿Baqui ma' majlel? Agar tsi' jac'be: —Wolic puts'tan c yum Sarai.

⁹ I yángel lac Yum tsi' su'be: —Cha' cucu ba'añ a yum, ac'ʌ a bʌ ti' wenta.

¹⁰ I yángel lac Yum tsi' cha' su'be: —Mi caj c wen p'ojlesan a walobil, jinto che' mach mejlix ti tsijquel.

¹¹ I yángel lac Yum tsi' cha' alʌ: —Cʌntʌbil a walobil, mi caj a wʌc' ti pañimil juntiquil ch'itoñ, mi caj a wotsʌben i c'aba' ti Ismael, come lac Yum tsi' yu'bi a wocol.

¹² Wen jontol mi caj i pʌs i bʌ ili wiñic che' bajche' caballo maxto bʌ uts-esʌbilic, mi caj i contrajin pejtelel wiñicob, pejtelel wiñicob mi caj i contrajiñob ja'el; tʌts'ʌl mi' caj ti chumtʌl ba'añ i pi'ʌlob.

¹³ Jiñi cha'añ Agar tsi' yotsʌbe i c'aba' lac Yum tsa' bʌ i pejca: “Jatetʌch jiñi Dios woli bʌ i q'uelon,” come tsi' yʌlʌ: “¿Mach ba tsa'ic q'uele jiñi woli bʌ i q'uelon?”

¹⁴ Jiñi cha'añ tsi' yotsʌbe i c'aba' jiñi pozo: “I pozo jiñi Cuxul bʌ mu' bʌ i q'uelon.” Ili pozo xinlʌpʌl añ ti yojlil Cades yic'ot Bered.

¹⁵ Agar tsi' yʌc'ʌ ti pañimil juntiquil ch'itoñ bʌ i yalobil Abram; jiñi Abram tsi' yotsʌbe i c'aba' ti Ismael tsa' bʌ yʌc'ʌ ti pañimil Agar.

¹⁶ Añix wʌcp'ejl i jo'c'al (86) i ja'bilel Abram che' bʌ tsi' yila pañimil Ismael tsa' bʌ i yʌc'ʌ ti pañimil Agar.